Geeshsha Maxaafay hegaabaa yootenna. SHin eti yan takkanaadan oottana danddayiya amaridabata Geeshsha Maxaafay yootees.

Mayraama shahaarada naˈa yelanaagaa issi kiitanchchay iyyo yootiis. Kiitanchchay ha kiitaa yootiyo wode, Mayraamanne Yooseefi Galiilan Naazireete giyo kataman deˈoosona. (Luq. 1:26-31; 2:4) Guyyeppe, eti Gibxxeppe simmiyo wode Naazireete biidosona. Yesuusi yan diccido gishshawu Naazireeta asa geetettiis. (Maa. 2:19-23) Yesuusabaa, Yooseefabaanne Mayraamibaa nuuni yootiyo wode Naazireetebaa qoppiyoy hegaassa.

Mayraamissi Yihudan deˈiya Elssaabeexo geetettiya dabbiyaa deˈawusu. Elssaabeexa qeesiyaa Zakkaariyaasa machchiyoonne Xammaqiya Yohaannisa aayyiyo. (Luq. 1:5, 9, 13, 36) Mayraama Elssaabeexo oychchanawu baada Yihudan heezzu agina iira takkaasu. Yaatada Naazireete guyye simmaasu. (Luq. 1:39, 40, 56) Mayraama Yihudaa heeraa eriyoy hegaassa.

Guyyeppe, ‘asa ubbay xaafettanaadan’ kiyida awaajjuwaa Yooseefi azazettiis. Yaatanawu Yooseefi Naazireeteppe Beetaliheeme biis; hegee ‘Daawita katamanne’ Masee yelettana geetettidi kasetidi odettida soho. (Luq. 2:3, 4; 1 Sam. 17:15; 20:6; Mik. 5:2) Mayraama yan Yesuusa yela simmin, Yooseefi iiranne yiira naˈaara Naazireete guyye simmanawu adussa ogiyaa manddaribeenna. Eti Yerusalaameppe uddufuna gidiya kilo meetire haakkiya Beetaliheemen takkidosona. Yaatiyo gishshawu, hegee eti yiira naˈaa beeta maqidasiyaa efaanawunne yarshshuwaa yarshshanawu injjetiya wode.—Wog. 12:2, 6-8; Luq. 2:22-24.

Mayraami naˈaayyo ‘Daawita kawotettay imettanaagaanne I kawotanaagaa’ Xoossaa kiitanchchay iyyo kasetidi yootiis. Geellaa, Yooseefinne Mayraama Yesuusi Daawita kataman yelettidoogee keehi koshshiyaaba giidi qoppidonaa? (Luq. 1:32, 33; 2:11, 17) Eti yan takkiyoogeenne eti kaallidi oottanaadan Xoossay koyiyoobaa akeekana gakkanaashin naagiyoogee loˈˈo giidi qoppennan aggokkona.

Xoolinttiyaa paydiya amaridaageeti gakkanaashin eti Beetaliheemen ay keena takkidaakko erokko. SHin he wode he so asay issi keettan deˈees; qassi eta “na7ai” yiira gidenna. (Maa. 2:11) Eti Naazireete simmiyoogaa aggidi, Beeteliheemen adussa wodiyaa takkidaba milatees.

“[Beetaliheemen] . . . de7iya naa77u laitta attuma naatanne qassi naa77u laittappe guuxxiya attuma naata ubbaa” woranaadan Heeroodisi azaziis. (Maa. 2:16) Issi kiitanchchay hegaabaa Yooseefawu yootido gishshawu, inne Mayraama Yesuusa ekkidi Gibxxe baqatidi Heeroodisi hayqqana gakkanaashin yan takkidosona. Guyyeppe, Yooseefi ba soo asaa ekkidi Naazireete biis. Eti Beetaliheeme simmibeennay aybissee? He wode Heeroodisa naˈay Arkkelawoosi, Yihudan haariyo gishshassanne I meqetta iita gidiyo gishshassa. Qassi Beetaliheeme biyoogee qohuwaa gattiyoogaa issi kiitanchay Yooseefawu zaarettidi yootido gishshaassa. Yooseefi Naazireeten Yesuusi Xoossawu tumu goynuwaa goynnanaadan oottidi saruwan dichchiis.—Maa. 2:19-22; 13:55; Luq. 2:39, 52.

Saluwaa biyo ogiyaa Yesuusi dooyanaappe kase Yooseefi hayqqennan aggenna. Yaaniyo gishshawu, Yooseefi saˈan deˈanawu denddana. Daroti aara gayttana; qassi inne Mayraama Yesuusi yeletti simmin Beetaliheemen takkidoy aybissakko appe gujjidi erana danddayoosona.