Tana yelidaageeti Naaˈˈantto Alamiyaa Olaa wode Isttooniyaappe Jarmane biidosona; qassi taani yan yelettaas. Taani yeletta simmin eti Kanaada baanawu giigettiyoogaa doomidosona. Kanaadan Otawa heeran, nu koyro keettay kuttotikka deˈiyo guutta keetta. Nuuni keehi hiyyeesa gidikkokka, baa giishin qanˈˈiyaawu phuuphulliyaa demmoos.

Issi galla, Yihoowa Markkati ta aayeessi Ajjuutaa 21:3, 4 nabbabidosona. A hegaa erido wode keehi ufayttada yeekkiyoogaa doommaasu. Ta aayyiyaanne ta aaway Geeshsha Maxaafaa aggennan xannaˈidi xammaqettanawu sohuwaara giigettidosona.

Tana yelidaageeti Inggilizettuwaa loytti akeekana xayikkonne, eti minnidi Yihoowawu haggaazidosona. Qeeraa ubbatoo, Ontariyon, Sudburin deˈiya birataa seerissiya paabirkkan kumetta qamma ootti simmidikka ta aaway tananne ta kalo michchiyo Silvo haggaazuwaa ekkidi kiyees. Qassi nuuni soo asaara saaminttan saaminttan Wochchiyo Keelaa xannaˈoos. Tana yelidaageeti taani Xoossaa siiqanaadan loytti tamaarissidosona. Hegaa gishshawu 1956n tawu layttay tamma gidin tana Yihoowawu sheedhdhanawu kuuyaas. Eti Yihoowa keehi siiqiyoogaa taani qoppido wode ubban awu aggennan haggaazanawu minettays.

Naaˈˈantto xekkaa timirttiyaa wurssin ta qofay shaahettiis. Taani aqinye gidikko horophilliyan baada alamiyaa beˈanawu halchchido halchchuwawu gidiya miishshaa mule demmana danddayikke gaada qoppaas. Taani nu heeran deˈiya eraadoone xaabiyan muuziqaa sissiyo oosuwaa demmaas; he oosuwaa dosays. SHin omarssi omarssi oottiyo gishshawu darotoo shiiqota shiiqikke, qassi Xoossaa siiqennaageetuura laggetaas. Wurssettan, Geeshsha Maxaafaa maaran loohida ta kahay taani laamettanaadan denttettiis.

Taani Ontariyon Oshawa giyoosaa baas. Yan Ray Normanaara, A michchee Lesliiranne hara aqinyetuura gayttaas. Ubbaykka tana dosidosona. Eti keehi ufayttiyoogaa beˈiyoogee ta halchchuwaa zaarettada yigganaadan maaddiis. Taani aqinye gidanaadan eti tana minttettidosona, yaatin Masqqala 1966n aqinye gidaas. Taani ufayttaasinne loˈˈo deˈuwaa deˈaas. SHin qoppennan merettidabay ta deˈuwaa laammiis.

Naaˈˈantto xekkaa timirttiyaa tamaariyo wode, Kanaadan Torontton deˈiya Beeteelen haggaazanawu qitsiyaa kunttaas. Guyyeppe aqinye gidada haggaaziyo  wode, Beeteelen oyddu layttawu oottanaadan shoobettaas. SHin taani Leslo keehi siiqido gishshawu he shoobiyaa ekkikko iira zaarettada mule gayttikkinaashsha gaada yayyaas. Taani wozanappe adussa saatiyaa woossa simmada, Beeteelen haggaazanawu kuuyaas, shin Leslippe shaahettiyoogan keehi azzanaas.

Taani Beeteelen maayuwaa meecciyoosan oottaas, qassi guyyeppe xaafe gidaas. He wode Lesla Kuwibeken Gatiniwu giyoosan dumma aqinye gidada haggaazawusu. A oottaydda deˈiyoobaanne taani likkebaa kuuyidanaashsha gaada darotoo qoppays. Guyyeppe ta deˈuwan keehi maalaalissiyaabay haniis. Lesli ishay Rayi Beeteele shoobettiis. I tanaara issi kifiliyan deˈiyoogaa doommiis! Hegaa gaasuwan Lesliira laggetettaa zaarettidi minttida. Taani Beeteelen haggaazido oyddantta layttaa wurssetta gallassan, Usuppune 27, 1971n nuuni aqo oyqqida.

Leslanne taani Kuwibeken Paranssaayetto qaalaa goˈettiya gubaaˈiyan haggaazanaadan maddabettida. Amarida layttaappe simmin, tawu layttay 28 gidido wode woradaa xomoosiyaagaa gidada haggaazanaadan shoobettidoogan keehi maalaalettaas. Woradaa xomoosiyaagaa gidanawu taani keehi yelaga, qassi tawu daro meezee baa gaada qoppaas; shin Ermmaasa 1:7, 8n deˈiya qofay tana keehi minttettiis. Gidikkokka, kaamiyaa daafay Leslo naaˈˈutoo gakkiis, qassi A xiskkanawukka metootawusu. Hegaa gishshawu woradaa oosuwaa oottiyoogee nuussi keehi metiyaaba giidi qoppida. Gidoppe attin, A hagaadan gaasu, “Nuuni issibaa oottanaadan Yihooway shoobbikko, hegaa oottanawu baaxetana koshshees.” Nuuni he aawatettaa ekkidi 17 layttawu yuuyidi xomoosiyo oosuwaa oottida.

Woradaa xomoosiyaagaa gidada oottiyo wode tawu oosoy darees, qassi taani Lesliira aattiyo gidiya wodee darotoo tawu baawa. Taani harabaakka tamaarana koshshiis. Saynno galla maallado penggiya dawalee waassiis. Yan asi baa, shin allaxxanawu biyo wode efiyo zambbile malaban xaraphpheezzaa mayzziyoobay, mittaa ayfee, pilay, daabboy, xaaramusiyan deˈiya woynee, burccukkoy, qassi “Ne keettayiyo allaxxiyoosaa efa” giya ooni xaafidaakko erettenna masttooshay deˈees. Saˈay booqalssa gidiyo gishshawu keehi loˈˈees. SHin taani haasayaa giigettana koshshido gishshawu baana danddayennaagaa iyyo yootaas. A ta hanotaa akeekikkonne, guuttaa azzanaasu. Taani xaraphpheezzaa matan uttidaashin ta kahay qumˈˈiyoogaa doommiis. Taani Efisoona 5:25, 28y yootiyoobaa qoppaas. Ta machchiyaa koyiyoobaa ta akeekanaadan Yihooway ha xiqisiyaa baggaara tana minttettiis. Taani woossa simmada Leslo, “Hindda boos” yaagaas, yaatin A keehi ufayttaasu. Nuuni loˈˈiya shaafaa doona biidi xaraphpheezzaa mayzziyo carqqe malabaa hiixxidi yan issippe ufayssiya wodiyaa aattida. Qassi ta haasayaakka giigettaas.

Woradaa oosoy ufayssiyaagaa, qassi keehi daro; hegee British Kolombbiyaappe biidi Niwufawundlandde gakkanaashin deˈiyaagaa. Taani hara  biitti baanawu halchchido halchchoy polettiis. Taani Giiliyaade Timirtte Keettan tamaaranawu qoppikkokka, misoonaawe gidada hara biitti baanawu koyabeykke. Misoonaaweti dumma asa tawu milatido gishshawu, misoonaawe gidana danddayikke gaada qoppaas. Qassi harggeenne olay darido Afirkka biittatuppe issuwaa nuna kiittaneeshsha gaada yayyaas. Kanaadan deˈiyoogan ufayttays.

Yihoowa Markkati 1992n Sooveete haaruwan deˈiya amarida biittatun zaarettidi sooppe soo biidi sabbakana danddayidosona. Hegaa gishshawu misoonaawe gididi Isttooniyan haggaazanawu koyiyaakkonne ishantti nuna oychchidosona. Nu maalaalettikkokka hegaabaa woossida. ‘Yihooway nuuni issibaa oottanaadan shoobbikko hegaa oottanawu baaxetana koshshees’ giidi zaaretti qoppida. Nu he aawatettaa ekkida, qassi Afirkka biitti beennaagan keehi ufayttaas.

Nuuni sohuwaara Isttooniyaa doonaa tamaariyoogaa doommida. He biittan naaˈˈu aginaappe simmin woradaa oosuwawu shoobettida. Isttooniyan, Laativiyan, Litiweeniyaaninne Raashiyaa Kaaliningraaden deˈiya 46 gubaaˈetanne citata xomoosoos. Yaatiyo gishshawu Laativiyaa, Litiweeniyaanne Raashiyaa qaalaa amaridabaa meezetanawu baaxetida. Hegee deexxiyaaba. SHin, ishanttinne michchontti nuuni eta qaalaa meezetanawu baaxetiyoogan keehi ufayttidosona, qassi nuna maaddidosona. Isttooniyan 1999n macara biiroy eqqiis, qassi taani Toomas Eduuraara, Lembit Rilaaranne Toomi Kawukoora macara biiruwaa kontte gidada haggaazanaadan sunttettaas.

Kase wolqqan Saybeeriyaa efiido daro Yihoowa Markkata nuuni erida. Qasho keettan eta qohoy gakkikkokka, qassi so asaappe eti shaahettikkokka hanqqettibookkonanne lanccibookkona. Eti ubbatoo ufayttoosonanne minni haggaazoosona. Waayissiya hanotay deˈishinkka, nuuni genccananne ufayttana danddayiyoogaa etappe tamaarida.

Nuuni daro layttawu minni oottido gishshawunne daro shemppibeenna gishshawu Lesla keehi xalalaasu. O xalalissiyaabay faybromayalzhiya geetettiya sahuwaara gayttidaba gidiyoogaa sohuwaara akeekibookko. Nuuni Kanaada simmanawu keehi koyida. Amarkkaa, Niwu Yorken, Patersenen hara loohissuwawu shoobettido wode, loohissuwaa ekkana danddayoos gaada qoppabeykke. SHin mintti woossi simmidi he shoobiyaa ekkida. Nuuni kuuyidobaa Yihooway anjjiis. Tamaariyo wode Lesla bawu koshshiya akkamuwaa wurssettan akkamettaasu. Yaatin nuuni zaarettidi kaseegaadan oottana danddayida.

Nuuni Isttooniyaa simmin 2008n issi omarssan, waanna biiruwaappe silkkiyaa dawalidi nuuni Kongon haggaazana danddayiyaakkonne oychchidosona. Hegaa zaaruwaa kaalliya gallassi zaarana koshshido gishshawu hirggaas. Lesliyyo hegaa yootikko he galla qammi A xiskkennaagaa ta eriyo gishshawu yootabeykke. Afirkka buussaara gayttidaagan tana qofissidabaa woossaydda xiskkennan aqaas.

 Kaalliya gallassi taani Lesliyyo yootido wode, “Yihooway nuuni Afirkka baanaadan shoobbees. Nuuni malana xayikko hegaa oottananne hegan ufayttana danddayennaagaa waati eriyoo?” giidi qoppida. Isttooniyan 16 layttaa deˈi simmidi, Kongo Kinshaasa biida. Macara biiroy deˈiyoy keehi loˈˈiya ciishshati deˈiyo woppu giidasaa. Lesla nu kifiliyan koyro wottidobatuppe issoy Kanaadappe kiyoosappe doomidi I matan deˈiya karddiyaa. He karddiyan xaafettidabay “Ne deˈiyoosan ufaytta” yaagees. Ishanttuura shiiqi simmidi, Geeshsha Maxaafaa xinaateta xannaˈissi simmidi, hegaa mala misoonaawetettaa oosoy keehi ufayssiyoogaa akeeki simmidi nuuni Yihoowa haggaazuwan kaseegaappe aaruwan ufayttida. Guyyeppe, nuuni Afirkkan 13 macara biirota xomoosiyo aawatettaa demmida. Hegee ufayttiya dumma dumma asaara nuuni gayttanaadan oottiis. Kase taani yayyiyo yashshay attiis, qassi Afirkkan haggaazanaadan nuna kiittido gishshawu Yihoowa galatoos.

Kongon, dumma dumma qumaa nuussi shiishshidosona; hegeetuppe amaridaageeta nuuni dosana gaada qoppabeykke. SHin nu ishantti hegaa miyoogaa beˈido wode nuunikka maanawu malida; yaatidi hegaa dosida.

Nu ishantta minttettanawunne etawu koshshiyaabaa immanawu he biittan arshsho baggi biida. He sohotun qosan olettiyaageeti heeran qohuwaa gattoosona, qassi maccaasatanne guutta naatakka qohoosona. He ishanttuppe darotussi aqoy guutta. Gidikkonne, eti dendduwaa hidootan mintti ammaniyoogee, Yihoowa siiqiyoogeenne A dirijjitiyawu ammanettiyoogee nuna keehi minttettiis. Eta hanotay nuuni Yihoowawu haggaaziyoonne an mintti ammaniyo gaasuwaa loytti qoppanaadan oottiis. Nu ishanttuppe amaridaageetu keettay muleera xayssiisinne eta kattay wuuqettiis. Hegee nuussi deˈiya aqoy nuuni qoppennan sohuwaara xayana danddayiyoogaanne keehi koshshiyaabay nuuni Yihoowaara dabbotido dabbotaa gidiyoogaa tana hassayissiis. Wolqqaama metoy gakkikkokka, ishantti darin zuuzummokkona. Eta qofay nuuni nu metuwaanne sahuwaa xalatettan genccanaadan maaddiis.

Guyyeppe hara maalaalissiyaabay haniis. Nuuni Hong Konge macara biiruwaa baanaadan shoobettida. Isiyan deˈanawu mule qoppi erokko! SHin nuussi  imettida hara aawatettaa ubban Yihooway nuna siiquwan maaddidoogaa akeekido gishshawu, he shoobiyaa ekkida. Sinttappe hananabaa erana xayikkokka, 2013n nu ishanttuppenne michchonttuppe yeekkiiddi shaahettida; qassi loˈˈiyaa Afirkka biittaa aggidi biida.

Hong Kongen, kumetta saˈaappe yiida daro asay deˈiyo gishshawu, yan deˈiyoogee nuussi gita laame. CHaynatto qaalaa tamaariyoogee metiyaaba. Gidikkonne, ishantti nuna ufayssan mokkidosona, qassi he biittaa qumaa dosida. Macara biiruwan keehi daro oosoy oosettees; shin he wode biittaanne keettaa waagay keehi alˈˈiis. Hegaa gishshawu Oosuwaa Kaalettiya Citay he macara biiroy goˈettiyoobaappe dariya baggaa bayzzanawu akeekan kuuyiis. Hegaappe simmin darin takkennan, 2015n nuuni Tohossa Kooriyaa biidi, yan haggaaziyoogaa doommida. Nuuni hara waayissiya qaalaa tamaarana koshshiis; qassi Kooriyaa qaalaa loytti haasayana xayikkokka, ishanttinne michchontti nuuni he qaalaa meezetiiddi deˈiyoogaa yootiyoogan nuna minttettoosona.

Ooratta laggeta demmiyoogee issi issitoo metiyaaba gidikkonne, kasetidi harata imatuwaa mokkiyoogan asaara eesuwan erettana danddayida. Ishantta dummayiyaabaappe aaruwan issi mala oottiyaabay deˈiyoogaanne nuuni nu wozanaa dooyidi daro laggeta siiqanaadan oottidi Yihooway nuna maalaalissiya ogiyan medhdhidoogaa akeekida.—2 Qor. 6:11.

Nuuni Yihoowaagaadan asaa mokki ekkana koshshiyoogaa, Yihooway nuna siiqiyoogaanne nuussi kaaletuwaa immiyoogaa bessiyaabaa akeekida. Nuuni hidootaa qanxxiyo wode woy ishanttinne michchontti nuna dosidaakkonne siriyo wode ubban laggeti kiittido minttettiya karddeta woy dabddaabbeta zaarettidi nabbaboos. Yihooway nu woosaa zaariyoogaa, nuna siiqiyoogaanne nuussi wolqqaa immiyoogaa beˈida.

Nuussi oosoy darikkokka, issippe wodiyaa aattiyoogee keehi koshshiyaaba gidiyoogaa Leslanne taani daro layttawu akeekida. Nuuni ooratta qaalaa tamaaranawu baaxetiyo wode baliyooban miiccana koshshiyoogaakka akeekida. Qassi nuuni ubba galla qammi Yihoowa galatana danddayiyo ufayssiyaabaa qoppanawu maloos.

Tumaa yootanawu, taani misoonaawe gidanawu woy hara biittan deˈanawu mule qoppa erikke. SHin ubbabay Yihooway maaddin waani polettiyaakko eriyoogan keehi ufayttays. Hananabaa yootiya Ermmaasi giidobaa hassayaas: “Abeet GODAU, neeni tana cimmadasa.” (Erm. 20:7) Ee, I nuussi maalaalissiya darobaa oottiisinne qoppibeenna anjjuwaa immiis; haray atto taani horophilliyan baanawu keehi amottidoogaakka poliis. Taani naatettan qoppidoogaappekka aaruwan daro biittatun deˈiya macara biirota xomoosanawu horophilliyan daro sohota biida. Qassi nuussi imettida aawatettaa ubban Lesla ufayssan tana maaddido gishshawu keehi galatays.

Nuuni ubbabaakka Yihoowa siiqidi oottiyoogaa muletoo hassayanawu baaxetoos. Nuuni ha wodiyan demmiyo anjjoy Yihooway ba ‘kushiyaappe yeggidi paxa deˈiyaageetu ubbaa amuwaa aliyo’ merina deˈuwawu xeera beso.—Maz. 145:16.