1-2. (a) Maatay deˈiyoogeetun ammanettanawu ha wodiyan daroti metootiyoy aybissee? (b) Nuuni ha huuphe yohuwan ay beˈanee?

MAATAY deˈiyoogeetun ammanettanawu ha wodiyan daroti metootoosona. Kawotettatinne higgeti duretanne hayttatida asata darotoo maaddiyaaba gidikkonne, hiyyeesata darin maaddennaagaa eti akeekidosona. Geeshsha Maxaafay hagaadan gees: ‘Issi asi bawu deˈiya haariyo maataa hara asa qohanawu goˈettees.’ (Era. 8:9) Qassi haymaanootiyaa kaalettiya amaridaageeti iitabata oottoosona, hegee issi issi asay Xoossan ammanettiyoogaa agganaadan oottiis. Hegaa gishshawu, nuuni issi uraa Geeshsha Maxaafaa xannaˈissiyo wode, I Yihoowaaninne Yihooway saˈan sunttidoogeetun ammanettanaadan nuuni maaddana koshshees.

² Yihoowaaninne A dirijjitiyan ammanettana koshshiyaageeti xinaatetu xalla gidokkona. Nuuni Yihoowawu daro layttawu haggaazidaba gidikkonne, Yihooway ubbatoo suurebaa oottiyoogaa ammaniyoogaa mule aggana koshshenna. Nuuni Yihoowan ammanettiyoogee paacettanaadan oottiyaabay issi issitoo merettana danddayees. Ha huuphe yohuwan, nu ammanoy paacettanaadan oottiya heezzu hanotaa beˈana: (1) nuuni amarida Geeshsha Maxaafaa taariketa nabbabiyo wode, (2) Yihoowa dirijjitiyaappe nuussi kaaletoy imettiyo wode, qassi (3) sinttappe nuna metoy gakkiyo wode.

3. Amarida Geeshsha Maxaafaa taariketi nuuni Yihoowan ammanettiyoogee paacettanaadan waati oottana danddayiyoonaa?

 ³ Nuuni Xoossaa Qaalaa nabbabiyo wode, Yihooway amarida asaa xeelliyaagan hegaadan oottidoy aybissee, qassi amaridabaa hegaadan kuuyidoy aybissee? giidi qoppana danddayoos. Leemisuwawu, Sambbatan mittaa mixido gishshawu issi Israaˈeela bitanee hayqqanaadan Yihooway pirddidoogaa Qoodaabaa maxaafay yootees. Hegaappe daro layttay aadhdhi simmin, wodiraa laammidanne asa worissida Kawuwaa Daawitawu Yihooway atto giidoogaa naaˈˈantto Sameela maxaafay yootees. (Qoo. 15:32, 35; 2 Sam. 12:9, 13) ‘Asa worissidanne wodiraa laammida Daawitawu Yihooway atto giidi guutta nagara milatiyaabaa oottida bitanee hayqqanaadan pirddidoy aybissee?’ giidi qoppana danddayoos. Ha oyshaa zaaranawu nuuni Geeshsha Maxaafaa nabbabiyo wode hassayana koshshiyo heezzubata ane beˈoos.

4. Doomettaabaa 18:20, 21ynne Zaarettido Wogaa 10:17y Yihooway kuuyiyooban nuuni kaseegaappe aaruwan ammanettanaadan waati maaddiyoonaa?

⁴Geeshsha Maxaafay issi taarikiyaabaa ubbatoo wurssi yootenna. Leemisuwawu, Daawiti ba oottido nagaraappe wozanappe simmidoogaa nuuni eroos. (Maz. 51:2-4) SHin Sambbataa higgiyaa bonchchibeenna bitanee ay mala asee? I ba oottidoban azzanidee? I Yihoowa higgiyawu kasekka azzazettenee? I kase seeray imettin xaasayi xeellidee woy shenehoo giidee? Geeshsha Maxaafay hegaabaa yootenna. Gidikkonne, nuuni hagaa ammanettana danddayoos: Yihooway “iitatettai bainnaagaa” woy pirddaa mule geellayennaagaa. (Zaa. 32:4) I kuuyiyo ubbabawu denddoy tumaappe attin, harati yootiyoobaa, coo ixxiyoogaa, woy darotoo asay issibaa bala ogiyan xeellanaadan oottiya hanotaa gidenna. (Doomettaabaa 18:20, 21; Zaarettido Wogaa 10:17 nabbaba.) Nuuni Yihoowabaanne I kessido maaratubaa loytti eriyo wode, I kuuyidoban kaseegaappe aaruwan ammanettoos. Nuuni Geeshsha Maxaafaa nabbabiyo wode ha wodiyan zaaruwaa demmana danddayenna oyshati merettikko, nu Xoossay “ba ogiyan ubban xillo” gidiyoogaa ammanettanaadan oottiyaabaa eroos.—Maz. 145:17.

5. Nagaranchcha gidiyoogee nuuni suure kuuyennaadan waati oottii? (“ Nuuni Nagaranchcha Gidiyo Gishshawu, Issi Allaalliyaa Issi Issitoo Suure Akeekennan Aggana Danddayoos” giya saaxiniyaakka xeella.)

 ⁵Nuuni nagaranchcha gidiyo gishshawu issi issitoo suure gidanabaa kuuyoos. Xoossay nuna ba leemisuwan medhdhido gishshawu, nuuni asay maaraa oyqettiyoogaa beˈanawu koyoos. (Doo. 1:26) Gidoppe attin, nuuni nagaranchcha gidiyo gishshawu, ubbabaa eroos giidi qoppiyo wodekka issibaa xeelliyaagan balabaa kuuyana danddayoos. Leemisuwawu, Yihooway Nanawe asaa maaranawu kuuyido gishshawu, Yoonaasi keehi azzanidoogaa hassaya. (Yona. 3:10–4:1) SHin, Yihooway etawu maarotaa bessido gishshawu, hanidabaa qoppa. Bantta nagaraappe simmida 120,000ppe dariya Nanawe asay xayuwaappe attiis! Wurssettan, Yoonaasi asaabaa balabaa kuuyiis; shin Yihooway hegaadan oottibeenna.

6. Yihooway ba kuuyiyoobaa gaasuwaa nuussi yootana koshshennay aybissee?

⁶Yihooway issibaa kuuyido gaasuwaa asawu yootana koshshenna. Yihooway ba ashkkarati I kuuyidobaa woy kuuyanabaa xeelliyaagan banttawu siyettiyaabaa yootanaadan beni oottidoogee tuma. (Doo. 18:25; Yona. 4:2, 3) Qassi issi issitoo I ba kuuyidobaa yootiis. (Yona. 4:10, 11) SHin, Yihooway issi issibata kuuyido gaasuwaa nuuyyo yootana koshshenna. I nuna medhdhidaagaa gidiyo gishshawu, issibaa oottanaappe kase woy ootti simmidi nuuni hegaa maayettanaadan nuna oychchana koshshenna.—Isi. 40:13, 14; 55:9.

7. Nuna metana danddayiyaabay aybee, qassi aybissi?

⁷ Yihooway ubbatoo suurebaa oottiyoogaa nuuni wozanappe ammanettoos. SHin I sunttido asatun ammanettiyoogee nuussi metiyaaba gidana danddayees. ‘Yihoowa dirijjitiyan aawatettay deˈiyoogeeti tumuppe Yihoowa kaaletuwaadan oottiyoonaayye, bantta sheniyaadan oottiyoonaa?’ giidi nuuni qoppana danddayoos. Beni wode deˈida amaridaageeti hegaadan qoppennan waayi aggana.  Mentto 3n odettida taariketa qoppa. Sambbataa higgiyaa bonchchibeenna bitaniyaa dabboy, ‘Muusee bitanee hayqqanaadan pirddanaappe kase tumuppe zoriyaa Yihoowa oychchidee?’ giidi qoppennan aggenna. Daawiti Hiitiyaa Ooriyoona machcheera wodiraa laammiis; Ooriyoona laggee Daawiti kawo gidiyo ba maataa goˈettidi qixaatiyaappe attiis giidi qoppennan waayi aggana. Nuuni Yihooway ammanettiyo, I saˈan sunttidoogeetun ammanettana xayikko, Yihoowan ammanettoos gaana danddayennaagee tuma.

8. Ha wodiyan Kiristtaane gubaaˈee issi issibaa oottiyo ogee Oosuwaa 16:4, 5n odettidabaara issi mala gidiyoy aybiinee?

⁸ Yihooway ‘ammanettida wozannaama ashkkaraa’ baggaara ba dirijjitiyawu saˈaa baggaa ha wodiyan kaalettees. (Maa. 24:45) Koyro xeetu layttan bolla gididi heemmiyaagaadan, ha ashkkaray kumetta saˈan deˈiya Xoossaa asaa xomooseesinne gubaaˈe cimatussi kaaletuwaa immees. (Oosuwaa 16:4, 5 nabbaba.) Qassi cimati he kaaletoy gubaaˈetun polettanaadan oottoosona. Nuuni dirijjiteenne cimati immiyo kaaletuwaa kaalliyoogan, Yihooway ubbatoo suurebaa oottiyoogaa ammanettiyoogaa bessoos.

9. Cimati kuuyidobaa maayettiyoogee nuna metiyoy awudee, qassi aybissi?

⁹ Cimati kuuyidobaa maayettanawu nuuni issi issitoo metootana danddayoos. Leemisuwawu, mata layttappe ha simmin, daro gubaaˈeti issippe walahettidosona; hegee amarida gubaaˈeti hara woradawu laamettanaadan oottiis. Issi issi hanotatun, SHiiquwaa Addaraashati ekkiyoogaa keena asay shiiqanaadan aassiyaageeti hara gubaaˈiyaa baana mala cimati oychchoosona.  Eti nuuni hara gubaaˈiyaa baanaadan nuna oychchikko, laggetanne so asaa aggidi biyoogee nuuyyo deexxiyaaba gidana danddayees. Cimati aassiya issuwaa issuwaa awa maddabanaakko Yihooway eta kaalettii? Kaalettenna. Qassi hegee nuussi imettiya kaaletuwaa kaalliyoogee nuna metanaadan oottana danddayees. Gidikkonne, cimati hegaa malabaa kuuyiyo wode Yihooway etan ammanettees; nuunikka etan ammanettana koshshees. *

10. Ibraawe 13:17y yootiyoogaadan, nuuni cimatuura hashetana koshshiyoy aybissee?

¹⁰ Cimati kuuyiyoobay nuuni koyiyooba gidenna wodekka, eti kuuyidobaa nuuni maayettana koshshiyoy aybissee? Nuuni maayettiyoogee Xoossaa asaa giddon issippetettay xayennaadan maaddiyo gishshataassa. (Efi. 4:2, 3) Cimati kuuyidobaa ubbaykka banttana ziqqi oottidi azazettiyo wode gubaaˈeti minnoosona. (Ibraawe 13:17 nabbaba.) Ubbaappe aaruwan, nuussi koshshiyaabaa kunttanaadan Yihooway sunttidoogeetun ammanettidi hashettiyoogan nuuni Yihoowan ammanettiyoogaa bessoos.—Oos. 20:28, NW.

11. Cimati immiyo kaaletuwan mintti ammanettanaadan nuna aybi maaddana danddayii?

¹¹ Cimati gubaaˈiyaa xeelliyaagan haasayiyo wode geeshsha ayyaanaa demmanawu woossiyoogaa hassayiyoogan eti immiyo kaaletuwan ammanettana danddayoos. Qassi eti hegawu haniya Geeshsha Maxaafay yootiyo maaratanne Yihoowa dirijjitee giigissido kaaletota loytti pilggoosona. Eti Yihoowa ufayssanawunne banttawu danddayettida ubbabaa A asawu oottanawu wozanappe koyoosona. He ammanettida attuma asati bantta aawatettaa kiyiyoogaara gayttidaagan eti Xoossaa sinttan oyshettiyoogaa eroosona. (1 PHe. 5:2, 3) Hagaa qoppa: Zariyan, haymaanootiyaaninne polotikan, shaahettida ha alamiyan Yihoowa asay sarotettan issippe issi tumu Xoossawu goynnees. Hegee haniyoy Yihooway ba dirijjitiya maaddiyo gishsha xallaassa!

12. Issi uri ba nagaraappe simmidaakko simmibeennaakko kuuyiyo wode, cimati loytti qoppana koshshiyaabay aybee?

¹² Cimati gubaaˈiyaa geeshshatettaa naaganaadan Yihooway etassi gita aawatettaa immiis. Issi Kiristtaanee gita nagaraa oottikko, he uri gubaaˈiyaa yame gididi deˈana bessiya bessennaakko cimati kuuyanaadan Yihooway koyees. Qassi he uri ba oottido nagaraa gishshawu wozanappe zilˈˈettiyaakkonne cimati erana koshshees. I ba nagaraappe simmaassi giidi yootana danddayees, shin I tumuppe ba oottidobaa ixxii? I he nagaraa zaaretti oottennan agganawu murttidee? Iitatuura laggetiyoogee I nagaraa oottanaadan gaaso gidikko, I etaara laggetiyoogaa agganawu eeno gii? Cimati Yihoowa woossoosona, he yohuwaabaanne Geeshsha Maxaafay yootiyoobaa eti loytti qoppoosona, qassi nagaraa oottida uri ba oottidobaa xeelliyaagan awu siyettiyaabaa eranawu maloosona. Yaatidi eti nagaraa oottida uri gubaaˈiyaa yame gididi deˈana bessiya bessennaakko kuuyoosona. Issi issi hanotatun, I bohettana koshshees.—1 Qor. 5:11-13.

13. Nu laggee woy dabboy bohettiyo wode nuna qofissana danddayiyaabay aybee?

¹³ Nuuni cimatun ammanettiyoogee waani paacettana danddayii? Bohettida uri nuussi mata lagge woy dabbo gidana xayikko, cimati kuuyidobaa maayettiyoogee metennaba gidana danddayees. SHin bohettida uri nuussi mata lagge gidikko, hegaa maayettennan aggana danddayoos. Cimati ubbabaa qoribookkona giidi hirggana danddayoos, woy eti he yohuwaa Yihoowaagaadan kuuyidonaashsha giidi qoppana danddayoos. Kuuyidobaa maayettanaadan nuna aybi maaddana danddayii?

14. Nu laggetuppe woy nu dabbotuppe issoy bohettana koshshees giidi cimati kuuyiyo wode nuna aybi maaddana danddayii?

 ¹⁴ Bohiyoogee Yihooway giigissidoba, qassi hegee gubaaˈiyaa maaddiyoogaanne nagaraa oottida uraa goˈˈana danddayiyoogaa nuuni hassayana koshshees. Ba nagaraappe simmibeenna uri gubaaˈiyaa yame gididi deˈanaadan paqqadikko, haratikka nagaraa oottanaadan I denttettana danddayees. (Gal. 5:9) Hegaa bollikka, I gita nagaraa oottidoogaa akeekennan aggana danddayees, qassi Yihoowan sabettanawu ba qofaanne ba oottiyoobaa laammanawu darin waayi koyenna. (Era. 8:11) Issi uri bohettana koshshiya koshshennaakko kuuyiyo wode, cimati bantta aawatettaa maara poliyoogaa nuuni ammanettana danddayoos. Beni Israaˈeelan deˈiya daannatudan, eti ‘asayyo gidennan, Yihoowawu pirddiyoogaa’ eroosona.—2 Odi. 19:6, 7.

15. Yihooway immiyo kaaletuwaa ha wodiyan awudeegaappenne aaruwan nuuni ammanettana koshshiyoy aybissee?

¹⁵ Ha iita alamiyaa wurssettay keehi matido gishshawu, Yihooway issibaa oottiyo ogiyaa nuuni kaseegaappe aaruwan ammanettana koshshees. Aybissi? Gita waayiyaa wode, akeekanawu woy azazettanawu metiyaaba milatiya kaaletoy nuussi imettana danddayees. Yihooway nuussi huuphiyan huuphiyan yootenna. I saˈan sunttidoogeetu baggaara kaaletuwaa immana. Hagee imettiya kaaletuwaa siriyo wode, woy ‘Ha kaaletoy tumuppe Yihoowappe yiidabee, woykko aawatettay deˈiyo ishantti kuuyidobee?’ giidi qoppiyo wode gidenna. Keehi koshshiya he wodiyan neeni Yihoowaaninne A dirijjitiyan ammanettanee? Xoossay saˈan sunttidoogeeti immiyo kaaletuwaa neeni ha wodiyan xeelliyo ogee he oyshaa zaaruwaa eranaadan maaddana. Nuussi ha wodiyan imettiya kaaletuwaa neeni ammanettada azazettikko, gita waayiyaa wode neeni hegaadan oottana danddayaasa.—Luq. 16:10.

16. Nuuni Yihooway kuuyiyooban ammanettiyoogee sinttappe waani paacettana danddayii?

¹⁶ Nuuni loytti qoppana koshshiya harabay deˈees; hegeekka Yihooway ha iita alamiyaa bolli wurssettan pirddiyo pirddaa. Yihoowa Markka gidenna nu dabbotaa gujjin, Yihoowawu haggaazenna daroti wurssettay yaanaappe kase awu haggaazanawu kuuyana giidi nuuni ha wodiyan hidootan naagoos. SHin Armmageedoona olaa wode, Yihooway Yesuusa baggaara sinttappe eta gakkanabaa xeelliyaagan wurssetta pirddaa pirddana. (Maa. 25:​31-33; 2 Tas. 1:​7-9) Yihoowa maarotay oossi bessiyaakko, qassi oossi bessennaakko kuuyiyay nuna gidokko. (Maa. 25:​34, 41, 46) Nuuni Yihooway kuuyiyoobaa ammanettanee, woy I kuuyiyoobaa nuuni maayettenna gishshawu awu haggaaziyoogaa agganee? Nuuni sinttappe Yihoowan loytti ammanettana mala ha wodiyan an mintti ammanettana koshshiyoogee qoncce.

17. Yihooway ha iita alamiyaa bolli wurssettan pirddiyo pirdday nuna waati goˈˈanee?

 ¹⁷ Yihoowa pirddaa gaasuwan hanidabaa nuuni beˈiyo wode Xoossay ehiyo ooratta alamiyan nuussi aybi siyettanaakko qoppa. Worddo haymaanootee xayana, qassi yaaretiya zalˈˈanchchati woy asi deˈido wode ubban naaquwaa gattidanne asay tuggatanaadan oottida kawotettati deˈokkona. Sahoynne cimatettay deˈenna, qassi nuuni siiqiyoogeeti hayqqokkona. Seexaanaynne daydanttati shaˈu layttawu qashettana. Eti makkalidoogaa gaasuwan gakkida iitaba ubbay xayana. (Ajj. 20:2, 3) Nuuni Yihooway ubbatoo suurebaa oottiyoogaa ammanettiyoogan he wode keehi galatiyaageeta gidana!

18. Qoodaabaa 11:4-6ynne 21:5y yootiyoogaadan, Israaˈeelatu hanotaappe nuuni ay tamaarana danddayiyoo?

¹⁸ Nuuni Yihooway ubbatoo suurebaa oottiyoogaa ammanettiyoogee paacettanaadan oottiyaabay Xoossay ehiyo ooratta alamiyan merettana danddayii? Leemisuwawu, Israaˈeelati Gibxxe aylletettaappe laˈa kiyi simmin daro takkennan hanidabaa qoppa. Issoti issoti kase miyo qumaa amottido gishshawu zuuzummiyoogaa doommidosona; qassi eti Yihooway immido mannaa shenetidosona. (Qoodaabaa 11:4-6; 21:5 nabbaba.) Gita waayiyaappe simmin nuuni hegaadan qoppana danddayiyoo? Saˈaa geeshshanawunne loddan loddan saˈay gannate gidana mala nuuni ay keena oosuwaa oottana koshshiyaakko erokko. Oottana koshshiyo daro oosoy deˈiyo gishshawu koyro heeran deˈoy metennan waayi aggana. He wode Yihooway nuussi immiyooban zuuzummanee? Yihooway nuussi haˈˈi immiyoobaa gishshawu nuuni galatiyaageeta gidikko, I he wode nuussi immiyoobaa gishshawu nuuni loytti galatana.

19. Ha huuphe yohuwan tamaarido ayfettiya yohota qanttan qonccissuutee?

¹⁹ Yihooway ubbatoo suurebaa oottees. Nuuni hegaa ammanettana koshshees. Yihooway ba kaaletuwaa polissiyaageetun ammanettiyoogaadan, nuunikka etan ammanettana koshshees. Yihooway I kiittin hananabaa yootiya Isiyaasa baggaara yootido qaalaa mule dogoppa: “Co77u giyoogeenne ammanettiyoogee intteyyo wolqqa gidana.”—Isi. 30:15.