1. Yihoowa asawu deˈiya loˈˈo eeshshay aybee?

XOOSSAA asay Yesuusa kaaletuwaa kaallidi Yihoowawu oottanawu bantta dosan ‘eeno gaanaagaa’ Geeshsha Maxaafay kasetidi yootiis. (Maz. 110:3) He hiraagay ha wodiyan tumuppe polettiiddi deˈees. Layttan layttan, Yihoowa ashkkarati sabbakiyo oosuwaa daro xeetu miilooniyan qoodettiya saatiyawu minnidi oottoosona. He oosuwaa oottanawu etawu miishshi qanxxettenna, qassi eti hegaa oottanawu koyiyo gishshawu oottoosona. Eti bantta ishantti koshshiyaabaa demmanaadan maaddanawu, eta minttettanawunne eta ammanuwaa minttanawu wodiyaa bazzoosona. Sunttettida ishantti banttawu imettida kifileta giigettiyoogan, qassi bantta ishanttanne michchontta minttettanawu biidi oychchiyoogan daro saatiyaa aattoosona. Yihoowa asay ha ubba oosuwaa oottiyoy aybissee? Eti Yihoowanne asaa siiqiyo gishshataassa.—Maa. 22:37-39.

2. Roome 15:1-3n odettidaagaadan, Yesuusi nuussi aybin leemiso gidii?

² Yesuusi I koyiyoobaappe harati koyiyoobaa kaseyiyoogan nuussi loˈˈo leemiso. Nuuni A kottiyaa kaallanawu nuussi danddayettida ubbabaa oottanawu baaxetoos. (Roome 15:1-3 nabbaba.) A leemisuwaa kaalliyaageeti goˈettana. Yesuusi hagaadan giis: ‘Ekkiyaagaappe immiyaagee ufayttees.’—Oos. 20:35.

3. Nuuni ha huuphe yohuwan ay beˈanee?

³ Yesuusi harata maaddanawu ba goˈˈaa aggi bayido amarida  hanotanne nuuni A leemisuwaa waati kaallana danddayiyaakko ha huuphe yohuwan beˈana. Kaseppe aaruwan harata maaddanawu nuuni waatana danddayiyaakkokka beˈana.

4. Yesuusi ba koyiyoobaappe harati koyiyoobaa waati kaseyidee?

⁴Yesuusi daafurido wodekka harata maaddiis. Yesuusi deriyaa lanqqen deˈiyo wode daro asay akko yin I oottidobaa qoppa; hegee Qifirinaahooma katamaa matan gidennan waayi aggana. Yesuusi qamma ubban woossiiddi aqiis. I keehi daafurennan aggenna, shin daro asaa beˈido wode eta giddon deˈiya hiyyeesatussinne hargganchchatussi qarettiis. I eta pattiyoogaa xalla gidennan, awudeegaappenne aaruwan minttettiya haasayaa haasayiis; hegee Maatiyoosa shemppo 5-7​n deˈiya haasayaa.—Luq. 6:12-20.

5. So asaa ayssiyaageeti daafuriyo wode siiquwaa bessiyoogan Yesuusa leemisuwaa waati kaalliyoonaa?

⁵So asaa ayssiyaageeti Yesuusa waati milatiyoonaa? Ha hanotaa qoppa: Kumetta gallassaa daafurssiya oosuwaa oottida aaway xalaliis. I he galla omarssi deˈiya So Asaa Goynuwaa prograamiyaa agganawu paacettikkonne, he xinaatiyaa kaalettanawu Yihooway wolqqaa immanaadan woossees. Yihooway A woosaa zaarido gishshawu eti kaseegaadankka xannaˈidosona. He galla omarssan naati keehi koshshiyaabaa, hegeekka Yihoowayyo goynniyoogee eta yelidaageetuyyo keehi aadhdhiyaaba gidiyoogaa tamaaridosona.

6. Yesuusi barkka takkana koshshiyo wodiyaa harata maaddanawu waati goˈettidaakko qonccissa.

⁶Yesuusi barkka takkana koshshido wodekka haratuyyo wodiyaa bazziis. Yesuusi ba laggee Xammaqiya Yohaannisi qooriyaa muucettidoogaa siyido wode awu aybi siyettidaakko qoppana danddayay? Yesuusi keehi azzanennan waayi aggana. Geeshsha Maxaafay hagaadan gees: “Yesuusi hegaa [Yohaannisa hayquwaabaa] siyidi, wolwoluwan gelidi, he sohuwaappe barkka asi bainnasaa biis.” (Maa. 14:10-13) I barkka takkanawu koyidoy aybissakko nuuni akeekana danddayoos. Nuuppe daroti kayyottanaadan oottiyaabay gakkiyo wode nurkka takkanawu koyoos. SHin Yesuusi barkka takkana danddayibeenna. Asi baynna he sohuwaa daro asay appe  kasetidi gakkiis. Yesuusi waatidee? I daro asawu koshshiyaabaa qoppiis, qassi etayyo ‘qarettiis.’ Etawu Xoossaa maadoynne minttettoy koshshiyoogaa Yesuusi akeekido gishshawu eta sohuwaara maaddiis. Yesuusi “asaa [guuttabaa gidennan,] darobaa tamaarissuwaa doommiis.”—Mar. 6:31-34; Luq. 9:10, 11.

7-8. Maadoy koshshiyo wode siiqiya cimati Yesuusa milatiyoogaa waati bessiyaakko leemisuwaa yoota.

⁷Siiqiya cimati Yesuusa waati milatiyoonaa? Bantta goˈˈaa aggi bayiya cimati nuuyyo oottiyoobaa gishshawu nu eta keehi galatoos! Gubaaˈiyaa ishanttuppenne michchonttuppe daroti eti oottiyoobaa erokkona. Leemisuwawu, eesuwan akkamettanaadan oottiyaabay merettiyo wode, Hosppitaaliyaara Gattiya Konttiyaa yarati bantta mala Kiristtaaneta sohuwaara maaddoosona. Eesuwan akkamettanaadan oottiyaabay darotoo qammi merettees! SHin he siiqiya cimati metoy gakkido ishaassi woy michcheessi qarettiyo gishshawu, bantta soo asaagaappenne banttaagaappe aaruwan, bantta mala Kiristtaaneti koyiyoobaa kaseyoosona.

⁸ Cimati SHiiquwaa Addaraashatanne hara keettata keexxiyoogan, qassi daafabay gakkin qohettidaageeta maaddoosona. Qassi eti nuna tamaarissanawunne minttettanawu bantta wodiyaappe dariya baggaa goˈettoosona. Ha ubba ishanttanne eta soo asaa nuuni wozanappe galatiyoogee bessiyaaba. Eti bantta goˈˈaa aggi bayiyo gishshawu Yihooway eta woytanaadan amottoos! Nu ubbaagaadan, cimati hanotaadan oottiyaageeta gidana koshshees. Eti bantta soo asawu koshshiyaabaa kunttanawu wode xayana gakkanaashin gubaaˈiyaa oosuwaa oottiiddi daro wodiyaa aattana koshshenna.

9. Piliphphisiyuusa 2:4, 5y yootiyoogaadan, ubba Kiristtaaneti ay mala qofay deˈiyoogeeta gidana koshshii?

⁹ Piliphphisiyuusa 2:4, 5 nabbaba. Cimatu xalla gidennan, nuuni ubbay nu goˈˈaa aggi bayiyoogan Yesuusa milatana danddayoos. I ‘ashkkara meretaa ekkidoogaa’ Geeshsha Maxaafay yootees. (Pili. 2:7) He xiqisiyaappe nuuni tamaarana danddayiyoobaa loytta qoppa. Nashshiyo ayllee woy ashkkaray ba godaa ufayssanawu koyees. Nuuni Yihoowa ayllenne nu ishanttussi ashkkara gidiyo gishshawu, kaseegaappe aaruwan Yihoowawunne nu ishanttussi oottanawu koyoos. Kaallidi deˈiya qofata pilggiyoogan hegaadan oottana danddayaasa.

10. Nuuni nuna oychchana danddayiyo oyshati awugeetee?

¹⁰Ne qofaa yigga. Hagaa mala oyshata nena oychcha: ‘Taani harata maaddanawu ta goˈˈaa agga bayanawu eeno giyaanaa? Leemisuwawu, issi cima ishaa baada oychchanaadan woy issi cima michchiyo gubaaˈiyaa shiiqota efaanaadan tana oychchiyaakko, ta waatanee? Gita shiiquwaa shiiqiyo sohuwaa geeshshiyoogan woy SHiiquwaa Addaraashaa loyttiyoogan maaddanawu taani eeno giyaanaa?’ Nuuni nuna Yihoowawu sheedhdhido wode nuussi deˈiya ubbaban awu haggaazanawu qaalaa gelida. Nuuni nu wodiyaa, nu wolqqaanne nu aquwaa harata maaddanawu goˈettanaadan I koyees. Hegaa gishshawu, nuuni nu goˈˈaa aggi bayidi hegaadan oottiyo wode I ufayttees. Nuuni giigissana koshshiyoobaa akeekikko, waatana danddayiyoo?

11. Nuuni nu goˈˈaa aggi bayanaadan woosay nuna waati maaddana danddayii?

¹¹Wozanappe Yihoowa woossa. Geella kaseegaappe aaruwan neeni ne goˈˈaa agga bayana koshshiyoogaa akeekikkonne, hegaadan oottennabadan neeyyo siyettana danddayees. Yaatikko, Yihoowa wozanappe woossa. Tumanchcha gida. Neessi siyettiyaabaa Yihoowawu yoota, qassi I ‘neeni awu eeno gaanaadaaninne I qoppidobaa nena ootissanaadan’ A oychcha.—Pili. 2:13.

12. Xammaqettida yelaga ishantti bantta gubaaˈiyaa ayba ogiyan maaddana danddayiyoonaa?

¹² Neeni xammaqettida yelaga isha gidikko, ne gubaaˈiyaa ishanttanne michchontta loytta maaddanawu koyana mala Yihooway nena maaddanaadan A oychcha. Issi issi biittatun, gubaaˈiyawu oottiyaageetuppe cimatu qooday daro, qassi gubaaˈiyawu oottiyaageetuppe daroti yelaga gidokkona. Dirijjitee dicci dicci biyo gishshawu, Yihoowa asaa maaddiya daro yelaga ishantti koshshoosona. Neeni koshshiyoosan awankka oottanawu eeno giikko, ufayttana. Ayssi giikko, neeni Yihoowa ufayssana, neeyyo loˈˈo sunttay deˈana, qassi harata maaddiyoogan neeni keehi ufayttana.

13-14. Nu ishanttanne michchontta maaddanawu waatana danddayiyoo? (Koyro sinttan deˈiya misiliyaa xeella.)

¹³Haratussi koshshiyaabaa loytta akeeka. Kiitettida PHawuloosi Ibraawe Kiristtaaneta hagaadan zoriis: “Lo77obaa oottiyoogaanne issoi issuwaa maaddiyoogaa dogoppite. Aissi giikko, Xoossaa ufaissiyaagee hegaa mala yarshshuwaa.” (Ibr. 13:16) Hegee loˈˈo zore! He Kiristtaaneti ha dabddaabbee gakkin daro takkennan bantta keettaa, bantta oosuwaanne ammanenna bantta dabbotaa aggidi ‘deriyaakko baqatana’ koshshiis. (Maa. 24:16) He wode eti issoy issuwaa maaddiyoogee keehi koshshiyaaba. Issoi issuwaa maaddanaadan PHawuloosi zorido zoriyaa hegaappe kase eti oosuwan peeshshikko, ooratta deˈuwaa meezetanawu metootokkona.

¹⁴ Nu ishanttinne michchontti banttassi koshshiyaabaa ubbatoo nuussi yootennan  aggana danddayoosona. Leemisuwawu, issi ishawu machchiyaa hayqqana danddayawusu. Nu ishawu qumaa kattiyoogan, transpporttiyaara gayttidaagan, woy so giddo oosuwan maadoy koshshii? I nuna metana koyenna gishshawu maaduwaa oychchennan aggana danddayees. I nuna maaduwaa oychchanaappe kase nuuni A maaddikko, I keehi galatana. Issi uri A maaddana woy I bawu koshshiyaabaa nuussi ubbatoo yootana giidi nuuni qoppana bessenna. Nena hagaadan oychcha: ‘Taani hegaa mala hanotan deˈiyaakko, ay mala maaduwan ufayttiyaanaa?’

15. Nuuni harata maaddanawu koyikko, waanana koshshii?

¹⁵Harati yayyennan haasayissiyo asa gida. Ne gubaaˈiyan harata maaddanawu ubbatoo giigi uttida ishanttanne michchontta neeni eriyoogee qoncce. Eti nuuni eta metidabadan qoppanaadan oottanawu mule koyokkona. Eti ubbatoo nuna maaddanawu koyiyoogaa nuuni eroos; qassi nuunikka hegaa mala asa gidanawu koyoos! Alan giyo layttay 45 gidido issi cimay harati yayyennan haasayissiyo asa gidanawu koyees. Yesuusa leemisuwaa wotti dentti qoppidi Alani hagaadan giis: “Yesuusi oosoy darido asa gidikkonne, naatinne cimati A dosoosona, qassi maaduwaa A oychchanawu yayyokkona. I etawu tumuppe qoppiyoogaa eti eroosona. Taani Yesuusa milatanawunne harati yayyennan haasayissiyo, siiqiyaanne qoppiya asa gidiyoogan erettanawu koyays.”

16. Mazamure 119:59, 60 oosuwan peeshshiyoogee Yesuusa leemisuwaa loytti kaallanaadan nuna waati maaddana danddayii?

¹⁶ Nuuni Yesuusa leemisuwaa wottiyoobi baynna ogiyan kaallennan aggikko, hidootaa qanxxana koshshenna. (Yaaq. 3:2) Misiliyaa medhdhiyoogaa malabaa tamaariya uri bana tamaarissiyaagaa wottiyoobi baynna ogiyan  milatana danddayeenna. SHin tamaaree ba mooruwaappe tamaariyo wodenne ba asttamaariyaa milatanawu bawu danddayettida keena loytti baaxetiyo wode, eraa gujji gujji bees. Hegaadankka, nuuni Geeshsha Maxaafaa xannaˈiyo wode akeekidobaa oosuwan peeshshikko, nuuyyo deˈiya shugo miyyiya giigissanawu nuussi danddayettida ubbabaa oottikko, Yesuusa leemisuwaa loytti kaallana danddayoos.—Mazamure 119:59, 60 nabbaba.

17-18. Nuuni Yesuusa leemisuwaa kaalliyo wode, demmiyo goˈˈay aybee?

¹⁷ Nuuni harata maaddanawu eeno giyo wode, haratikka hegaadan oottanawu koyana. Tiima giyo cimay hagaadan giis: “Keehi yelaga gidida amarida ishantti gubaaˈiyawu oottiyaageeta gididosona. He yelagati harati maaddanawu wozanappe eeno giyoogaa beˈido gishshawu, etikka hegaadan oottanawu koyidoogee hegawu issi gaaso. He yelaga ishantti nu gubaaˈiyaa maaddoosonanne cimata loytti kaafoosona.”

¹⁸ Ha wodiyan alamiyan daro asay bana keehi siiqees. SHin Yihoowa asay hegeetu mala mule gidenna. Yesuusi ba goˈˈaa aggi bayidoogee nuna maaddido gishshawu, nuuni A leemisuwaa kaallanawu murttida. Nuuni A leemisuwaa wottiyoobi baynna ogiyan kaallana danddayennaba gidikkonne, A leemisuwaa loytti “kaallana” danddayoos. (1 PHe. 2:21) Nuuni Yesuusa leemisuwaa kaallanawu nuussi danddayettida ubbabaa oottiyo wode, Yihooway ufayttiyo gishshawu nuunikka ufayttana.