XANNAˈIYO HUUPHE YOHUWAA 33
Yihooway Ba Asaa Naagees
‘GODAA ayfeti ayyo yayyiya asatu bollaana.’—MAZ. 33:18.
MAZAMURE 4 ‘Yihooway Ta Henttanchaa’
HA XINAATIYAN *
1. Yesuusi bana kaalliyaageeta Yihooway naaganaadan woossidoy aybissee?
YESUUSI hayqqanaappe kase qammi, saluwan deˈiya ba Aawaa issibaa woossiis. I bana kaalliyaageeta Yihooway naaganaadan woossiis. (Yoh. 17:15, 20) Yihooway ubbatoo ba asawu qoppeesinne eta naagees. Gidikkonne, Yesuusi bana kaalliyaageetu bolli Seexaanay wolqqaama yedetaa gattanaagaa erees. Dabloosi gattiyo iita qohuwaa eqettanawu Yihoowa maadoy etawu koshshiyoogaakka Yesuusi erees.
2. Mazamure 33:18-20y yootiyoogaadan, nuuni metuwaa yayyana koshshennay aybissee?
2 Seexaanay haariyo alamee, ha wodiyan tumu Kiristtaanetu bolli daro metuwaa gattees. Nuuni hidootaa qanxxanaadaaninne Yihoowawu ammanettiyoogee paacettanaadan oottiya metoy nuna gakkees. SHin, ha huuphe yohuwan beˈanaagaadan, nuuni aybiyyoonne yayyana koshshenna. Yihooway nuna naagees. Hegaa giyoogee I nuna gakkiya metuwaa beˈeesinne nuna maaddanawu koyees giyoogaa. Yihoowa ayfeti ‘ayyo yayyiya asatu bollaana’ gidiyooga bessiya naaˈˈu Geeshsha Maxaafaa leemisota ane pilggoos.—Mazamure 33:18-20 nabbaba.
NURKKA ATTIDABADAN NUUSSI SIYETTIYO WODE
3. Nurkka attidabadan nuussi siyettana danddayiyoy awudee?
3 Nu gubaaˈiyan daro ishanttinne michchontti deˈiyaaba gidikkonne, nuuni nurkka attidabadan issi issitoo nuussi siyettana danddayees. Leemisuwawu, yelagati timirtte keettan banttanaara tamaariyaageetussi bantta ammanuwaabaa qonccissiyo wode woy ooratta gubaaˈiyaa biyo wode banttarkka attidabadan etawu siyettana danddayees. Hegaa nurkka genccana koshshees giidi qoppiyoogan nuuppe amaridaageeti azzanana woy hidootaa qanxxana danddayoos. Nuuni harati nubaa akeekana danddayokkona giidi hirggiyo gishshawu, nuussi siyettiyaabaa etawu yootanawu mammottana danddayoos. Qassi, issi issitoo ooninne nubaa akeekana danddayenna giidi qoppana danddayoos. Nurkka attidabadan nuussi siyettiyoy aybissanne gidin, hegee nuna maaddiyaabi baynnabadan nuussi siyettanaadaaninne unˈˈettanaadan oottana danddayees. Nuussi hegaadan siyettanaadan Yihooway mule koyenna. Nuuni hegaadan gaana danddayiyoy aybissee?
4. Hananabaa yootiya Eelaasi “taani tarkka attaas” giidoy aybissee?
4 Ammanettida bitaniyaa Eelaasa hanotaa beˈa. Elzzaabeela A woranaagaa yootido gishshawu, I 40 gallassaappe daruwaa ba shemppuwaa ashshanawu baqatiis. (1 Kaw. 19:1-9) Wurssettan, I gonggolo gidduwan barkka deˈiiddi Yihoowawu hagaadan giis: “[Hananabaa yootiyaageetuppe] taani tarkka attaas.” (1 Kaw. 19:10) He biittan hananabaa yootiya harati deˈoosona. Obaadee hananabaa yootiya 100 asata Elzzaabeela worennaadan ashshiis. (1 Kaw. 18:7, 13) He wode, Eelaasawu barkka attidabadan siyettidoy aybissee? I Obaadee ashshido hananabaa yootiyaageeti ubbay hayqqiichchidosona gi qoppidee? Geella, Qarmmeloosa Deriyan Yihooway tumu Xoossaa gidiyoogaa qonccissi simminkka, hara ooninne Yihoowawu haggaaziyoogaa doommibeenna gishshawu, I barkka attidabadan awu siyettidee? Woy morkketi A woranawu maliyoogaa ooninne erennabadan woykko abaa akeekiya uri baynnabadan awu siyettidee? Geeshsha Maxaafay Eelaasawu siyettida ubbabaa yootenna. Gidikkonne, Yihooway Eelaasi barkka attidabadan awu siyettido gaasuwaa akeekidoogaanne A maaddanawu waatanaakko eridoogaa nuuni ammanettoos.
Nurkka attidabadan nuussi siyettiyo wode, Yihooway Eelaasa maaddido ogiyaappe nuna minttettiyaabaa ay tamaarana danddayiyoo? (Mentto 5-6 xeella)
5. Eelaasi barkka attibeennaagaa Yihooway waati yootidee?
5 Yihooway Eelaasa daroban maaddiis. Eelaasi haasayanaadan I minttettiis. I naaˈˈutoo Eelaasa hagaadan oychchiis: “Hagan ai oottai?” (1 Kaw. 19:9, 13) Eelaasi bawu siyettidabaa yootido wode ubban Yihooway I giyoobaa ezggiis. Yihooway hegan deˈiyoogaanne I keehi wolqqaama gidiyoogaa Eelasawu bessiis. Yihooway hara daro Israaˈeelatikka Awu goynniiddi deˈiyoogaakka Eelaasawu yootiis. (1 Kaw. 19:11, 12, 18) Eelaasi bawu siyettidabaa Yihoowawu yootin, Yihooway hegaa zaaridoogaa siyidi I woppu giidoogee qoncce. Yihooway Eelaasawu keehi koshshiya daro oosuwaa immiis. Hazaaˈeeli Sooriyaa bolli kawotanaadan, Yeehu Israaˈeela bolli kawotanaadan, qassi Elssaaˈi hananabaa yootiyaagaa gidanaadan tiyana mala Yihooway awu yootiis. (1 Kaw. 19:15, 16) Yihooway he oosota Eelaasawu immiyoogan I loˈˈobaa xallaa qoppanaadan maaddiis. Qassi Elssaaˈi awu mata lagge gidanaadan oottiis. Nerkka attidabadan neeyyo siyettiyo wode, Yihoowa maaduwaa waata demmana danddayay?
6. Nerkka attidabadan neessi siyettiyo wode aybaa xeelliyaagan woossana danddayay? (Mazamure 62:8)
6 Yihooway neeni woossanaadan shoobbees. Nena gakkiya metota I erees; qassi neeni awudenne woossiyo woosaa I siyees. (1 Tas. 5:17) Bawu goynniyaageeti woossiyo woosaa siyiyoogan I ufayttees. (Lee. 15:8) Nerkka attidabadan neessi siyettiyo wode aybaa xeelliyaagan woossana danddayay? Eelaasaagaadan, neessi siyettiya ubbabaa awu yoota. (Mazamure 62:8 nabbaba.) Nena qofissiyaabata, qassi hegeeti neessi aybi siyettanaadan oottidaakko awu yoota. Neeni nerkka attidabadan neessi siyettiyo woy azzaniyo wode waatanaakko eranawu Yihooway nena maaddanaadan oychcha. Leemisuwawu, nenaara tamaariyaageeti ne ammanuwaabaa nena oychchiyo wode nerkka attidabadan neessi siyettikko, qassi yayyikko ne ammanuwaabaa qonccissanawu koshshiya xalatettaa immanaadan Yihoowa oychcha. Ne ammanuwaabaa hiillan qonccissanawu aadhdhida eratettaa demmanawukka oychchana danddayaasa. (Luq. 21:14, 15) Neeni unˈˈettikko woy hidootaa qanxxikko, hegaabaa issi kayma Kiristtaaniyaara haasayanawu Yihooway nena maaddanaadan oychcha. Neeni neeyyo siyettiyaabaa yootiyo uri ne odiyoobaa akeekan siyanaadan Yihooway A maaddanaadan oychchana danddayaasa. Neeyyo siyettiya ubbabaa Yihoowawu yoota; I ne woosaa waati zaariyaakko akeeka, qassi haratu maaduwaa ekka. Yaatikko, nerkka attidabadan neessi darin siyettenna.
Kaseegaappe aaruwan haggaazanawunne hegaa haratuura oottanawu danddayiyo ogeta demmanawu baaxetay? (Mentto 7 xeella)
7. Morisiya hanotaappe ay tamaaray?
7 Nuuni oottanaadan Yihooway nuussi ubbawu ufayssiya oosuwaa immiis. Gubaaˈiyaaninne haggaazuwan neessi danddayettida ubbabaa neeni oottiyoogaa Yihooway akeekiyoogaanne nashshiyoogaa ammanettana danddayaasa. (Maz. 110:3) Ha oosuwaa oottiyoogee nerkka attidabadan neessi siyettiyo wode nena waati maaddana danddayii? Morisiyo * giyo issi yelaga ishaa hanotaa beˈa. I xammaqettidi daro takkennan, A mata laggetuppe issoy loddan loddan Yihoowa aggiis. I hagaadan giis: “I Yihoowa aggidoogaa taani beˈido wode keehi yayyaas. Taani Yihoowawu haggaazanawu gelido qaalaa naagada A keettan deˈana danddayiyaanaashsha gaada hirggaas. Taani tarkka attidabadan tawu siyettiis, qassi hegaa ooninne akeekenna gaada qoppaas.” Morisiya maaddidabay aybee? I hagaadan giis: “Taani kaseegaappe aaruwan haggaazaas. Hegee taani tabaa xallaanne iitabaa wotta denttada qoppennaadan tana maaddiis. Haratuura haggaaziyoogan taani ufayttaasinne tarkka attidabadan tawu darin siyettenna.” Nuuni nu mala Kiristtaanetuura gayttidi sabbakanawu danddayenna wodekka, dabddaabbiyaaninne silkkiyaa malaban issippe sabbakiyoogan minettoos. Morisiya maaddida harabay aybee? I gujjidi hagaadan giis: “Gubaaˈiyan hara oosuwaakka oottaas. Giigettanawunne gubaaˈe shiiqotun kifiliyaa loytta shiishshanawu tawu danddayettida ubbabaa oottaas. Taani yaatidoogee Yihoowaykka haratikka tana nashshiyaabadan tawu siyettanaadan oottiis.”
WOLQQAAMA METOY GAKKIN NUUNI HIDOOTAA QANXXIYO WODE
8. Wolqqaama metoy nuuni waananaadan oottana danddayii?
8 Ha wurssetta gallassatun, metoy nuna gakkanaagaa eroos. (2 Xim. 3:1) SHin, nuuni issi metoy nuna gakkana giidi naagennan aggana woy metoy nuna gakkiyo wode dagammana danddayoos. Qoppennan miishshaa metoy nuna gakkana, caddi oyqqiya harggee oyqqana woy nu siiqiyo uri hayqqana danddayees. Hegaa mala wodetun, nuuni unˈˈettananne hidootaa qanxxana danddayoos; ubba qassi metoy bolli bollan gakkiyo wode woy issi kutti daro metoy gakkiyo wode hegaadan hanana danddayoos. Gidikkonne, Yihooway nuna naagiyoogaanne I maaddin, nuna gakkiya ay metuwaakka nuuni xalatettan genccana danddayiyoogaa hassaya.
9. Iyyooba gakkida metotuppe amaridaageeta yoota.
9 Ammanettida bitaniyaa Iyyooba Yihooway waati maaddidaakko qoppa. Guutta wodiyaa giddon unˈˈissiya daro metoy A gakkiis. Issi gallassi, Iyyooba mehe ubbay wuuqettidoogee woy hayqqidoogee, qassi A ashkkaratinne A naati hayqqidoogeekka awu odettiis. (Iyy. 1:13-19) Hegaappe daro takkennan, Iyyoobi kayyottiiddi deˈiyo wode keehi sakkiyaanne iita masunttay A bolli kiyiis. (Iyy. 2:7) Iyyoobi ba hanotay keehi iita gidiyo gishshawu hayqqanawu koyidi hagaadan giis: “Taani ta de7uwaa karaas.”—Iyy. 7:16.
Yihooway Iyyooba siiqiyoogaanne awu qoppiyoogaa I ammananaadan, ba medhdhido ubbabawu Yihooway ay keena qoppiyaakko Iyyoobawu yootiis (Mentto 10 xeella)
10. Iyyoobi bana gakkida metuwaa genccanaadan koshshiyaabaa Yihooway waati immidee? (Koyro sinttan deˈiya misiliyaa xeella.)
10 Yihooway Iyyooba naagiis. Yihooway Iyyooba siiqiyo gishshawu I bana gakkida metuwaa genccanaadaaninne ammanettidi deˈanaadan koshshiyaabaa immiis. Yihooway Iyyooba haasayissiis; he wode Yihooway zawi baynna Ba aadhdhida eratettaanne Ba meretatussi koshshiyaabaa kunttiyoogaa Iyyoobi hassayanaadan oottiis. I maalaalissiya daro doˈatubaa Iyyoobawu yootiis. (Iyy. 38:1, 2; 39:9, 13, 19, 27; 40:15; 41:1, 2) Eelihu giyo ammanettida yelagaa baggaara Yihooway Iyyooba minttettiisinne maaddiis. Yihooway ba ashkkarati gencciyo gishshawu ubbatoo eta woytanaagaa Eelihu Iyyoobawu yootiis. SHin Eelihu Iyyooba siiquwan zoranaadankka Yihooway A denttettiis. Saluwaanne saˈaa Medhdhida Yihoowaara nuna geeddarssiyo wode nuuni keehi guutta gidiyoogaa Iyyooba hassayissiyoogan I babaa xallaa qoppiyoogaa agganaadan Eelihu A maaddiis. (Iyy. 37:14) Yihooway Iyyoobi issibaa oottanaadankka yootiis. I bana naaqqida ba heezzu laggetussi woossanaadan yootiis. (Iyy. 42:8-10) Wolqqaama metoy nuna gakkiyo wode Yihooway ha wodiyan nuna waati maaddii?
11. Nuna metoy gakkiyo wode Geeshsha Maxaafay nuna waati maaddii?
11 Iyyoobaagaadan, Yihooway nuna sittan haasayissana xayikkonne, Ba Qaalaa, Geeshsha Maxaafaa baggaara I nuna haasayissees. (Roo. 15:4) Hidootay deˈanaadan oottiyoogan I nuna minttettees. Nuna metoy gakkiyo wode minttettana danddayiya amarida Geeshsha Maxaafaa xiqiseta qoppa. Yihooway wolqqaama metuwaa gujjin, aybikka “[A] siiquwaappe nuna shaakkanau danddayennaagaa” Geeshsha Maxaafaa baggaara nuussi yootees. (Roo. 8:38, 39) I woosan ‘bana xeesiya ubbawu matan deˈiyoogaakka’ yootiis. (Maz. 145:18) Nuuni an ammanettikko, ay metuwaakka genccana danddayoos, qassi waayee deˈishinkka ufayttana danddayiyoogaa Yihooway nuussi yootiis. (1 Qor. 10:13; Yaaq. 1:2, 12) Yihooway nuussi immana merinaa deˈuwaa woytuwaara geeddarssiyo wode, nuna gakkiya metoy haˈˈissawunne guutta wodiyawu gidiyoogaakka Xoossaa Qaalay nuna hassayissees. (2 Qor. 4:16-18) Yihooway nu meto ubbawu gaaso gidida Seexaanaa Dabloosanne A mala iitata xayssanaagaa yootiyoogan nuussi ammanttiya hidootaa immiis. (Maz. 37:10) Sinttappe nena gakkana metuwaa genccanawu maaddiya minttettiya amarida Geeshsha Maxaafaa xiqiseta hassayadii?
12. Geeshsha Maxaafaappe loytti goˈettanawu nuuni waatanaadan Yihooway koyii?
12 Nuuni ubbatoo Geeshsha Maxaafaa nabbabanawunne nabbabidobaa takki giidi qoppanawu wodiyaa bazzanaadan Yihooway koyees. Nuuni eridobaa oosuwan peeshshiyo wode, nu ammanoy minnees, qassi saluwan deˈiya nu Aawaakko kaseegaappe aaruwan shiiqoos. Hegaappe denddidaagan, nuna gakkiya metuwaa minnidi genccoos. Yihooway ba Qaalan ammanettiyaageetussi ba geeshsha ayyaanaakka immees. He geeshsha ayyaanay nuuni ay metuwaakka genccanaadan “ubbaappe aadhdhiya [wolqqaa]” nuussi immees.—2 Qor. 4:7-10.
13. ‘Ammanettida wozannaama ashkkaray’ giigissiyo ayyaanaabaa qumay nuuni metuwaa genccanaadan waati maaddii?
13 Yihooway maaddin, ‘ammanettida wozannaama ashkkaray’ nu ammanuwaa minttananne kaseegaappe aaruwan Yihoowakko shiiqidi deˈanaadan maaddana danddayiya daro xuufeta, biidotanne muuziqata giigissees. (Maa. 24:45) Yihooway nuussi giigissido ubbabaa nuuni loytti goˈettana koshshees. Amarkka deˈiya issi michchiyaa ha ubba ayyaanaabaa qumaa gishshawu galatiyoogaa mata wode yootaasu. A hagaadan gaasu: “Taani Yihoowawu haggaazido 40 layttan, ammanettada deˈiyoogaara gayttidaagan darotoo tana paacee gakkiis.” O wolqqaama waayee gakkiis; hegeekka, mattottidi laaggiya bitaniyaa kaamiyan I aayee aaway hayqqiis, O yelidaageeti keehi sahettidi hayqqidosona, qassi O naaˈˈutoo kanssere harggee oyqqiis. Genccanaadan O maaddidabay aybee? A hagaadan gaasu: “Yihooway ubbatoo tawu koshshiyaabaa kunttees. I ammanettida wozannaama ashkkaraa baggaara giigissiyo ayyaanaabaa qumay taani genccanaadan maaddiis. Hegaappe denddidaagan, Iyyoobaagaadan gaana danddayays: ‘Hayqqana gakkanaassikka taani suure gidiyoogaa aggikke.’”—Iyy. 27:5.
Gubaaˈiyan deˈiya harata waati maaddana danddayiyoo? (Mentto 14 xeella)
14. Metoy nuna gakkiyo wode nu mala Kiristtaanetu baggaara Yihooway nuna waati maaddii? (1 Tasalonqqe 4:9)
14 Unˈˈissiya wodiyan issoy issuwaara siiqettanaadaaninne issoy issuwaa minttettanaadan Yihooway ba asaa loohissiis. (2 Qor. 1:3, 4; 1 Tasalonqqe 4:9 nabbaba.) Nu ishanttinne michchontti Eelihu leemisuwaa kaalliyoogan, metoy nuna gakkiyo wode ammanettidi deˈanaadan nuna maaddanawu koyoosona. (Oos. 14:22) Leemisuwawu, Diyaani azinay keehi sahettin gubaaˈee O waati minttettidaakkonne A ayyaanaaban minnanaadan waati maaddidaakko beˈa. A hagaadan gaasu: “Hegee keehi deexxiyaaba. SHin he metiya aginatun, Yihoowa maaduwaanne A siiquwaa nuuni beˈida. Gubaaˈee nuna maaddanawu darobaa oottiis. Nu ishanttinne michchontti yiidi oychchiyoogee, dawaliyoogeenne nuna qoommiyoogee nuuni genccanaadan maaddiis. Taani kaamiyaa laaggiyoogaa erenna gishshawu, ishanttinne michchontti gubaaˈiyaa shiiquwaa tana ekkidi efoosona, qassi taani danddayiyo wode haggaazuwaa efoosona.” Hegaadan siiqettiya ishanttinne michchontti gubaaˈiyan deˈiyoogee keehi ufayssiyaaba!
YIHOOWAY NEESSI SIIQUWAN IMMIDOBAA GISHSHAWU A GALATA
15. Nuuni metuwaa genccana danddayiyoogaa ammanettiyoy aybissee?
15 Nuna ubbaa metoy gakkees. SHin nuna metoy gakkiyo wode nuuni mule nurkka deˈokko. Siiqiya aawadan Yihooway nuna ubbatoo naagees. I nu matan deˈees, maaduwawu nu mintti woossiyoogaa siyees, qassi nuna maaddees. (Isi. 43:2) Nuuni genccanawu koshshiya ubbabaa kehatettan I nuussi immiyo gishshawu, nuna gakkiya metuwaa genccana danddayiyoogaa ammanettoos. I metiya wodiyan nuna maaddanawu imota gidida woosaa, Geeshsha Maxaafaa, gidi palahiya ayyaanaabaa qumaanne siiqiya ishantta immiis.
16. Nuuni Yihoowa siiquwan deˈanawu waatana danddayiyoo?
16 Saluwan deˈiya nu Aaway nuna naagiyo gishshawu nuuni A keehi galatoos. “Nu wozanai an ufaittees.” (Maz. 33:21) Yihooway nuna maaddanawu giigissido ubbabaa loytti goˈettiyoogan, I nuussi siiquwan immidobaa gishshawu A galatiyoogaa bessoos. Xoossaa siiquwan deˈanawu nuuppe koyettiya ubbabaa nuuni oottana koshshees. Qassi Yihoowawu azazettanawunne A sinttan loˈˈobaa oottanawu nuussi danddayettida ubbabaa nuuni oottikko, I nuna merinawu naagana!—1 PHe. 3:12.
MAZAMURE 30 Ta Aawaa, Ta Xoossaanne Ta Miyyiyaa