INDONEZHIYAN Saniger Bezar giyo qeeri haruuruwan nu michchonttuppe heezzati deꞌoosona. Amarida layttaappe kase eti abba doonan issippe oottidosona. Eti ha haruuruwan asay Geeshsha Maxaafaa eranaadan maaddanawu sabbakiyogan erettoosona. Shin he wode eti dumma oosuwa oottidosona.

Koyruwan, eti haattaa giddo hemettidi deexxiya shuchchaa demmoosona, qassi tookkidi abbaa gaxaa guyye simmoosona. He shuchchatuppe amaridaageeti tohuwa kuwasiyadan gita. Naaꞌꞌanttuwan, he shuchchaa yesoy kuttuwa phuuphulliyappe guuxxana gakkanaashin eti guutta oydiyan uttidi madooshan mentterettoosona. Hegaappe simmin, suuppa shuchchaa balddiyan yeggidi bantta heeran deꞌiya adussa xekkaa kiyoosona. Yaatidi ogiya oosuwawu kaamee caanidi efaanaadan he shuchchaa wogga qanccan qoloosona.

He michchonttuppe issinniya Hulddo. He oosuwa oottiya haraatuppe aaruwan hegaa oottanawu iyyo daro wode deꞌees. A hegaappe demmiyo miishshaa ubbaa ba so asawu koshshiyabaa kunttanawu darotoo goꞌettawusu. Shin A haꞌꞌi he miishshaappe amaridaagaa harabawukka goꞌettanawu koyaasu. A JW Laybreeriya goꞌettanawu taabileetiya koyaasu. Ha applikeeshiniyan deꞌiya biidotinne harabati Huldda haratussi markkattanaadan, Geeshsha Maxaafaa xannaꞌanaadaaninne akeekanaadan maaddiyogaa eraasu.

Huldda qeeri kaamiya kumiyagaa keena shuchchaa mentterettanawu issi aginanne baggaa maallado maallado naaꞌꞌu saatiyawu oottaasu. Wurssettan, A taabileetiya shammanawu gidiya miishshaa demmaasu.

Huldda hagaadan gaasu: “Shuchchaa mentterettiyogan ta keehi daafuridabanne sahettidaba gidikkokka, taani haggaazuwan qara gidanawunne shiiqotussi metootennan giigettanawu ha ooratta taabileetiya goꞌettiyo wode ta daafuraanne sahuwa ubbaa sohuwara dogaas.” Koronaa harggiya wodiyan shiiquwawunne haggaazuwawu galchchaara gayttanaadan O he taabileetee maaddidoogaakka yootaasu. Huldda ba halchchuwa polidoogan nu keehi ufayttoos.