XANNAꞌIYO HUUPHE YOHUWA 44
MAZAMURE 33 Ne Toohuwaa Yihoowan Wotta
Naaquwa Genccanawu Waatana Danddayay?
“Asi oottiyo iitaban xoonettoppite, shin loꞌꞌobaa oottidi iitabaa xoonana danddayeeta.”—ROO. 12:21.
TAMAARANABAA
Nuna harati naaqqiyo wode, hanotay yaa iitennaadan waatana danddayiyakko beꞌana.
1-2. Naaqoy nuna ayba ogetun gakkana danddayii?
DAANNAY iyyo suure pirddanaadan ubbatoo oychchiya amꞌꞌe maccaaseebaa Yesuusi leemisuwan yootiis. He wode Yesuusa kaalliyageeta daro asay naaqqiyo gishshawu he maccaaseessi aybi siyettidaakko eti loytti akeekennan aggokkona. (Luq. 18:1-5) Nuna ubbaakka dumma dumma wodiyan naaqoy gakkiyo gishshawu, iyyo siyettidabaa nuunikka akeekana danddayoos.
2 Ha wodiyan alamiyan asa coo ixxiyogee, asa asappe shaakkiyogeenne huqqunnay keehi darido gishshawu, naaqoy nuna gakkiyo wode nuuni maalaalettokko. (Era. 5:8) Shin issi ishay woy michchiya nuna naaqqiyo wode, nuuni keehi azzanana danddayoos. Nu ishanttinne michchontti nuuyyo morkke gidennaagee qoncce. Shin eti nagaranchcha. Iitati naaquwa gattido wode Yesuusi oottidobaappe nuuni darobaa tamaarana danddayoos. Nuna naaqqiya nu morkketa nuuni danddayiyaba gidikko, nu mala Kiristtaaneta hegaappe aaruwan danddayana koshshees! Issi ishay woy michchiya woy hara uri nuna naaqqiyo wode Yihoowawu aybi siyettii? Nubay A qofissii?
3. Nu bolli gakkiya naaqoy Yihoowa qofissii, qassi aybissi?
3 Yihooway harati nuna suure oyqqanaadan koyees; qassi nuna harati naaqqiyo wode I hegaa akeekees. Ayssi giikko, I ‘likke pirddaa dosees.’ (Maz. 99:4) Bessiya wodiyan, Yihooway nuuyyo ‘eesuwan suure pirddanaagaa’ Yesuusi yootiis. (Luq. 18:7, 8) Qassi Yihooway nuna waayissiya ubbabaa mata wode xayssidi, naaqoy haranttuwa nuna gakkennaadan oottana.—Maz. 72:1, 2.
4. Yihooway ha wodiyan nuna maaddanawu waatii?
4 Yihooway meto ubbaa xayssiyo wodiya nuuni naagana koshshees. Shin I ha wodiyankka harati naaqqiyo wode nuna maaddees. (2 PHe. 3:13) Harati nuna naaqqiyo wode nuuni eeyyabaa oottiyogaappe naagettanaadan I nuna tamaarissees. Naaqoy gakkido wode ba Naꞌay oottidobaa Geeshsha Maxaafan xaafissidoogee I yaatiyo issi oge. Qassi naaqoy nuna gakkiyo wode nuuni oottana danddayiyobaa xeelliyagan Geeshsha Maxaafaa baggaara nuna zorees.
NAAQOY NENA GAKKIYO WODE NE HANIYOBAN NAAGETTA
5. Nu bolli naaqoy gakkiyo wode nuuni haniyoban naagettana koshshiyoy aybissee?
5 Naaqoy gakkiyo wode nuuni keehi azzanananne unꞌꞌettana danddayoos. (Era. 7:7) Iyyoobanne Imbbaqooma mala ammanettida ashkkaratuyyokka hegaadan siyettiis. (Iyy. 6:2, 3; Imb. 1:1-3) Hegaadan siyettiyogee wottin deꞌiyaba gidikkokka, nuuni eeyyabaa oottennaadan naagettana koshshees.
6. Abeseloomappe nuuni tamaariyobay aybee? (Misiliyakka xeella.)
6 Issi uri nuna woy nu siiqiyo ura naaqqikko, nuuni haluwa kessanawu koyana danddayoos. Shin haluwa kiyiyogee hanotay yaa iitanaadan oottana danddayees. Leemisuwawu, Kawuwa Daawita naꞌay Abeseloomi oottidobaa beꞌa. I ba michchiyo Taamaaro eta aawaa naꞌay Aminooni moorido wode keehippe hanqqettiis. Aminooni oottidobawu Muuse Higgiya maaran hayqqana bessees. (Wog. 20:17) Abeseloomi yiillotidoogee bala gidenna, shin Aminoona worissidoogee bala.—2 Sam. 13:20-23, 28, 29.
Abeseloomi ba michchiyo Tamaaro Aminooni moorido wode keehi hanqqettiis (Mentto 6 xeella)
7. Mazamuraawee naaquwa beꞌidi koyro heeran waanidee?
7 Harata naaqqiyageeti qaxxayettennaba milatiyo wode, nuuni likkebaa oottiyogee aynne maaddenna giidi qoppana danddayoos. Iitati loꞌꞌo asata naaqqiiddi injje deꞌuwa deꞌiyaba milatiyogaa beꞌida mazamuraawiya hanotaa qoppa. I hagaadan giis: “Iitati hagaa mala; eti ubbatonkka injjetin de7oosona.” (Maz. 73:12) Naaquwan I keehi azzaniisinne Yihoowawu haggaaziyogee aynne maaddennabadan qoppiis. I hagaadan giis: “Taani ha ubba yohuwaa eranau qoppiyo wode, taayyo erettenna deexobaa gidiis.” (Maz. 73:14, 16) I ba hanotaa akeekidi hagaadan giis; “Tana gidikko, ta gedee xubettanau guuttaa attiis; ta tohoi hallixxanau matiis.” (Maz. 73:2) Alberttakka a hegaa malabay gakkiis.
8. Naaqoy issi ishay waananaadan oottidee?
8 Amarida ishantti galchchaa miishshaa wuuqqiis giidi Albertta wordduwan mootidosona. Hegaappe denddidaagan, I ba maataappe wodhdhiis, qassi hegaa siyida galchchan deꞌiya daroti A bonchchiyogaa aggidosona. I hagaadan giis: “Taani keehi yiillotaasinne azzanaas.” Hegan I keehi hanqqettidi shiiqota shiiqiyogaa aggiis; ubba qassi ichchashu layttawu ayyaanaaban shuggiis. Nuuni nu bolli naaqoy gakkin yiillotiyogaa aggana xayikko, hanana danddayiyabaa ha hanotay bessees.
NAAQOY GAKKIYO WODE YESUUSI OOTTIDOOGAADAN OOTTA
9. Yesuusa gakkida naaqoy aybee? (Misiliyakka xeella.)
9 Naaquwa gencciyogan Yesuusi nuuyyo wottiyobi baynna leemiso. A dabbotuppenne hara daro asaappe naaqoy A gakkiis. A dabboti I wozanaa boshettees giidosona; haymaanootiya kaalettiyageeti I daydanttatu wolqqan oottees giidosona; qassi Rooma wotaaddarati A bolli qilliiccidosona, A barchcheyidosonanne woridosona. (Mar. 3:21, 22; 14: 55; 15:16-20, 35-37) Yesuusa ha ubba naaqoy gakkidaba gidikkokka, nagaraa I mule oottibeenna. Nuuni hagaappe ay tamaarana danddayiyoo?
Naaquwa gencciyogan Yesuusi nuuyyo wottiyobi baynna leemiso (Mentto 9-10 xeella)
10. Yesuusi naaqoy gakkido wode waanidee? (1 PHeexiroosa 2:21-23)
10 Koyro PHeexiroosa 2:21-23 nabbaba. b Nuna naaqoy gakkiyo wode wottiyobi baynna Yesuusa leemisuwa kaallana danddayoos. I awude coꞌꞌu gaanaakko, qassi awude haasayanaakko erees. (Mat. 26:62-64) Harati A wordduwan mootiyo wode issi issitoo aybanne haasayennan agganawu kuuyiis. (Mat. 11:19) I haasayido wodetunkka, ba bolli yedetaa gattiyageeta cayibeenna woy manddibeenna. Yesuusi, “xillo pirddiya Xoossaayyo bana aattidi [immido]” gishshawu haasayiyoban ubbatoo naagettiis. Yesuusi hanotaa Yihoowagaadan xeelliyogee keehi koshshiyaba gidiyogaa eriis. I bana gakkida hanotaa Yihooway likke wodiyan giigissanaagaa ammanettiis.
11. Nuuni haasayiyoban naagettana danddayiyo amarida ogeti awugeetee? (Misiliyakka xeella.)
11 Nuna naaqoy gakkiyo wode nuuni haasayiyoban naagettiyogan Yesuusa leemisuwa kaallana danddayoos. Issi issitoo nu bolli gakkiya naaqoy wolqqaama gidenna gishshawu coꞌꞌu giidi xeellana danddayoos. Woy hanotay yaa iitanaadan oottiya aybanne haasayennan aggana danddayoos. (Era. 3:7; Yaaq. 1:19, 20) Qassi hara wodetun, harata qohoy gakkin beꞌiyo wode woy nu ammanuwawu exatana koshshiyo wode nuuni haasayiyogee koshshana danddayees. (Oos. 6:1, 2) Haasayiyaba gidikko, woppu giidi bonchchuwan haasayissanawu nuussi danddayettida ubbabaa oottana koshshees.—1 PHe. 3:15. c
Nuna naaqoy gakkiyo wode, awude haasayanaakko, qassi ay haasayanaakko akeekan dooriyogan Yesuusa leemisuwa kaallana danddayoos (Mentto 11-12 xeella)
12. Nuuni ‘xillo pirddiyagan’ ammanettiyogaa waati bessana danddayiyoo?
12 Yesuusaagaadan nuunikka, ‘xillo pirddiyagan’ ammanettana danddayoos. Harati nu bolli pirddiyo wode woy nuna naaqqiyo wode hanotaa Yihooway eriyogaa ammanettoos. Yihooway wurssettan ha hanota ubbaa giigissanaagaa eriyogee naaquwa genccanaadan maaddees. Nuuni Yihoowan ammanettiyabanne metuwa I giigissanaashin naagiyaba gidikko, hanqqettiyogaa woy harata ixxiyogaa aggana. Nuuni haratu bolli hanqqettiyogaa aggennaba gidikko, hegee nuuni iitabaa oottanaadan, ufayttiyogaa agganaadaaninne qohettanaadan oottana danddayees.—Maz. 37:8.
13. Naaquwa ubbatoo genccanaadan nuna aybi maaddana danddayii?
13 Nuuni Yesuusa leemisuwa wottiyobi baynna ogiyan kaallana mule danddayennaagee qoncce. Issi issitoo nuuni guyyeppe zilꞌꞌettanaadan oottiyabaa hanana woy haasayana danddayoos. (Yaaq. 3:2) Qassi issi issitoo harati nuna naaqqiyogee nuuni nu deꞌo laytta ubban azzananaadaaninne unꞌꞌettanaadan oottana danddayees. Nenakka hegaa malabay gakkikko, neeni gencciyobaa Yihooway eriyogaa ammanetta. Qassi naaqoy gakkido Yesuusikka neeyyo siyettiyabaa akeekees. (Ibr. 4:15, 16) Yihooway wottiyobi baynna Yesuusa leemisuwa nuussi xaafissidoogaa xalaala gidennan, naaqoy gakkiyo wode nuna maaddiya zoriyakka ba Qaalaa baggaara yootees. Roome maxaafan odettida nuna maaddana danddayiya naaꞌꞌu xiqiseta ane beꞌoos.
“XOOSSAY BA HANQQUWA BESSANAADAN AGGI BAYITE”
14. ‘Xoossay ba hanqquwa bessanaadan aggi bayiyogaa’ giyogee woygiyogee? (Roome 12:19)
14 Roome 12:19 nabbaba. Kiristtaaneti ‘Xoossay ba hanqquwa bessanaadan aggi bayana’ mala kiitettida Phawuloosi minttettiis. Yihooway ba koyido wodiyaninne ogiyan suure pirddana mala yohuwa awu aggiyogan I ba hanqquwa bessanaadan oottoos. Joona giyo ishay naaqoy bana gakki simmin hagaadan giis: “Taani balabaa oottenna mala hanqqettiyogaa aggana koshshiis, shin hegee keehi deexxiyaba. Roome 12:19y, taani danddayanchcha gidanaadaaninne Yihoowan ammanettanaadan maaddiis.”
15. Hanotaa Yihooway giigissanaashin danddayan naagiyogee loꞌꞌo gidiyoy aybissee?
15 Hanotaa giigissanaashin Yihoowa danddayan naagiyogan nuuni goꞌettoos. Nuuni yaatikko, nu metuwa nurkka giigissanawu baaxetiyogee kaalettiyo toohuwappenne unꞌꞌuwappe shemppoos. Yihooway nuna maaddees. I giidobay hagaadan giyogaa mala, ‘Intte naaqettidobaa tawu aggiigite taani hanotaa giigissana.’ Yihooway nuna naaqqidaageetu bolli pirddanaagaa nuuni ammaniyaba gidikko, hanqqettiyogaa aggana koshshees; ayssi giikko I suurebaa oottanaagaa nuuni eroos. Qommoora abay odettido Joona hegee maaddiis. I hagaadan giis: “Taani Yihoowa danddayan naagikko taagaappe kehiya ogiyan I hanotaa giigissana.”
“LOꞌꞌOBAA OOTTIDI IITABAA XOONANA DANDDAYEETA”
16-17. ‘Loꞌꞌobaa oottidi iitabaa xoonanaadan’ woosay nuna waati maaddana danddayii? (Roome 12:21)
16 Roome 12:21 nabbaba. Kiristtaaneti ‘loꞌꞌobaa oottidi iitabaa xoonanaadankka’ Phawuloosi minttettiis. Yesuusi Deriya Bolli Tamaarissido wode hagaadan giis: “Intte morkketa siiqiyogaanne inttena naaqqiyageetussi woossiyogaa aggoppite.” (Mat. 5:44) Ikka hegaadan oottiis. Rooma wotaaddarati mittaa bolli misimaariyan Yesuusa xishido wode I ay keena waayettidaakko nuuni loytti qoppana danddayoos. Yesuusa barchchiya bessidosona; qassi I waayiya gencciis. I ay keena tuggatidaakko nuuni loytti akeekana danddayokko.
17 Yesuusi keehi tuggatikkokka Yihoowa siiqiyogaanne ayyo ammanettiyogaa aggibeenna. I wotaaddarata qanggiyogaa aggidi hagaadan giidi woossiis: “Ta Aawawu, eti ay oottiyakko erenna gishshawu, etayyo atto ga.” (Luq. 23:34) Nuna naaqqiyageeta maaddanaadan Yihoowa woossiyogee, nuuni woppu gaanaadaaninne keehi hanqqettennaadan maaddees; qassi hegee nuuni etabaa qoppiyo ogiya laammanaadankka maaddana danddayees.
18. Alberttinne Jooni naaquwa genccanaadan woosay waati maaddidee?
18 Ha huuphe yohuwan qommoora etabay odettido naaꞌꞌu ishantti banttana gakkida naaquwa genccanaadan woosay maaddiis. Albertti hagaadan giis: “Tana naaqqida ishanttussi taani woossaas. Ta bolli gakkidabaa gaasuwan hanqqettiyogaa agganaadan Yihooway maaddana mala taani darotoo woossaas.” Albertti Yihoowawu ammanettidi haggaaziyogaa zaarettidi doommidoogee ufayssiyaba. Jooni hagaadan giis: “Yihooway tana qohida ishaa maaddanaadaaninne taani awu atto gaana mala tanakka maaddanaadan darotoo woossaas. Yihooway taani ta ishaa bolli hanqqettiyogaanne pirddiyogaa agganaadan maaddiis. Qassi hegaadan woossidoogee taani woppu gaanaadan maaddiis.”
19. Ha alamee xayana gakkanaashin nuuni waatana bessii? (1 PHeexiroosa 3:8, 9)
19 Nuuni ha iita alamiyan deꞌiyo gishshawu, naaqoy nuna gakkana danddayees. Nuna gakkiyabay ayba gidikkokka, Yihooway nuna maaddanaadan woossiyogaa mule aggokko. Qassi nuna naaqoy gakkiyo wode nuuni Yesuusa leemisuwa kaallana koshshees. Hegaa bollikka, Yihoowa Qaalay yootiyo zoriya nuuni ubbatoo oosuwan peeshshana bessees. Nuuni yaatikko, Yihooway nuna anjjanaagaa ammanettana danddayoos.—1 PHeexiroosa 3:8, 9 nabbaba.
MAZAMURE 38 I Nena Minttana
a Issi issi asatu sunttay laamettiis.
b Koyro Pheexiroosa shemppo 2ninne 3n, Pheexiroosi iita godatuppe woy ammanenna azinatuppe Kiristtaaneta gakkida naaquwabaa yootiis.—1 PHe. 2:18-20; 3:1-6, 8, 9.
c Siiqoy Tumu Sarotettaa Waati Demissii? giya biiduwa jw.org saytiyan beꞌa.
