Ha laytti kiyida Wochchiyo Keelaa loytta nabbabadii? Yaatikko, neeni kaallidi deˈiya oyshata zaarana danddayiyaakkonne beˈa:

Nuuni takki giidi Yihoowaara haasayiyaabanne abaa qoppiyaaba gidikko, waani goˈettanee?

Nuuni loˈˈobaa kuuyana, loˈˈo asttamaare gidana, nu ammanoy minnana, qassi Yihoowa wozanappe siiqana.—w22.01, sinttaa 30-31.

Nuuni Yihoowaaninne I sunttidoogeetun ammanettikko waani goˈettanee?

Nuuni cimati immiyo kaaletuwaa minttidi kaalliyoogan, Yihooway ubbatoo suurebaa oottiyoogaa ammanettiyoogaa bessiyo wodee haˈˈa. Gita waayiyaa wode, akeekanawu woy azazettanawu metiyaaba milatiya kaaletoy nuussi imettikkokka, nuuni azazettanawu giigi uttida.—w22.02, sinttaa 4-6.

‘[Biittaa Haariya] Zarubaabeela kushiyan deˈiya tumbbiyaabaa’ kiitanchchay Zakkaariyaasawu yootido wode woyganawu koyidee? (Zak. 4:8-10)

Beniigaappe guuxxiya beeta maqidasee keexettidi polettanaagaanne Xoossay koyiyoogaadan hananaagaa A asay akeekanaadan ha ajjuutay maaddiis.—w22.03, sinttaa 16-17.

Nuuni waanidi ‘haasayan leemiso’ gidana danddayiyoo? (1 Xim. 4:12)

Haggaazuwan kehatettaaninne bonchchuwan haasayiyoogan, wozanappe yexxiyoogaaninne ubbatoo shiiqotun qofaa yootiyoogan, tumaa haasayiyoogaaninne harata minttettiyoogan, qassi cayennan aggiyoogan.—w22.04, sinttaa 6-9.

Daaneela shemppo 7n odettida oyddu doˈati (kawotettati) Ajjuutaa 13:1, 2n qonccida doˈaara issi mala gidiyoy aybiinee?

Ajjuutaa 13 odettida doˈay qonccissiyoy Roome haaruwaa mala issi kawotetta xallaa gidenna. SHin ha doˈay asaa haarida kawotetta ubbaa qonccissiyaaba.—w22.05, sinttaa 9.

Nuuni Xoossaa suure pirddan ammanettiyoogaa bessiyo waanna ogee awugee?

Issi uri nuna cayikko, yiilloyikko, woy naaqqikko, hanqqettiyoogaanne uluwan lancciyaa oyqqiyoogaa aggidi pirddaa Yihoowawu aggibayanawu baaxetoos. Nagaraa gaasuwan gakkida qoho ubbaa I xayssana.—w22.06, sinttaa 10-11.

SHiiquwan woossiya ishay ay hassayana koshshii?

Nuuni woosaa gubaaˈiyan deˈiyaageeta zoranawu woy etawu erissuwaa yootanawu goˈettana koshshenna. Woossiya ishay ‘adussidi’ woossana bessenna; ubba qassi shiiquwaa doomettan hegaadan oottana koshshenna. (Maa. 6:7)—w22.07, sinttaa 24-25.

“Iitabaa oottidaageeti pirddettanau” denddanay ayba ogiyaanee? (Yoh. 5:29)

Eti kase deˈido deˈuwaa gaasuwan iita geetetti pirddettokkona. Eti hayquwaappe denddi simmidi bessiyo eeshshaadaaninne oottiyo oosuwaadan pirddettana.—w22.09, sinttaa 18.

Masqqala 1922n shiiqido gita shiiquwan J. F. Razerfordi yootido ufayssiyaabay aybee?

Amarkkan, Ohayon, Seedar Poyntten shiiqido gita shiiquwan I hagaadan giis: “Kawoy haariyoogaa doommiis! Hagaa asa ubbawu yootiyo aawatettay intteyyo deˈees. Yaatiyo gishshawu, Kawuwaanne A Kawotettaa erissite, erissite, erissite!”—w22.10, sinttaa 3-5.

Isiyaasa shemppo 30n odettida, Xoossay nuuni genccanaadan maaddiyo heezzu ogeti awugeetee?

Ha shemppoy I (1) nu woosaa siyidi zaariyoogaa, (2) nuna tamaarissiyoogaa, qassi (3) nuna ha wodiyaaninne sinttappe anjjiyoogan maaddiyoogaa yootees.—w22.11, sinttaa 9.

Nuuni Mazamure 37:10, 11, 29 deˈiya qofay beni polettiis, qassi sinttappekka polettana giyoy aybissee?

Daawiti yootidobay Solomona haaruwaa wode Israaˈeela biittan deˈanabaa qonccissees. Yesuusi sinttappe yaana gannatiyaabaa yootido wode, paydo 11 deˈiya qofaappe ekkidi yootiis. (Maa. 5:5; Luq. 23:43)—w22.12, sinttaa 8-10, 14.