1. Daro asay haniyoobaa xayidoy aybissee?

BANTTANA Kiristtaane giyaanne Xoossaa ufayssiya ogiyan awu goynnoos giya daro haymaanooteti ha wodiyan deˈoosona. Daro asay haniyoobaa xayidoy hegaassa! Eti hagaadan oychchoosona: “Issi tumu haymaanootee deˈiiyye, ubba haymaanootee Xoossaa ufayssii?” Nuuni Yihoowa Markkati tumaa tamaarissiyoogaanne nuuni Yihoowawu goynniyo ogee xallay A ufayssiyoogaa ammaniyoo? Hegeeta eriyoogee neeni ammanettanaadan oottana danddayii? Ane naqaashaa beˈoos.

2. Kiitettida PHawuloosi tumaa ammanidoy aybissee? (1 Tasalonqqe 1:5)

² Kiitettida PHawuloosi tumaa mintti ammanees. (1 Tasalonqqe 1:5 nabbaba.) I tuma ammanidoy hegee bana ufayssiyo gishsha xallaassa gidenna. PHawuloosi Xoossaa Qaalaa mintti xannaˈiis. I, ‘Xoossaa maxaafa ubban Xoossaa ayyaanay deˈiyoogaa’ ammaniis. (2 Xim. 3:16) I hegaappe ay akeekidee? Yaana geetettida Masee Yesuusa gidiyoogaa bessiya naqaashaa Ayhuda haymaanootiyaa kaalettiyaageeti xaasayi xeellidosona, shin PHawuloosi Geeshsha Maxaafaappe hegaa loytti akeekiis. Eti asaa Xoossaabaa tumaa tamaarissoos giidi yootikkonne, Xoossay ixxiyoobaa oottoosona. (Tii. 1:16) PHawuloosi eta mala gidenna. I Xoossaa Qaalaappe ammananawu koyiyoobaanne ammananawu koyennabaa dooribeenna. “Xoossay oottanawu qoppidobaa ubbaa” tamaarissiisinne oosuwan peeshshiis.—Oos. 20:27.

3. Nuuni tuman deˈiyoogaa ammananawu nu oychchiyo oysha ubbawu zaaruwaa demmana koshshii? (“ Yihoowa Oosoynne A Qofay ‘Yootin, Wuriyaabaa Gidenna’” giya saaxiniyaakka xeella.)

³ Tumu haymaanootee ubba oyshata, haray atto Geeshsha Maxaafan zaaroy baynnaageetakka zaarana koshshees  giidi amaridaageeti qoppoosona. Hegee danddayettiyaabee? PHawuloosa hanotaa qoppa. I ba mala Kiristtaaneti ‘ubbabaa paaccanaadan’ yootidaba gidikkonne, I erenna darobay deˈiyoogaakka odiis. (1 Tas. 5:21) I hagaadan giis: “Nuuni eratettaappe baggaa ereettees.” Qassi gujjidikka, “Nuuni ha77i be7iyoogee heregan be7iyo lem77i lem77iya mera mala” yaagiis. (1 Qor. 13:9, 12) PHawuloosi ubbabaa erennaagaadan, nuunikka erokko. SHin PHawuloosi Yihoowa xeelliyaagan tumaa erees. I ammaniyoobay tuma gidiyooga loytti erees!

4. Nuuni tumaa eridoogaa waati mintti ammanana danddayiyoo, qassi tumu Kiristtaanetubaa ay beˈanee?

⁴ Nuuni tumaa eridoogaa kaseegaappe aaruwan ammanana danddayiyo issi ogee Yihoowa Markkati ha wodiyan goynuwaara gayttidaagan oottiyoobaa goynuwaa xeelliyaagan Yesuusi oottidobaara geeddarssiyoogaana. Tumu Kiristtaaneti (1) eeqawu goynnennaagaa, (2) Yihoowa sunttaa bonchchiyoogaa, (3) tumaa siiqiyoogaanne (4) issoy issuwaa wozanappe siiqiyoogaa ha huuphe yohuwan beˈana.

5. Xoossawu goynniyo likke ogiyaa xeelliyaagan Yesuusappe ay tamaarana danddayiyoo, qassi I tamaarissidobaa waati oosuwan peeshshana danddayiyoo?

⁵ Yesuusi Yihoowa keehi siiqiyo gishshawu saluwan deˈiyo wodekka saˈan deˈiyo wodekka A xalaalawu goynniis. (Luq. 4:8) Ba erissiyo ashkkaratikka Yihoowa xalaalawu goynnanaadan tamaarissiis. Yesuusikka ammanettida I erissiyo ashkkaratikka goynuwawu misiliyaa goˈettibokkona. Xoossay ayfiyan beettenna gishshawu, ooninne A milatissidi medhdhana danddayenna! (Isi. 46:5) Issoti issoti geeshsha giidi qoppiyo asatu misiliyaa medhdhiyoogaanne eta woossiyoogaa  xeelliyaagan shin? Tammu Azazotuppe naaˈˈanttoogan Yihooway hagaadan giis: “Bolla saluwan de7iyaabaa, woikko garssa sa7an de7iyaabaa, . . . aibanne malatissada neeyyo goinniyo misileta kessoppa. Etayyo hokkoppa.” (Kes. 20:4, 5) Xoossaa ufayssanawu koyiyaageetussi ha xiqisee yootiyoobay qoncce.

6. Ha wodiyan Yihoowa Markkati goynuwaara gayttidaagan kaalliyoobay aybee?

⁶ Beni Kiristtaaneti Xoossaa xalaalawu goynnidoogaa taarikiyaa eranchchati yootoosona. Leemisuwawu, beni Kiristtaaneti goyno sohotun misiliyaa goˈettennan “ixxidoogaa” issi taarikiyaa maxaafay yootees. Ha wodiyan Yihoowa Markkati beni Kiristtaanetu leemisuwaa kaalloosona. Geeshsha giyoogeetu misileta woy kiitanchchata woossokko; haray atto Yesuusa woossokko. Qassi nuuni banddiraa siraataa bonchchokko woy nu biittaa goynniyoogaa bessiya aybanne oottokko. Nuuni hegaadan oottanaadan harati malikkokka, Yesuusi, “Godaayyo, ne Xoossaayyo goinna” giidi azazidobaa azazettanawu murttida.—Maa. 4:10.

7. Yihoowa Markkatu giddooninne hara haymaanootetu giddon deˈiya dummatettay aybee?

⁷ Ha wodiyan daroti asay keehi dosiyo sabaketi yootiyoobaa siyanawu koyosona. He sabaketa goynniyoogaa keenaa asay keehi nashshees. Daro asay eta woosa keettaa bees, eta maxaafata shammees, qassi eta woy eta dirijjitiyaa maaddanawu daro miishshaa immees. Amarida asay he sabaketi yootiyo ubbabaa ammanees. Woosa keettaa biyaageeti Yesuusi etawu qoncciyaakko hegaadan keehi ufayttana giidi qoppiyoogee metiyaaba! SHin, likke ogiyan Xoossaa goynniyaageeti asa kaallokkona. Nuuni aawatettay deˈiyoogeeta bonchchikkokka, Yesuusi, “intte ubbai ishantta” giidi qoncciyan tamaarissidobaa azazettoos. (Maa. 23:8-10) Haymaanootiyaa kaalettiyaageeta gidin woy polotikan alamiyaa haariyaageeta gidin nuuni ay asanne goynnokko. Qassi eta halchchuwaa kaafokko. Nuuni polotikan oossinne exatennan deˈoosinne ha alamiyaa bagga gidokko. Banttana Kiristtaane giya hara haymaanootetuppe nuuni ha ubbaban keehi dummatoos.—Yoh. 18:36.

8. Yihooway ba sunttay bonchchettanaadaaninne ubba asay eranaadan koyiyoogaa waati eriyoo?

⁸ Yesuusi issi wode hagaadan woossiis: “Ta Aawau, ne sunttaa bonchcha.” Yihooway ba sunttaa bonchchanaagaa saluwaappe gita cenggurssan yootiyoogan he woosaa zaariis. (Yoh. 12:28) Yesuusi haggaaziyo wode ubban ba Aawaa sunttaa bonchchiis. (Yoh. 17:26) Yaatiyo gishshawu, tumu Kiristtaaneti Xoossaa sunttaa goˈettiyoogaanne harati hegaa eranaadan oottiyoogaa gita maatadan xeelloosona.

9. Koyro xeetu layttan deˈida Kiristtaaneti Xoossaa sunttaa bonchchiyoogaa waati bessidonaa?

⁹ Kiristtaane gubaaˈee eqqi simmin takkennan, Yihooway ‘Ayhuda gidennaageetu giddoppe bawu woy ba sunttawu haniya asaa ekiis.’ (Oos. 15:14) He Kiristtaaneti Xoossaa sunttaa goˈettiyoogaaninne hegaa harati eranaadan oottiyoogan keehi ufayttidosona. Kiitettidaageetinne erissiyo ashkkarati sabbakiyo wodenne Geeshsha Maxaafaa xaafiyo wode Xoossaa sunttaa goˈettidosona. * Yaatiyoogan Xoossaa sunttaa erissiyay eta xalaala gidiyoogaa bessidosona.—Oos. 2:14, 21, NW.

10. Yihoowa sunttay erettanaadan oottiyaageeti Yihoowa Markkatu xalaala gidiyoogaa waati eriyoo?

¹⁰ Yihoowa Markkati Yihoowa sunttawu haniya  asee? Naqaashata beˈa. Ha wodiyan, haymaanootiyaa kaalettiya daroti bantta maataa goˈettidi Xoossaa buzo sunttay erettennaadan banttawu danddayettida ubbabaa oottidosona. Eti bantta Geeshsha Maxaafaa birshshettatuppe he sunttaa kessidosona; issi issi hanotatun qassi bantta woosa keettatun Xoossaa sunttaa goˈettennaadan diggidosona. * Xoossaa sunttaa bessiyaagaadan bonchchiyaageeti Yihoowa Markkatu xalaala gidiyoogee qoncce. Hara ay haymaanootetugaappe aaruwan nuuni Xoossaa buzo sunttay ubbasan erettanaadan oottoos! Nuuni Yihoowa Markka gidiyo gishshawu nu sunttaadan deˈanawu nuussi danddayettida ubbabaa oottoos. (Isi. 43:10-12, NW) Geeshsha Maxaafaa birshshiya harati Yihoowa sunttaa Geeshsha Maxaafaappe kessido sohuwan zaaretti gelissiyoogan he sunttay deˈiyo Ooratta Alamiyaa Geeshsha Maxaafaa Birshshettaa 240 miilooneppe daruwaa nuuni attamissida. Nuuni 1,000ppe dariya qaalan giigissiyo Geeshsha Maxaafaa qofay deˈiyo xuufetun Yihoowa sunttaa goˈettoos!

11. Beni Kiristtaaneti tumaa siiqiyoogaa waati bessidonaa?

¹¹ Yesuusi tumaa siiqees; hegeekka Xoossaabaa tumaanne Xoossay oottana ubbabaa siiqees giyoogaa. Yesuusi deˈido deˈoy I tumaa ammaniyoogaa bessees; qassi I harati he tumaa eranaadan oottiis. (Yoh. 18:37)  Tumuppe Yesuusa kaalliyaageetikka he tumaa mintti siiqoosona. (Yoh. 4:23, 24) PHeexiroosi Kiristtaanetu haymaanootiyaa, ‘Tumaa ogiyaa’ yaagiis. (2 PHe. 2:2) Beni Kiristtaaneti tumaa mintti siiqiyo gishshawu, tumaara maayettenna haymaanoote timirtteta, wogaanne asa qofaa kaallibookkona. (Qol. 2:8) Hegaadankka ha wodiyan tumu Kiristtaaneti bantta ammanuwaassinne bantta deˈuwaassi Yihoowa Qaalaa denddo oottidi ‘tuman deˈanawu’ baaxetoosona.—3 Yoh. 3, 4.

12. Bolla Gididi Heemmiyaagee nuuni kase eridobaa woy issibaa oottiyo ogiyaa laammana koshshiyoogaa akeekiyo wode waati, qassi aybissi?

¹² Yihoowa Markkati ubbatoo Geeshsha Maxaafan deˈiya ubbabaa loytti eroos gookkona. Geeshsha Maxaafaa timirttiyaa qonccissiyo ogiyan woy gubaaˈiyaa darajjayiyo ogiyan issi issitoo baloosona. Hegan nuuni garamettana koshshenna. Tumaa eray wodiyaappe wodiyan gujji gujji baanaagaa Geeshsha Maxaafay qoncciyan yootees. (Qol. 1:9, 10) Yihooway tumaa loddan loddan qonccissees, qassi nuuni tumaa loytti akeekana gakkanaashin danddayan naagana koshshees. (Lee. 4:18) Bolla Gididi Heemmiyaagee nuuni kase eridobaa woy issibaa oottiyo ogiyaa laammana koshshiyoogaa akeekiyo wode, sohuwaara laammees. Ha wodiyan daro woosa keettati bantta asaa ufayssanawu woy alamee eta dosanaadan koyiyo gishshawu, bantta timirtteta laammoosona. SHin Yihoowa Markkati kaseegaappe aaruwan Xoossaakko shiiqanawunne Yesuusaagaadan awu goynnanawu koyiyo gishshawu laammoosona. (Yaaq. 4:4) Nuuni laammiyoy alamiyaa asaa qofay laamettido gishshataassa gidennan, Geeshsha Maxaafaa loytti akeekido gishshataassa. Nuuni tumaa siiqoos!—1 Tas. 2:3, 4.

13. Beni Kiristtaaneti bessido ubbaappe aadhdhiya eeshshay awugee, qassi ha wodiyan Yihoowa Markkati hegaa waati bessiyoonaa?

¹³ Beni Kiristtaaneti daro loˈˈo eeshshati deˈiyoogeeta gidiyoogan erettoosona, shin eti loytti erettiyoy ubbaappe aadhdhiya eeshsha gidida siiquwaana. Yesuusi hagaadan giis: “Intte issoi issuwaara siiqettikko, ta erissiyo ashkkarata gidiyoogaa asai ubbai erana.” (Yoh. 13:34, 35) Ha wodiyan, kumetta alamiyan deˈiya Yihoowa Markkati tumuppe siiqettoosonanne issippetettan deˈoosona. Nu biittaynne nu wogay dummatikkokka nuuni issi keetta asa mala gidiyo gishshawu, hara haymaanootetu ubbaappe dummatoos. Hegaa nu gubaaˈe shiiqotuninne nu gita shiiqotun beˈoos. Hegee nuuni Yihoowa ufayssiya ogiyan goynniyoogaa loytti ammananaadan maaddees.

14. Efisoona 4:32y yootiyoogaadan, nuuni issoy issuwaara wozanappe siiqettiyooga bessana danddayiyo keehi koshshiya ogee aybee?

¹⁴ Geeshsha Maxaafay nuuni ‘issoy issuwaara wozanappe siiqettanaadan’ zorees. (1 PHe. 4:8) Nuuni issoy issuwawu atto giyoogeenne eta mooruwaa danddayiyoogee hegaa mala siiquwaa bessiyo issi oge. Nuuni nuna yiilloyidaageeta gujjin, gubaaˈiyan deˈiya ubbawu kehatettaa bessananne eta imatuwaa mokkana danddayiyo injjiyaa koyoos. (Efisoona 4:32 nabbaba.) Nuuni hegaa mala siiquwaa bessiyo wode tumu Kiristtaaneta gidiyooga qonccissoos.

15. Goynuwaara gayttidaagan nuuni hara ayba ogetun koyro xeetu layttan deˈida Kiristtaanetu leemisuwaa kaalliyoo?

¹⁵ Nuuni goynuwaara gayttidaagan hara ogetunkka koyro xeetu layttan deˈida Kiristtaanetu  leemisuwaa kaalloos. Leemisuwawu, nuuni darajjayettido ogee beni Kiristtaanetuugaara issi mala. Etaagaadan, nuussikka yuuyidi xomoosiyaageeti, cimatinne gubaaˈiyawu oottiyaageeti deˈoosona. (Pili. 1:1; Tii. 1:5) Qassi etaagaadan, Yihooway mattumaa gaytettawunne aqo deˈuwawu kessido maarata, qassi suuttaa goˈettiyoogaa xeelliyaagan Xoossay yootiyoobaa azazettoos; Xoossaa higgiyawu azazettana koyennaageetuppe gubaaˈiyaa naagoos.—Oos. 15:28, 29; 1 Qor. 5:11-13; 6:9, 10; Ibr. 13:4.

16. Efisoona 4:4-6n deˈiya qofaappe nuuni ay tamaariyoo?

¹⁶ Yesuusi daroti I erissiyo ashkkara gidiyoogaa yootanaagaa odiis; shin eti ubbay tumanchcha gidokkona. (Maa. 7:21-23) Qassi Geeshsha Maxaafay ha wurssetta gallassatun deˈiya daroti ‘ammanuwaa bolla doona xallan ekkidabaa milatanagaa’ yootees. (2 Xim. 3:1, 5) Gidikkonne, Geeshsha Maxaafay Xoossaa ufayssiya ‘issi ammanoy’ woy haymaanootee deˈiyoogaa geeshshidi yootees.—Efisoona 4:4-6 nabbaba.

17. Yesuusanne tumu haymaanootiyaa ha wodiyan kaalliyaageeti oonee?

¹⁷ Ha wodiyan issi tumu haymaanootiyaa kaalliyaageeti oonee? Nuuni naqaashaa pilggida. Goynuwaara gayttidaagan Yesuusi tamaarissidobaanne koyro xeetu layttan deˈida Kiristtaaneti oottidobaa beˈida. Zaaroy issuwaa xalla; hegeeti Yihoowa Markkata. Yihoowa asa gidiyoogee, qassi Yihoowabaanne I halchchidobaa tumaa eriyoogee nuussi gita maataa! Hegaa gishshawu, nuuni tuman deˈiyoogaa mintti ammananawu nuussi danddayettida ubbabaa oottanawu koyiyaageeta gidoos.