1. Nagaraappe simmidaageetuyyo Yihooway gelido qaalay aybee?

 YIHOOWAY nuna Medhdhidaagaa, nuuyyo Higgiyaa Immiyaagaanne nu Daanna xalla gidennan, saluwan deˈiya nu siiqo Aawa. (Maz. 100:3; Isi. 33:22) Nuuni A bolli nagaraa oottidi zilˈˈettidi wozanappe simmiyo wode, nuuyyo atto giyo maatay awu deˈees, qassi I yaatanawu koyees. (Maz. 86:5) Yihooway hananabaa yootiya Isiyaasa baggaara siiqiyoogaa bessiya ha qofaa yootiis: “Intte nagarai baaraadan zo77ikkokka, shachchaadan booxxana.”—Isi. 1:18.

2. Nuuni haratuura sarotettan deˈanawu koyikko, waatana bessii?

² Nuuni ubbay nagaranchcha gidiyo gishshawu, harata yiilloyiyaabaa haasayoosinne oottoos. (Yaaq. 3:2) SHin, hegaa giyoogee nuuni etaara dabbotaa minttana danddayokko giyoogaa gidenna. Nuuni atto giyaageeta gidikko, hegaadan oottana danddayoos. (Lee. 17:9; 19:11; Maa. 18:21, 22) Nuuni guuttaban issoy issuwaa qohiyo wode, Yihooway nuuni atto gaanaadan koyees. (Efi. 4:32) Nuuni yaatanaadan oottiya gaasoy deˈees. Qassi Yihooway darotoo nuuyyo “coo” atto gees.—Isi. 55:7.

3. Nuuni ha huuphe yohuwan ay beˈanee?

³ Nuuni ha huuphe yohuwan, nagaranchcha asay atto giyoogan Yihoowa waati milatana danddayiyaakko beˈana. Nuuni cimatuyyo yootana koshshiyo nagarati awugeetee? Nuuni haratuyyo  atto gaanaadan Yihooway koyiyoy aybissee? Haratu nagaraa gaasuwan keehi qohettida amarida ishanttuppenne michchonttuppe nuuni ay tamaarana danddayiyoo?

4. (a) Yihoowa ashkkaray gita nagaraa oottikko, I waatana bessii? (b) Cimati nagaraa oottida uraara haasayiyo wode waatiyo aawatettay etawu deˈii?

⁴ Issi uri gita nagaraa oottikko, nuuni cimatuyyo yootana koshshees. He nagaratuppe amaridaageeti 1 Qoronttoosa 6:9, 10n odettidosona. Gita nagaraa oottiyoogee Xoossaa higgiyaa kanttiyoogaa bessiyaaba. Issi Kiristtaanee hegaa mala nagaraa oottikko, ayyo atto gaanaadan Xoossaa Yihoowa woossananne gubaaˈiyaa cimatussi yootana bessees. (Maz. 32:5; Yaaq. 5:14) Gubaaˈiyaa cimatussi ayba aawatettay deˈii? Wozuwaa yarshshuwaa denddo oottidi nagaraa muleera atto giyo maatay deˈiyoy Yihoowa xalaalaassa. * Gidoppe attin, nagaraa oottida uri gubaaˈiyaa yame gididi deˈana bessiya bessennaakko Geeshsha Maxaafaa goˈettidi kuuyiyo aawatettaa Yihooway cimatuyyo immiis. (1 Qor. 5:12) Yaatanawu, kaalliya oyshatu zaaruwaa demmanawu maliyoogee eti oottiyoobatuppe issuwaa: He uri nagaraa oottanawu kasetidi halchchidee? He uri ba oottido nagaraa haratuppe genttanawu malidee? I gita nagaraa daro wodiyawu zaari zaari oottidee? Qassi, I nagaraappe wozanappe simmidoogaa bessiyaabi deˈii? Yihooway ayyo atto giidoogaa qonccissiyaabi deˈii?—Oos. 3:19.

5. Cimati oottiyoobay ayba ayfe demissii?

⁵ Cimati nagaraa oottida uraara haasayiyo wode, eta halchchoy nagaraa oottida uraa xeelliyaagan Yihooway kuuyidobaara maayettiyaabaa kuuyiyoogaa. (Maa. 18:18) He giigissoy gubaaˈiyaa waati maaddii? Hegee nagaraa oottidaageeti gubaaˈiyaa yame gididi deˈennaadan oottiyo gishshawunne Yihoowa alˈˈo ashkkarati qohettennaadan oottiyo gishshawu gubaaˈiyaa naagees. (1 Qor. 5:6, 7, 11-13; Tii. 3:10, 11) Hegee nagaraa oottida uri nagaraappe simmanaadaaninne Yihooway awu atto gaanaadankka maaddana danddayees. (Luq. 5:32) Cimati nagaraappe simmida urawu woossoosona, qassi I zaarettidi ayyaanaaban minnanaadan Yihooway A maaddana mala oychchoosona.—Yaaq. 5:15.

6. Issi uray bohettikkonne, Yihooway ayyo atto gaana danddayii? Qonccissa.

⁶ Cimati issi uraa haasayissiyo wode, nagaraappe I simmibeenna gaada qoppa. Yaatikko, gubaaˈiyaappe I bohettana. I issi biittaa higgiyaa kanttikko, cimati hegaa gaasuwan gakkiyaabaappe A ashshokkona. Deriyaa haariyaageeti higgiyaa kanttida uraa bolli pirddanaadaaninne A qaxxayanaadan Yihooway paqqadiis; he uri nagaraappe simmidaagaa woy simmibeennaagaa gidana danddayees. (Roo. 13:4) Gidoppe attin, he uri I oottidobay bala gidiyoogaa akeekidi ba qofaanne oosuwaa laammikko, Yihooway ayyo atto gees. (Luq. 15:17-24) I gita nagaraa oottikkonne, Yihooway awu atto gees.—2 Odi. 33:9, 12, 13; 1 Xim. 1:15.

7. Nuna naaqqida urawu nuuni ayba ogiyan atto gaana danddayiyoo?

⁷ Nagaraa oottida urawu Yihooway atto gaana bessiya bessennaakko nuuni kuuyana koshshennaagaa eriyoogee keehi ufayssiyaaba! Gidikkonne, nuuni kuuyana koshshiyaabay deˈees. Hegee aybee? Issi issitoo, issi uri nuna qohikkonne, nuuni awu atto gaanaadan oychchana danddayees. Haroode, nuuni awu atto gaanaadan I oychchennan  aggana danddayees. Gidikkonne, nuuni ayyo atto gaananne A bolli hanqqettennan aggana danddayoos. Ubba qassi, nuuni keehi qohettikko, yaatiyoogee wode ekkiyaabanne baaxeyiyaaba gidana danddayiyoogee qoncce. Masqqala 15, 1994, Wochchiyo Keelay (Amaarattuwaa) hagaadan gees: “Neeni nagaraa oottida urawu atto giyoogee he nagaraa maayettadasa giyoogaa gidenna. Atto giya Kiristtaanee Yihooway he allaalliyaa wottiyoobi baynna ogiyan pirddanaagaa ammanettees. I salo gufanttuwan xillo Daanna gidiyo gishshawu, suure pirddaa koshshiya wodiyan pirddana.” Yihooway nuuni atto gaanaadaaninne I suure pirddaa pirddiyoogaa ammanettanaadan koyiyoy aybissee?

8. Nuuni atto giyoogee Yihoowa maarotaa gishshawu A galatiyoogaa waati bessii?

⁸ Nuuni atto giyo wode, Yihoowa maarotaa gishshawu A galatoos. Yesuusi issi leemisuwan, daro acuwaa qanxxana danddayenna ba ashkkaratuppe issuwaa maarida godaara Yihoowa geeddarssiis. SHin, he ashkkaray keehi guutta miishshaa baappe talˈˈida ashkkaraa maaribeenna. (Maa. 18:23-35) Yesuusi nuna tamaarissidobay aybee? Yihooway nuussi bessido gita maarotawu nuuni A wozanappe nashshikko, nu haratuyyo atto gaana. (Maz. 103:9) Issi Wochchiyo Keelay daro layttaappe kase hegaabaa hagaadan giis: “Nuuni haratuyyo darotoo atto giikkokka, Xoossay Kiristtoosa yarshshuwaa baggaara nuussi ubbawu atto giidoogaa keena nuuni hara asawu mule atto gookko.”

9. Yihooway oona maarii? (Maatiyoosa 6:14, 15)

⁹ Nuuni haratuyyo atto giikko, Yihooway nuuyyo atto gaana. Maariyaageeta Yihooway maarees. (Maa. 5:7; Yaaq. 2:13) Yesuusi ba erissiyo ashkkarati waati woossanaakko tamaarissido wode hegaa geeshshi yootiis. (Maatiyoosa 6:14, 15 nabbaba.) Yihooway ba ashkkaraa Iyyoobawu yootidobaappe hegaara issi malabaa tamaaroos. He ammanettida bitanee Elifaaza, Bilddaadanne Xoofaara geetettiya heezzu asati haasayido iitaban keehi qohettiis. Iyyoobi eta gishshaa woossanaadan Yihooway awu yootiis. Iyyoobi woossi simmin, Yihooway A anjjiis.—Iyy. 42:8-10.

10. Uluwan lancciyaa oyqqiyoogee qohiyoy aybissee? (Efisoona 4:31, 32)

¹⁰ Uluwan lancciyaa oyqqiyoogee qohees. Lanccee deexo tooho mala gidiyo gishshawu, nuuni uluwan lancciyaa oyqqiyoogaa aggidi sarotettan deˈanaadan Yihooway koyees. (Efisoona 4:31, 32 nabbaba.) ‘Hanqquwaa agganaadaaninne yiilluwaappe teqettanaadan’ I nuna zorees. (Maz. 37:8) Nuuni he zoriyaa kaallikko hegee nuna maaddana. Nuuni issi uraa bolli uluwan lancciyaa oyqqiyo wode, hegee nuna asatettaaninne qofan qohana danddayees. (Lee. 14:30) Nuuni marzziyaa uyikko hegee hara uraa qohennaagaadan, nuuni he uraa bolli uluwan lancciyaa oyqqikko hegee A qohenna. SHin, nuuni haratuyyo atto giyo wode, nuuyyo imotaa immoos. (Lee. 11:17) Nuuni sarotettaa demmoosinne aggennan Yihoowawu haggaazoos.

11. Haluwaa kiyiyoogaa xeelliyaagan Geeshsha Maxaafay ay yootii? (Roome 12:19-21)

¹¹ Yihooway haluwaa kessees. Nuna naaqqida uraa qaxxayiyo maataa Yihooway nuussi immibeenna. (Roome 12:19-21 nabbaba.) Nuuni ubbabaa erenna gishshawunne nagaranchcha gidiyo gishshawu, Xoossaagaadan suure pirddana danddayokko. (Ibr. 4:13) Qassi, nuuyyo siyettiyaabay nuna balettana danddayiyo gishshawu, nuuni oottana koshshiya suurebaa eranawu issi issitoo metootana  danddayoos. Yaaqoobi hagaadan xaafanaadan Yihooway A denttettiis: “Asa hanqqoi Xoossai koyiyo xillotettaa eheenna.” (Yaaq. 1:20) Yihooway suurebaa oottanaagaanne wottiyoobi baynna pirddaa pirddanaagaa nuuni ammanettana danddayoos.

12. Nuuni Yihoowa suure pirddan ammanettiyoogaa waati bessana danddayiyoo?

¹² Atto giyoogee nuuni Yihoowa suure pirddan ammanettiyoogaa bessees. Yihooway ubbabaa suure pirddiyoogaa nuuni ammanettiyo wode, nagaraa gaasuwan gakkida qoho ubbaa Yihooway xayssanaagaa ammanettiyoogaa bessoos. I qaalaa gelido ooratta alamiyan, nuna azzanttiyaabay mule “hassayettennanne qofettenna.” (Isi. 65:17) Gidoppe attin, nuuni keehi qohettidaba gidikko, hanqqettiyoogaanne uluwan lancciyaa oyqqiyoogaa aggiyoogee tumuppe danddayettiyaabee? Amaridaageeti hegaadan waati oottidaakko ane beˈoos.

13-14. Atto giyoogaa xeelliyaagan Toonanne Joosa hanotaappe ay tamaaradii?

¹³ Nu mala Kiristtaanetuppe daroti harati eta keehi qohikkonne, etawu atto gaanawu kuuyidosona. Yaatiyoogan eti ayba anjjota demmidonaa?

¹⁴ Pilippinsse biittan deˈiya Tooni * I Yihoowa Markka gidanaappe daro wodiyaappe kase, ba bayra ishanttuppe issuwaa Joosa giyo bitanee woridoogaa eriis. He wode, Tooni keehi hanqqettiya asa gidiyo gishshawu haluwaa kiyanawu koyiis. Joosi ba oottido danobaa gaasuwan oyqettidi qashettiis. Guyyeppe Joosi qashuwaappe birshshettido wode, Tooni A demmidi woranawu murttiis. I woranawu massaariyaa shammiis. He wode, Tooni Yihoowa Markkatuura Geeshsha Maxaafaa xannaˈiyoogaa doommiis. I hagaadan giis: “Ta hanqquwaa gujjin, ta eeshshaanne ta oottiyoobaa laammana koshshiyoogaa taani Geeshsha Maxaafaa xannaˈiyo wode akeekaas.” Guyyeppe, Tooni xammaqettiis; qassi wurssettan gubaaˈe cima gidiis. Joosikka xammaqettida Yihoowa ashkkara gididoogaa Tooni erido wode garamettidoogaa qoppa! Eti naaˈˈay gayttido wode issoy issuwaara qoomettidosona; qassi Tooni Joosayyo  atto giidoogaa yootiis. Tooni Joosayyo atto giidoogee Tooni keehi ufayttanaadan oottidoogaa yootiis; he daro ufayssaa qonccissanawu Tooni metootiis. Ee, Tooni atto gaanawu eeno giido gishshawu Yihooway A anjjiis.

15-16. Piteranne Suu hanotaappe atto giyoogaa xeelliyaagan neeni ay tamaaradii?

¹⁵ Piterinne Suu 1985n SHiiquwaa Addaraashan shiiqi uttidaashin qoppennan wolqqaamabay xuuqqiis. Issi bitanee SHiiquwaa Addaraashan bombbiyaa wottiis. Suu keehi qohettidoogaa gaasuwan waayettawusu. Peenuwaakka A shaakkana danddayukku. Piterinne Suu, ‘Hagaa mala iitabaa oottida asi ay mala asee?’ giidi banttana darotoo oychchidosona. Bombbiyaa wottida bitanee daro layttappe guyyiyan oyqettidi ba deˈo laytta ubban qashettanaadan pirddettiis; I Yihoowa ashkkara gidenna. Piterinne Suu he bitaniyawu atto giidaakkonne oyshettido wode hagaadan giidosona: “Hanqqettiyoogeenne uluwan lancciyaa oyqqiyoogee asatettaaninne qofan nuna qohana danddayiyoogaa Yihooway tamaarissiis. Hegaa gishshawu, wolqqaamabay xuuqqi simmin daro takkennan, nuuni sarotettan deˈanawu hanqqettiyoogaa agganaadan Yihooway nuna maaddana mala oychchida.”

¹⁶ Eti he bitaniyawu atto gaanawu metootibookkonaa? Issi issitoo metootennan aggokkona. Eti hagaadan giidosona: “Suu bana gakkida qohuwaa gaasuwan waayettiyo wode, nuuni zaarettidi issi issitoo hanqqettoos. SHin nuuni he yohuwaa wotti dentti qoppenna gishshawu hanqquwaa sohuwaara aggoos. Qassi bombbiyaa wottidaagee issi galla nu ishaa gidikko, nuuni A mokki ekkanaagaa wozanappe yootana danddayoos. Geeshsha Maxaafay yootiyo maarati tumuppe laˈa kessiyoogaa ha hanotaappe nuuni tamaarida; he maarati nuuni qoppana danddayiyoogaappe aaruwan daro ogetun nuna laˈa kessoosona! Nu bolli gakkida qoho ubbaa Yihooway mata wode xayssanaagaa eriyoogeekka nuna minttettees.”

17. Mayri hanotaappe atto giyoogaa xeelliyaagan neeni ay tamaaradii?

¹⁷ Mayra tumaa siyiyo wode aqo oyqqa uttaasu,  qassi iyyo naaˈˈu guutta naati deˈoosona. I azinay tumaa ekkennan ixxiis. Guyyeppe I wodiraa laammiisinne so asaa aggidi biis. Mayra hagaadan gaasu: “Ta azinay tananne nu naaˈˈu naata aggidi biido wode, siiqiyo uri kaddin darotussi siyettiyaabay tawukka siyettiis; taani dagammaas, hanotaa ammananawu metootaas, kayyottaas, zilˈˈettaas, tana mooranchchadan xeellaasinne hanqqettaas.” Aqo deˈoy laaletti simminkka, azinay O kaddido gaasuwan azzaniyoogaa A aggabeykku. Mayra hagaadan gaasu: “Taani unˈˈettiyoogaanne hanqqettiyoogaa daro aginawu aggabeykke; qassi hegee taani Yihoowaaranne haratuura dabbotido dabbotay moorettanaadan oottidoogaa akeekaas.” Mayra haˈˈi hanqqettennaagaanne ba kase azinaa bolli iitabi aybinne gakkanaadan koyennaagaa yootawusu. Issi gallassi I Yihoowakko shiiqana gaada A hidootan naagawusu. Mayra sinttanaaban xeelaa wottaasu. A ba naaˈˈu naati Yihoowa ashkkara gidanaadan oottada barkka dichchaasu. Ha wodiyan, Mayra ba naatuuranne eta soo asaara issippe Yihoowawu haggaaziyoogan ufayttawusu.

18. Yihooway Ooppenne Aadhdhiya Daanna gidiyo gishshawu nuuni ay ammanettana danddayiyoo?

¹⁸ Asaa bolli waati pirddana koshshiyaakko nuuni kuuyana bessennaagaa eriyoogee keehi woppu gaanaadan oottiyaaba! Yihooway Ooppenne Aadhdhiya Daanna gidiyo gishshawu keehi koshshiya ha oosuwaa maara polana. (Roo. 14:10-12) I likkebawunne likke gidennabawu kessido wottiyoobi baynna maaraara maayettiyaabaa ubbatoo pirddanaagaa nuuni wozanappe ammanettana danddayoos. (Doo. 18:25; 1 Kaw. 8:32) I likke gidennabaa mule oottenna!

19. Wottiyoobi baynna daanna gidida Yihooway ay oottanee?

¹⁹ Nagaraa gaasuwan gakkida iitaba ubbaa Yihooway muleera xayssiyo wodiyaa nuuni yeemuwan naagoos. Nuna azzanttiyaabay ubbay he wode muleera xayana. (Maz. 72:12-14; Ajj. 21:3, 4) Hegee mule hassayettenna. He keehi ufayssiya wodee gakkanaashin naagiiddi, Yihooway nuuni atto giyoogan bana milatanaadan oottido gishshawu A keehi galatoos.