Eray?
Hara biittaa asay Kawuwa Daawita olanchcha gididoy aybissee?
KAWUWA Daawita olanchchatu giddon Israaꞌeela asa gidennaageeti deꞌoosona; leemisuwawu Amoonappe yiida Xeleqa, Hiitiya Ooriyonanne Mooꞌaabappe yiida Yitima. a (1 Odi. 11:39, 41, 46) Daawita olanchchatun ‘Kariita asati, Peleeta asatinne Gaate asatikka’ deꞌoosona. (2 Sam. 15:18, NW) Kariita asatinne Peleeta asati Pilisxxeematuura hashetiyaba milatees. (Hiz. 25:16) Gaate asati Gaate giyo Pilisxxeema kataman deꞌiyageeta.—Yaa. 13:2, 3; 1 Sam. 6:17, 18.
Daawiti he asati ba olanchcha gidanaadan paqqadidoy aybissee? Eti awunne ubbaappe aaruwan Yihoowawu ammanettiya asa gidiyogaa I ammanettido gishshataassa. Leemisuwawu, Kariita asatanne Peleeta asata xeelliyagan Geeshsha Maxaafaa qaalaa kochchay hagaadan giis: “Keehi metiya Daawita haaruwa wode eti awu ammanettidi deꞌidosona.” Eti ammanettiyogaa waati bessidonaa? “Israa7eela asati ubbai” Kawuwa Daawita aggidi ‘Shebaaꞌa giyo issi shori baynna bitaniya’ kaallido wode, Kariita asatinne Peleeta asati Daawitawu ammanettidi deꞌidosonanne Shebaaꞌi makkaliyogaa agganaadan oottidosona. (2 Sam. 20:1, 2, 7) Hara wode qassi, Kawuwa Daawita naꞌay Adoonee kawotaa araatan uttanawu maliis. Shin Kariita asatinne Peleeta asati Daawitawu ammanettidi deꞌidosona; qassi eti Yihooway Solomona doorido gishshawu I kaallidi kawotanaadan maaddidosona.—1 Kaw. 1:24-27, 38, 39.
Hara biittaa asa gidida Gaatiya Ittaayikka Daawitawu keehi ammanettiis. Abeseloomi Israaꞌeela asay bana kaallanaadan oottanawu malido wode, Ittaayinne 600 A olanchchati Kawuwa Daawita maaddidosona. Ittaayi hara biittaa asa gidiyo gishshawu olawu baana bessennaagaa Daawiti yootiis. Shin Ittaayi hagaadan giis: “GODAI ero! Ta godai kawoi ero! Ta godai kawoi de7iyoosan awan gidinkka, i tau haiqo gidin, paxa gidinkka, taani ne ashkkarai nenaara de7ana.”—2 Sam. 15:6, 18-21.
Yihooway tiyido Kawuwa Daawitawu Ittaayi ammanettiis
Kariita asati, Peleeta asatinne Gaate asati hara biitta asa gidikkonne, Yihooway tumu Xoossaa gidiyogaanne Daawiti Yihooway sunttido kawo gidiyogaa eridosona. Daawiti he asati A maaddido gishshawu I Yihoowa wozanappe galatidoogee qoncce!
a Zaarettido Wogaa 23:3-6n odettida Xoossaa higgee Amoona asaynne Mooꞌaaba asay Israaꞌeela galchchaa gelennaadan diggees. Gidikkonne, ha higgee kumetta hanotan he biittaa asa gidiyogaa bessiyaba milatees; qassi he hara biittaa asati Xoossaa asaara hashettiyogaa woy etaara deꞌiyogaa diggenna. Geeshsha Maxaafaa Loytti Akeekiyogaa (Inggilizettuwa) Paydo 1, sinttaa 95 xeella.
