1. Geeshsha Maxaafay yootiyoobaa neeni haratussi odiyo wode nena garamissana danddayiyaabay aybee?

GEESHSHA MAXAAFAA tumaa neeni koyro tamaarido wodiyaa hassayay? Neeni Geeshsha Maxaafaappe tamaaridobay akeekanawu metennaba! Neeni ammanidobaa asay ubbay ufayttidi tamaarana gaada qoppadasa. Geeshsha Maxaafay yootiyo tumay eti haˈˈi ufayttidi deˈanaadan, qassi sinttappe keehi ufayssiya hidootay etawu deˈanaadan oottanaagaa ammanadasa. (Maz. 119:105) Hegaa gishshawu neeni tamaarido tumaa ne laggetussinne ne dabbotussi yeemuwan yootadasa. SHin aybi hanidee? Neeni yootidobaa daro asay siyennan ixxido gishshawu garamettadasa.

2-3. Yesuusi saˈan deˈiyo wode deˈiya daro asay abaanne I yootiyoobaa xeelliyaagan ay qoppidee?

² Nuuni sabbakiyoogaa harati siyennan ixxiyo wode nu garamettana koshshenna. Yesuusi saˈan deˈiyo wode, I bana Xoossay maaddiyoogaa qonccissanawu maalaalissiyaabaa oottidaba gidikkonne, daroti I yootiyoobaa siyennan ixxidosona. Leemisuwawu, Yesuusi Alˈˈaazara hayquwaappe denttiis. He maalaalissiyaabay Yesuusa eqettiyaageeti kashi gaana danddayennaba. Gidikkonne, Ayhuda haymaanootiyaa kaalettiyaageeti Yesuusi Mase gidiyoogaa ammanibookkona. Eti Yesuusakka Alˈˈaazarakka woranawu koyidosona!—Yoh. 11:47, 48, 53; 12:9-11.

³ Yesuusi I Mase gidiyoogaa daro asay ammanennaagaa erees. (Yoh. 5:39-44) I Xammaqiya Yohaannisi erissiyo ashkkaratussi naaˈˈatussi hagaadan giis: “Tana sirenna [“ta gaasuwan xubettenna,” NW] urai anjjettidaagaa.” (Maa. 11:2, 3, 6) Yesuusi yootiyoobaa daroti siyennan ixxidoy aybissee?

4. Ha huuphe yohuwan nuuni ay beˈanee?

⁴ Koyro xeetu layttan deˈiya daroti Yesuusa ammananawu koyibeenna  gaasota ha huuphe yohuwaaninne kaalliyaagan beˈana. Nuuni yootiyoobaa ha wodiyan daroti ekkennan ixxiyo gaasuwaakka beˈana. Ubbaappe aaruwan, nuuni Yesuusa kaalliyoogaa aggennaadan mino ammanoy nuussi deˈana koshshiyoy aybissakko tamaarana.

5. Yesuusi kasetidi odettida Mase gidenna giidi issoti issoti qoppidoy aybissa gidana danddayii?

⁵ Yesuusi diccido katamaa gaasuwan asay I tamaarissiyoobaa siyennan ixxiis. Yesuusi keehi gooba asttamaare gidiyoogaanne maalaalissiyaabaa oottidoogaa eti akeekidosona. SHin eti A hiyyeesa anaaxe naˈa xalla oottidi xeelloosona. Qassi I daro asay xoqqu oottidi xeellenna Naazireete kataman dicciis. Ubba qassi guyyeppe Yesuusi erissiyo ashkkara gidida Naatinaaˈeeli, koyro hagaadan giis: “Naazireete katamaappe payyabi kiyanau danddayii?” (Yoh. 1:46) Yesuusi he wode deˈiyo katamaa Naatinaaˈeeli waayi dosana. Woy Masee Naazireete kataman gidennan, Beetaliheemen yelettanaagaa, Mikiyaasa 5:2n odettida hiraagaa I qoppennan aggenna.

6. Yesuusa wode I Mase gidiyoogaa asay akeekanaadan maaddana danddayiyaabay aybee?

⁶ Geeshsha Maxaafay woygii? Yesuusa morkketi ‘Masiyaa yeletaabaa’ akeekennaagaa hananabaa yootiya Isiyaasi kasetidi odiis. (Isi. 53:8, NW) Hegaara gayttidaagan darobay hiraagan odettiis. He asati suurebaa eranawu takki giidi qoppiyaakko, Yesuusi Beetaliheemen yelettidoogaanne Kawuwaa Daawita zare giyoogaa akeekana shin. (Luq. 2:4-7) Gidoppe attin, Yesuusi Mikiyaasa 5:2n kasetidi odettido sohuwan yelettiis. Yaatin metoy aybee? Asay issibaa kuuyanawu eesotiyoogaa. Eti ubbabaa wurssi eribeenna gishshawu, Yesuusa kaallibookkona.

7. Yihoowa Markkati yootiyoobaa ha wodiyan daroti siyennay aybissee?

⁷ Ha wodiyan hegaa mala metoy deˈiyoogaa akeekiyoo? Ee. Yihoowa asaappe daroy dure woy keehi erettida asa gidenna. Yaatiyo gishshawu daro asay eta ‘tamaaribeenna coo asadan’ qoppees. (Oos. 4:13) Haymaanootiyaabaa tamaarissiya xoqqa timirtte keettatun Yihoowa Markkati tamaaribeenna gishshawu, eti Geeshsha Maxaafaabaa tamaarissana danddayennabadan amarida asay qoppees. Harati Yihoowa Markkatu haymaanootee “Amarkkaa haymaanoote” goosona. SHin tumaa yootanawu Yihoowa Markkatuppe daroti deˈiyoy Amarkkaana gidenna. Harati qassi Yihoowa Markkati Yesuusan ammanokkona goosona. Daro layttawu, eti Yihoowa asaa “Koministteta,” “Amarkkaa biittawu wochchiyaageeta,” qassi kawotettaa higgiyaa eqettiyaageeta goosona. Daro asay Yihoowa Markka gidanawu koyennay odettiya he taariketa siyiyo gishshataassanne Yihoowa Markkatubaa tumaa erenna gishshassa.

8. Ha wodiyan Xoossawu oottiyaageeti oonakko eranawu koyikko, Oosuwaa 17:11 maaran asay waatana koshshii?

⁸ Nu ammanoy xayennaadan nuna aybi maaddanee? Asay issibaa xeelliyaagan tumaa akeekanawu baaxetana koshshees. Wonggeliyaa xaafee Luqaasi hegaadan oottanawu loytti baaxetiis. I ‘koyruwaappe doommidi ubbabaa akeekan qoridi’ loytti xannaˈiis. Nabbabiyaageeti Yesuusabaa siyidoogaa I xaafido ‘yohuwaappe geeshshidi erana mala’ koyiis. (Luq. 1:1-4) Beeriyan beni deˈiya Ayhuda asati Luqaasa mala. Yesuusabaa yootiya mishiraachchuwaa eti koyro siyido wode, siyidobay tumakkonne akeekanawu Ibraawetto Geeshsha Maxaafaara geeddarissidosona. (Oosuwaa 17:11 nabbaba.) Hegaadan, asay ha wodiyan issibay tumakkonne eranawu pilggana koshshees. Xoossaa asay tamaarissiyoobaa Geeshsha Maxaafay yootiyoobaara eti geeddarissana koshshees. Eti ha wodiyan Yihoowa asay  oottidobaakka xannaˈana koshshees. Eti issibaa loytti akeekikko, coo ixxokkona woy siyidobaa xallan kuuyokkona.

9. Yesuusi saluwaappe malaataa bessennan ixxido wode aybi hanidee?

⁹ Yesuusa wode deˈiya amarida asay I tamaarissiyooban ufayttibeenna. Eti hegaappe aarobaa koyidosona. I Mase gidiyoogaa qonccissiya ‘malaataa saluwaappe bessana mala’ eti A oychchidosona. (Maa. 16:1) Eti Daaneela 7:13, 14 nabbabido gishshawu, I hegaa oottanaadan koyennan aggokkona. SHin, he wodee he hiraagay polettanaadan Yihooway keerido wode gidenna. Yesuusi tamaarissidobay I Mase gidiyoogaa etawu qonccissana koshshees. SHin, eti koyido malaataa I bessennan ixxido wode, A siyennan ixxidosona.—Maa. 16:4.

10. Isiyaasi Masiyaa xeelliyaagan yootido hiraagaa Yesuusi waati polidee?

¹⁰ Geeshsha Maxaafay woygii? Hananabaa yootiya Isiyaasi Masiyaabaa hagaadan giis: “I waassenna; woi ba qaalaa xoqqissenna; woi qassi ba qaalaa ogiyan sissenna.” (Isi. 42:1, 2) Yesuusi ba bolli asay xeelaa wottanaadan oottenna ogiyan haggaaziis. I beeta maqidasiyaa keexxibeenna, haymaanootiyaa kaalettiyaageeti maayiyo dumma maayuwaa maayibeenna, woy haymaanootiyaara gayttidaagan bonchcho sunttan asay A xeeganaadan koyibeenna. Yesuusi shilootan eqqido wode, I malaataa bessanaadan Kawuwaa Heeroodisi oychchin ixxiis. (Luq. 23:8-11) Gidikkonne, Yesuusi amarida malaatata bessiis; shin I xeelaa wottidoy mishiraachchuwaa sabbakiyoogaana. “Taani yiidoogee hegaassa” giidi I ba erissiyo ashkkaratussi yootiis.—Mar. 1:38

11. Ha wodiyan amaridaageeti qoppiyo bala qofay aybee?

¹¹ Ha wodiyan hegaa mala metoy deˈiyoogaa akeekiyoo? Ee. Keehi alˈˈoban alleeqettida haymaanoote keettata, haymaanootiyaara gayttidaagan xeegettiyo bonchcho sunttatanne denddoy Kiristtaane haymaanootiyaara gayttennaba gidiyoogaa daro asay dogido  baalata ha wodiyan daroti nashshoosona. Gidoppe attin, he haymaanootiyaa shiiqota shiiqiya asati Xoossaabaanne A halchchuwaabaa daro tamaarokkona. Nu shiiqota shiiqiyaageeti Yihooway nuuni oottanaadan koyiyoobaanne A sheniyaara maayettiya ogiyan hegaa waati oottanaakko tamaaroosona. Nu SHiiquwaa Addaraashati alˈˈoban alleeqissidoogeeta gidana xayikkonne, geeshshanne sima. Aawatettay deˈiyoogeeti dumma maayo maayokkonna, woy qassi bonchcho sunttan xeegettokkona. Nuuni tamaarissiyoobaynne ammaniyoobay Geeshsha Maxaafan deˈiyaaba. Gidikkonne, asay xoqqu oottidi xeelliyo baalata nuuni bonchchenna gishshawu, ha wodiyan daroti nu yootiyoobaa siyokkona; qassi nuuni tamaarissiyoobay eti siyanawu koyiyoobaara maayettenna.

12. Ibraawe 11:1, 6n qonccidaagaadan, nu ammanuwaa minttanawu waatana bessii?

¹² Nu ammanoy xayennaadan nuna aybi maaddanee? Roomen deˈiya Kiristtaanetussi kiitettida PHawuloosi hagaadan giis: “Asi qaalaa siyidi ammanees; qassi issi urai [Kiristtoosabaa] qaalaa yootin siyees.” (Roo. 10:17) Yaatiyo gishshawu, bala gidiyoogaa Geeshsha Maxaafay qonccissiyo haymaanoote baalati ufayssiyaaba woy asay xoqqu oottidi xeelliyooba gidikkonne, eta bonchchiyoogan gidennan, Geeshsha Maxaafaa xannaˈiyoogan nu ammanuwaa minttoos. “Ammanoi bainnan ooninne Xoossaa ufaissanau danddayenna” gishshawu suure eran nu ammanuwaa minttana bessees. (Ibraawe 11:1, 6 nabbaba.) Hegaa gishshawu, nuuni tumaa demmidoogaa shaakki eranawu saluwaappe wolqqaama malaata beˈana koshshenna. Nuuni tumaa demmidoogaa shaakki eranawunne siriyoogaa mule agganawu ammanuwaa minttiya Geeshsha Maxaafay yootiyo timirtteta loyttidi xannaˈiyoogee gidees.

13. Daro asay Yesuusa eqettanaadan oottidabay aybee?

¹³ Yesuusa wodiyan, Xammaqiya Yohaannisi erissiyo ashkkarati Yesuusi erissiyo ashkkarati xoomibeenna gishshawu garamettidosona. Yesuusi I paxa deˈishin eti xoomiyo gaasoy  baynnaagaa yootiis. (Maa. 9:14-17) Gidikkonne, Yesuusa eqettiya Parisaawetinne harati I eta wogaa kaallenna gishshawu A bolli pirddidosona. I Sambbatan hargganchchaa pattido wode eti hanqqettidosona. (Mar. 3:1-6; Yoh. 9:16) Eti Sambbataa Higgiyaa bonchchiyoogan ceeqettidi haasayiyaaba gidikkonne, beeta maqidasiyan asay zalˈˈanaadan paqqadiyoogan metoy baawa goosona. Hegaa gishshawu Yesuusi eta eqettido wode eti hanqquwan suullidosona. (Maa. 21:12, 13, 15) Eti bantta xallaa siiqiyaageetanne ammanoy baynnaageeta gidiyoogaa qonccissanawu, Israaˈeelatu taarikiyaa yootidi Naazireeten deˈiya Ayhudatu woosa keettan Yesuusi tamaarissido wode keehi hanqqettidosona. (Luq. 4:16, 25-30) Yesuusi oottana bessees giidi eti qoppiyoobaa I oottibeenna gishshawu daro asay Yesuusa eqettiis.—Maa. 11:16-19.

14. Geeshsha Maxaafaara maayettenna wogata Yesuusi kaallibeennay aybissee?

¹⁴ Geeshsha Maxaafay woygii? Yihooway I kiittin hananabaa yootiya Isiyaasa baggaara hagaadan giis: “Hagee asai ba bolla doonan taakko shiiqees; ba inxxarssan tana bonchchees; shin eta wozanai taappe haahuwan de7ees. Eti asi medhdhido wogaa tamaariiddi, taassi hadan goinnoosona.” (Isi. 29:13) Geeshsha Maxaafay yootiyoobaara maayettenna wogata kaallennan aggiyoogan Yesuusi likkebaa oottiis. Asi kessido maaratanne wogata Geeshsha Maxaafaappe aattidi xeelliyaageeti Yihoowanne I kiittido Masiyaa eqettidosona.

15. Ha wodiyan daro asay Yihoowa Markkata dosennay aybissee?

¹⁵ Ha wodiyan hegaa mala metoy deˈiyoogaa akeekiyoo? Ee. Yeleta gallassaanne ufayssa masqqalaa mala Geeshsha Maxaafay yootenna baalata Yihoowa Markkati bonchchenna gishshawu daroti yiillotoosona. Xoossaa Qaalay bala giidi yootiyo, asay ba biittaa siiqiyo gishshawu bonchchiyo baalata woy baliyaa kessiyoogaara gayttida meezeta Yihoowa Markkati kaallenna wode harati hanqqettoosona. Hegeetu gaasuwan Yihoowa Markkatu bolli lancciyaageeti Xoossaa ufayssiya ogiyan goynniyaabadan qoppana danddayoosona. SHin eti Geeshsha Maxaafay yootiyo qoncce timirttiyaa aggidi asa wogaa kaallanawu doorikko, Xoossaa ufayssokkona.—Mar. 7:7-9.

16. Mazamure 119:97, 113, 163-165 maaran, nuuni oottana bessiyaabaynne naagettana bessiyaabay aybee?

¹⁶ Nu ammanoy xayennaadan nuna aybi maaddanee? Nuuni Yihooway kessido higgetanne maarata loyttidi siiqana koshshees. (Mazamure 119:97, 113, 163-165 nabbaba.) Nuuni Yihoowa siiqiyo gishshawu, A ufayssenna wogata kaallokko. Nuuni Yihoowa siiqiyoogaappe harabaa xoqqu oottidi xeellana koshshenna.

17. Yesuusa wode deˈiya daroti Masee ay oottana giidi qoppidonaa?

¹⁷ Yesuusa wode deˈiya amaridaageeti kawotettay laamettanaadan koyidosona. Eti Masee banttana Rooma haaruwaappe laˈa kessees giidi qoppidosona. SHin eti Yesuusa banttawu kawo oottanawu koyido wode, I ixxiis. (Yoh. 6:14, 15) Qeesetinne harati Yesuusi kawotettaa laammanawu malees giidi hirggidosona. Hegee, Roomati hanqqettanaadaaninne eti qeesetussi immido maataa wotti ekkanaadan oottana. Polotikaabay eta keehi qofissido gishshawu, daro Ayhudati Yesuusa kaallennan ixxidosona.

18. Geeshsha Maxaafay Masiyaa xeelliyaagan yootiyo, daro asay xaasayi xeellido hiraagay awugee?

¹⁸ Geeshsha Maxaafay woygii? Masee wurssettan wolqqaama Olanchcha gidanaagaa daro hiraagati yootiyaaba gidikkonne, hara hiraagati I koyro nu nagaraa gishshawu hayqqana koshshiyoogaa yootoosona. (Isi. 53:9, 12) Yaatin, Ayhudati Masiyaabaa balabaa qoppidoy  aybissee? He wode deˈiya metuwaa sohuwaara xayssiyoogaabaa yootenna hiraagata Yesuusa wode deˈiya daroti xaasayidi xeellido gishshataassa.—Yoh. 6:26, 27

19. Daroti nu yootiyoobaa siyennaadan oottiya bala qofay aybee?

¹⁹ Ha wodiyan hegaa mala metoy deˈiyoogaa akeekiyoo? Ee. Nuuni polotikaaban oossinne exatenna gishshawu ha wodiyan daroti nuuni yootiyoobaa siyokkona. Yihoowa Markkati dooruwaa wode doorana koshshees eti giidi qoppoosona. SHin, nuuni asi nuna haaranaadan doorikko, Yihooway nuna haaranaadan koyokko giyoogaa. (1 Sam. 8:4-7) Asay nuuni timirtte keettatanne hosppitaaleta keexxanaadan, qassi deretettaa maaddiya harabaakka oottanaadan koyees. Nuuni ha alamiyaa metuwaa giigissanawu malennan, sabbakiyo oosuwaa minni oottiyo gishshawu eti nu yootiyoobaa siyokkona.

20. Yesuusi Maatiyoosa 7:21-23n yootidoogaadan, nuuni xoqqu oottidi xeellana koshshiyaabay aybee?

²⁰ Nu ammanoy xayennaadan nuna aybi maaddanee? (Maatiyoosa 7:21-23 nabbaba.) Yesuusi nu oottanaadan azazido oosuwaa nuuni keehi xoqqu oottidi xeellana koshshees. (Maa. 28:19, 20) Ha alamiyaa metuwaa giigissanawu baaxetiyoogan nu wodiyaa mule wurssana koshshenna. Nuuni asaa siiqiyo gishshawu eta metoy nuna qofissees, shin nuuni nu shoorota Xoossaa Kawotettaabaa tamaarissiyoogeenne eti Yihoowaara dabbotanaadan maaddiyoogee aybippenne aadhdhiyaaba gidiyoogaa eroos.

21. Nuuni waatanawu murttana koshshii?

²¹ Yesuusa wode daro asay I yootiyoobaa siyennan ixxidonne Yesuusa kaalliyaageeti yootiyoobaa ha wodiyan siyennan ixxiyo oyddu gaasota ha huuphe yohuwan beˈida. SHin nuuni naageettana koshshiyoobati hageetu xallee? CHii. Xube gidana danddayiya hara oyddubata kaalliya huuphe yohuwan pilggana. Nuuni Yesuusi yoootiyoobaa siyanawunne ubbatoo ammanuwan mino gidanawu murttidaageeta gidoos!