1. Yihooway nu ubbawu ay oottidee?

YIHOOWAY nuna ubbaa baakko ehiis. (Yoh. 6:44) Hegaa giyoogee woygiyoogaakko qoppa. Yihooway ha alamiyan deˈiya biilooniyan qoodettiya asaa wozanaa qoriyo wode, I neeni ashkke gidiyoogaanne A siiqiyoogaa akeekiis. Hegee Yihooway xoqqu ootti xeelliyooba. (1 Odi. 28:9) Yihooway nena erees, nebaa akeekeesinne nena siiqees. Hegee keehi minttettiyaaba!

2. Yihooway Ba dorssa ubbawu keehi qoppiyoogaa Yesuusi leemisuwan waati qonccissidee?

² Yihooway neeyyo wozanappe qoppees; qassi Kiristtaane gidida ne ishanttussinne michchonttussi ubbawukka qoppees. Hegaa akeekanaadan nuna maaddanawu, Yihoowa issi henttanchchaara Yesuusi geeddarssiis. Xeetu dorssay deˈiyo wudiyaappe issi dorssay bayikko henttanchchay waatanee? I “uddufun tammanne uddufunaa deriyan yeggi bayidi, he bayidaagaa koyanau” bees. Henttanchchay he dorssaa demmiyo wode, bayido gishshawu A bolli hanqqettenna. I ufayttana. Nuuni hegaappe ay tamaariyoo? Ubba dorssatikka Yihoowawu alˈˈo. Yesuusi hagaadan giis: “Saluwan de7iya intte Aawai ha guuttatuppe issoi bayyanaagaakka koyenna.”—Maa. 18:12-14.

3. Nuuni ha huuphe yohuwan ay beˈanee?

³ Nuuni nu ishanttuppe woy michchonttuppe ooninne hidootaa qanxxanaadan oottanawu mule koyokko. Harata qohennaadan waani naagettana danddayiyoo? Qassi issi uri nuna qohikko, ay oottana danddayiyoo? Nuuni ha oyshatu zaaruwaa ha huuphe yohuwan beˈana. SHin koyruwan, Maatiyoosa shemppo 18⁠n odettida ‘ha guuttatubaa’ loyttidi tamaarana.

4. ‘Ha guuttata’ geetettidaageeti oonee?

⁴ ‘Ha guuttati’ Yesuusa kaalliyaageeta. Eti ubbay layttan dumma dumma gidikkonne, Yesuusappe bantta dosan tamaariyo gishshawu, naatu mala. (Maa. 18:3) Dumma dumma sohuwaappe yiidaageeti, wogaaninne eeshshan dummatiyaageeti eta giddon deˈoosona. Eti ubbay Kiristtoosa ammanoosona. Qassi Kiristtoosi eta keehi siiqees.—Maa. 18:6; Yoh. 1:12.

5. Yihooway ba asaappe issuwaa issi uri qohiyo wode waanii?

⁵ ‘Ha guuttata’ ubbaa Yihooway xoqqu oottidi xeellees. Awu siyettiyaabaa akeekanawu, naata xeelliyaagan nuuyyo siyettiyaabaa qoppa. Nuuni eta xoqqu ootti xeelloos. Eti gastta asadan mino, meezee woy aadhdhida eratettay deˈiyoogeeta gidenna gishshawu, nuuni eta naaganawu koyoos. Issi uri hara ura qohiyoogaa beˈiyo wode nuuni dosokko, ubba qassi issi uri naata qohiyo wode nuuni keehi hanqqettoos. Hegaadan, Yihooway nuna naaganawu koyees. I ba asaappe issuwaa issi uri qohiyo wode yiillotees, ubba qassi keehi hanqqettees!—Isi. 63:9; Mar. 9:42.

6. Koyro Qoronttoosa 1:26-29 yootiyoogaadan, Yesuusa kaalliyaageeta alamiyaa asay waati xeellii?

⁶ Yesuusa kaalliyaageeti ‘guuttatu’ mala gidido hara ogee aybee? Alamiyaa asay xoqqu ootti xeelliyoy oonee? Dureta, loytti erettiyaageetanne maatay deˈiyoogeeta. SHin, Yesuusa kaalliyaageeti awudenne hegeetu mala gidokkona. Hegaa gishshawu, alamiyaa asay eta laafa, pattenna ‘guutta’ asadan xeellees. (1 Qoronttoosa 1:26-29 nabbaba.) Gidoppe attin, Yihooway eta hegaadan xeellenna.

7. Yihooway nuuni nu ishanttanne michchontta waati xeellanaadan koyii?

⁷ Yihooway baayyo daro layttawu haggaazidaageeta woy tumaa mati siyidaageeta gidin, ba ashkkarata ubbaakka siiqees. Nu ishanttanne michchontta ubbaa Yihooway xoqqu ootti xeelliyo gishshawu, nuunikka eta xoqqu ootti xeellana koshshees. Nuuni etappe amaridaageetu xalla gidennan ‘nu ishanttu’ maabaraa ubbaa siiqanawu koyoos. (1 PHe. 2:17) Nuuni eti ufayttanaadan oottananne eta qohennaadan naagettana koshshees. Nuuni issi uraa qohidoogaa woy yiilloyidoogaa akeekikko, hegaa xaasayi xeellana koshshenna, qassi he uri nuuyyo atto gaananne hegaa dogana bessees giidi nuuni qoppana koshshenna. Amaridaageeti yiillotana danddayiyoy aybissee? Amaridaageeti bantta diccido hanotaappe denddidaagan haratuppe guuxxiyaabadan banttana xeellana danddayoosona. Harati tumaa mati siyidaageeta gidiyo gishshawu, eti hara uri mooriyo wode waati atto gaana bessiyaakko tamaarichchibookkona. Hanotay ayba gidikkonne, merettida metuwaa giigissanawu nuuyyo danddayettida ubbabaa oottana bessees. Qassi, haratun darotoo lancciya uri lanccennan agganawu baaxetana bessiyoogaa akeekana koshshees. Yaatikko, I ufayttananne ba ishaara dabbotaa minttana.

8. Dara asay qoppiyoobay Yesuusa kaalliyaageeta waati qohidee?

⁸ Yesuusi ‘ha guuttatubaa’ yootidoy aybissee? A kaalliyaageeti A hagaadan oychchidosona: “Saluwaa kawotettan ubbaappe aadhdhiyaagee oonee?” (Maa. 18:1) Daro Ayhudati banttana harati xoqqu ootti xeellanaadan koyoosona. Issi eranchchay hagaadan giis: “Haratun bonchchettiyaageetanne loytti erettiyaageeta gidiyoogee eti bantta deˈuwan xoqqu ootti xeelliyooba.”

9. Yesuusa kaalliyaageeti ay oottana koshshidee?

⁹ Daro Ayhudati haratuppe aadhdhanawu baaxetiyo gishshawu, Yesuusi bana  kaalliyaageeti qoppiyo ogiyaa laammanawu baaxetana koshshiyoogaa erees. I etawu hagaadan giis: “Intteppe gitatiyaagee intte ubbaappe guuxxiyaagaa mala [gido] . . . Inttena haariyaagee inttessi ashkkaradan hano.” (Luq. 22:26) Nuuni haratuppe aadhdhoos woy ‘gitatoos yaagidi qoppiyoogaa’ aggiyo wode ‘guuttatu’ mala gidoos. (Pili. 2:3) Nuuni hegaadan loytti qoppikko, harata qohennan aggana danddayoos.

10. Nuuni oosuwan peeshshana koshshiyo, PHawuloosi zorido zoree aybee?

¹⁰ Nu ishanttinne michchontti ubbay nuuppe issi issiban aadhdhoosona. Nuuni eta loˈˈo eeshshata qoppiyo wode hegaa akeekiyoogee metenna. Kiitettida PHawuloosi Qoronttoosa Kiristtaanetuyyo yootido zoriyaa nuuni akeekana koshshees: “Haratuppe nena oonee xoqqissidai? Neeni Xoossaappe ekkabeennabai neessi aibee de7iyai? Yaatin, neeni ekkidabaa gidikko, aissi ekkabeennabaadan ceeqettai?” (1 Qor. 4:7) Yaatiyo gishshawu, harati nuna nashshanaadan woy haratuppe aadhdhiyaabadan xeellanaadan nuuni mule koyana koshshenna. Leemisuwawu, haasayata loytti haasayiya ishantti woy daro xinaateta demmiyoogan gooba gidida michchontti Yihooway eti oottiyooban ubbatoo sabettanaadan oottana koshshees.

11. Yesuusi issi kawuwaabaanne A ashkkaraabaa yootido leemisuwan nuna tamaarissidobay aybee?

¹¹ Yesuusi bana kaalliyaageeti haratussi xube gidennaadan yooti simmidi, issi kawuwaabaanne A ashkkaraabaa leemisuwan yootiis. Kawoy he ashkkaray mule qanxxana danddayenna daro acuwaa ayyo maari aggiis. Guyyeppe, he ashkkaray ba mala ashkkaray talˈˈido keehi guutta acuwaa maarennan ixxiis. Wurssettan, kawoy he qarettenna ashkkaraa qasho keetti gelissiis. Nuuni hegaappe ay tamaariyoo? Yesuusi hagaadan giis: “Intte huuphiyan huuphiyan intte ishau wozanappe atto gaana xayikko, he godai ba ashkkaraa oottidoogaadan, saluwan de7iya ta Aawaikka inttena hegaadan oottana.”—Maa. 18:21-35.

12. Nuuni haratuyyo atto geennaagee eta waati qohii?

¹² He ashkkaray oottidobay A xallaa gidennan haratakka qohiis. Koyruwan, I ba lagge ashkkaraa “he acuwaa qanxxana gakkanaashin, qasho keettaa” gelissiyoogan awu kehibeennanne qarettibeenna. Naaˈˈanttuwan, I oottidobaa beˈida hara ashkkaratakka qohiis. “A lagge ashkkarati hegaa be7idi, daro yiillotidosona.” Hegaadankka, nu oottiyoobay harata qohees. Issi uri nuna qohin nuuni ayyo atto gaana xayikko, aybi hanana danddayii? Koyruwan, nuuni awu atto geennan aggiyoogan, A bonchchennaaninne siiqennan aggiyoogan qohoos. Naaˈˈanttuwan, nuuni he uraara siga gidennaagaa gubaaˈiyan deˈiya harati akeekiyo wode unˈˈettanaadan oottoos.

13. Issi aqinyiyo gakkidabaappe nuuni ay tamaariyoo?

¹³ Nuuni nu ishanttuyyoonne michchonttuyyo atto giyo wode ufayttoos, qassi haratikka ufayttanaadan maaddoos. Kristalo giyo aqinyiyo hegaa malabay gakkiis. Gubaaˈiyan deˈiya issi michchiyaa O qohaasu. Kristala hagaadan gaasu: “A haasayiyo qareti baynna haasayay tana issi issitoo billamadan qanxxees. Taani iira haggaazanawukka koyikke. Taani minnada haggaaziyoogaanne ufayttiyoogaa aggaas.” Yiillotiyoogee bessiyaaba gaada Kristala qoppaasu. SHin A lancciyaa uluwan oyqqabeykku woy bawu siyettiyaaban xeelaa wottabeykku. Aybissi? Xiqimita 15, 1999 Wochchiyo Keelan (Amaarattuwaa) “Wozanappe Atto Giite” giya huuphe yohuwan deˈiya Geeshsha Maxaafaa zoriyaa A bana ziqqi oottada oosuwan peeshshaasu. A ba michcheeyyo  atto gaasu. Kristala hagaadan gaasu: “Taani nuuni ubbay laamettanawu baaxetana koshshiyoogaa haˈˈi akeekaas; qassi Yihooway nuussi ubba galla atto gaanawu giigetti uttiis. Taani keehi woppu gaas. Taani kaseegaadan ufayttaas.”

14. Maatiyoosa 18:21, 22y yootiyoogaadan, kiitettida PHeexiroosa metoy ayba gidana danddayii, qassi Yesuusi zaaridobaappe nu ay tamaariyoo?

¹⁴ Nuuni atto gaana koshshiyoogaa eroos; qassi hegee nu oottana bessiyaaba. SHin hegaadan oottiyoogee nuuyyo deexxana danddayees. Kiitettida PHeexiroosi issi wode hegaadan qoppennan waayi aggana. (Maatiyoosa 18:21, 22 nabbaba.) Nena aybi maaddana danddayii? Koyruwan, Yihooway neeyyo ay keena atto giidaakko wotta dentta qoppa. (Maa. 18:32, 33) Nuuni A maarotay bessiyoogeeta gidana xayikkonne, I nuna coo maarees. (Maz. 103:8-10) Qassi, “nuunikka issoi issuwaara siiqettanau bessees.” Hegaa gishshawu, atto giyoogee dooriyooba gidenna. Nuuni nu ishanttuyyoonne michchonttuyyo atto gaana bessees. (1 Yoh. 4:11) Naaˈˈanttuwan, nuuni atto giyo wode haniyaabaa wotta dentta qoppa. Nuuni nuna qohida uraa maaddana, gubaaˈiyan issippetettay deˈanaadan oottana, Yihoowaara nu dabbotido dabbotaa naagananne woppu gaana danddayoos. (2 Qor. 2:7; Qol. 3:14) Wurssettan, nuuni atto gaanaadan koyiya Yihoowa woossa. Ne ishanttuuranne michchonttuura ne dabbotido mino dabbotaa Seexaanay mooranaadan eeno gooppa. (Efi. 4:26, 27) Seexaanay wottido piriyan gelennaadan naagettanawu nuussi Yihoowa maadoy koshshees.

15. Qolasiyaasa 3:13 maaran, issi ishay woy michchiyaa nuna hanqqetissikko waatana danddayiyoo?

¹⁵ SHin, ne mala Kiristtaanee nena keehi hanqqetissiyaabaa oottikko, ne waatana koshshii? Sigettanawu neeyyo danddayettida ubbabaa ootta. Neessi siyettiyaabaa Yihoowawu  yoota. Nena yiilloyida uraa I anjjanaadaaninne he urawu deˈiya loˈˈo eeshshata hegeekka Yihooway A siiqanaadan oottida eeshshata neeni akeekanaadan maaddana mala Yihoowa oychcha. (Luq. 6:28) Ne ishay oottidobaa neeni dogana xayikko, A waata haasayissanaakko qoppa. Ne ishay nena eriiddi mule qohennaagaa ubbatoo qoppiyoogee keehi loˈˈo. (Maa. 5:23, 24; 1 Qor. 13:7) Neeni A haasayissiyo wode, abaa loˈˈobaa qoppa. Sigettanawu I koyennan ixxikko shin? ‘Abaa ubbatoo danddaya.’ Ne ishan hidootaa qanxxoppa. (Qolasiyaasa 3:13 nabbaba.) Qassi, lancciyaa uluwan mule oyqqoppa; ayssi giikko, hegee Yihoowaara ne dabbotido dabbotaa moorana danddayees. Nena aybinne xubbanaadan oottoppa. Yaatiyoogan, neeni Yihoowa aybippenne aaruwan siiqiyoogaa bessaasa.—Maz. 119:165.

16. Nuuni ubbay waatana koshshii?

¹⁶ Nuuni nu ishanttuuranne michchonttuura ‘heemmiya issuwaa’ kaalliya ‘issi wude’ gididi Yihoowawu haggaaziyoogan ufayttoos. (Yoh. 10:16) Yihoowa SHeniyaa Oottanawu Giigettidaageeta (Amaarattuwaa) giyo maxaafaa sinttaa 165n deˈiya qofay hagaadan gees: “Neeni hegaadan issippetettan deˈiyo gishshawu, he issippetettay moorettennaadan naaganawu neeyyo danddayettida ubbabaa oottana koshshees.” Hegaa gishshawu, nuuni “nu ishanttanne michchontta Yihooway xeelliyoogaadan xeelliyoogaa” tamaarana koshshees. Yihooway nuna ubbaa ‘guuttatudan’ xoqqu ootti xeellees. Neeni ne ishanttanne michchontta hegaadan xeelliyoogee keehi loˈˈo. Neeni eta maaddanawunne etawu koshshiyaabaa kunttanawu oottiyo ubbabaa Yihooway akeekeesinne xoqqu ootti xeellees.—Maa. 10:42.

17. Nuuni waatanawu kuuyana koshshii?

¹⁷ Nuuni nu ishanttanne michchontta siiqoos. Yaatiyo gishshawu nuuni ‘issi ishaa xubbiyaabaa woykko nagaran onggiyaabaa oottennaadan qofaa qachchoos.’ (Roo. 14:13) Nu ishanttinne michchontti nuuppe aadhdhiyaabadan qoppoos, qassi etassi wozanappe atto gaanawu koyoos. Nuuni haratun xubettana koshshenna. “Ane nuuni sarotetta ehiyaabaanne nuna issuwaa issuwaara minttettiyaabaa ubbaa koyoos.”—Roo. 14:19.