‘Saˈaa Laattanawu’ Giigettadii?
“ASHKKETI anjjettidaageeta; aissi giikko, eti sa7aa laattana” giidi Yesuusi yootidoogee polettiyo wodiyaa nuuni ubbay yeemuwan naagoos. (Maa. 5:5) Tiyettidaageeti kawo gidiyo wodenne Yesuusaara saluwan haariyo wode eti saˈaa laattana. (Ajj. 5:10; 20:6) Ha wodiyan deˈiya daro Kiristtaaneti saˈaa laattanawunne wottiyoobi baynna hanotan sarotettaaninne ufayssan merinawu deˈanawu yeemuwan naagoosona. Hegaadan deˈanawu eti oottana bessiya keehi koshshiya oosoy deˈees. Leemisuwawu, eti saˈay gannate gidanaadan oottiyoogan maaddana, hayquwaappe denddiyaageetussi koshshiyaabaa kunttananne eta tamaarissana. Qassi neeni hegeeta oottanawu keehi koyiyoogaa haˈˈi waata bessana danddayiyaakko akeeka.
SAˈAA GANNATE OOTTANAWU GIIGETTADII?
Yihooway asaa “ha sa7aa kumitenne haarite” giidi azazido wode, kumetta saˈay loddan loddan gannate gidanaagaa yootiiddi deˈees. (Doo. 1:28) Gannatiyan merinawu deˈanaageeti hegawu azazettana koshshees. Edene gannatee xayido gishshawu saˈay gannate gidenna. Armmageedoona olaappe simmin sohuwaara saˈan keehi moorettidabata geeshshiyo daro oosuwaa nuuni oottana. Ee hegee keehi daro ooso!
Israaˈeelati Baabilooneppe simmido wode oottidobaa hegee nuna hassayissees. Eta biittan 70 layttawu ooninne deˈibeenna. SHin eti he biittaa keehi loˈˈiya soho oottanaagaa Isiyaasi kasetidi yootiis. Hiraagay hagaadan gees: “I bazzuwaa Edene Gannatiyaadan, i mela sohotakka GODAA ataakilttiyaa sohuwaadan oottana.” (Isi. 51:3) Israaˈeelatussi ubbabay ushachchiis. Hegaadankka, saˈaa laattanaageeti Yihooway maaddin saˈaa keehi loˈˈiya gannate oottana. Qassi neeni he oosuwaa oottanawu koyiyoogaa bessanawu haˈˈi oottana danddayiyoobati deˈoosona.
Issi ogee ne keettay geeshshanne giiga gidanaadan neeyyo danddayettida ubbabaa oottiyoogaa. Ne shooroti geeshshennaba gidikkonne neeni yaatana danddayaasa. Qassi intte SHiiquwaa Addaraashaanne Gita SHiiquwaa Addaraashaa geeshshiyoogaaninne bottokoniyoogan maaddana danddayaasa. Danddayettiyaaba gidikko, intte heeran daafaban qohettidaageeta ne dosan maaddanawu oychchanakka danddayaasa. Hegee maadoy koshshiyoosi deˈikko, ne ishanttanne michchontta neeni maaddanawu koyiyoogaa bessees. Nena hagaadan oychcha: ‘Taani saˈan merinawu deˈanaadan Yihooway paqqadikko, he wode goˈettana amarida hiillata tamaarana danddayiyaanaa?’
HAYQUWAAPPE DENDDIYAAGEETUSSI KOSHSHIYAABAA KUNTTANAWU GIIGETTADII?
Yesuusi Yaaˈiroosa naˈiyo hayquwaappe dentti simmidi, sohuwaara iyyo qumaa immanaadan yootiis. (Mar. 5:42, 43) Ha 12 laytta naˈeessi qumaa immiyoogee metiyaaba gidennan aggana danddayees. SHin Yesuusi “duufuwan de7iyaageeti a cenggurssaa siyiyo wodee” yaana giidi qaalaa gelidoogee polettiyo wode, nuuni darobaa oottana koshshiyoogaa qoppa. (Yoh. 5:28, 29) Geeshsha Maxaafay ubbabaa yootana xayikkonne, hayquwaappe denddiyaageeti qumaa, deˈiyoosaanne maayuwaa demmanaadan nuuni maaddana koshshiyoogaa qoppana danddayoos. Neeni maaddanawu giiga uttidoogaa ha wodiyan bessana danddayaasa. Neeni oottana danddayiyo amaridabati deˈoosona.
Neeni saˈaa laattanawu giigetta uttidoogaa haˈˈi waata bessana danddayay?
Woradaa xomoosiya ishay ne gubaaˈiyaa xomoosanawu yaanaagee erissoy odettikko, qumaa A shoobbana danddayaasa. Beeteelen ubba wode haggaazuwaa haggaaziya ishantti eta oosoy laamettin intte gubaaˈiyaa yiyo wode woy woradaa xomoosiya ishay yuuyidi xomoosiyo ba oosuwaa essiyo wode eti deˈiyoosaa demmanaadan maaddana danddayaasa. Ne heeran killiliyaa shiiqoy woy hara gita shiiqoy deˈikko, shiiquwaappe kase woy shiiquwaappe simmin ne dosan issi issibata oottana, woy harasaappe yiya imattata mokkana danddayaasa.
HAYQUWAAPPE DENDDANAAGEETA TAMAARISSANAWU GIIGA UTTA
Oosuwaa 24:15y yootiyoogaadan, daro biiloone asay hayquwaappe denddana. Etappe daroti hayqqanaappe kase Yihoowa eribookkona. Eti hayquwaappe denddi simmidi abaa tamaariyo injjiyaa demmana. a Meezee deˈiyo, Xoossawu ammanettidi haggaaziyaageeti eta tamaarissana. (Isi. 11:9) Awurooppan, Tohossa Amarkkaaninne Afirkkan sabbakida, SHarlloota hegaa yeemuwan naagawusu. A ufayttaydda hagaadan gaasu: “Taani hayquwaappe denddiyaageeta tamaarissanawu yeemuwan naagays. Taani beni deˈida issi uraabaa nabbabiyo wode, darotoo hagaadan qoppays: ‘Ha uri Yihoowa eriyaakko A deˈoy laamettana danddayiyaaba shin.’ Hayquwaappe denddana asawu Yihoowabaanne eti awu haggaaziyaaba gidikko, eta deˈoy keehi laamettanaagaa etawu yootanawu yeemuwan naagays.”
Yesuusi saˈaa yaanaappe kase ammanettidi deˈida Yihoowa ashkkaratikka darobaa tamaarana. Daaneeli xaafikkonne I akeekibeenna hiraagay polettidoogaa awu qonccissiyoogee, keehi ufayssiyoogaanne gita maata gidiyoogaa qoppa. (Dane. 12:8) Woy Urutanne Naaˈooma Masee eta zariyaappe yiidoogaa eranaadan maaddiyoogee ay keena ufayssiyaakko qoppa. Ha iita alamiyaagaadan yashissiyaanne diggiya uri baynnasan, kumetta saˈan nuuni asaa tamaarissiyoogee keehi ufayssiyaaba gidana!
Hayquwaappe denddanaageeta tamaarissanawu giigettidoogaa bessanawu haˈˈi ay oottana danddayay? Issi ogee gooba asttamaare gidanawunne ubbatoo sabbakanawu neessi danddayettida ubbabaa oottiyoogaa. (Maa. 24:14) Cimatettaa woy harabaa gaasuwan neeni haˈˈi loytta oottana danddayennabaa gidikko, neeni neessi danddayettidabaa oottiyoogan hayquwaappe denddanaageeta tamaarissanawu giiga uttidoogaa bessana danddayaasa.
Ha keehi koshshiya oyshata qoppiyoogee loˈˈo; neeni saˈaa laattanawu tumuppe yeemuwan naagay? Saˈaa gannate oottanawu, hayquwaappe denddiyaageetussi koshshiyaabaa kunttanawunne eta tamaarissanawu yeemuwan naagay? Neeni saˈaa laattiyo wode yan oottanabaa ha wodiyan oottiyoogan saˈan merinawu deˈanawu giigetta uttidoogaa bessana danddayaasa!
a Masqqala 2022 Wochchiyo Keelan, “Darota Xillotettaa Ogiyan Kaalettiyaageeta” giya huuphe yohuwaa xeella.
