1. Yihooway bawu goynniyaageeti waatanaadan shoobbii? (Misiliyaakka xeella.)

 NUUSSI koshshiya minttettuwaanne kaaletuwaa oona oychchana danddayiyoo? Ha oyshaa zaaruwaa eroos. Nuuni Xoossaa Yihoowa oychchana danddayoos. Nuuni yaatanaadan Yihooway shoobbees. Nuuni ‘ubba wode Xoossaa woossanaadan’ Geeshsha Maxaafay yootiyo gishshawu darotoo woossanaadan I koyiyoogaa eroos. (1 Tas. 5:17) Nuuni laˈatettan Yihoowa woossananne nu deˈo macara ubban kaaletuwaa demmanawu A oychchana danddayoos. (Lee. 3:5, 6) Yihooway keha gidiyo gishshawu nuuni koyidoogaa keenaa darotoo A woossana danddayiyoogaa yootees.

2. Nuuni ha huuphe yohuwan ay beˈanee?

² Nuuni woosaa imotaa nashshoos. Nuuni woossanawu oottana koshshiya ubbabaa oottikkonne, yaatanawu wodiyaa demmanawu metootana danddayoos. Nuuni kaseppe loytti woossana koshshiyoogaakka akeekana danddayoos. Daro minttettuwaanne kaaletuwaa Geeshsha Maxaafaappe nu demmana danddayiyoogee ufayssiyaaba. Nuuni Yesuusa leemisuwaa pilggiyoogan woosawu wodiyaa waati bazzana danddayiyaakko ha huuphe yohuwan beˈana. Qassi keehi koshshiya ichchashubata xeelliyaagan woossiyoogankka nuuni kaseegaappe waati loytti woossana danddayiyaakko beˈana.

3. Woosaa xeelliyaagan Yesuusi eriyoobay aybee?

³ Yihooway woosaa nashshiyoogaa Yesuusi akeekiis. Yesuusi ha saˈaa yaanaappe daro wodiyaappe kase, ammanettida asati woossido woosaa ba Aaway zaarishin beˈiis. Leemisuwawu, Haanna, Daawiti, Eelaasinne ammanettida hara daroti wozanappe woossido woosaa ba Aaway zaarido wode Yesuusi A matan deˈees. (1 Sam. 1:10, 11, 20; 1 Kaw. 19:4-6; Maz. 32:5) Yesuusi ba erissiyo ashkkarati ammanettidi darotoo woossanaadan tamaarissidoy hegaassa!—Maa. 7:7-11.

4. Yesuusi woossido woosatuppe nu ay tamaariyoo?

⁴ Yesuusi Yihoowa woossido woosatun, ba erissiyo ashkkaratussi leemiso gidiis. Yesuusi saˈan haggaazido wodetun darotoo woossiis. Awu darotoo oosoy dariyo gishshawunne daro asay akko yiyo gishshawu woosawu I wodiyaa bazzana koshshiis. (Mar. 6:31, 45, 46) I barkka deˈiyoosan woossanawu wodiyaa demmana mala maallado wontti maattan denddees. (Mar. 1:35) Baa giishin issi wode, I keehi gitabaa kuuyanaappe kase qamma ubbaa woossiiddi aqiis. (Luq. 6:12, 13) Yesuusi saˈaa haggaazuwan keehi metiyaabaa polidi hayqqanaappe kase qammi darotoo woossiis.—Maa. 26:39, 42, 44.

5. Nuuni Yesuusa waati milatana danddayiyoo?

⁵ Nuussi oosoy darikkokka, woossanawu wodiyaa bazzana koshshiyoogaa Yesuusappe tamaaroos. Yesuusaagaadan, nuuni woossanawu wodiyaa bazziyoogee koshshana danddayees. Geellaa nuuni wontti maattan denddana woy guuttaa qamissidi xiskkana danddayoos. Yaatiyo wode, nuuni ha alˈˈo imotaa nashshiyoogaa Yihoowawu bessoos. Liino giyo michchiyaa woosaa maataabaa koyro erido wode hegaa keehi nashshidoogaa hassayawusu. A hagaadan gaasu, “Yihoowa awudenne haasayissana danddayiyoogaa eridoogee taani A ta mata laggedan xeellanaadaaninne kaseppe loytta woossanawu koyanaadan tana maaddiis.” Nuuppe daroti hegaadan qoppiyoogee qoncce. Yaatikko nuuni woossana danddayiyo keehi koshshiya ichchashubata ane pilggoos.

6. Ajjuutaa 4:10, 11 yootiyoogaadan, Yihoowassi bessiyaabay aybee?

⁶ Yihoowa sabba. Kiitettida Yohaannisi 24 cimati saluwan Yihoowayyo goynniyoogaa  maalaalissiya ajjuutan beˈiis. Eti Xoossay “bonchchuwaa, sabaanne wolqqaa” ekkanawu bessiyoogaa yootiiddi A sabbidosona. (Ajjuutaa 4:10, 11 nabbaba.) Ammanettida kiitanchchatikka Yihoowa sabbiyo daro gaasoy deˈees. Eti saluwan aara deˈiyo gishshawu A loytti eroosona. Eti I oottiyooban qonccida A eeshshata akeekoosona. Eti Yihooway oottiyoobaa beˈiyoogee A sabbanaadan eta denttettees.—Iyy. 38:4-7.

7. Nuuni Yihoowa sabbana koshshiyoy aybissee?

⁷ Nuunikka nu woosan Yihoowa sabbana koshshees. Nuuni abaa siiqiyoobaanne A bonchchiyo gaasuwaa awu yootiyoogan yaatana danddayoos. Neeni Geeshsha Maxaafaa nabbabiyoonne xannaˈiyo wode, nena keehi ufayssiya Yihoowa eeshshata akeekanawu mala. (Iyy. 37:23; Roo. 11:33) Yaatada he eeshshata xeelliyaagan neeyyo siyettiyaabaa Yihoowayyo yoota. Qassi nuna, nu ishanttanne michchontta ubbaa maaddiyo gishshawu Yihoowa sabbana danddayoos. I ubbatoo nuussi qoppeesinne nuna naagees.—1 Sam. 1:27; 2:1, 2.

8. Nuuni Yihoowa galatanaadan oottiya amarida gaasoti awugeetee? (1 Tasalonqqe 5:18)

⁸ Yihoowa galata. Nuuni woosan Yihoowa galatanaadan oottiya daro gaasoy deˈees. (1 Tasalonqqe 5:18 nabbaba.) Nuussi deˈiya loˈˈoba ubbawu Yihoowa galatana danddayoos; ayssi giikko loˈˈo imota ubbaa immiday A. (Yaaq. 1:17) Leemisuwawu, loˈˈiya saˈaa gishshawunne I medhdhido maalaalissiyaabaa gishshawu A galatana danddayoos. Nu deˈuwaa, nu soo asaa, nu laggetanne nu hidootaa gishshawukka A galatana danddayoos. Qassi Yihooway nuuni A dabbo gidanaadan oottido gishshawu A galatoos.

9. Nuuni Yihoowa galatana koshshiyoy aybissee?

⁹ Nuuni Yihoowa galatiyaageeta gidana koshshiyo gaasota qoppanawu loytti baaxetiyoogee koshshana danddayees. Ha wodiyan daro asay galatenna. Asay baassi deˈiyaabawu galatiyoogaa aggidi, deˈanaadan koyiyoobaa darotoo qoppees. Nuuni hegaadan qoppiyoogaa doommikko, nu woossiyoobay oysha xalla gidana danddayees. Hegaappe naagettanawu, Yihooway nuussi oottiyo ubbabaa gishshawu A ubba wode galatana koshshees.—Luq. 6:45.

10. Issi michchiyaa galatiyaaro gidiyoogee genccanaadan O waati maaddidee? (Misiliyaakka xeella.)

¹⁰ Galatiyoogee metuwaa genccanaadan nuna maaddana danddayees. Ichchashe 15, 2015, Wochchiyo Keelan odettida Kiyun-suki deˈuwan hanidabaa beˈa. A goofiniyaa kansseriyan oyqettidoogaa eraasu. A hagaadan gaasu: “Taani ha harggiyan oyqettidoogaa erido wode keehi unˈˈettaas. Taappe ubbabay halidabadan qoppaasinne keehi dagammaas.” Genccanaadan O maaddidabay aybee? Ubba gallassi A xiskkanaappe kase pooqiyan deˈiya kifiliyaa baada he gallassi demmido ufayssiya ichchashubaa xeelliyaagan ba cenggurssaa  xoqqu oottada Yihoowa galatiyoogaa yootaasu. Yaatiyoogee O minttetteesinne Yihoowa siiqiyoogaa A yootanaadan denttettees. Yihooway ammanettida ba ashkkarata meto wodiyan waati naagiyaakko beˈaasu; qassi nu demmido anjjoy nuna gakkiya metuwaappe keehi daro gidiyoogaa akeekaasu. Kiyun-sukigaadan, nuna metoy gakkiyaaba gidikkonne, Yihoowa galatanaadan oottiya daro gaasoy deˈees. Woosan Yihoowa galatiyoogee nuuni genccanaadaaninne woppu giidi deˈanaadan maaddees.

11. Yesuusi erissiyo ashkkarati I saluwaa bi simmin xala gidana koshshidoy aybissee?

¹¹ Haggaazuwan xala gidanawu Yihoowa woossa. Yesuusi I erissiyo ashkkarati “Yerusalaameeninne Yihudaa biitta ubban, Samaariyaaninne sa7aa gaxaa [gakkanaashin]” abaa markkattanaagaa I saluwaa simmanaappe guuttaa kasetidi eta hassayissiis. (Oos. 1:8; Luq. 24:46-48) Amarida wodiyaappe simmin, Ayhuda haymaanootiyaa kaalettiyaageeti kiitettida PHeexiroosanne Yohaannisa oyqqidi Sanhedirina shilootaa sintti shiishshidosona; eti ha ammanettida asati sabbakiyoogaa agganaadan azazidosona, ubba eta yashissidosona. (Oos. 4:18, 21) Yaatin PHeexiroosinne Yohaannisi waatidonaa?

12. Oosuwaa 4:29, 31 yootiyoogaadan, erissiyo ashkkarati ay oottidonaa?

¹² Ayhuda haymaanootiyaa kaalettiyaageeti PHeexiroosanne Yohaannisa yashissido wode, eti hagaadan zaaridosona: “Xoossau azazettiyoogaa aggidi, intteyyo azazettiyoogee Xoossaa sinttan lo77okkonne ane intte pirddite. Aissi giikko, nuuni be7idobaanne siyidobaa yootennan agganau danddayokko.” (Oos. 4:19, 20) PHeexiroosinne Yohaannisi qashuwaappe birshshettido wode, erissiyo ashkkarati Yihoowa sheniyaa polanawu woossidosona. Eti, “nuuni ne ashkkarati, ne qaalaa kumetta xalan yootanaadan, nuna danddayissa” yaagidi Yihoowa woossidosona. Yihooway eti wozanappe woossido woosaa siyiis.—Oosuwaa 4:29, 31 nabbaba.

13. Jin-hiyuka hanotaappe ay tamaarana danddayiyoo?

¹³ Nuuni sabbakiyoogaa agganaadan kawotettaa sunttati azaziyo wodekka ubbatoo sabbakiyoogan erissiyo ashkkaratu leemisuwaa kaallana danddayoos. Wotaaddara gidennan ixxido gishshawu qashettida ishaa Jin-hiyuka hanotaa beˈa. I qasho keettan banttarkka banttarkka qashettidaageetussi qumaanne harabaa gishanaadan maddabettiis, gidikkonne etassi koshshiyaaba xalla etaara haasayanaadan awu paqqadettiis. SHin I Geeshsha Maxaafaabaa etaara haasayanaadan awu paqqadettibeenna. I demmido injje ubban markkattana mala xalanne akeekanchcha gidanawu woossiis. (Oos. 5:29) I hagaadan giis: “Qasho keettaa penggetun ichchawu ichchawu daqiiqawu darota Geeshsha Maxaafaa xannaˈissiyoogaa doomissanaadan xalatettaanne aadhdhida eratettaa immiyoogan Yihooway ta woosaa zaariis. He wode, qashuwan deˈiya asaassi kaalliya gallassan immana dabddaabbeta omarssan xaafays.” Nuunikka nu haggaazuwaa polanawu Yihooway nuna maaddanaagaa ammanettana danddayoos. Jin-hiyukaagaadan, xalatettaanne aadhdhida eratettaa demmanawu woossana danddayoos.

14. Nuuni metuwaa gencciyo wode nuna aybi maaddana danddayii? (Mazamure 37:3, 5)

¹⁴ Metuwaa genccanawu maaddanaadan Yihoowa woossa. Nuuppe daroti sahuwan, siiqiyo uri hayqqidoogan, so asaara gayttida metuwan, yedetan, woy hara metotun waayettoos. Qassi ubbasaa gakkiya harggiyaanne olaa malabay nuuni he metota gencciyoogee  yaa metanaadan oottiis. Ne wozanaabaa Yihoowawu yoota. Neeni ne mata laggiyawu yootiyoogaadan, ne hanotaa ayyo yoota. Yihooway ‘neessi oottanaagaa’ ammanetta.—Mazamure 37:3, 5 nabbaba.

15. ‘Waayiyan genccanaadan’ woosay nuna waati maaddii? Leemisuwaa yoota.

¹⁵ Ubba wode woossiyoogee ‘waayiyan genccanaadan’ nuna maaddees. (Roo. 12:12) Yihooway baayyo goynniyaageeti gencciiddi deˈiyoobaa akeekees, qassi ‘eta waasuwaa siyees.’ (Maz. 145:18, 19) Layttay 29 gidido Kristo giyo aqinyaa hegee tuma gidiyoogaa akeekaasu. Qoppibeenna wolqqaama harggee O oyqqiis. Hegaappe denddidaagan, A keehi unˈˈettaasu. Guyyeppe, woriyaa harggee ba aayyiyo oyqqidoogaa eraasu. Krista hagaadan gaasu: “Taassi ubba gallawu koshshiya minotettaa demmanawu Yihoowa mintta woossaas. SHiiqota shiiqiyoogaaninne buzo xannaˈiyoogan ayyaanaaban loˈˈobaa ubbatoo meeze oottanawu baaxetaas.” A gujjada hagaadan gaasu: “Wayssiya wodeta genccanaadan woosay tana maaddiis. Yihooway ubbatoo ta miyyiyan deˈiyoogaa erays, qassi hegaa qoppidoogee taani woppu gaanaadan maaddiis. Tana sakkiyaabay sohuwaara aggana xayikkonne, Yihooway sarotettaanne woppaa immiyoogan ta woosaa zaariis.” Yihooway bawu ‘goinniya asata paaciyaappe waati ashshanaakko eriyoogaa’ mule dogokko.—2 PHe. 2:9.

16. Paaciyaa eqettanawu nuussi Yihoowa maadoy koshshiyoy aybissee?

¹⁶ Paaciyaa eqettanawu Yihooway maaddanaadan woossa. Nuuni nagaranchcha gidiyo gishshawu, iitabaa oottanaadan nuna gakkiya paaciyaa ubbatoo eqettana koshshees. Nuussi paacee deexxanaadan Seexaanay bawu danddayettida ubbabaa oottees. I yaatiyo issi ogee pokkoban allaxxiyoogan nuuni iitabaa qoppanaadan oottiyoogaa. Hegaa malaban allaxxiyoogee nuuni pokkobaa qoppanaadan oottiyoogan Yihoowa sinttan  geeshsha gidennaadan oottees, qassi gita nagaraa oottanaadan nuna denttettees.—Mar. 7:21-23; Yaaq. 1:14, 15.

17. Nuuni maaduwaa demmanawu woossi simmidi paaciyaappe naagettanawu waatana koshshii? (Misiliyaakka xeella.)

¹⁷ Balabaa oottanaadan gakkiya paaciyaa xoonanawu nuussi Yihoowa maadoy koshshees. Yesuusi tamaarissido woosan kaalliya qofay deˈees: “Nuna iitabaappe ashshanaappe attin, paacen gelissoppa.” (Maa. 6:13) Yihooway nuna maaddanawu koyikkonne, I maaddanaadan nuuni woossana bessees. Nuuni nu woosaara maayettiyaabaakka oottana koshshees. Seexaanaa alamiyan daro asay qoppiyo bala qofaa nabbabiyoogaappenne siyiyoogaappe naagettanawu nuussi danddayettida keenaa baaxetana danddayoos. (Maz. 97:10) Nuuni Geeshsha Maxaafaa nabbabiyoogaaninne xannaˈiyoogan loˈˈobaa qoppana danddayoos. Qassi shiiqota shiiqiyoogeenne haggaaziyoogee nuuni qoppiyooban naagettanaadan oottees. Nuuni danddayiyoogaappe aaruwan paacettanaadan paqqadennaagaa Yihooway qaalaa geliis.—1 Qor. 10:12, 13.

18. Woosaara gayttidaagan nuuni ubbay waatana koshshii?

¹⁸ Nuuni ubbay ha waayissiya gallassatun Yihoowayyo ammanettidi deˈanawu kaseegaappe aaruwan woossana koshshees. Ubba galla wozanappe woossanawu wodiyaa bazza. Yihooway nuuni woossiyo wode ‘nu metuwaa awu yootanaadan’ koyees. (Maz. 62:8) I oottiyo ubbabaa gishshawu Yihoowa sabba, qassi A galata. Haggaazuwan xala gidanawu maaddanaadan A woossa. Nena gakkiya meto ubbaa genccanawunne paace ubbaa eqettanawu maaddanaadan A mintta woossa. Neeni ubbatoo Yihoowa woossiyoogaa aybinne woy ooninne teqqanaadan oottoppa. Yaatin Yihooway nu woosaa waati zaarii? Ha keehi koshshiya oyshaa kaalliya huuphe yohuwan beˈana.