HIDOOTAA BIITTAN deˈiya Ibraawetuyyo layttay doommiyoy goyiyoonne zeriyo wodiyaana; eti yaatiyoy haˈˈi Masqqalaa/Xiqimitaa geetettiya aginaana.

Asay aginaa giddon deˈiya gallassata eranawu aginay xeeriyoonne goobaniyo wodiyaa qoodees; hegee 29 gallassa woy 30 gallassa. Eti wodeta goˈettiyoogan layttay ay keenakko eroosona. Qassi, issi issitoo eti kaalliya layttay doommanaappe kase, hara gallassata woy hara aginaa gujjoosona. Yaatiyoogee, kattaa zeriyoonne shiishshiyo wodiyaara kalanddaree issi mala gidanaadan oottees.

Gidoppe attin, Israaˈeelatuyyo layttawu koyro aginay Abiiba woy Niisaana gidanaadan Xoossay Muuse wode azaziis. (Kes. 12:2; 13:4) Hegee Laappune/Hosppune agina. Niisaana aginan Israaˈeelati issi baalaa bonchchana, qassi he baalan eti koyro gakkida banggaa ayfiyaappe amaridaagaa Yihoowawu yarshshana koshshees.—Kes. 23:15, 16.

Kalanddariyan hara aginaa gujjiyo wode hegaa eriyoogee metennaagaa issi eranchchay yootiis. I hagaadan giis: “Paasikay Niisaana (Niisaana 14) aginay goobaniyo wode bonchchettana bessees; hegee ubbatoo peˈiyoy badhdheesan gallassaynne qammay issi lagge gidiyo wodee aadhdhi simmiina. . . . Yaatiyo gishshawu, Paasikay layttaa wurssettan he gallassaappe kasetidi peˈiyoogee erettikko, Ayhudati Niisaanaappe kase issi aginaa gujjoosona.”

Yihoowa Markkati Godaa Kahuwaa bonchchiyo gallassaa kuuyiyo wode he hiillaa goˈettoosona; he gallassay badhdheesan Ibraawetu kalanddariyan Niisaana 14n peˈees. Kumetta saˈan deˈiya gubaaˈetussi he gallassay kasetidi odettees.

SHin issi aginay wuriyo wodiyaanne ooratta aginay doommiyo wodiyaa Ibraaweti waati eriyoonaa? Ha wodiyan neeni attamettida kalanddariyan woy elektiroonike miishshan beˈana danddayaasa. Gidoppe attin, yaatiyoogee beni wode metiyaaba.

Nohe wode, aginan 30 gallassay deˈiyaabadan qofettees. (Doo. 7:11, 24; 8:3, 4) Guyyeppe, Ibraawetu kalanddariyan issi aginay 30 gallassa xalla gidenna. Ibraawetu kalanddariyan issi aginay doommiyoy aginay xeeriyo wodiyaana. Hegee kasetiya aginay doommoosappe 29 woy 30 gallassay aadhdhi simmiina.

Issi wode, Daawitinne Yonaataani ooratta aginay doommiyoogaa xeelliyaagan haasayiiddi hagaadan giidosona: ‘Wonttoy aginay xeeriyo gallassa.’ (1 Sam. 20:5, 18) Hegaa gishshawu, eta wode aginata kasetidi qoodi wottiyaaba milatees. SHin, Israaˈeelati ooratta aginay doommiyo wodiyaa waati eriyoonaa? Mishiina giyo maxaafay amarida qofaa yootees; hegan Ayhudatu wogay xaafettiis. Ayhudati Baabiloone omoodduwaappe simmi makkin, hegaabaa kuuyiyay Sanhedirine shilootaa (Ayhuda xoqqa pirdda keettaa) gidiyoogaa Mishiina giyo maxaafay qonccissees. Laappun aginatun, he shilootay aginawu 30tta gallassan shiiqees. Kaalliya aginay awude doommiyaakko kuuyiyo maatay he asatuyyo deˈees. Hegaa eti waati kuuyiyoonaa?

Yerusalaame yuushuwan xoqqasan deˈiya asay qammi saluwan aginay biron xeeriyo wode beˈees. Eti sohuwaara Sanhedirine shilootawu yootoosona. Aginay xeeridoogaa bessiya naqaashaa demmidabadan he shilootaa asawu siyettiyo wode, eti ooratta aginay doommidoogaa awaajjoosona. SHaaray woy gubbanay wochchiyaageeti aginay xeeridoogaa beˈennaadan teqqiyaaba gidikko shin? He wode xeeri uttida aginaayyo 30 gallassay deˈiyaabadan qofettees, hegaappe simmin kaalliya ooratta aginay doommees.

Eti ooratta aginay doommidoogaa erissanawu Yerusalaame matan deˈiya Dabira Zayte deriyaa  xeeran tamaa eettoosona. He oduwaa gattanawu Israaˈeela biittan hara xoqqa sohotu ubbankka tamaa eettoosona. Hegaappe simmin deˈiya wodetun, kiitaa yootiyaageeta kiittoosona. Yaatiyo gishshawu Yerusalaamen, Israaˈeela biitta ubbaaninne harasan deˈiya Ayhudati ooratta aginay doommidoogaa eroosona. Hegaappe guyyiyan, keerido gallassatun ubba asay baalata bonchchana danddayees.

Ibraawetu aginati, baalatinne wodeti waani gayttiyaakko akeekanaadan hagaara gayttida sanxxarazhee nena maaddana danddayees.