1-2. Nu deˈuwan issi issibati laamettiyo wode, amarida xiqiseti nuussi keehi koshshiyaaba gidana danddayiyoy aybissee?

 ISSI attumaageenne maccaara aqo oyqqiyo wode, issi cimay aqo deˈuwaa xeelliyaagan Geeshsha Maxaafaappe haasayiyo haasayaa loytti ezggoosona. He haasayan odettiya xiqiseti etawu ooratta gidokkona. SHin haˈˈi ha xiqiseti etawu keehi koshshiyaaba. Aybissi? Eti he zoriyaa bantta aqo deˈuwan oosuwan peeshshiyo gishshataassa.

² Issi Kiristtaane azinaynne machchiyaa naˈa yeliyo wode deˈiya hanotaykka hegaa mala. Naata dichchiyoogaa xeelliyaagan eti daro layttawu daro haasayaa siyennan aggokkona. SHin haˈˈi he haasayan odettiya zoree etawu keehi koshshiyaaba. Eti naˈa yelidi dichchanawu deˈoosona. Hegee keehi gita aawatetta! Yaatiyo gishshawu, nu deˈuwan issi issibati laamettiyo wode, amarida xiqiseti nuussi keehi koshshiyaaba. Israaˈeela kawoti oottanaadan odettidaagaadan, Yihoowawu goynniyaageeti Geeshsha Maxaafaa nabbabiyoynne bantta “de7o laittan ubban” wotti dentti qoppiyoy hegaassa.—Zaa. 17:19.

3. Nuuni ha huuphe yohuwan beˈanabay aybee?

³ Yelidaageetoo, intte Kiristtaane gidiyoogaadan inttessi imettida gita aawatettaappe issoy intte naata Yihoowabaa tamaarissiyoogaa. SHin nu Xoossaabaa intte eta tamaarissiyoogaappe aadhdhiyaabaa oottanawu koyeeta. Intte naati A wozanappe siiqanaadan eta maaddanawu intte koyeeta. Intte naati Yihoowa loytti siiqanaadan maaddanawu ay oottana danddayeetii? Yelidaageeta maaddana danddayiya Geeshsha Maxaafay yootiyo oyddu maarata ha huuphe yohuwan nuuni  tobbana. (2 Xim. 3:16) Qassi yelida amarida Kiristtaaneti Geeshsha Maxaafaa zoriyaa oosuwan peeshshiyoogan waani goˈettidaakko nuuni beˈana.

4. Yelidaageeti bantta naati Yihoowa loytti siiqanaadan tamaarissanawu eta maaddana danddayiya maaray awugee? (Yaaqooba 1:5)

⁴ Maaraa 1: Kaaletuwaa immanaadan Yihoowa oychchite. Intte naati Yihoowa loytti siiqanaadan maaddanawu koshshiya aadhdhida eratettaa inttessi immanaadan A oychchite. (Yaaqooba 1:5 nabbaba.) Yihooway ooppenne aaruwan nuna maaddiyaabaa zorees. Hegawu daro gaasoti deˈoosona. Ane naaˈˈata beˈoos. Koyruwan, aawa gidiyoogaa Yihoowaagaa keena eriya uri baawa. (Maz. 36:9) Qassi naaˈˈanttuwan, I aadhdhida eratettan zoriyoobay awudenne nuna goˈˈees.—Isi. 48:17.

5. (a) Yelidaageeta maaddanawu Yihoowa dirijjitee giigissiyoobay aybee? (b) Ishaa Amoriminne michchiyaa Amorima bantta naata waati dichchidaakko ha biiduwaappe ay akeekidetii?

⁵ Intte intte naati Yihoowa siiqanaadan oottidi dichchanaadan inttena maaddana danddayiya kumi palahiya ayyaanaabaa qumaa Yihooway ba Qaalaa baggaaranne ba dirijjitiyaa baggaara giigissees. (Maa. 24:45) Leemisuwawu, “So Asaa Maaddiyaabaa” giya kaalli kaalli kiyiya huuphe yohuwan (Amaarattuwaa) maaddiya daro zoriyaa demmana danddayeeta; hegee Beegottite! maxeetiyan daro layttawu kiyiis, qassi ha wodiyan nu websaytiyan deˈees. Qassi, jw.org saytiyan deˈiya daro biidoti yelidaageeti bantta naata dichchiyo wode Yihoowa zoriyaa oosuwan peeshshanaadan maaddana danddayoosona. *—Lee. 2:4-6.

6. Inne A machchiyaa Yihoowa dirijjitiyaappe demmiyo kaaletuwaa xeelliyaagan issi aawawu aybi siyettidee?

⁶ Yihooway ba dirijjitiyaa baggaara maaddiyo gishshawu yelida daroti A galatoosona. Jo giyo aaway hagaadan giis: “Heezzu naata tumaa keettan dichchiyoogee keehi deexxiyaaba. Taaninne ta machchiyaa Yihooway nuna maaddanaadan ubbatoo woossoos. Qassi issi huuphe yohoy woy issi biidoy nuna  gakkiyaaban maaddanawu koshshiya wodiyan kiyiis giidi darotoo qoppoos. Yihoowa zoriyan nuuni ubbatoo ammanettoos.” Joynne A machchiyaa bantta naati Yihoowakko shiiqanaadan he huuphe yohotinne biidoti maaddiyoogaa akeekidosona.

7. Yelidaageeti bantta naatussi loˈˈo leemiso gidanawu banttawu danddayettida ubbabaa oottana koshshiyoy aybissee? (Roome 2:21)

⁷ Maaraa 2: Loˈˈo leemiso gidite. Naati banttana yelidaageetu hanotaa loytti beˈoosonanne darotoo eta kaalloosona. Yelidaageeti ubbay nagaranchcha gidiyoogee tuma. (Roo. 3:23) Gidikkonne, yelidaageeti bantta naatussi loˈˈo leemiso gidanawu banttawu danddayettida ubbabaa oottana koshshees. (Roome 2:21 nabbaba.) Issi aaway naatubaa hagaadan giis: “Naati ubbabaa xunxxiya ispponjje mala.” I gujjidi hagaadan giis: “Eti oottanaadan nuuni eta tamaarissiyoobaa nuuni oottenna wode eti nuussi yootoosona.” Yaatiyo gishshawu, nu naati Yihoowa siiqanaadan koyikko, nuuni A siiqiyo siiqoy minonne qoncce gidana koshshees.

8-9. Andriwunne Eema yootidobaappe ay tamaarana danddayeetii?

⁸ Yelidaageeti bantta naati Yihoowa siiqanaadan tamaarissana danddayiyo daro ogeti deˈoosona. Layttay 17 gidido Andriwu giyo naˈay yootidobaa akeeka: “Woossiyoogee keehi koshshiyaaba gidiyoogaa tana yelidaageeti ubbatoo tana tamaarissidosona. Ubba galla qammi, taani buzo woosaa woossikkonne, ta aaway tanaara woossees. Ta aawaynne aayyiyaa nuna ubbatoo hagaadan hassayissoosona: ‘Intte koyiyo wode ubban Yihoowa darotoo haasayissana danddayeeta.’ Hegaappe denddidaagan, woosay taani keehi xoqqu ootta xeelliyooba gidiis. Taani haˈˈi metootennan woossays, qassi Yihoowa tana siiqiya ta Aawadan xeellays.” Yelidaageetoo, intte Yihoowa siiqiyoogee intte naatikka A siiqanaadan maaddana danddayiyoogaa ubbatoo hassayite.

⁹ Eemi hanotaakka ane beˈoos. I aaway so asaa aggidi biido wode, I haratuppe talˈˈido daro miishshaa I aayyiyaa qanxxana koshshiis. Eema hagaadan gaasu: “Ta aayyiyaa miishshaa metootido daro wodeti deˈoosona, shin A Yihooway ba ashkkaratussi qoppiyoogaanne etawu koshshiyaabaa kunttiyoogaa ubbatoo yootawusu. A hegaa tumuppe ammaniyoogaa taani I deˈuwaappe akeekaas. Ta aayyiyaa tana tamaarissidobaa oosuwan peeshshaasu.” Hagaappe ay tamaariyoo? Yelidaageeti metiya wodiyankka loˈˈo leemiso gidana danddayoosona.—Gal. 6:9.

10. Israaˈeelati Yihoowabaa bantta naatuura awude haasayana danddayiyoonaa? (Zaarettido Wogaa 6:6, 7)

¹⁰ Maaraa 3: Intte naatuura ubbatoo haasayite. Yihooway beni Israaˈeelati bantta naata ubbatoo abaa tamaarissanaadan azaziis. (Zaarettido Wogaa 6:6, 7 nabbaba.) Kumetta gallassi bantta naatuura haasayiyoonne eti Yihoowa siiqanaadan tamaarissiyo daro injjee yelidaageetussi deˈees. Leemisuwawu, Israaˈeela biittan issi naˈay goshshaa oosuwan woy kattaa shiishshiyoogan ba aawaa maaddiyoogan daro wodiyaa aattana danddayees. A michchiyaa sikkiyoogan, daddiyoogaaninne son harabaa oottada ba aayyiyo maaddiyoogan galla galla daro saatiyaa iira aattana danddayawusu. Yelidaageetinne naati issippe oottiyo wode, koshshiya darobaa haasayana danddayoosona. Leemisuwawu, eti Yihoowa loˈˈotettaabaanne so asaa I maaddido ogiyaabaa haasayana danddayoosona.

11. Yelidaageeti ha wodiyan bantta naatuura awude haasayana danddayiyoonaa?

¹¹ Ha wodiyan, deˈoy kaseegaappe dummatees. Daro biittatun, yelidaageetinne naati  gallassa kumettaa issippe wodiyaa aattokkona. Yelidaageeti oosuwan, naati qassi timirtte keettan peˈoosona. Yaatiyo gishshawu, yelidaageeti bantta naatuura haasayiyo wodiyaa demmanawu baaxetana koshshees. (Efi. 5:15, 16; Pili. 1:10) So asaa goynoy hegaadan oottiyo wodetuppe issuwaa. Aleksander giyo yelaga ishay hagaadan giis: “Ta aaway so asaa goynuwawu ubbatoo hanotaa injjeyees. Qassi nuuni he wodiyaa issippe aattennaadan aybinne teqqana mala koyenna. So asaa goynuwaappe simmin, haasayoos.”

12. So asaa goynuwaa wode aaway ay hassayana koshshii?

¹² Intte aawa gidikko, so asaa goynoy intte naata ufayssiyaagaa gidanaadan ay oottana danddayeetii? Merinawu Ufayttada Deˈa! giyo ooratta maxaafaa intte naatuura issippe xannaˈana danddayeeta. Ha maxaafay intte issoy issuwaara loytti haasayanaadan maaddees. Naati bantta qofaanne banttana hirggissiyaabaa intteyyo yootanaadan intte koyikkonne, so asaa goynuwan eta borana woy seerana koshshenna. Qassi eti Geeshsha Maxaafay yootiyoobaara maayettennabaa haasayiyo wode yiillotennan agganawu baaxetite. Eti bantta qofaa intteyyo qoncciyan yootiyo wode galatite; qassi eti ubbatoo metootennan yootanaadan oottite. Intte naatussi siyettiyaabaa intte eriyo wode eta loytti maaddana danddayeeta.

13. Yelidaageeti bantta naati Yihoowakko shiiqanaadan maaddana danddayiyo hara ogee aybee?

¹³ Yelidaageetoo, intte naati Yihoowakko shiiqanaadan maaddanawu kumetta gallassan injjiyaa koyite. Nu siiqo Xoossaabaa tamaarissanawu Geeshsha Maxaafaa eta xannaˈissiyo wodiyaa intte naagana koshshenna. Liiso giyo aayyiyaa hagaadan gaasu: “Nuuni nu naata Yihoowabaa tamaarissanawu nu heeran deˈiya ubbabaa goˈettida. Leemisuwawu, nu kanay naati miiccanaadan oottiyo wode, hagee Yihooway ufayttiya Xoossa gidiyoogaa bessiyoogaanne nuunikka deˈuwan ufayttanaadan I koyiyoogaa nuuni etawu yootoos.”

14. Laggeta akeekan dooranaadan yelidaageeti bantta naata maaddana koshshiyoy aybissee? (Leemiso 13:20)

¹⁴ Maaraa 4: Intte naati loˈˈo laggeta dooranaadan maaddite. Nu laggeti nuuni loˈˈobaa woy iitabaa oottanaadan denttettana  danddayiyoogaa Xoossaa Qaalay geeshshidi yootees. (Leemiso 13:20 nabbaba.) Yelidaageetoo, intte naatu laggeta ereetii? Etaara gaytti ereetii, qassi amarida wodiyaa etaara aatti ereetii? Intte naati Yihoowa siiqiyaageetuura laggetanaadan maaddanawu waatana danddayeetii? (1 Qor. 15:33) Inttenaaranne intte naatuura issi issibaa oottanaadan Yihoowaara loˈˈo dabbotaa dabbotidaageeta shoobbiyoogan intte naatussi loˈˈo laggeti deˈanaadan maaddana danddayeeta.—Maz. 119:63.

15. Yelidaageeti bantta naatussi loˈˈo laggeti deˈanaadan maaddanawu waatana danddayiyoonaa?

¹⁵ Toona giyo aaway inne A machchiyaa bantta naati loˈˈo laggeta demmanaadan maaddanawu ay oottidaakko yootiis. I hagaadan giis: “Taaninne ta machchiyaa dumma dumma ishanttanne michchontta, yelagatanne gasttata daro layttawu nu soo shoobbida. Nuuni etaara qumaa miidanne so asaa goynuwaa issippe goynnida. Hagee Yihoowa wozanappe siiqiyaageetanne ufayssan awu haggaaziyaageeta eranawu keehi loˈˈo oge. Woradaa xomoosiyaageeti, misoonaawetinne harati nu son shemppoosona. Eta deˈuwan hanidabaa eti yootidoogaappe, eti minnidi oottidoogaappenne bantta goˈˈaa aggi bayidoogaappe nu naati darobaa tamaaridosona. Ha ubbabay nu naati Yihoowakko shiiqanaadan maaddiis.” Yelidaageetoo, intte naatussi loˈˈo laggeti deˈanaadan maaddanawu murttite.

16. Intte naˈay Yihoowawu haggaazanawu koyennaagaa yootikko waatana danddayeetii?

¹⁶ Intte baaxetishinkka, intte naatuppe issoy Yihoowawu haggaazanawu koyennaagaa yootikko shin? Coo daafurida giidi qoppoppite. Intte naˈa gujjin, nu ubbawu Xoossawu haggaazanawu woy haggaazennan agganawu dooriyo maataa Yihooway immiis. Intte naˈay Yihoowa aggikko, issi galla simmana giidi hidootan naagite. Bayida naˈaabaa yootiya leemisuwaa qoppite. (Luq. 15:11-19, 22-24) He yelagay daro iitabaa oottiis, shin wurssettan simmiis. Issoti issoti, “Hagee leemisoppe attin, tumuppe deˈuwan hanana danddayiyaabee?” giidi oychchana danddayoosona. Ee, hanana danddayiyaaba! Eela giyo bitaniyaa hanotaykka hegaa mala.

17. Eela hanotay inttena waati minttettii?

 ¹⁷ Bana yelidaageetubaa Eeli hagaadan giis: “Eti taani Yihoowanne A Qaalaa Geeshsha Maxaafaa siiqanaadan maaddanawu banttawu danddayettida ubbabaa oottidosona. SHin taani yelagatettan makkaliyoogaa doommaas.” Eeli naaˈˈu qommo deˈuwaa deˈiyoogaa doommiis; qassi A aawaynne aayyiyaa ayyaanaaban A maaddanawu baaxetiyo baaxiyaa I ekkennan ixxiis. I sooppe kiyi simmidi iitabaa oottiyoogaa doommiis. Gidikkonne, I ba laggetuppe issuwaara Geeshsha Maxaafaabaa issi issitoo haasayees. Eeli hagaadan giis: “Taani Yihoowabaa ta laggiyawu loytta yootiyoogee taani Yihoowabaa loytta qoppanaadan oottiis. Ta aayyiyaanne ta aaway Geeshsha Maxaafaa tumaa ta wozanan zeranawu mintti baaxetidosona; ta wozanan deˈiyaabay loddan loddan dicciyoogaa doommiis.” Guyyeppe, Eeli Yihoowakko simmiis. * Yelidaageeti naatettaappe doommidi I Yihoowa siiqanaadan tamaarissanawu baaxetidoogan ay keena ufayttidaakko qoppa!—2 Xim. 3:14, 15.

18. Bantta naati Yihoowa siiqanaadan tamaarissanawu minnidi oottiya yelidaageeta xeelliyaagan intteyyo siyettiyaabay aybee?

¹⁸ Yelidaageetoo, Yihoowawu goynniya ooratta yeletaa dichchiyo gita maataa Yihooway intteyyo immiis. (Maz. 78:4-6) Hegee deexxiyaaba gidikkokka, intte naata maaddanawu intte minnidi oottiyo gishshawu nuuni inttena wozanappe nashshoos! Intte naati Yihoowa siiqanaadan maaddanawunne eti awu azazettanaadan tamaarissanawu inttessi danddayettida ubbabaa aggennan oottikko, saluwan deˈiya nu siiqo Aaway ufayttanaagaa ammanettana danddayeeta.—Efi. 6:4.