1. Yihooway nuuni waananaadan koyii?

 NAꞌA yeliyogee azinaynne machchiya keehi ufayttanaadan oottiyabatuppe issuwa. Shin eti bantta guutta naꞌaa siiqiyaba gidikkokka, he naꞌi ubbatoo guutta gididi deꞌanaadan koyokkona. He naꞌi diccana xayikko, eti keehi unꞌꞌettiyogee qoncce. Hegaadan, Yihooway nuuni abaa tamaariyogaa doommiyo wode ufayttikkokka, nuuni ubbatoo he hanotan deꞌiigganaadan koyenna. (1 Qor. 3:1) Ubba I nuuni ‘wozannaama’ Kiristtaane gidanaadan minttettees.—1 Qor. 14:20.

2. Nuuni ha huuphe yohuwan ay beꞌanee?

² Kayma Kiristtaane gidiyogaa giyogee woygiyogee? Nuuni kayma Kiristtaane waani gidana danddayiyoo? Ayyaanaaban mino qumaa miyogee nuuni kayma gidanaadan waati maaddii? Qassi nuuni ayyaanaaban kayma gididi deꞌanawu ubbatoo baaxetana koshshiyoy aybissee? Ha huuphe yohuwan ha oyshatu zaaruwa pilggana.

KAYMA KIRISTTAANE GIDIYOGAA GIYOGEE WOYGIYOGEE?

3. Kayma Kiristtaane gidiyogaa giyogee woygiyogee?

³ Geeshsha Maxaafan “wozannaamata gidite” geetetti birshshettida Giriiketto qaalay ‘diccite, polonne’ “gastta asa” gidite geetettidikka birshshettana danddayees. (Efi. 4:13) Issi guutta naꞌi gastta gidana gakkanaashin dicciyogaadan, Yihoowara dabbotido nu dabbotaykka ubbatoo diccana koshshees. Yaaniyo wode nuuni kayma Kiristtaane gidoos. Nuuni kayma Kiristtaane gidi simmidikka, ayyaanaaban dicciyogaa mule aggana koshshenna. (1 Xim. 4:15) Yelagata gujjin, nuuni ubbaykka kayma Kiristtaane gidana danddayoos. Shin nuuni kayma Kiristtaane gididaakkonne waati shaakki erana danddayiyoo?

4. Issi uri kayma Kiristtaane gidiyogaa bessiyabay aybee?

 ⁴ Kayma Kiristtaanee Yihooway koyiyo ubbabaa ootteesippe attin, ba koyiyobaa xalla oottenna. I nagaranchcha gidiyo gishshawu baliyogee qoncce. Gidoppe attin, I Yihooway koyiyogaadan qoppanawunne oottanawu bawu danddayettidabaa oottees. I ooratta asatettaa maayeesinne kaseegaappe aaruwan Yihoowagaadan qoppanawu ubbatoo baaxetees. (Efi. 4:22-24) I Yihoowa higgiyadaaninne maaraadan loꞌꞌobaa kuuyanawu loohido gishshawu, oottana bessiya ubbabawu ayyo higge koshshenna. I issibaa kuuyiyo wode hegaa polanawu minnidi oottees.—1 Qor. 9:26, 27.

5. Kayma gidenna Kiristtaaniya gakkiya qohoy aybee? (Efisoona 4:14, 15)

⁵ Hara baggaara qassi, kayma gidenna issi Kiristtaanee elle ‘cimettananne bala ogiya’ kaallana danddayees. I naqaashi baynna worddo oduwa ammanana danddayees; woy kaddidaageetun cimettana danddayees. a (Efisoona 4:14, 15 nabbaba.) I harata qanaatana, etaara ooyettana woy elle yiillotana danddayees. Qassi I paacettiyo wode darotoo iitabaa oottana danddayees.—1 Qor. 3:3.

6. Nuuni ayyaanaaban kayma gidiyogaa issi naꞌi gastta gidiyogaara geeddarssana danddayiyoy aybissee? (Misiliyakka xeella.)

⁶ Qommoora beꞌidoogaadan, Geeshsha Maxaafay ayyaanaaban kayma gidiyogaa issi uri gastta asa gidiyogaara geeddarssees. Guutta naꞌi yuushshi qoppenna gishshawu, A naagiyanne kaalettiya gastta asi koshshees. Leemisuwawu, issi aayyiya ogiya kanttaydda ba naꞌiya I kushiya oyqqanaadan oychchana danddayawusu. He naꞌiya dicciyo wode, A ogiya barkka kanttanaadan aayyiya paqqadana danddayikkonne, A ogiya kanttiyo wode kaamee deꞌiyakkonne baynnaakko shaakkanaadan hassayissawusu. A gastta gidiyo wode qohiya hegaa malabaappe waata naagettanaakko erawusu. Guutta naata qohuwappe naaganawu gasttatu maadoy koshshiyogaadan, ayyaanaaban kayma gidenna Kiristtaaneti Yihoowara dabbotido dabbotay moorettanaadan oottana danddayiyabaappe naagettanawunne loꞌꞌobaa kuuyanawu ayyaanaaban kayma gidida Kiristtaanetuppe maadoy darotoo koshshees. Shin, kayma Kiristtaaneti issibaa kuuyana koshshiyo wode, Yihoowa qofaa akeekanawu Geeshsha Maxaafay yootiyobaa loytti qoppoosona; yaatidi suurebaa kuuyoosona.

7. Kayma Kiristtaanetussi haratu maadoy koshshii?

 ⁷ Hegaa giyogee kayma Kiristtaaniyawu haratu maadoy mule koshshenna giyogee? Chii. Kayma Kiristtaanetikka issi issitoo maaduwa oychchana koshshees. Kayma gidenna issi uri I waatanaakko harati yootanaadan, woy I kuuyana koshshiyabaa harati kuuyanaadan koyana danddayees. Shin issi kayma Kiristtaanee eraaninne meeziyan baappe dariya harata maaduwa oychchiyo wode I ba kuuyiyoban oyshettiyogaanne ‘ba toohuwa tookkana’ bessiyogaa erees.—Gal. 6:5.

8. Kayma Kiristtaaneti issoy issuwappe dummatiyoy ayba ogetuunee?

⁸ Gastta asa ubbay issi mala gidennaagaadan, kayma Kiristtaane ubbawu issi mala eeshshay deꞌenna. Leemisuwawu, issoti issoti akeekanchcha gidana danddayoosona; harati qassi keehi xala gidana danddayoosona; amaridaageeti kehiyageeta, harati qassi keehi qarettiyageeta gidana danddayoosona. Hegaa bollikka, naaꞌꞌu kayma Kiristtaaneta issi mala paacee gakkiyo wode, eti kuuyiyobay dummatana danddayees; shin eta kuushshay Geeshsha Maxaafay yootiyo maaraara maayettiyaba gidana danddayees. Hegee kahaara gayttidaba. Hegaa gishshawu, eti kuuyiyobay dummatikkonne issoy issuwa bolli pirddokkona. Eti issippetettan deꞌoosona.—Roo. 14:10; 1 Qor. 1:10.

KAYMA KIRISTTAANE GIDANAWU NUUNI WAATANA KOSHSHII?

9. Nuuni aynne baaxetennan Yihoowara loytti dabbotana danddayiyoo? Qonccissa.

⁹ Issi naꞌi wodiyappe wodiyan diccees; shin ooninne baaxetennan Yihoowara loytti dabbotenna. Leemisuwawu, Qoronttoosan deꞌiya ishanttinne michchontti mishiraachchuwa ammanidosona, haattan muukettidosona, geeshsha ayyaanaa ekkidosonanne Phawuloosi eta tamaarissidobaappe goꞌettidosona. (Oos. 18:8-11) Shin daroti haattan muukettin amarida layttay aadhdhikkonne eti kayma Kiristtaane gidibookkona. (1 Qor. 3:2) Ayyaanaaban kayma gidanawu waatana danddayiyoo?

10. Kayma Kiristtaane gidanawu nuuni waatana koshshii? (Yihudaa 20)

¹⁰ Nuuni kayma Kiristtaane gidanawu nuussi koyruwan koshshay deꞌana bessees. “Akeekaa pacaa” dosiyageetinne hegaadan deꞌanawu koyiyageeti mule kayma Kiristtaane gidokkona. (Lee. 1:22) Diccidi gastta gidikkonne etassi aawaynne aayyiya kuuyanaadan ubbatoo koyiya asatu mala gidanawu koyokko. Shin nuuni kayma Kiristtaane gidanawu koyoos. (Yihudaa 20 nabbaba.) Neeni kayma Kiristtaane gidanawu hanno gakkanawu baaxetaydda deꞌikko, Yihooway nena ‘eeno giissanaadaaninne ba koyiyobaa ootissanaadan’ woossa.—Pili. 2:13.

11. Nuuni kayma Kiristtaane gidanaadan maaddanawu Yihooway nuussi immidobay aybee? (Efisoona 4:11-13)

¹¹ Nuuni kayma Kiristtaane gidanawu nuussi maadoy koshshiyogaa Yihooway erees. Nuuni “Kiristtoosa polo dichchaa keenaa diccidi gastta asa gidana” mala maaddiya henttanchchatanne asttamaareta Yihooway nuussi immiis. (Efisoona 4:11-13 nabbaba.) “Kiristtoosa wozanai” woy qofay nuussi deꞌanaadan maaddanawu Yihooway geeshsha ayyaanaakka nuussi immees. (1 Qor. 2:14-16) Hegaa bollikka, Yesuusi saꞌan deꞌiyo wode qoppido, haasayidonne oottido ogiya qonccissiya oyddu Wonggeleta Xoossay nuussi immiis. Yesuusaagaadan qoppiyogaaninne oottiyogan kayma Kiristtaane gidanawu halchchido halchchuwa polana danddayaasa.

AYYAANAABAN MINO QUMAA MIYOGEE WAATI MAADDII?

12. Nuuni Kiristtoosabaa tamaarido koyro timirtteti awugeetee?

¹² Nuuni kayma Kiristtaane gidanawu Kiristtoosabaa tamaarido koyro timirttetu xalla gidennan, harabaakka tamaarana koshshees.  Nuuni tamaarido koyrobatuppe amaridaageeti nagaran zilꞌꞌettidi laamettiyogaa, ammanuwa, haattan muukettiyogaanne dendduwa. (Ibr. 6:1, 2) Hageeti ubba Kiristtaaneti ammaniyo koyro timirttetuppe amaridaageeta. Yaatiyo gishshawu, Pheexiroosi Phenxxaqosxxe gallassi asawu sabbakido wode hegeetubaa haasayiis. (Oos. 2:32-35, 38) Nuuni Kiristtoosa kaalliyageeta gidanawu ha koyro timirtteta ammanana koshshees. Leemisuwawu, nuuni dendduwa ammanennaba gidikko, Kiristtoosa kaalliyageeta gidana danddayennaagaa Phawuloosi yootiis. (1 Qor. 15:12-14) Nuuni kayma Kiristtaane gidanawu koyro timirttetu xalla gidennan, harabaakka tamaaranawu koyana bessees.

13. Ibraawe 5:14n qonccidaagaadan, ayyaanaaban mino qumaappe goꞌettanawu nuuni waatana koshshii? (Misiliyakka xeella.)

¹³ Koyro timirttetuppe dumma hanotan ayyaanaaban mino qumay Yihoowa higgetu xalla gidennan, I kessido maaratakka bessiyaba; hegeeti nuuni A qofaa akeekanaadan maaddoosona. He ayyaanaa qumaappe goꞌettanawu nuuni Xoossaa Qaalaa xannaꞌana, wotti dentti qoppananne hegaa oosuwan peeshshana koshshees. Nuuni yaatiyo wode Yihoowa ufayssiyabaa kuuyanawu loohoos. b—Ibraawe 5:14 nabbaba.

14. Phawuloosi Qoronttoosan deꞌiya Kiristtaaneti ayyaanaaban kayma gidanaadan maaddanawu waatidee?

¹⁴ Kayma gidenna Kiristtaaneti Geeshsha Maxaafan yaata yaatoppa giya higgee baynna wode suurebaa kuuyanawu metootoosona. Yaata yaatoppa giya higgee Geeshsha Maxaafan baynna wode issoti issoti bantta koyidobaa oottana danddayiyabadan qoppoosona. Harati qassi higge koshshennabawu higge oychchana danddayoosona. Leemisuwawu, Qoronttoosan deꞌiya Kiristtaaneti eeqawu yarshshettida qumaa maanaakkonne, meennan agganaakko higgiya Phawuloosa oychchidaba milatees. Phawuloosi eti oottanabaa yootiyogaappe bantta kahaa goꞌettidi bantta “shenedan” oottanaadan etawu yootiis. I eta kahay qumꞌꞌennaadaaninne harati xubettennaadan oottiya loꞌꞌobaa kuuyanaadan maaddana danddayiya Geeshsha Maxaafay yootiyo maarata etawu qonccissiis. (1 Qor. 8:4, 7-9)  Qoronttoosan deꞌiya Kiristtaaneti harata kaalliyogaa aggidi woy higgiya koyiyogaa aggidi Geeshsha Maxaafaa goꞌettidi banttawu kuuyana mala Phawuloosi eta tamaarissiis. Yaatiyogan eti kayma Kiristtaane gidanaadan eta maaddanawu baaxetiis.

15. Ibraawen deꞌiya Kiristtaaneti ayyaanaaban diccanaadan Phawuloosi waati maaddidee?

¹⁵ Phawuloosi Ibraawen deꞌiya Kiristtaanetussi xaafidobaappe nuuni keehi koshshiyabaa tamaarana danddayoos. Amaridaageeti ayyaanaaban dicciyogaa aggidosona; eti ‘ayyaanaaban mino qumaa miyogaa aggidi, zaarettidi maattaa uyanawu koyidosona.’ (Ibr. 5:12) Galchchaa baggaara Yihooway eta tamaarissiyo oorattabaa eti ammanibookkona. (Lee. 4:18) Leemisuwawu, Kiristtoosa yarshshuwan 30 gidiya layttaappe kase Muuse Higgee shaarettikkokka, Ayhuda ammanuwa kaalliya daroti haꞌꞌikka Muuse Higgiya kaalloosona. (Roo. 10:4; Tii. 1:10) Ha 30 layttay Kiristtaaneti Muuse Higgiya kaallana koshshennaagaa akeekanaadan maaddiya daro wodiya demmanaadan oottiis! Phawuloosi ayyaanay kaalettin Ibraawen deꞌiya Kiristtaanetuyyo xaafido dabddaabbiya nabbabiya ooninne he maxaafan ayyaanaaban mino qumay deꞌiyogaa akeekana danddayees. He dabddaabbee goynuwara gayttidaagan Yihooway Yesuusa baggaara giigissido ooratta ogee keehi aadhdhiyogaa eti akeekanaadaaninne Ayhudati eqettishinkka xala gididi aggennan sabbakanaadan maaddiis.—Ibr. 10:19-23.

AYYAANAABAN KAYMA GIDIDI DEꞌANAWU UBBATOO BAAXETANA KOSHSHIYOY AYBISSEE?

16. Nuuni ayyaanaaban kayma gidiyogaa xalla gidennan, hara ay oottana koshshii?

¹⁶ Nuuni ayyaanaaban kayma gidanawu xalla gidennan, ubbatoo hegaadan deꞌanawu baaxetana koshshees. Hegaa gishshawu, nuuni ayyaanaaban kayma gididabadaaninne Yihoowara ubbatoo dabbotaa minttidi deꞌana koshshennabadan qoppiyogaappe naagettana bessees. (1 Qor. 10:12) Nuuni ayyaanaaban ubbatoo dicciiddi deꞌiyakkonne aggennan nuna qorana koshshees.—2 Qor. 13:5.

17. Phawuloosi Qolasiyasan deꞌiya Kiristtaanetuyyo xaafido dabddaabbee eti ayyaanaaban kayma gididi deꞌana bessiyogaa waati qonccissii?

¹⁷ Phawuloosi Qolasiyasan deꞌiya Kiristtaanetussi xaafido dabddaabbiyan eti ayyaanaaban  kayma gididi deꞌana koshshiyogaa zaarettidi yootiis. Qolasiyasan deꞌiya Kiristtaaneti ayyaanaaban kayma gidikkokka, eti alamiya qofan cimettenna mala naagettanaadan Phawuloosi etawu yootiis. (Qol. 2:6-10) He galchchan deꞌiyageeta loytti eriya Eppaafiri eti “poli ammananaadan,” woy kayma gidanaadan ubbatoo woossiis. (Qol. 4:12) Nuuni hegaappe ay tamaarana danddayiyoo? Ayyaanaaban kayma gididi deꞌanawu baaxeenne Xoossaa maadoy koshshiyogaa Phawuloosinne Eppaafiri akeekidosona. Qolasiyasan deꞌiya Kiristtaaneta ay paacee gakkikkokka eti ayyaanaaban kayma woy wozannaama gididi deꞌanaadan Phawuloosinne Eppaafiri koyidosona.

18. Kayma Kiristtaanee waanana danddayii? (Misiliyakka xeella.)

¹⁸ Kayma Kiristtaanee naagettana xayikko, merinawu Xoossaa ufayssiyogaa aggana danddayiyogaa Phawuloosi Ibraawe Kiristtaanetuyyo yootiis. Issi Kiristtaanee Yihooway yootiyobaa siyennan ixxikko, ba nagaran zilꞌꞌettidi laamettananne Xoossaappe maarotaa demmana danddayenna. Ibraawe Kiristtaaneti hegaadan hanibeennaagee ufayssees. (Ibr. 6:4-9) Ha wodiyan ayyaanaaban shuggidi woy bohettidi guyyeppe bantta nagaran zilꞌꞌetti laamettidaageetubaa shin? Eti banttana ziqqi oottidi bantta nagaran zilꞌꞌettidi laamettikko, Phawuloosi xaafido merinawu Xoossaa ufayssiyogaa aggida asatu mala gidennaagaa bessoosona. Eti Yihoowakko simmiyo wode A maadoy etawu koshshiyogee qonccee. (Hiz. 34:15, 16) Eti Yihoowara dabbotido dabbotaa zaarettidi minttanaadan issi kayma ishay woy michchiya eta maaddanaadan cimati oychchana danddayoosona.

19. Nuuni ay halchchana koshshii?

¹⁹ Neeni ayyaanaaban kayma Kiristtaane gidanawu baaxetaydda deꞌikko, ne halchchuwa polana danddayaasa! Ayyaanaaban mino qumaa ubbatoo ma; qassi kaseegaappe aaruwan Yihoowagaadan qoppa. Neeni kayma Kiristtaane gidikko, haꞌꞌikka merinawukka kayma gidada deꞌanawu neessi danddayettida ubbabaa ootta.