1-2. Nuuni Ajjuutaa maxaafan ufayttana koshshiyo issi gaasoy aybee?

 ISSI uraa pootuwaa albbemiyaa beˈanaadan neeni shoobetta eray? Neeni pootota beˈiyo wode, ne erenna daro asaa xeellaasa. SHin neeni issi pootuwaa takki gaada loytta beˈaasa. Aybissi? Neeni he pootuwan deˈiyo gishshataassa. Neeni hegaa beˈiyo wode, he pootuwaa denddido wodiyaanne sohuwaa hassayanawu malaasa. Qassi he pootuwan deˈiya haratakka shaakkanawu malaasa. He pootoy nena keehi ufayssees.

² Ajjuutaa maxaafay he pootuwaa mala. Aybissi? Baa giishin naaˈˈu gaasuwaana. Koyruwan, Geeshsha Maxaafan deˈiya ha maxaafay nuussi xaafettiis. Koyro xiqisee hagaadan gees: “Eesuwan hananau bessiyaabaa ba ashkkaraa bessana mala, Xoossai Yesuus Kiristtoosayyo immido ajjuutai hagaa.” (Ajj. 1:1) Hegaa gishshawu, he maxaafan xaafettidabay ubba asaassa gidennan, nuussa; ayssi giikko, nuuni Xoossaassi oottoos. Nuuni Xoossaa asa gidiyo gishshawu, ha maalaalissiya maxaafan deˈiya hiraagati polettanaadan oottiyoogaa eriyoogan nu garamettana koshshenna. Qassi nuuni Ajjuutaa maxaafaa nabbabiyo wode, nuna huuphiyan huuphiyan maaddiyaabaa nabbaboos.

3-4. Ajjuutaa maxaafay yootiyoogaadan, an deˈiya hiraagati awude polettanee, qassi hegee nuuni waatanawu koyanaadan oottana koshshii?

³ Nuuni Ajjuutaa maxaafan deˈiya hiraagatun ufayttana koshshiyo naaˈˈantto gaasoy he hiraagati polettana wodiyaa yootiyo gishshataassa. Layttan cimida kiitettida Yohaannisi he wodiyaabaa hagaadan giidi yootiis: ‘Godaa gallassan taani  geeshsha ayyaanan ohettaas.’ (Ajj. 1:10) Yohaannisi 96 M.Ln, he qofaa xaafido wode, ‘Godaa gallasay’ biron gakkiichchibeenna. (Maa. 25:14, 19; Luq. 19:12) Gidoppe attin, Geeshsha Maxaafaa hiraagaa maaran, he gallassay Yesuusi 1914n saluwan Kawo gidido wode doommiis. He layttaappe doommidi, Ajjuutaa maxaafan deˈiya hiraagati Xoossaa asaara gayttidaagan polettiyoogaa doommidosona. Ee, ha wodiyan nuuni “Godaa gallassan” deˈoos!

⁴ Nuuni ha ufayssiya wodiyan deˈiyo gishshawu, Ajjuutaa 1:3n deˈiya siiqo zoriyaa loytti akeekana koshshees: “Ha maxaafaa nabbabiya urai anjjettidaagaa; qassi ha hananabaa yootiya qaalaa siyiyaageetinne ha maxaafan xaafettidaagaa naagiyaageeti anjjettidaageeta; aissi giikko, wodee matattiis.” Nuuni cenggurssa xoqqu oottidi ‘nabbabana, ha hananabaa yootiya qaalaa siyana,’ qassi eta ‘naagana’ koshshees. Nuuni azazettana koshshiya he qaalatuppe amaridaageeti awugeetee?

5. Nu goynoy Yihoowa ufayssiyoogaa akeekiyoogee keehippe koshshiyaaba gidiyoogaa Ajjuutaa maxaafay waati qonccissii?

⁵ Yesuusi gubaaˈetun haniyaabaa loytti eriyoogaa nuuni Ajjuutaa maxaafaa koyro shemppuwaappe doommidi akeekoos. (Ajj. 1:12-16, 20; 2:1) Yesuusi Qeeri Isiyan deˈiya laappun gubaaˈetussi kiittido kiitan I hegaa eriyoogaa loytti qonccissiis. I he kiitan, koyro xeetu layttan deˈiya Kiristtaaneti bantta goynoy Yihoowa ufayssiyoogaa akeekanaadan maaddiya kaaletuwaa yootiis. Qassi I he kiitan yootidobay ha wodiyan deˈiya Xoossaa asawu ubbawu hanees. Nuuni hegaappe ay tamaariyoo? Nu Goday Kiristtoos Yesuusi nuuni Yihoowaara dabbotido dabbotay loˈˈokkonne loytti erees. I nuna kaaletteesinne naagees, qassi ubbabaa beˈees. Nuuni ubbatoo Yihoowan sabettanawu waatana koshshiyaakko I erees. Nuuni ha wodiyan naagana koshshiyo I immido kaaletoy aybee?

6. (a) Yesuusi Ajjuutaa 2:3, 4n yootidoogaa maaran, Efisoona gubaaˈiyan deˈiyaageetu metoy aybee? (b) Nuuni hegaappe ay tamaariyoo?

⁶ Ajjuutaa 2:3, 4 nabbaba. Nuuni Yihoowa kase siiqiyo siiquwaa aggana bessenna. Efisoona gubaaˈiyan deˈiyaageeti daro metoy deˈishinkka, genccidoogaanne aggennan Yihoowawu haggaazidoogaa Yesuusi etayyo xaafido kiitay qonccissees. Gidikkonne, kase siiqiyo bantta siiquwaa eti aggidosona. Eti zaarettidi siiqana xayikko, eta goynoy Yihoowa ufayssenna. Hegaadan ha wodiyan, nuuni gencciyoogaappe aarobaa oottana koshshees. Nuuni genccana koshshiyo gaasoti deˈoosona. Nuuni oottiyooban xalla gidennan, hegaa oottiyo gaasuwankka nu Xoossay ufayttees. Nuuni issibaa oottanaadan denddo gididaba I xoqqu ootti xeellees; ayssi giikko, nuuni A loytti siiqiyo gishshawunne sabbiyo gishshawu awu goynnanaadan I koyees.—Lee. 16:2; Mar. 12:29, 30.

7. (a) Ajjuutaa 3:1-3n qonccidaagaadan, Sarddeesa gubaaˈiyan deˈiyaageetu metoy aybee? (b) Nuuni waatana koshshii?

⁷ Ajjuutaa 3:1-3 nabbaba. Nuuni ubbatoo beegottidi deˈana koshshees. Sarddeesa gubaaˈiyaa yaratu metoy dumma dumma. Eti Yihoowawu kase haggaazidaba gidikkonne, haˈˈi haggaazokkona. Hegaa gishshawu, eti ‘beegottanaadan’ Yesuusi etawu yootiis. He zoriyaappe nuuni ay tamaariyoo? Yihooway nu oosuwaa mule dogenna. (Ibr. 6:10) SHin, nuuni Yihoowawu kase haggaazido gishshawu, haˈˈi ayyo haggaazana koshshenna giidi qoppana bessenna. Nu abbee kaseegaa mala gidana xayikkonne, nuuni “Godaa oosuwaa”  wurssettaa gakkanaashin minni oottanawu beegottidaageeta gidana koshshees.—1 Qor. 15:58; Maa. 24:13; Mar. 13:33.

8. Yesuusi Lodooqiyan deˈiya ishanttuyyo yootido Ajjuutaa 3:15-17n deˈiya qofaappe ay tamaariyoo?

⁸ Ajjuutaa 3:15-17 nabbaba. Nuuni minnidi wozanappe goynnana koshshees. Yesuusi Lodooqiyan deˈiyaageetuyyo kiittido kiitay eta metoy dumma gidiyoogaa qonccissees. Eti bantta goynuwan “bol77o.” Eti shenehoo giyaageeta gidiyo gishshawu, Yesuusi eti ‘metootiya asanne qarettiya asa’ gidiyoogaa yootiis. Eti Yihoowawu keehippe minni goynnana koshshiis. (Ajj. 3:19) Nuuni hegaappe ay tamaariyoo? Nuuni kaseegaadan minni oottana xayikko, Yihoowaynne A dirijjitee nuussi oottido loˈˈoba ubbawu nuuni eta loytti galatana koshshees. (Ajj. 3:18) Nuuni Yihoowawu goynniyoogaa kaseyennaadan oottiya ishalo deˈuwaa ha wodiyan deˈanawu mule baaxetana koshshenna.

9. PHerggaamoonaaninne Tiyaaxiroonan deˈiya Kiristtaanetuyyo Yesuusi kiittido kiitan qonccidaagaadan, qohiya aybippe nuuni naagettana koshshii?

⁹ Nuuni kaddidaageetu timirttiyaa eqettana bessees. PHerggaamoonan deˈiya amaridaageeti ishanttu giddon issippetettay xayanaadan oottido gishshawu, Yesuusi eta seeriis. (Ajj. 2:14-16) Tiyaaxiroonan deˈiyaageeti naagettido gishshawu, I eta galatiisinne tumaa eti ‘mintti naaganaadan’ zoriis. (Ajj. 2:24-26) Worddo timirttetun cimettida shugo Kiristtaaneti bantta nagaraappe simmana koshshiis. Ha wodiyan nuuni shin? Yihoowa qofaa phalqqiya ay timirttiyaanne nuuni eqettana bessees. Kaddidaageeti “ammanuwaa bolla doonan ekkidabaa milatana” danddayikkonne, eti ‘A tumu wolqqaa erikke goosona.’ (2 Xim. 3:5) Nuuni Xoossaa Qaalaa xannaˈiyoogan gooba gidikko, worddo timirtteta akeekanawunne eqettanawu metootokko.—2 Xim. 3:14-17; Yih. 3, 4.

10. PHerggaamoonaaninne Tiyaaxiroonan deˈiya gubaaˈetussi Yesuusi yootidobaappe nuuni harabaa ay tamaarana danddayiyoo?

¹⁰ Nuuni pokko gidida ubbabaa ixxana bessees. PHerggaamoonaaninne Tiyaaxiroonan hara metoykka deˈees. He gubaaˈetun deˈiya amaridaageeti pokkobaa ixxibeenna gishshawu Yesuusi eta seeriis. (Ajj. 2:14, 20) Nuuni hegaappe ay tamaariyoo? Nuuni Yihoowayyo daro layttawu haggaazidaageetanne ha wodiyan daro maatay deˈiyoogeeta gidikkonne, nu oottido pokkobaa I xaasayi xeellees giidi qoppana koshshenna. (1 Sam. 15:22; 1 PHe. 2:16) Ha alamiyan deˈiya asaa kanddoy keehi  morettikkonne, Yihooway I kessido kandduwaa maaraa nuuni naagidi deˈanaadan koyees.—Efi. 6:11-13.

11. Hanno gakkanawu nuuni ay tamaaridoo? (“ Ha Wodiyan Nuuni Tamaariyoobaa” giya saaxiniyaakka xeella.)

¹¹ Hanno gakkanawu nuuni ay tamaaridoo? Nu goynuwan Yihooway ufayttiyoogaa akeekana koshshiyoogaa nuuni beˈida. Nu goynuwan Yihooway ufayttennaadan oottana danddayiyaabaa nuuni oottikko, A ufayssanawu nuuni sohuwaara laamettana koshshees. (Ajj. 2:5, 16; 3:3, 16) SHin, Yesuusi he gubaaˈetussi kiittido kiitan harabaakka yootiis. Yootidobay aybee?

12. Samirnneesaaninne Pilaadelifiyan deˈiya ishanttuyyo Yesuusi kiittido kiitaappe nuuni ay tamaarana danddayiyoo? (Ajjuutaa 2:10)

¹² Yesuusi Samirnneesaaninne Pilaadelifiyan deˈiya gubaaˈetussi kiittido kiitaa ane beˈoos. Yesuusi Kiristtaaneti ammanettidi deˈikko Yihooway eta woytiyo gishshawu, eti yedetaa yayyennaadan etawu yootiis. (Ajjuutaa 2:10 nabbaba; 3:10) Nuuni ha wodiyan hegaappe ay tamaariyoo? Nuuni yedetay gakkanaagaa naagananne hegaa genccanawu eeno gaana bessees. (Maa. 24:9, 13; 2 Qor. 12:10) Ha hassayissoy keehi koshshiyaaba gidiyoy aybissee?

13-14. Ajjuutaa shemppo 12n odettidaagaadan, Xoossaa asaa bolli aybi gakkidee?

¹³ Ha wodiyan “Godaa gallassan,” Xoossaa asaa bolli yedetay gakkanaagaa Ajjuutaa maxaafay yootees. Saluwan Xoossaa Kawotettay eqqi simmin sohuwaara olay denddidoogaa Ajjuutaa shemppo 12y yootees. Mikaaˈeela geetettida bonchchettida Yesuus Kiristtoosinne A olanchchati Seexaanaaranne daydanttatuura olaa olettidosona. (Ajj. 12:7, 8) Hegaappe denddidaagan, Xoossaa morkketi xoonettidoogeenne duge saˈawu olettidoogee saˈaaninne an deˈiyaageetu bolli wolqqaama metoy gakkanaadan oottiis. (Ajj. 12:9, 12) Hegaa gaasuwan Xoossaa asaa bolli aybi gakkidee?

¹⁴ Seexaanay waanidaakko Ajjuutaa maxaafay kaallidi yootees. I hegaappe simmin saluwaa gelana danddayenna gishshawu, saˈan deˈiya ayyaanan tiyettida Xoossaa ashkkarata qohees. Eti Xoossaa Kawotettaa gishshaa oottiyaageeta gidiyo gishshawu, ‘Yesuusabaa markkattiyo oosoy’ etawu imettiis. (Ajj. 12:17, NW; 2 Qor. 5:20; Efi. 6:19, 20) Ha hiraagay waani polettidee?

15. Ajjuutaa shemppo 11n odettida ‘naaˈˈu markkatun’ leemisettidaageeti oonee, qassi eta bolli aybi gakkidee?

¹⁵ Kawotettaabaa sabbakiyo oosuwan aawatettay deˈiyo tiyettida ishantta Seexaanay Xoossaa morkketi qohanaadan oottiis. He asati Ajjuutaa maxaafan odettida hayqqida  ‘naaˈˈu maarkkatun’ leemisettidoosona. * (Ajj. 11:3, 7-11) Aawatettay deˈiyo hosppun ishantta 1918n wordduwan mootidosona, qassi eti ubbay daro wodiyawu qashettanaadan pirddidosona. Daro asay tiyettidaageeti oottiyo oosoy attidabadan qoppiis.

16. Issi shaˈanne uddufun xeetanne tammanne uddufunan hanida maalaalissiyaabay aybee, qassi Seexaanay he wodeppe doommidi aybi gakkanaadan oottiyoogaa aggibeennee?

¹⁶ He ‘naaˈˈu markkati’ amarida wodiyaappe simmin hayquwaappe denddanaagaakka Ajjuutaa shemppo 11 deˈiya hiraagay yootees. He ishantti qashettoosappe laytta kumennan he hiraagay maalaalissiya hanotan polettiis. He tiyettida ishantti Laappune 1919n qashuwaappe birshshettidosona, qassi eta mootido paylee guyyeppe gorddettiis. He ishantti sabbakiyoonne tamaarissiyo oosuwaa minnidi oottiyoogaa sohuwaara doommidosona. Gidoppe attin, hegee Seexaanay Xoossaa asaa qohiyoogaa agganaadan oottibeenna. Seexaanay he wodeppe doommidi Xoossaa asaa ubbaa bolli ‘shaafan’ leemisettida yedetaa gattiis. (Ajj. 12:15) Ee, nuussi ubbawu “danddayainne ammanoi” koshshees.—Ajj. 13:10.

17. Seexaanay Xoossaa asaa qohikkonne, eti demmido qoppibeenna maadoy aybee?

¹⁷ Xoossaa asay qoppibeenna sohuwaappe amarida maaduwaa demmanaagaa Ajjuutaa shemppo 12y kaallidi qonccissees. ‘SHaafan’ leemisettida yedetaa “biittai” mittidoogaa Ajjuutaa maxaafay yootees. (Ajj. 12:16) Hanidabaykka hegaa. Seexaanaa alamiyan deˈiya pirddaa eqotatu mala loˈˈobaa oottiya amaridaageeti issi issitoo Xoossaa asaa ashshidosona. Yihoowa ashkkarati banttassi amarida laˈatettaa demissiya mootota darotoo shatimmidosona. Eti he laˈatettaa waati goˈettidonaa? Eti Yihooway banttassi immido oosuwaa oottanawu he wodiyaa loytti goˈettidosona. (1 Qor. 16:9) He oosoy aybee?

18. Ha wurssetta gallassatun nuuni oottana bessiya oosoy aybee?

¹⁸ Yesuusi wurssettay gakkanaappe kase ba asay kumetta saˈan ‘Xoossaa Kawotettaa wonggeliyaa mishiraachchuwaa’ awaajjanaagaa kasetidi yootiis. (Maa. 24:14) Eti sabbakiyo wode, “sa7an de7iya asa ubbaayyo, zare ubbaayyo, qommo ubbaayyo, dumma dumma biittaa qaala ubbaayyoonne yara ubbaayyo merinaa wonggeliyaa mishiraachchuwaa”  awaajjiya issi kiitanchchaappe woy kiitanchchatu citaappe maaduwaa demmoosona.—Ajj. 14:6.

19. Yihoowa siiqiyaageeti sabbakana koshshiyo hara kiitay aybee?

¹⁹ Xoossaa asay awaajjana koshshiyo kiitay Kawotettaa mishiraachchuwaa xalla gidenna. Eti Ajjuutaa shemppo 8ppe 10 gakkanaashin odettida kiitanchchati oottiyo oosuwaakka maaddana koshshees. He kiitanchchati Xoossaa Kawotettaa eqettiyaageetu bolli gakkana wolqqaama boshaa awaajjoosona. Hegaa gishshawu, Yihoowa Markkati ‘shachchaaninne taman’ leemisettida kiitaa awaajjoosona; qassi hegee Xoossay Seexaanaa alamiyaa bolli pirddido pirddaa qonccissees. (Ajj. 8:7, 13) Asay ba deˈuwan laamettidi Yihoowa hanqquwaa gallassaappe attanawu wurssettay matidoogaa erana koshshees. (Sof. 2:2, 3) SHin hagee darota ufayssiya kiitaa gidenna. Hegaa awaajjanawu nuuni xala gidana koshshees. Gita waayiyaa wode, wurssetta pirddaa kiitay keehi wolqqaama.—Ajj. 16:21.

20. Kaalliya naaˈˈu huuphe yohotun nuuni ay beˈanee?

²⁰ Nuuni Ajjuutaa maxaafan nabbabiyoobay polettiyoogee nu hanotaara gayttidaba gidiyo gishshawu, “ha hananabaa yootiya qaalaa” nuuni naagana koshshiyoogee tuma. (Ajj. 1:3) SHin nuuni ammanettidi yedetaa waati genccana danddayiyoo, qassi he kiitaa aggennan waati xalatettan awaajjana danddayiyoo? Naaˈˈubati nuuni minnanaadan oottana: koyroy, Ajjuutaa maxaafay Xoossaa morkketubaa yootiyoobaa, qassi naaˈˈanttoy, nuuni ammanettidi deˈikko, sinttappe demmana anjjuwaa. Kaalliya naaˈˈu huuphe yohotun he allaalleta beˈana.