1-2. Hagaappe kasetiya huuphe yohuwan nuuni ay tamaaridoo, qassi nuuni ha huuphe yohuwan ay tamaaranee?

HAGAAPPE kasetiya huuphe yohuwan, Wogaabaa shemppo 19ppe maaddiya amarida zoriyaa beˈida. Leemisuwawu, paydo 3n, Yihooway Israaˈeelati banttana yelidaageeta bonchchanaadan yootidoogaa nabbaboos. Nuna yelidaageeta koshshiyaaban maaddiyoogan, eta minttettiyoogaaninne eti Yihoowaara dabbotidi deˈanaadan maaddiyoogan he zoriyaa ha wodiyan nuuni waati oosuwan peeshshana danddayiyaakko beˈida. He payduwankka, Xoossay ba asay Sambbataa bonchchanaadan yootiis. Ha wodiyan nuuni Sambbataa higgiyaa azazettana koshshennaagaa tamaaridaba gidikkonne, nuuni galla galla Yihoowawu oottanawu wodiyaa bazziyoogan he maaraa oosuwan peeshshana danddayoos. Yaatiyoogan, Wogaabaa 19:2ynne 1 PHeexiroosa 1:15y yootiyoogaadan nuuni geeshsha gidanawu baaxetiyoogaa bessoos.

² Ha huuphe yohuwan nuuni Wogaabaa shemppo 19ppe hara paydota beˈana. Bollan qohoy deˈiyoogeetussi qarettiyoogaa xeelliyaagan, zalˈˈiyaara gayttidaagan tumanchcha gidiyoogaa xeelliyaagaaninne haratussi siiquwaa bessiyoogaa xeelliyaagan ha shemppuwaappe nuuni ay tamaaranee? Xoossay geeshsha gidiyo gishshawu nuuni geeshsha gidanawu koyoos; yaakko nuuni tamaarana danddayiyoobaa ane beˈoos.

3-4. Wogaabaa 19:14y Israaˈeelati tulleta woy qooqeta waati oyqqana koshshiyoogaa yootii?

³ Wogaabaa 19:14 nabbaba. Bollan qohoy deˈiyoogeetussi ba asay qarettanaadan Yihooway koyees. Leemisuwawu, Israaˈeelati tulliyaa qanggennaadan I yootiis. He qanggettay yashissiyoogaa  woy abaa iitabaa haasayiyoogaa gidana danddayees. Hegee tulle bitanee keehi qohettanaadan oottees! Abaa haasayiyoobaa I siyana danddayeenna gishshawu I zaarana danddayeenna.

⁴ Qassi, Xoossay ba ashkkarati ‘qooqiyaa sinttan xubbiyaabaa wottennaadan’ paydo 14n yootiis. Bollan qohoy deˈiyoogeeta xeelliyaagan issi maxaafay hagaadan gees: “Beni Israaˈeelan asay eta bolli bessennabaanne meqetti baynnabaa darotoo oottees.” Meqetti baynna uri qooqe ura qohanawu woy A bolli miiccanawu koyiyo gishshawu, A sinttan issibaa wottana danddayees. Hegee keehi iitaba! Paydo 14n deˈiya higgee bollan qohoy deˈiyoogeetussi Yihoowa asay qarettana koshshiyoogaa akeekanaadan eta maaddiis.

5. Bollan qohoy deˈiyoogeetussi qarettiyoogaa waati bessana danddayiyoo?

⁵ Bollan qohoy deˈiyoogeetussi Yesuusi qarettiis. I Xammaqiya Yohaannisawu kiittidobaa hassaya: “Qooqeti xeelloosona; wobbeti hemettoosona; inchchirichchai oiqqidoogeeti paxoosona; tulleti siyoosona; haiqqidaageeti denddoosona.” Yesuusi oottido maalaalissiyaabata eti beˈi simmin, ‘asay ubbay Xoossaa galatiis.’ (Luq. 7:20-22; 18:43) Kiristtaaneti Yesuusa milatanawu koyiyo gishshawu bollan qohoy deˈiyoogeetussi qarettoosona. Yaatiyo gishshawu, nuuni hegaa mala asatussi qarettoosinne eta danddayoos. Yesuusaagaadan nuuni maalaalissiyaabata oottanaadan Yihooway nuussi wolqqaa immibeenna. SHin xeellanawu danddayennaageeta woy ayyaanaaban qooqe gididaageeta gujjin, asa ubbay gannattiyan wottiyoobi baynnaagaa gidanaagaanne Xoossaara mata dabbotettay deˈanaagaa xeelliyaagan mishiraachchuwaa haratussi yootiyo gita matay nuussi deˈees. (Luq. 4:18) Ha mishiraachchoy daroti Xoossaa sabbanaadan maaddiiddi deˈees.

6. Tammu Azazota loytti akeekanawu Wogaabaa shemppo 19y nuna waati maaddii?

⁶ Wogaabaa shemppo 19n deˈiya amarida paydoti Tammu Azazotun odettidabata gujji qonccissoosona. Leemisuwawu, hosppuntta azazoy, “Wuuqqoppa” yaagees. (Kes. 20:15) Issi uri babaa gidennabaa ekkana xayikko, he azazuwaa azazettiiddi deˈiyaabadan qoppana danddayees. SHin I hara ogiyan wuuqqana danddayees.

7. Wuuqqoppa giya hosppuntta azazuwaa issi zalˈˈanchchay waani azazettennan aggana danddayii?

 ⁷ Issi zalˈˈanchchay babaa gidennabaa aybanne mule ekkibeenna gishshawu wuuqqabeykke giidi qoppana danddayees. SHin zalˈˈiyaara gayttidaagaadan I ubbatoo tumanchchee? Wogaabaa 19:35, 36n Yihooway hagaadan giis: “Intte pirddan likkiyooban, meezaanan wottidi kiliyoobaaninne makkiyooban worddotoppite. Intte kiliyo meezaanai, intte makkiyoobainne likkiyo miishshati ubbai likke gidona.” Ba danbbaynnata cimmanawu likke gidennaban kiliya woy makkiya zalˈˈanchchay etappe wuuqqees. Wogaabaa shemppo 19n deˈiya hara paydotikka hegaa loytti qonccissoosona.

8. Wogaabaa 19:11-13n loytti qonccidabay Ayhudati hosppuntta azazuwan deˈiya maaraa oosuwan peeshshanaadan waati maaddidee, qassi hegee nuna waati maaddana danddayii?

⁸ Wogaabaa 19:11-13 nabbaba. Wogaabaa 19:11 doomettan hagaadan gees: “Intte wuuqqoppite.” Paydo 13y hagaadan gees: “Ne shooruwaa sugoppa” woy cimmoppa. Hegaa gishshawu, issi uri zalˈˈiyo wode worddotikko he uri wuuqqees. Hosppuntta azazoy wuuqqiyoogee bala gidiyoogaa yootees. SHin Wogaabaa maxaafan loytti qonccidabay Ayhudati he higgiyan deˈiya maaraa waati oosuwan peeshshana danddayiyaakko, hegeekka eti oottiyo ubbaban waani tumanchcha gidana danddayiyaakko akeekanaadan maaddiis. Worddotiyoogaanne wuuqqiyoogaa Yihooway waati xeelliyaakko wotti dentti qoppiyoogee nuna maaddana danddayees. Nuna hagaadan oychchana danddayoos: ‘Wogaabaa 19:11-13, taani yuushsha qoppiyo wode ta deˈuwan, ubba qassi ta zalˈˈiyo ogiyan laammana koshshiyaabi deˈiyoogaa akeekiyaanaa?’

9. Wogaabaa 19:13n deˈiya higgee oosanchchata waati maaddidee?

⁹ Hara asaa ootissiya issi Kiristtaanee tumanchcha gidiyoogaa xeelliyaagan qoppana koshshiyo hara ginaykka deˈees. Wogaabaa 19:13y hagaadan gees: “Keraa oottiya bitaniyaa damoozaa diggada, issi qammaanne ne matan aissoppa.” Israaˈeela biittan daro asay goshshanchcha; qassi keraa oottiyaageetu damoozay he gallassi qanxxettana koshshees. Issi oosanchchawu he gallassa damoozay qanxxettana xayikko, he gallassan ba soo asaa mizanawu koshshiyaabaa demmana danddayeenna. Yihooway hagaadan giis: “I metootanchcha gidiyo gishshawu A deˈuwawu damoozay koshshees.”—Zaa. 24:14, 15, NW; Maa. 20:8.

10. Wogaabaa 19:13ppe nuuni ay tamaarana danddayiyoo?

¹⁰ Ha wodiyan daro oosanchchatussi damoozay galla galla gidennan, aginan issitoo woy naaˈˈutoo qanxxettees. SHin, Wogaabaa 19:13n deˈiya maaray ha wodiyankka oottees. Ootissiya issoti issoti bantta oosanchchatussi koshshiyaabaappe keehi guutta miishshaa qanxxiyoogan eta qohoosona. He oosanchchatussi qanxxettiya miishshay keehi guutta gidikkonne, azzaniiddikka oottiyoogaa aggennaagaa eti eroosona. Hegaa giyoogee, ootissiya hegaa mala asati ‘keraa oottiya bitaniyaa damoozaa diggoosona’ giyoogaa. Hara asata ootissiya issi Kiristtaanee ba oosanchchatussi I likkebaa oottiyaakkonne shaakkana bessees. Wogaabaa shemppo 19ppe nuuni tamaarana danddayiyo harabaa ane beˈoos.

11-12. Yesuusi Wogaabaa 19:17, 18ppe yootiyo wode ay qonccissidee?

¹¹ Harata qohennan aggiyoogaappe aarobaa nuuni oottanaadan Xoossay koyees. Nuuni hagaa Wogaabaa 19:17, 18ppe akeekana danddayoos. (Nabbaba.) Yihooway qoncciyan hagaadan giis: “Ne shooruwaa ne huuphedan siiqa.” Issi Kiristtaanee Xoossaa ufayssanawu koyikko I hegaadan oottana bessees.

¹² Wogaabaa 19:18n deˈiya azazoy keehi koshshiyaaba  gidiyoogaa Yesuusi waati qonccissidakko akeeka. Issi Parisaawee issi wode Yesuusa hagaadan oychchiis: “Higgiyaa giddon ubbaappe aadhdhiya azazoi augee?” Yihoowa nu kumetta wozanaappe, nu kumetta shemppuwaappenne nu kumetta qofaappe siiqiyoogee “ubbaappe gitatiya azazonne qassi ubbaappe aadhdhiya azazo” gidiyoogaa Yesuusi yootiis. Qassi Yesuusi Wogaabaa 19:18n deˈiya xiqisiyaappe ekkidi hagaadan giis: “Naa77antto azazoikka a mala; hegee, ‘Neeni ne shooruwaa ne huuphedan siiqa’ giyaagaa.” (Maa. 22:35-40) Haratussi siiquwaa bessiyo daro ogeti deˈoosona. Wogaabaa shemppo 19ppe hegeetuppe amaridaageeta nuuni tamaarana danddayoos.

13. Geeshsha Maxaafan odettida Yooseefabaa nuuni xannaˈiyo wode Wogaabaa 19:18 waati loytti akeekana danddayiyoo?

¹³ Wogaabaa 19:18n deˈiya zoriyaa oosuwan peeshshiyoogee ne shooruwaa siiqiyoogaa bessiyo issi oge. Xiqisee hagaadan gees: “Haluwaa kiyoppa; qassi ne asaappe issuwaayyoonne uluwan lancce oiqqoppa.” Banaara oottiya, tamaariya woy bantta so asappe issuwaa bolli amarida layttawu uluwan lancce oyqqida asa nuuppe daroti eroos! Yooseefa ishantti tammati A bolli uluwan lancciyaa oyqqidoogee guyyeppe eti A ixxanaadan oottidoogaa hassaya. (Doo. 37:2-8, 25-28) SHin Yooseefi eta bolli iitabaa oottibeenna! I ba ishanttu bolli haluwaa kiyana danddayiyo wodekka, I eta maariis. Yooseefi uluwan lancciyaa oyqqibeenna. Guyyeppe, Wogaabaa 19:18n xaafettida zoriyaara maayettiyaabaa I oottiis.—Doo. 50:19-21.

14. Wogaabaa 19:18n deˈiya maarata haˈˈikka nuuni azazettana koshshiyoogaa bessiyaabay aybee?

¹⁴ Xoossaa ufayssanawu koyiya Kiristtaaneti Yooseefa leemisuwaa kaallana koshshees; I ba ishanttu bolli haluwaa kiyiyoogaappe etayyo atto giis. Hegee nuuni nuna naaqqidaageetuyyo atto gaanaadan Yesuusi tamaarissido woosaarakka maayettees. (Maa. 6:9, 12) Qassi kiitettida PHawuloosi ba mala Kiristtaaneta hagaadan zoriis: “Ta ishatoo, intte intte huuphen asau halo kessoppite.” (Roo. 12:19) I gujjidikka eta minttettiis: “Issoi issuwaabaa danddayite; ooninne ba laggiyaa bolli hanqqettidobai de7ikko, issoi issuwau atto yaago.” (Qol. 3:13) Yihooway kessido maarati laamettokkona.  Wogaabaa 19:18n deˈiya maarata nuuni haˈˈikka azazettana koshshees.

15. Nuuni atto gaananne dogana koshshiyoy aybissakko akeekanaadan maaddiya leemisoy awugee?

¹⁵ Ane ha leemisuwaa qoppa. Qohuwaa masunttaara geeddarssana danddayoos. Issi issi masunttati guutta; shin harati gita. Leemisuwawu, nuuni qumaa kattiyo wode nu biradhdhee guutta qanxxettana danddayees. Hegee nuna sakkana danddayees; shin sakkiyoogaa sohuwaara aggeesinne paxees. Issi woy naaˈˈu gallassappe guyyiyan, nuuni qanxxettida sohuwaakka hassayennan aggana danddayoos. Hegaadankka, nuuni guuttaban qohettana danddayoos. Leemisuwawu, issi laggee qoppennan nuna qohiyaabaa haasayaana woy oottana danddayees; shin nuuni awu coo atto gaana danddayoos. Gidoppe attin, masunttay gita gidikko, issi dottoree he masunttaa sikkananne qachchana danddayees. Nuuni masunttaa ubbatoo bochchikko, hegee paxennan aggananne yaa iitana danddayees. Issi uri keehi yiillotiyo wode hegaa malabaa oottana danddayiyoogee keehi azzanttiyaaba. I bana yiilloyidabaanne qohidabaa ubbatoo qoppana danddayees. SHin uluwan lancciyaa oyqqiyaageeti banttana qohoosona. Wogaabaa 19:18n deˈiya zoriyaa azazettiyoogee keehi loˈˈoba!

16. Wogaabaa 19:33, 34y yootiyoogaadan, Israaˈeelati beteta waati oyqqanaadan Yihooway koyii, qassi hegaappe nuuni ay tamaarana danddayiyoo?

¹⁶ Israaˈeelati harata siiqanaadan Yihooway azazido wode eti bantta zare woy bantta biittaa asa xalla siiqana koshshees giidi yootibeenna. Eti banttanaara deˈiya betetakka siiqanaadan yootiis. Wogaabaa 19:33, 34y yootiyoobay qoncce. (Nabbaba.) Israaˈeelati bete uraa bantta “biittaa asadan,” xeellanaadaaninne ‘bantta huuphedan siiqanaadan’ Yihooway koyees. Leemisuwawu, Israaˈeelati bantta gaden deˈiya poshiluwaa betetussinne hiyyeesatussi aggana koshshiyoogaa Higgee yootees. (Wog. 19:9, 10) Beteta siiqanaadan odettida maaray ha wodiyan Kiristtaanetussikka oottees. (Luq. 10:30-37) Waanidi? Miilooniyan qoodettiya beteti deˈoosona; qassi amaridaageeti ne heeran deˈennan aggokkona. Nuuni ha attuma asata, macca asatanne naata bonchchuwan oyqqiyoogee bessiyaaba.

17-18. (a) Wogaabaa 19:2ynne 1 PHeexiroosa 1:15y nuuni waatanaadan minttettiyoonaa? (b) Nuuni oottanaadan kiitettida PHeexiroosi minttettido keehi koshshiya oosoy aybee?

¹⁷ Wogaabaa 19:2ynne 1 PHeexiroosa 1:15y Xoossaa asay geeshsha gidanaadan yootees.  Wogaabaa shemppo 19n deˈiya hara daro paydoti Yihoowan sabettanawu nuuni waatana danddayiyaakko akeekanaadan nuna maaddana danddayoosona. Nuuni oottana amarida loˈˈobatanne nu naagettana koshshiyo amarida iitabata qonccissiya paydota nuuni beˈida. * Yihooway nuuni nu deˈuwan ha maarata oosuwan peeshshanaadan haˈˈikka koyiyoogaa Giriikettuwan xaafettida Geeshsha Maxaafay qonccissees. SHin kiitettida PHeexiroosi harabaakka yootiis.

¹⁸ Nuuni ubbatoo Yihoowawu goynniyaageetanne haratussi loˈˈobaa oottiyaageeta gidana danddayoos. Gidikkonne, PHeexiroosi keehi koshshiya issibaa Kiristtaaneti oottanaadan minttettiis. Nuuni nu ooso ubban geeshsha gidanaadan minttettanaappe kasetidi PHeexiroosi hagaadan giis: “Oosuwaa oottanau intte wozanan qoppi uttite.” (1 PHe. 1:13, 15) He oosoy aybee? PHeexiroosi ayyaanan tiyettida Kiristtoosa ishantti “ooratta oosuwaa yootanau” xeesettidoogaa etawu yootiis. (1 PHe. 2:9) Qassi, ha wodiyan ubba Kiristtaanetussi ha keehi koshshiya oosuwaa oottiyo maatay deˈees. Hegee nu oottiyo hara ay oosuwaappekka aaruwan asaa maaddees, ubbatoo minnidi sabbakiyaanne tamaarissiya geeshsha gidida Xoossaa asawu hegee dumma maata! (Mar. 13:10) Wogaabaa shemppo 19n deˈiya maarata oosuwan peeshshanawu nuussi danddayettida ubbabaa oottiyo wode, nu Xoossaanne nu shooruwaa siiqiyoogaa bessoos. Qassi nu oosuwaa ubban ‘geeshsha gidanawu’ koyiyoogaa bessoos.