NEENI buzo xinaatiya ubbatoo, qassi ufayttaydda xannaꞌanawu metootay? Nuuni ubbaykka issi issitoo metootoos. Shin bollaa meecettiyogaa gujjin, ubbatoo oottiyo harabatubaa qoppa. Meecettanawu wodeenne wolqqay koshshiyaba gidikkonne guyyeppe ufayssees! Geeshsha Maxaafaa xannaꞌiyogee ‘qaalaaninne haattan meecettiyogaa’ mala. (Efi. 5:26) Hegawu maaddana danddayiya amarida qofata beꞌa:

• Prograamiya kessa. Buzo xinaatee issi Kiristtaanee oottana bessiya ‘loꞌꞌobatuppe’ issuwa. (Pili. 1:10) Xannaꞌiyo saatiya dogennaadan maaddana mala gallassaanne saatiya woraqatan xaafa, yaatada qoncce sohuwan kaqqa. Woy xannaꞌiyo saatiyappe guuttaa kasetada neeni hassayana mala silkkiyan alarmiya kunttana danddayaasa.

• Xannaꞌanawu neessi injjetiya wodiyanne ogiya doora. Neeni waata xannaꞌanawu koyay? Neeni ne qofay shaahettennan issi saatiyawu xannaꞌana danddayay? Woy qantta wodiyawu darotoo xannaꞌiyogaa dosay? Neeyyo injjetiyagaa ne eraasa. Yaaniyo gishshawu, hegaa qoppada xannaꞌiyo wodiya bazza. Neeni bazzido saatiyan xannaꞌanawu koyana xayikko, tammu daqiiqawu xannaꞌana danddayaasa. Tammu daqiiqawu xannaꞌiyogeekka mule xannaꞌennan aggiyogaappe keha. Qassi neeni issitoo doommaychchikko aggennan xannaꞌanawu koyana danddayaasa.—Pili. 2:13.

• Xannaꞌanabaa kasetada doora. Neeni xannaꞌanabaa doorennan xannaꞌiyo wodee gakkikko, ‘ne loꞌꞌo wodee coo xayana’ danddayees. (Efi. 5:16) Neeni xannaꞌana koyiyobata xaafa oyqqana danddayaasa. Neeni loytta akeekabeennabaara gayttidaagan neessi oyshay deꞌikko hegaa xaafa oyqqa. Qassi neeni xannaꞌiyogaa wurssiyo wode ubban, ne xannaꞌana koyiyo harabata xaafa oyqqana danddayaasa.

• Hanotaadan hana. Neeni prograamiya kessidaba gidikko, koshshiyagaadan giigissana danddayaasa; leemisuwawu xannaꞌaydda takkiyo wodiya woy xannaꞌiyo huuphe yohota laammana danddayaasa. Waannabay neeni awude, ay keena, woy aybaa xannaꞌay giyagaa gidennan, neeni ubbatoo xannaꞌay giyagaa.

Nuuni saaminttan saaminttan buzo xinaatiya xannaꞌikko loytti goꞌettana. Nuuni Yihoowara dabbotaa minttoos, nu deꞌuwan loꞌꞌobaa kuuyoos, qassi minettoos.—Yaa. 1:8.