1-2. Mazamure 25:14y yootiyoogaadan, nuuni Yihoowaara dabbotaa minttanawu koyikko waatana koshshii?

 NEENI issi uraara laggetettaa kaseppe minttanawu koyikko, keehi koshshiya eeshshati awugeeta gaada qoppay? Loˈˈo laggeti issoy issuwaa siiqananne maaddana koshshees gaada zaarennan aggakka. Loˈˈo laggetettawu yashshay keehi koshshiya eeshshaa gaada neeni waaya qoppana. SHin ha huuphe yohoy ekettido xiqisee yootiyoogaadan, Yihoowaara dabbotaa minttana koyiya ubbay awu ‘yayyana’ koshshees.—Mazamure 25:14 nabbaba.

² Nuuni Yihoowawu haggaazido wode ay keena gidikkokka, nu ubbay A wozanappe bonchchana koshshees. SHin, Xoossawu yayyiyoogaa giyoogee woygiyoogee? Nuuni Yihoowawu yayyiyaageeta waani gidana danddayiyoo? Qassi Xoossawu yayyiyoogaa xeelliyaagan aawatettay deˈiyo Obaadiyaappe, Qeese Ubbatu Halaqaa Yoodaaheppenne Kawuwaa Yoˈaashaappe ay tamaarana danddayiyoo?

3. Yashshay nuna waati naagana danddayiyaakko qonccissa.

³ Qohana danddayiya amaridabaa nuuni qoppiyo wode yayyana danddayoos. Hegaa mala yashshay nuuni loˈˈobaa kuuyanaadan maaddiyo gishshawu, loˈˈo gidana danddayees. Kunddaneeshsha giidi yayyiyoogee nuuni aafuwaa doonan keehi matattidi hemettennaadan oottees. Qohettaneeshsha giidi yayyiyoogee nuuni iita hanotaappe baqatanaadan oottana danddayees. Nuuni siiqiyo uraara laggetido laggetettay moorettaneeshsha giidi yayyiyoogee iitabaa haasayennaadan woy oottennaadan diggana.

4. Asay Yihoowawu ay mala yashshaa yayyanaadan Seexaanay koyii?

 ⁴ Seexaanay asay Yihoowawu yashshan maashanaadan koyees. Seexaanay Yihooway ubbatoo hanqqettiyaabadan, nuna qaxxayanawu koyiyaabadaaninne nuuni A mule ufayssana danddayennabadan ammananaadan koyees. (Iyy. 4:18, 19) Nuuni haggaaziyoogaa Yihoowawu yashshan maashidi agganaadan Seexaanay koyees. Gidoppe attin, nuuni Yihoowa bonchchananne A azzanttennaadan yayyana koshsheesippe attin, yashshan maashana koshshenna.

5. Xoossawu yayyiyoogaa giyoogee woygiyoogee?

⁵ Xoossaa wozanappe bonchchiya uri A siiqeesinne aara dabbotido dabbotaa mooriya aybanne oottana koyenna. Yesuusi Xoossawu hegaadan ‘yayyiis.’ (Ibr. 5:7) I Yihoowawu yashshan maashibeenna. (Isi. 11:2, 3) SHin I Yihoowa wozanappe siiqiisinne awu azazettiis. (Yoh. 14:21, 31) Yihooway siiqiyaagaa, aadhdhida eranchchaa, suure pirddiyaagaanne wolqqaamaa gidiyo gishshawu, nuunikka Yesuusaagaadan A wozanappe bonchchoosinne awu bessiyaagaadan yayyoos. Nuuni Yihooway nuna keehi siiqiyoogaanne I tamaarissidobaa nuuni waati oosuwan peeshshiyaakko I qoppiyoogaa eroos. Nuuni Yihoowa hanqqetissana woy ufayssana danddayoos.—Maz. 78:41; Lee. 27:11.

6. Nuuni Xoossawu yayyiyaageeta gidanaadan maaddiya issi ogee aybee? (Mazamure 34:11)

⁶ Nuuni Yihoowawu yayyiya asa gididi yelettibookko; yaatiyo gishshawu awu yayyanawu baaxetana koshshees. (Mazamure 34:11 nabbaba.) Nuuni yaatana danddayiyo issi ogee meretaabaa loytti qoppiyoogaa. Xoossay ‘medhdhidobatun’ qonccida A aadhdhida eratettaa A wolqqaanne I nuna keehi siiqiyoogaa nuuni akeekiyo wode A wozanappe bonchchoosinne siiqoos. (Roo. 1:20) Adriino giyo michchiyaa hagaadan gaasu: “Meretan qonccida Yihoowa aadhdhida eratettaa taani beˈiyo wode, maalaalettays; qassi hegee taassi keehi loˈˈobay aybakko I eriyoogaa akeekanaadan tana maaddees.” A hegaabaa ubbatoo wotta dentta qoppiyo gishshawu hagaadan gaasu: “Tawu deˈuwaa immida Yihoowaara dabbotido dabbotaa mooriya aybanne oottana koyikke.” Meretaabaa qoppanawu ha saaminttan neeni amarida wodiyaa bazzana danddayay? Yaatiyoogee neeni Yihoowa wozanappe bonchchanaadaaninne siiqanaadan oottana.—Maz. 111:2, 3.

7. Nuuni Yihoowa wozanappe bonchchanadan woosay waati maaddana danddayii?

⁷ Nuuni kaseppe aaruwan Xoossaa yayyiyaageeta gidanaadan maaddiya hara ogee ubbatoo woossiyoogaa. Nu ubbatoo Yihoowa woossikko, A loytti erana. Genccanawu Yihooway nuussi wolqqaa immanaadan woossiyo wode ubban I keehi wolqqaama gidiyoogaa hassayoos. Yihooway ba naˈaa nuussi immido gishshawu nuuni A galatiyo wode I nuna keehi siiqiyoogaa akeekoos. Nuuni metuwaa genccanawu Yihooway maaddanaadan mintti woossiyo wode I aadhdhida eranchcha gidiyoogaa hassayoos. Hegaa mala woossay nuuni kaseegaappe aaruwan Yihoowa bonchchanaadan oottees. Qassi hegee nuuni aara dabbotido dabbotaa mooriya aybippenne naagettanawu murttido murttiyaa yaa minttees.

8. Ubbatoo Xoossawu yayyiyaageeta gidanawu waatana danddayiyoo?

⁸ Geeshsha Maxaafan etabay odettido loˈˈobaa oottidaageetunne iitabaa oottidaageetu taarikiyaa eranawu xannaˈiyoogee nuuni ubbatoo Xoossawu yayyiyaageeta gidanaadan maaddees. Yihoowawu ammanettidi haggaazida naaˈˈu ashkkaratubaa ane beˈoos; hegeetikka Kawuwaa Akaaba keettan aawatettay  deˈiyo Obaadiyaanne Qeese Ubbatu Halaqaa Yoodaaha. Yaatidi, koyro loytti haggaaziyaaba gidikkokka guyyeppe Yihoowa aggida, Yihudaa Kawuwaa Yoˈaashappe nuuni tamaarana danddayiyoobaa beˈana.

9. Obaadee Yihoowawu yayyidoogee A waati maaddidee? (1 Kawotu Maxaafaa 18:3, 12)

⁹ Geeshsha Maxaafay Obaadiyaabaa koyro yootiyo wode hagaadan gees: ‘Obaadee Yihoowayyo keehi yayyiya asa.’ (1 Kawotu Maxaafaa 18:3, 12 nabbaba.) Obaadee wozanappe yayyidoogee A waati maaddidee? Hegee I tumanchchanne ammanettiyaagaa gidanaadan oottiis; hegaa gishshawu kawoy A kawo keettan sunttiis. (Nahimiyaa 7:2ra gatta xeella.) Obaadee Xoossawu yayyidoogee assi tumuppe koshshiya eeshshaa, hegeekka maalaalissiya xalatettaa bessanaadan oottiis. I iita kawoy Akaabi haariyo wodiyan deˈiis; Akaabi “baappe kase wode de7ida kawotu ubbatuugaappekka aadhdhiya iitabaa GODAA sinttan oottiis.” (1 Kaw. 16:30) Qassi kawuwaa Akaaba machchiyaa, Baˈaalawu goynniya Elzzaabeela Yihoowa keehi ixxiyo gishshawu huuphessa kawotettaappe tumu goynuwaa xayssanawu baaxetaasu. A Xoossay kiittin hananabaa yootiya darotakka worissaasu. (1 Kaw. 18:4) Obaadee wayssiya wodiyan Yihoowawu haggaazidoogee qoncce.

10. Obaadee keehi xala gididoogaa waati bessidee?

¹⁰ Obaadee keehi xala gididoogaa waati bessidee? Elzzaabeela Xoossay kiittin hananabaa yootiyaageeta worissanawu koyido wode Obaadee etappe 100 ekkidi qumaa miziiddinne haattaa ushshiiddi ‘ishatama ishatamaa gonggoluwan qottiis.’ (1 Kaw. 18:13, 14) Obaadee oottidobaa Elzzaabeela eridaba gidiyaakko, akka worissanawu danddayawusu. Obaadee keehi yayyennan aggenna, qassi hayqqanawu koyenna. SHin, Obaadee baappe aaruwan Yihoowanne awu haggaaziyaageeta siiqiis.

11. Ha wodiyan Yihoowa ashkkarati Obaadiyaa mala gidiyoy aybiinee? (Misiliyaakka xeella.)

¹¹ Ha wodiyan Yihoowa ashkkaratuppe daroti nu oosoy muleera digettido biittatun deˈoosona. Obaadiyaagaadan, ha siiqo ishanttinne michchontti kawotetta sunttata ubbatoo bonchchikkonne Yihoowawu aggennan goynnoosona. (Maa. 22:21) Eti asawu azazettiyoogaappe aaruwan Xoossawu azazettiyoogan  Xoossawu yayyiyoogaa bessoosona. (Oos. 5:29) Eti geeman ubbatoo sabbakoosonanne issippe shiiqoosona. (Maa. 10:16, 28) Eti bantta ishanttinne michchontti Yihoowa dabbo gididi deˈanaadan koshshiyaabaa demmana mala baaxetoosona. Issi wode nu oosoy muleera teqettido Afirkkan issi biittan deˈiya Heneera hanotaa beˈa. He wode Heneeri ba mala Kiristtaanetussi Geeshsha Maxaafaa qofay deˈiyo xuufeta ba dosan gattees. I hagaadan giis: “Taani dungguuxa. Hegaa gishshawu, taani Yihoowa wozanappe bonchchidoogee tawu koshshiya xalatettaa demmanaadan oottidoogaa ammanettays.” Neeni Heneeraagaadan xala gidana danddayiyaabadan qoppay? Neeni Xoossaa wozanappe bonchchikko hegaadan xala gidana danddayaasa.

12. Qeese Ubbatu Halaqaa Yoodaaheenne A machchiyaa Yihoowawu loytti ammanettiyoogaa waati bessidonaa?

¹² Qeese Ubbatu Halaqaa Yoodaahee Yihoowawu yayyidoogee ammanettiyaagaa gidanaadaaninne harati Yihoowawu goynnana mala minttettanaadan oottiis. Elzzaabeeli naˈiyaa Ataala wolqqan Yihudan kawotido wode hegee qoncciis. Asay Ataaliyyo yashshan maashees. A meqetta iita gidiyo gishshawunne kawiyo gidanawu keehi amottido gishshawu, kawotanaayyo ba naatu naata ubbaa worissanawu malaasu! (2 Odi. 22:10, 11) Yoodaahe machchiyaa Yihoshebaaˈa qottido gishshawu he naatuppe Yoˈaashi attiis. Yihoshebaaˈanne I keettaaway he naˈaa qottidi awu koshshiyaabaa kunttidosona. Yaatiyoogan Yoodaaheenne Yihoshebaaˈa Daawita zerettaappe kawo gidana danddayiya issi uri xayennaadan oottidosona. Yoodaahee Yihoowawu ammanettido gishshawu, suurebaa oottiyoogaa Ataaliyyo yayyidi aggibeenna.—Lee. 29:25.

13. Yoˈaashawu layttay laappuna gidido wode Yoodaahee Yihoowawu ammanettiyoogaa zaarettidi bessidoy ayba ogiyaanee?

¹³ Yoˈaashawu layttay laappuna gidido wode, Yoodaahee Yihoowawu ammanettiyoogaa zaarettidikka bessiis. I issibaa halchchiis. He halchchoy polettikko, Daawita zare gidida Yoˈaashi kawotana. SHin, he halchchoy polettennan aggikko, Yoodaahee ba shemppuwaa xayana danddayees. Yihooway maaddin, he halchchoy polettiis. Halaqatinne Leewati maaddin Yoodaahe Yoˈaasha kawoyiisinne Ataalo worissiis. (2 Odi. 23:1-5, 11, 12, 15; 24:1) Hegaappe guyyiyan, Yoodaahee “asai GODAA asa gidana mala, . . . kawoinne asainne GODAARA maachchaa maacettana mala oottiis.” (2 Kaw. 11:17) “Higgiyan xaafettidoogaadan tuna asi issoinne gelennaadan Yoodaahee GODAA Beeta Maqidasiyaa penggen naagiyaageeta wottiis.”—2 Odi. 23:19.

14. Yoodaahee Yihoowa bonchchidoogan waani bonchchettidee?

¹⁴ Yihooway kasetidi hagaadan giis: “Tana bonchchiyaageeta taani bonchchana.” Yihooway Yoodaaha anjjiis. (1 Sam. 2:30) Leemisuwawu, I nuna tamaarissanawu Yoodaahe oottido loˈˈo oosoy xaafettanaadan oottiis. (Roo. 15:4) Qassi Yoodaahe hayqqido wode, “Israa7eelan Xoossaayyoonne Xoossaa Beeta Maqidasiyaayyo lo77obaa oottido gishshau, Daawita Kataman kawotu makkaanan” moogettiyoogan keehi bonchchettiis.—2 Odi. 24:15, 16.

15. Yoodaahebaa yootiya taarikiyaappe nuuni ay tamaarana danddayiyoo? (Misiliyaakka xeella.)

¹⁵ Yoodaahebaa yootiya taarikee nuuni ubbay Xoossawu yayyiyaageeta gidanaadan maaddana danddayees. Cimati gubaaˈiyaa naaganawu baaxetiyoogan Yoodaahee leemisuwaa kaallana danddayoosona. (Oos. 20:28) Layttan cimidaageeti Yihoowawu yayyiyo wodenne awu ammanettidi deˈiyo wode, I ba halchchuwaa  polanawu etan goˈettana danddayiyoogaa Yoodaaheppe tamaarana danddayoosona. I eta aggibayenna. Yelagati Yihooway Yoodaaha waati oyqqidaakko akeekana danddayoosona; layttan cimida ishanttanne michchontta, ubba qassi Yihoowawu daro layttaa haggaazidaageeta bonchchiyoogan A milatana danddayoosona. (Lee. 16:31) Wurssettan, Yoodaaha maaddida halaqatuppenne Leewatuppe nuuni ubbaykka tamaarana danddayoos. ‘Kaaletuwaa immiyaageetuyyo azazettiyoogan’ ammanettidi eta kaafiyaageeta gidoos.—Ibr. 13:17.

16. Kawuwaa Yoˈaashi iita gididoogaa bessiyaabi aybee?

¹⁶ Kawuwaa Yoˈaashi loˈˈo asa gidanaadan Yoodaahee maaddiis. (2 Kaw. 12:2) Hegaappe denddidaagan, he yelaga kawoy Yihoowa ufayssanawu koyiis. SHin, Yoodaahe hayqqi simmin Yoˈaashi kaddida halaqati yootiyoobaa siyiis. Hegee ay kaalettidee? Inne I haariyoogeeti “Asheeri misiletuyyoonne eeqatuyyo goinnidosona.” (2 Odi. 24:4, 17, 18) Yihooway hegan azzanikkokka, “asai baakko simmanaadan . . . hananabaa yootiyaageeta etakko kiittiis; . . . shin eti siyennan ixxidosona.” Eti Yoodaahee naˈay Zakkaariyaasi b yootiyoobaa siyennan ixxidosona. Zakkaariyaasi Yihooway kiittin hananabaa yootiyaagaanne qeese xalla gidennan, Yoˈaashassi aawaa michchee naˈa. Zakkaariyaasantta so asay Yoˈaasha shemppuwaa  ashshidaba gidikkokka, Kawuwaa Yoˈaashi Zakkaariyaasa worissiis.—2 Odi. 22:11; 24:19-22.

17. Yoˈaashi waanidee?

¹⁷ Yoˈaashi Yihoowa wozanappe bonchchibeenna gishshawu, A iitabay gakkiis. Yihooway hagaadan giis: “Tana kariyaageeta taani kaushshana.” (1 Sam. 2:30) Guyyeppe, “qoodan guutta” gidida Sooriyaa olanchchati “keehi daro gidida” Yoˈaasha olanchchata xoonidosonanne A ‘keehippe masunxxissidosona.’ Sooriyaa olanchchati aggidi bi simmin, Yoˈaasha ashkkarati I Zakkaariyaasa wurssido gishshawu, A woridosona. He kawoy keehi iita gidiyo gishshawu, ‘kawotu makkaanan moogettana’ bessenna giidi asay qoppiis.—2 Odi. 24:23-25.

18. Ermmaasa 17:7, 8y yootiyoogaadan, nuuni Yoˈaasha mala gidiyoogaappe waani naagettana danddayiyoo?

¹⁸ Yoˈaasha taarikiyaappe nu ay tamaarana danddayiyoo? I biittaa giddo xaphuwaa loytti yeddibeenna tuuqettidi eqqida mittaa mala. A maaddiya Yoodaahee hayqqi simmin Yoˈaashi kaddidaageeti yootiyoobaa siyiyoogaa doommido gishshawu, Yihoowawu ammanettiyoogaa aggiis. Nuuni Xoossawu azazettanaadan nu so asaynne gubaaˈiyan deˈiya harati leemiso gidiyo gishsha xallawu Xoossawu azazettana koshshennaagaa ha taarikee bessees. Nuuni Yihoowa dabbo gididi deˈanawu ubba wode xannaˈiyoogan, wotti dentti qoppiyoogaaninne woossiyoogan kaseegaappe aaruwan A siiqananne bonchchana koshshees.—Ermmaasa 17:7, 8 nabbaba; Qol. 2:6, 7.

19. Nuuni oottanaadan Yihooway koyiyoobay aybee?

¹⁹ Yihooway nuuni danddayiyoogaappe aarobaa oottanaadan koyenna. Eranchchaa 12:13y I nuuppe koyiyoobaa qonccissees; hagaadan gees: “Xoossaassi yayya; a azazuwaa naaga. Aissi giikko, hegee asassi waanna ooso.” Nuuni Xoossawu yayyikko, sinttappe haniyaabay ayba gidinkka, Obaadiyaagaadaaninne Yoodaaheegaadan Yihoowawu ammanettidi deˈoos. Nuuni Yihoowaara dabbotido dabbotaa aybinne moorana danddayenna.