1. Yihoowa ashkkarati issi issitoo boorasiyoy aybissee?

NUUPPE daroti issi issitoo boorasoos. Amaridaageeti boorasiyoogaa sohuwaara aggoosona. Harati qassi adussa wodiyawu boorasennan waayi aggana. Nuuni daro asaara deˈiyo wodekka boorasennan waayi aggana. Amaridaageeti ooratta gubaaˈiyan laggeta demmanawu metootoosona. Harati qassi darobaa issippe oottiya keettaa asaara deˈido gishshawu, eti bantta soo asaappe shaahettidi haahosaa biyo wode keehi boorasoosona. Qassi harati eti siiqiyo hayqqida uraara kase aattido wodiyaa keehi laamotoosona. Amarida Kiristtaaneti, ubba qassi tumaa mati siyidaageeti Yihoowawu goynnenna eta soo asatinne laggeti eta eqettiyo wode woy eta bolli yedetaa gattiyo wode boorasoosona.

2. Nuuni zaaruwaa beˈana oyshati awugeetee?

² Yihooway nubaa ubbabaa ereesinne akeekees. Nuuni boorasiyo wode I erees; qassi nuna maaddanawu koyees. Yihooway nuna waati maaddii? Nuna maaddanawu ay oottana danddayiyoo? Qassi nu gubaaˈiyan deˈiya boorasiyaageeta waati maaddana danddayiyoo? He oyshatu zaarota ane beˈoos.

3. Yihooway Eelaasawu qoppiyoogaa waati bessidee?

³ Yihooway baassi goynniyaageeti ubbay ufayttanaadan koyees. I nuussi ubbawu matan deˈees; qassi nuuni azzaniyo wode woy hidootaa qanxxiyo wode akeekees. (Maz. 145:18, 19) Hananabaa yootiya Eelaasabay Yihoowa ay keena qofissidaakkonne Yihooway A waati maaddidaakko qoppa. He ammanettida bitanee Israaˈeela taarikiyan keehi iita wodiyan deˈiis. Israaˈeelan Yihoowa siiqenna wolqqaama asati ayyo goynniyaageetu bolli yedetaa gattidosona; ubba qassi Eelaasa woranawu koyidosona.  (1 Kaw. 19:1, 2) Qassi, Eelaasi Yihooway kiittin hananabaa yootiyaageetuppe ba xallay attidabadan qoppidoogee I keehi hidootaa qanxxanaadan oottennan waayi aggana. (1 Kaw. 19:10) Eelaasa maaddanawu Xoossay sohuwaara issibaa oottiis. Yihooway I kiittin hananabaa yootiyaageetuppe attidaagee A xalla gidennaagaa yootanawu issi kiitanchchaa kiittiis. He kiitanchchay Yihoowawu ammanettidi haggaaziya hara daro Israaˈeelati deˈiyoogaa Eelaasawu yootiis.—1 Kaw. 19:5, 18.

4. So asay woy laggeti maaddennaageetussi Yihooway keehi qoppiyoogaa Marqqoosa 10:29, 30y waati qonccissii?

⁴ Nuuni Yihoowawu haggaaziyo wode, nuuppe amaridaageeti darobaa aggibayana koshshiyoogaa I erees. Nu aggiyoobaappe issibay Yihoowawu haggaazenna nu soo asaanne laggetu maaduwaa gidana danddayees. Kiitettida PHeexiroosi Yesuusa hagaadan giidi oychchidoy hirggido gishshataassa gidennan waayi aggana: “Be7a, nuuni nuuyyo de7iya ubbabaa aggi bayidi, nena kaallida; yaatidi nuuni ai demmaneeshsha?” (Maa. 19:27) Yesuusi bana kaalliyaageetuyyo gubaaˈee so asa mala gidanaagaa kehatettan yootiis. (Marqqoosa 10:29, 30 nabbaba.) Qassi saluwan deˈiya nu Aaway Yihooway baayyo haggaazanawu koyiyaageeta maaddanaagaa yootiis. (Maz. 9:10) Ne boorasiyoogaa agganawu baaxetiyo wode Yihooway maaddana mala neeni oottana danddayiyo amaridabata qoppa.

5. Yihooway nena maaddiyo ogiyaabaa yuushsha qoppiyoogee loˈˈo gidiyoy aybissee?

⁵ Yihooway nena waati maaddiyaakko qoppa. (Maz. 55:22) Hegee neeni nerkka deˈennaagaa akeekanaadan maaddana. So asaappe ooninne Yihoowa Markka gidenna aqo oyqqabeenna michchiyaa Kaarela * hagaadan gaasu: “Metiya wodeta taani genccanaadan Yihooway tana waati maaddidaakko qoppiyoogee taani tarkka deˈennaagaa akeekanaadan maaddees. Hegee Yihooway ubbatoo tana maaddanaagaa taani ammanettanaadan oottees.”

6. Boorasiyaageeta 1 PHeexiroosa 5:9, 10y waati minttettana danddayii?

⁶ Boorasiya ishanttanne michchontta Yihooway waati maaddiyaakko loytta qoppa.  (1 PHeexiroosa 5:9, 10 nabbaba.) Eta son daro layttawu Yihoowa Markkay A xalla gidido Hirosha giyo ishay hagaadan giis: “Gubaaˈiyan deˈiya ubbaakka metiyaabay deˈiyoogaa akeekiyoogee metenna. Nuuni ubbay Yihoowawu haggaazanawu nuuyyo danddayettida ubbabaa oottiyoogaa eroos, qassi hegee so asaappe ooninne Yihoowa Markka gidennaageeta minttettana danddayees.”

7. Woosay nena waati maaddii?

⁷ Ubbatoo woossa, Geeshsha Maxaafaa nabbabanne shiiqota shiiqa. Neeyyo siyettiyaabaa aybanne qottennan Yihoowayyo yootana bessees. (1 PHe. 5:7) Maasiyela hagaadan gaasu: “Boorasiyoogaa agganaadan tana keehi maaddidabaappe issoy ubbatoo Yihoowa woossiyoogaa.” Ha yelaga michchiyaa Yihoowayyo haggaazanawu kuuyido wode, eta soo asay Yihoowayyo haggaazenna gishshawu, barkka deˈiyaabadan iyyo siyettiis. A gujjadakka hagaadan gaasu: “I taayyo tumu Aawa gidiyo gishshawu, taani akko ubba galla darotoo woossaysinne tawu siyettiyaabaa awu yootays.”

8. Xoossaa Qaalaa nabbabiyoogeenne hegaa wotti dentti qoppiyoogee nena waati maaddii?

⁸ Xoossaa Qaalaa ubbatoo nabbaba, qassi Yihooway nena siiqiyoogaa qonccissiya taariketa yuushsha qoppa. Eta soo asay hidootaa qanxxissiyaabaa haasayiyoogaa genccida Biyankko giyo michchiyaa hagaadan gaasu: “Geeshsha Maxaafan deˈiya taariketanne taagaa mala hanotaa genccida Yihoowa ashkkaratubaa yootiya taariketa nabbabiyoogeenne wotti dentti qoppiyoogee tana tumuppe maaddiis.” Amarida Kiristtaaneti Mazamure 27:10⁠nne Isiyaasa 41:10 mala keehi minttettiya xiqiseta hassayoosona. Harati qassi cenggurssan giigidabata nu websaytiyaappe siyiyoogee boorasiyoogaa eti agganaadan maaddiyoogaa akeekidosona.

9. SHiiqota shiiqiyoogee nena waati maaddii?

⁹ SHiiqota ubbatoo shiiqanawu neessi danddayettida ubbabaa ootta. SHiiqotun neeni minettana, qassi ne ishanttuuranne michchonttuura erettana danddayaasa. (Ibr. 10:24, 25) Qommoora ibaa denttido Maasiyela hagaadan gaasu: “Taani dungguuxa gidikkonne, gubaaˈe shiiqota ubbaa shiiqanawunne qofaa yootanawu murttaas. Hegee taani gubaaˈiyan deˈiya ishanttuuranne michchonttuura loytta erettanaadan maaddiis.”

10. Gubaaˈiyaa ishanttuuranne michchonttuura laggetiyoogee keehi koshshiyaaba gidiyoy aybissee?

¹⁰ Ammanettida Kiristtaanetuura laggeta. Gubaaˈiyan deˈiya, etappe neeni tamaarana danddayiyoogeetuura laggeta. Eti neeppe bayratiyaageeta woy kaalotiyaageeta woy wogan dummatiyaageeta gidana danddayoosona. Geeshsha Maxaafay “aadhdhida eratettai cimida asatu matan” deˈiyoogaa yootees. (Iyy. 12:12) Cimidaageeti gubaaˈiyan deˈiya yelagatuppekka  darobaa tamaarana danddayoosona. Daawiti Yonaataanappe keehi kaalotikkonne, hegee eti issoy issuwawu mata lagge gidennaadan diggibeenna. (1 Sam. 18:1) Daawitinne Yonaataani metiyaabati deˈishinkka Yihoowawu haggaazanawu issoy issuwaa maaddidosona. (1 Sam. 23:16-18) Ha wodiyan eta son I xallay Yihoowa Markka gidido Ayriino giyo michchiyaa hagaadan gaasu: “Gubaaˈiyan deˈiyaageeti ayyaanaaban nu soo asa mala woy nu ishanttunne michchonttu mala gidana danddayoosona. Eti nuuni koyiyo so asa gidanaadan Yihooway eta goˈettana danddayees.”

11. Mata lagge gidanawu nuuni waatana bessii?

¹¹ Neeni dungguuxa gidikko, oorattatuura laggetiyoogee metiyaaba gidana danddayees. Harati O eqettishinkka tumaa siyida Raatino giyo michchiyaa hagaadan gaasu: “Gubaaˈiyan deˈiya ta ishanttunne michchonttu maadoy taayyo koshshidoogaa taani akeekana koshshiis.” Neessi siyettiyaabaa hara uraassi yootiyoogee deexxiyaaba gidana danddayees; shin neeni yootikko, he uri neeyyo mata lagge gidana danddayees. Ne laggeti nena minttettanawu koyoosona, shin eti waatana danddayiyaakko eranaadan neeni etawu yootana koshshees.

12. Haggaaziyoogee loˈˈo laggeta demmanawu nena waati maaddana danddayii?

¹² Hara Kiristtaanetuura issippe sabbakiyoogee laggeta demmana danddayiyo keehi koshshiya ogetuppe issuwaa. Ibay qommoora odettido Kaarela hagaadan gaasu: “Michchonttuura issippe haggaaziyoogaaninne Yihoowa haggaazuwan harabaa issippe oottiyoogan loˈˈo gidida daro laggeta demmaas. Ha laggetu baggaara Yihooway tana daro layttawu maaddiis.” Ammanettida Kiristtaanetuura laggetiyoogee nuuyyo ubbatoo loˈˈo. Neeni hidootaa qanxxiyo wode, leemisuwawu, boorasiyo wode nena minttettanawu Yihooway hegaa mala laggeta goˈettees.—Lee. 17:17.

13. Gubaaˈiyan deˈiya ubbawu ayba aawatettay deˈii?

¹³ Gubaaˈee sarotettay deˈiyo soho gidanaadan oottiyoonne ooninne boorasenna mala yan deˈiya ubbaa siiqiyo aawatettay gubaaˈiyan deˈiya ubbawu deˈees. (Yoh. 13:35) Nuuni oottiyoobaynne haasayiyoobay harata keehi minttettana danddayees! Issi michchiyaa hagaadan gaasu: “Taani tumaa erido wode, gubaaˈee tawu so asa mala gidiis. Ishanttinne michchontti tana maaddennaakko taani Yihoowa Markka gidikke.” Eta soo asay Yihoowa Markka gidennaageeta gubaaˈiyaa ishanttinne michchontti siiqiyoogaa eti akeekanaadan maaddanawu waatana danddayay?

14. Oorattatuura laggetanawu neeni waatana danddayay?

¹⁴ Oorattatuura laggetanawu mala. Oorattati gubaaˈiyaa yiyo wode eta ufayttada mokka ekkiyoogan doommana danddayaasa. (Roo. 15:7) SHin, nuuni eta ufayttidi sarotiyoogaa xallay gidenna. Nuuni loddan loddan laggetettaa minttanawu koyoos. Yaatiyo gishshawu, oorattatussi kehiyaagaanne wozanappe qoppiyaagaa gida. Yeellayiya oyshata oychchennan, eta gakkiya metuwaa akeekanawu mala. Banttawu siyettiyaabaa neeyyo yootiyoogee amaridaageetussi deexxana danddayiyo gishshawu yootanaadan eta wolqqanttoppa. Qassi, eti pashkki giidi yootanaadan hiillan oychcha, yaatada eti zaariyoobaa danddayan ezgga. Leemisuwawu, eti tumaa waati siyidaakko oychchana danddayaasa.

15. Kayma Kiristtaaneti gubaaˈiyan harata waati maaddana danddayiyoonaa?

¹⁵ Nuuni issoy issuwawu qoppiyoogaa bessiyo wode gubaaˈiyan deˈiya ubbaa ammanoy minnees. Ammanuwan mino gidida cimatinne harati hegaadan oottiyo wode, ubbaa ammanoy minniyoogee tuma. Aayyiyaa tumaa keettan dichchido Meelisa hagaadan gaasu:  “Daro layttawu tanaara wodiyaa aattidanne taayyo qoppiya, aawa mala gidida ishantta keehi galatays. Taani odana koyiyo wode ubban, ta yootiyoobaa siyiya uri deˈees.” Moorisa giyo yelaga ishay Geeshsha Maxaafaa A xannaˈissiyaagee tumaa aggido wode azzaniisinne boorasiis. Moorisoy hagaadan giis: “Cimati taayyo qoppiyaageeta gidiyoogee tana keehi maaddiis. Eti tana ubbatoo haasayissoosona. Eti tanaara haggaazidosona, Geeshsha Maxaafaa buzo xannaˈiiddi demmido alˈˈobaa tawu yootidosona, ubba qassi eti ufayssiyaabaa tanaara issippe kaaˈidosona.” Meelisakka Moorisoykka Yihoowawu ubba wode haggaazoosona.

16-17. Harata maaddanawu nuuni oottana danddayiyo harabay aybee?

¹⁶ Koshshiya ogetun maadda. (Gal. 6:10) Bantta soo asay deˈiyo biittaappe keehi haaho sohuwan misoonaawe gididi oottiya Liyoy hagaadan giis: “Likke wodiyan kehatettan oottiyo issibay darotoo nu ubbawu koshshees. Kaamiyaa daafay tana gakkido issi gallassaa taani hassayays. He galla taani so gakkido wode keehi unˈˈettaas. SHin he wode issi azinaynne machchiyaa bantta son tana qumaa shoobbidosona. Nuuni miidobaa taani hassayana xayikkonne, eti ta yootiyoobaa loytti ezggidoogaa hassayays. Wurssettan, taani keehi ufayttaas!”

¹⁷ Nuuni hara Yihoowa Markkatuura gayttiyo wodenne gita shiiqotun siyido haasayata tobbiyo wode ubbaykka ufayttoos. SHin kase ibaa denttido Kaarela hagaadan gaasu: “Gita shiiqotun taani keehi boorasays.” Aybissi? A hagaadan gaasu: “Tanaara xeetan qoodettiya woy ubba qassi shaˈan qoodettiya ishanttinne michchontti deˈiyaaba gidikkonne, eti ubbatoo bantta soo asaara issippe uttoosona. Taani eta beˈiyo wode, keehi boorasays.” Harati qassi bantta aqo laggeti hayqqi simmin gita shiiqota koyro shiiqiyoogee deexxiyaaba gidiyoogaa akeekidosona. Hegaa malabay gakkido uraa eray? He uri kaalliya shiiquwaa ne soo asaara shiiqanaadan shoobbiyoogee loˈˈo gidana danddayees.

18. Nuuni imatuwaa mokkiyo wode 2 Qoronttoosa 6:11-13 oosuwan waati peeshshana danddayiyoo?

¹⁸ Wodiyaa issippe aatta. Dumma dumma ishanttuuranne michchonttuura, ubba qassi boorasiyaageetuura wodiyaa aattanawu mala. Nuuni hegaa mala ishanttussinne michchonttussi ‘nu uluwaa’ aassi dooyanawu koyoos.  (2 Qoronttoosa 6:11-13 nabbaba.) Qommoora ibaa denttido Meelisa hagaadan gaasu: “Ishanttinne michchontti nuuni banttanaaranne bantta soo asaara wodiyaa aattanaadan woy issippe issisaa baanaadan nuna shoobbiyo wode, ubbatoo keehi ufayttoos.” Neeni imatuwaa shoobbana danddayiyo uri ne gubaaˈiyan deˈii?

19. Nu mala Kiristtaanetuura wodiyaa awude aattiyoogee maaddana danddayii?

¹⁹ Nu mala Kiristtaanetuura nuuni issi issitoo wodiyaa aattikko, eti keehi ufayttana danddayoosona. Worddo haymaanootiyaara gayttida baalata Yihoowa Markka gidenna so asay bonchchiyo wode etaara deˈiyoogee amaridaageetussi deexxana danddayees. Harati issibay hanido gallassaa, leemisuwawu, siiqiyo uri hayqqido gallassaa hassayidi keehi azzanana danddayoosona. Hegaa mala metoy gakkido ishanttuuranne michchonttuura wodiyaa aattanawu nuuni eta shoobbiyo wode, etawu ‘wozanappe hirggiyoogaa’ woy qoppiyoogaa bessoos.—Pili. 2:20

20. Yesuusi Maatiyoosa 12:48-50n yootidobay nuuni boorasiyo wode nuna waati maaddana danddayii?

²⁰ Issi Kiristtaanee boorasanaadan oottana danddayiya daro gaasoy deˈees. SHin, Yihooway hegaa mala hanotaa loytti eriyoogaa nuuni mule dogana bessenna. Nuussi koshshiyaabaa kunttanawu I ubbatoo nu ishanttanne michchontta goˈettees. (Maatiyoosa 12:48-50 nabbaba.) Qassi nuuni nu ishanttanne michchontta maaddanawu nuuyyo danddayettida ubbabaa oottiyo wode, gubaaˈiyaa immido gishshawu Yihoowa galatiyoogaa bessoos. Issi issitoo nuuyyo siyettiyaabay ayba gidikkonne, Yihooway ubbatoo nunaara deˈiyo gishshawu nuuni mule nurkka gidokko!