He yashshiya hanotay ta deˈuwaa laammido gishshawu, taani Xoossaa eranawu baaxetiyoogaa doommaas. SHin he sakkana xuman kaallidi hanidabaa yootanaappe kase, ane naatettan tana gakkidabaanne Xoossaabaa tamaaranaadan denttettidabaa yootays.

Taani huuphessa Paranssaayen, maadiniya bookkiyo Guwesnayn giyo kataman 1937n yelettaas. Ta aaway shuchchaa xiixinttaa bookkees, qassi minni oottiyoogee keehi koshshiyaba gidiyoogaa tana tamaarissiis. Ta aaway taani naaquwaa ixxanaadankka tana tamaarissiis. I maadiniya bookkiyaageetuppe daroti naaqettiyoogaanne daafabaa gattana danddayiya hanotan oottiyoogaa beˈidi eta maaddanawu koyiis. Hegaa gishshawu, I maadiniya oosanchchatu maataa bonchchissanawu baaxetiya dirijjitiyaa yame gidiis. Heeran deˈiya qeeseti cimmiyaageeta gidiyoogankka I keehi yiillotees. Etappe daroti ishalidi deˈoosona, shin maadiniya bookkiya hiyyeesati kattaanne miishshaa banttawu immanaadan oychchoosona. Ta aaway qeesetu hanotaa keehi shenetiyo gishshawu tana haymaanootiyaabaa aybanne tamaarissibeenna. Ubba qassi, Xoossaabaa mule haasayi erokko.

 Taanikka gitaa gidiyo wode naaquwaa ixxiyoogaa doommaas. He naaquwaappe issoy hara biittaappe yiidi Paranssaayen deˈiyaageeta coo ixxiyoogaa. Taani betetu naatuura tohuwaa kuwaasiyaa kaaˈays; qassi etaara laggetiyoogee tana ufayssees. Hegaa bollikka, ta aayyiyaa Paranssaaye asa gidukku, A Poolandde asa. Zariyan dumma dumma gidida asati issippe saruwan deˈanaadaaninne maara oyqettanaadan taani koyaas.

Taani 1957n wotaaddara gidanaadan kawotettay koyiis. Taani koyro yootido sakkana xuman Aljjeeriyaa dereta biidoy hegaassa. Taani “Xoossoo! Hay, Xoossoo!” gaada waassa simmiyo wode ta sinttan deˈiyay morkke wotaaddara gidenna, harddiiday deˈees! Taani keehi woppu gaas! He hanotaynne qassi olay ba huuphen, taani deˈuwaa halchchuwaabaa kaseegaappe aaruwan qoppanaadan oottiis. Nuuni merettidoy aybissee? Xoossay nuussi qoppii? Nuuni sarotettan merinawu deˈaneeshsha?

Guyyeppe, tana yelidaageeta oychchanawu wotaaddara keettappe soo yiido wode, Yihoowa markkatuppe issuwaara gayttaas. I taassi Kaatoliketi Paranssaaye doonan birshshido, La Saynte Baybl, giyo Geeshsha Maxaafaa immiis; guyye Aljjeeriyaa ba simmada hegaa nabbabiyoogaa doommaas. Ajjuutaa 21:3, 4n deˈiya qofay ta wozanaa denttettiis. Hagaadan gees: “Xoossaa keettai asaara de7ees; . . . Xoossai eta aifiyaappe afutta ubbaa quccana. Hagaappe sinttanau haiqoinne kayyoi woi waasoinne sahoi de7enna.” Hagaa malabaa taani kase mule nabbaba erikke. ‘Hagee tuma gidanddeeshsha?’ gaada tana oychchaas. He wode, taani Xoossaabaanne Geeshsha Maxaafaabaa aybanne erikke.

Taani wotaaddara gidada oottiyoogaa 1959n wurssa simmada, tana Geeshsha Maxaafaappe darobaa tamaarissida Firanssuwa giyo issi Yihoowa Markkaara gayttaas. Leemisuwawu, Xoossaassi Yihoowa giyo buzo sunttay deˈiyoogaa I tana Geeshsha Maxaafaappe bessiis. (Maz. 83:18, NW) Qassi, Yihooway ha saˈan suure pirddaa ehaanaagaa, biittaa gannate kessanaagaanne Ajjuutaa 21:3, 4n deˈiya qaalaa polanaagaa Firanssoy qonccissiis.

He timirtteti akeekanawu metennaba, qassi ta wozanaa denttettidosona. SHin taani qeesetu bolli keehi yiillotaas, qassi Geeshsha Maxaafan baynnabaa tamaarissiyo gishshawu eta boranawu koyaas! Qassi taani ta aawaagaadan qoppiyoogaa haˈˈikka aggabeenna gishshawu naaquwaa eqettanawu baaxetays. Taani issibaa sohuwaara oottanawu koyaas!

Firanssoynne Yihoowa Markka gidida hara ta ooratta laggeti taani hanqqettiyoogaa agganaadan maaddidosona. Nuuni Kiristtaaneti haratu bolli pirddana bessennaagaanne Xoossaa Kawotettaa mishiraachchuwaa yootiyoogan eta maaddana bessiyoogaa eti taassi qonccissidosona. Hegee Yesuusi oottido oosonne A kaalliyaageetikka oottanaadan immido ooso. (Maa. 24:14; Luq. 4:43) Asaa ammanoy ayba gidinkka taani eta kehatettaaninne hiillan haasayissana koshshiyoogaakka tamaaraas. Geeshsha Maxaafay hagaadan gees: “Godaa ashkkarai ubbaayyo kehiyaagaa . . . gidanau besseesippe attin, ooyettanau bessenna.”—2 Xim. 2:24.

Taani koshshiyaagaadan laamettada 1959n issi woradaa shiiquwan xammaqettada Yihoowa Markka  gidaas. He sohuwan Anjjeelo giyo issi yelaga michcheera gayttaas, qassi O dosaas. Taani A deˈiyo gubaaˈiyaa biyoogaa doommaas, qassi nuuni 1960n aqo oyqqida. A tumuppe keehi loˈˈo macca asa, gooba machcho, qassi taassi Yihooway immido alˈˈo imota.—Lee. 19:14.

Daro layttatu giddon, wozannaamanne kayma ishanttuppe taani keehi koshshiya darobaa tamaaraas. Hegeetuppe koyroy hagaa: Wayssiya oosuwaa suure polanawu nuuni nuna ziqqi oottiyaageetanne Leemiso 15:22n deˈiya, “Daro zoriyaageeti de7iyoosan halchchidobai polettees” yaagiya aadhdhida eratettay deˈiyo zoriya oosuwan peeshshiyaageeta gidana bessees.

Xoossaa ayyaanay denttettin xaafettida he qaalati ay keena tumakkonne, 1964n taani akeekiyoogaa doommaas. He laytti taani gubaaˈeta xomoosada ishantta minttettanawunne eti kaseppe aaruwan Yihoowakko shiiqanaadan maaddanawu woradaa xomoosiyaagaa gidada oottiyoogaa doommaas. Gidoppe attin, he wode taassi layttay 27 gidiyo gishshawu daro meezetabeykke. Hegaappe denddidaagan taani balabaa oottays. SHin he balatuppe tamaaranawu baaxetaas. Hegaappekka aaruwan, ‘zorana’ danddayiya kayma ishanttuppe taani keehi maaddiya darobaa tamaaraas.

Taani woradaa xomoosiyoogaa doommido wode hanidabaa hassayays. Taani Paarisen issi gubaaˈiyaa xomoosa simmin, ayyaanaaban kayma gidida issi ishay tana haasayissanawu oychchiis. Taani “ero” gaas.

I hagaadan oychchiis, “Luyisaa, dottoree soo biidi oona akkamii?”

“Harggidaageeta,” gaada taani zaaraas.

I hagaadan giis: “Hegee tuma. SHin neeni gubaaˈiyaa heemmiyaagaa mala Yihoowaara loˈˈo dabbotay deˈiyoogeetuura daro wodiyaa wurssiyoogaa taani akeekaas. Hidootaa qanxxida, ooratta, woy dungguuxa gidida daro ishanttinne michchontti nu gubaaˈiyan deˈoosona. Neeni etaara wodiyaa aattiyaakko, ubba qassi eta soo baada etaara kattaa miyaakko, hegee eta keehi minttettana.”

He alˈˈo ishay immido loˈˈo zoriyawu keehi galataas. I Yihoowa dorssata siiqiyo siiqoy ta wozanaa denttettiis. Hegaa gishshawu, taani balaa oottidoogaa ammananawu metootikkonne, I giidobaa sohuwaara oosuwan peeshshiyoogaa doommaas. Hegaa mala ishantta immido gishshawu Yihoowa galatays.

Paarisen, Kolombbese giyoosan, 1969ninne 1973n  giigida, daro biittaappe yiidaageeti shiiqiyo naaˈˈu gita shiiqotun Qumaa Giigissiya Kifiliyaa xomoosiyaagaa gidada oottaas. Nuuni 1973n shiiqido gita shiiquwan 60,000 gidiya asawu ichchashu gallassawu qumaa giigissana koshshiis! Hegaa nuuni waati oottana danddayiyaakko taani erabeykke. SHin haˈˈikka, maaddidabay haratu zoriya siyanaadan yootiya Leemiso 15:22n deˈiya zoriya. Taani meezee deˈiyo ishantti maaddanaadan oychchaas. Eta giddon axaareti, darkko ataakilttiyaa tokkiyaageeti, qumaa kattiyaageetinne shamaa eriyaageeti deˈoosona. Nuuni issippe he deexo oosuwaa polanawu danddayida.

Taaninne ta machchiya, 1973n Paransaaye Beeteelen haggaazanawu shoobettida. Yan taassi koyro imettida oosoykka keehi deexxiyaagaa. Taani 1970ppe 1993 gakkanawu nu oosoy muleera digettido, Afirkkan Kaameruune giyo biittan deˈiya ishanttussi xuufiyaa yeddiyo ogiyaa koyana bessees. Taani hegaa oottanawu danddayiyaakkonne erabeykke. Geella hegaa akeekido gishshawu, he wode Paranssayen deˈiya oosuwaa xomoosiya ishay tana hagaadan giidi minttettiis: “Kaameruunen deˈiya nu ishanttussi ayyaanaabaa qumay keehi koshshees. Eta mizoos!” Qassi nuuni eta mizida.

Taani Kaameruunen deˈiya cimatuura gayttanawu Kaameruune biittaara zawatiya biittata darotoo baas. He ishantti xalanne cincca. Kaameruunen deˈiya ishantti xuufiyaa ubbatoo demmana mala he ishantti taani xuufiyaa kiittiyo ogeta demmanaadan maaddidosona. Nuuni oottido baaxiyaa Yihooway anjjiis. He biittan deˈiya Yihoowa asay 20 laytta gidiya wodiyawu, Wochchiyo Keelaanne he wode Nu Kawotetta Haggaazuwaa geetettiya aginan aginan attamettiya xuufiyaa issuwaanne halennan demmidosona.

Nuuni issoy issuwaa loytti eriyoogaa doommido wodiyaappe doommada, Ajjeelissi Yihoowaara mino dabbotettay deˈiyoogaa taani akeekaas. Nuuni aqo oyqqi simmin kaseegaappe aaruwan hegaa  akeekana danddayaas. Leemisuwawu, nu bullachchaa gallassi omarssi, nuuyyo danddayettida keenan Yihoowassi haggaazanawu deˈiya nu koshshaa xeelliyaagan woossanaadan tana oychchaasu. Yihooway he woosaa zaariis.

Anjjeela taani kaseegaappe aaruwan Yihoowan ammanettanaadankka maaddaasu. Leemisuwawu, 1973n nuuni Beeteelen haggaazanawu shoobettido wode, taani woradaa oosuwaa dosiyo gishshawu mammottaas. SHin Anjjeela nuuni nu deˈuwaa Yihoowawu sheedhdhido gishshawu, A dirijjitee nuuni oottanaadan oychchiyo ubbabaa oottana koshshiyoogaa tana hassayissaasu. (Ibr. 13:17) Taani A giidobaa maayettaas! Yaaniyo gishshawu Beeteele biida. Nuuni issippe deˈido adussa wodiyan, ta keettaayee wozannaamatettay, kiphataynne ayyaanaabawu issi deˈiya xeelay nu aqo deˈuwaa minttiis, qassi loˈˈobaa kuuyanawu nuna maaddiis.

Haˈˈi nuuni cimido wodiyankka, Anjjeela loytta kaafiya machcho gidiyoogaa aggabeykku. Leemisuwawu, dariya baggi Inggilizettuwan tamaariyo, tiˈokiraase timirtte keettatun tamaaranawu, Anjjeelanne taani he doonaa loytti eranawu minnidi oottiyoogaa doommida. Hegaa gishshawu, he wode nuuyyo layttay 75 heera gidikkonne, nuuni Inggilizetto gubaaˈiyan shiiqiyoogaa doommida. Paransaaye Macara Biiruwaa Konttiyaa yara gidada oottiyo aawatettaa gaasuwan, hara doonaa xannˈanawu wodiyaa demmanaagee wayssiyaaba. SHin, Anjjeelanne taani issoy issuwaa maaddida. Ha wodiyan nuuyyo layttay 80nne giyoogaa gidinkka, gubaaˈe shiiqotussi Inggilizettuwaaninne Paranssaayettuwan giigettiyoogaa aggibookko. Nuuyyo danddayettida keenan ubbatoo nu gubaaˈiyaara shiiqanawunne haggaazanawu baaxetoos. Yihooway nuuni Inggilizettuwaa tamaaranawu baaxetido baaxiyaa anjjiis.

Issi gita anjjuwaa 2017n demmida. Anjjeelanne taani, Niwu Yorken, Patersenen deˈiya Wachtawer Timirtte Kifiliyan, Macara Biiruwaa Konttiyaa Yaratinne Eta Machoti Tamaariyo Timirtte Keettan tamaariyo maataa demmida.

Yihooway tumuppe gita asttamaare. (Isi. 30:20) Hegaa gishshawu, nuuni ubbay, cimidaageetinne naati ubbaappe aadhdhiya loˈˈo timirttiyaa demmiyoogee maalaalissiyaaba gidenna! (Zaa. 4:5-8) Tumukka, Yihooway, qassi kayma ishanttinne michchontti yootiyoobaa ezggiya yelagati ayyaanaaban diccidi ubbabay injjetido gastta asa gidiyoogaa taani akeekaas. Leemiso 9:9y hagaadan gees: “Aadhdhida eranchcha uraa tamaarissa; yaatikko, i kaseegaappekka aadhdhida eranchcha gidana. Xillo uraakka tamaarissa; yaatikko i eraa gujjana.”

Issitoo issitoo, taani 60 gidiya layttappe kase Aljjeeriyaa deretun aattido he yashshiya sakkana xuma qammaabaa qoppays. He qammi, taani hagaa mala ufayssiya deˈo demmanaagaa erabeykke. Taani haratuppe darobaa tamaaraas! Yihooway taassi tumuppe keehi maalaalissiya, ufayssiya deˈuwaanne Anjjeelo immiis. Hegaa gishshawu, nuuni saluwan deˈiya nu Aawaappenne A dosiya aadhdhida eranchchanne kayma ishanttuppenne michchonttuppe tamaariyoogaa mule aggennaadan murttida.