1. Nuuni issi issitoo yayyana danddayiyoy aybissee?

 NUUNI ubbay issi issitoo yayyoos. Nuuni Geeshsha Maxaafay yootiyobaa eriyo gishshawu, hayqqidaageetussinne daydanttatussi yayyokko woy sinttappe asay waananee giidi hirggokko. Shin nuuni wayssiya wodiyan deꞌiyo gishshawu olaa, danobaanne harggiya ‘yayyana’ danddayoos. (Luq. 21:11) Nuuni asawukka yayyana danddayoos; leemisuwawu, nuna naaqqiya kawotettaa sunttata woy tumu goynuwa eqettiya so asaa yayyana danddayoos. Amaridaageeti haꞌꞌi gakkiya metuwa woy sinttappe gakkanaagaa genccana danddayokko giidi hirggoosona.

2. Daawiti Gaaten deꞌiyo wode hanidabaa yoota.

² Daawiti yayyido wodeti deꞌoosona. Leemisuwawu, Kawuwa Saaꞌooli A woranawu yedettido wode Gaate geetettiya Pilisxxeematu katama baqatiis. Gaate kawoy Akiishi, Daawiti ‘tammu shaꞌu’ Pilisxxeema asata worida olanchcha gidiyogaa eriis. Yaatiyo gishshawu Daawiti “keehippe yayyiis.” (1 Sam. 21:10-12) Akiishi tana waataneeshsha giidi Daawiti hirggiis. Daawiti yayyiyogaa waati aggidee?

3. Mazamure 56:1-3, 11 yootiyogaadan, Daawiti yayyiyogaa waani aggidee?

³ Daawiti Gaaten deꞌiyo wode awu siyettidabaa Mazamure 56y yootees. He mazamuriyan Daawiti yayyido gaasuwa yootikkonne, yayyiyogaa agganaadan maaddidabaakka qonccissiis. Daawiti yayyido wode Yihoowan ammanettiis. (Mazamure 56:1-3, 11 nabbaba.) Daawiti Yihoowan ammanettidoogee bessiyaba. Daawiti Yihoowa maaduwan hegaappe kase hani erennabaa hananawu kuuyiis: I gooyiya asa milatiis; qassi A halchchoy polettiis! Akiishi Daawita woranawu koyiyogaa aggidi  harasaa yeddido gishshawu, Daawiti hayqqennan attiis.—1 Sam. 21:13–22:1.

4. Nuuni Yihoowan waani loytti ammanettana danddayiyoo? Leemisuwa yoota.

⁴ Nuunikka yayyiyo wode Yihoowan ammanettana danddayoos. Yaatin nuuni yayyiyo wode Yihoowan kaseegaappe aaruwan waani ammanettana danddayiyoo? Ane issi leemisuwa beꞌa. Issi harggee nena oyqqidoogaa eriyo wode neeni koyro heeran yayyana danddayaasa. Shin nena akkamiya dottoriya ammanettikko yayyiyogaa aggana danddayaasa. I hegaa mala harggiya harggida darota maaddidaagaa gidana danddayees. Neeni yootiyobaa I loytti ezggiyogee nena qofissidabaa I loytti akeekiyogaa ne ammanettanaadan oottees. Qassi I harata loytti maaddida akkamuwa neessi yootana danddayees. Hegaadankka, Yihooway kase oottidobaa, haꞌꞌi oottiiddi deꞌiyobaanne sinttappe nuussi oottanabaa qoppiyogan an kaseegaappe aaruwan ammanettana danddayoos. Daawiti hegaadan oottiis. I ayyaanay denttettin Mazamure 56n, xaafidobaappe amaridabaa nuuni pilggiyo wode neenikka Yihoowan loytta ammanettanawunne yayyiyogaa agganawu waatanaakko qoppa.

YIHOOWAY KASE OOTTIDOBAY AYBEE?

5. Daawiti yayyido wode loytti qoppidobay aybee? (Mazamure 56:12, 13)

⁵ Daawiti iita hanotan deꞌikkokka, Yihooway oottido loꞌꞌobata ubbatoo qoppiis. (Mazamure 56:12, 13 nabbaba.) Daawiti ba deꞌo laytta ubban hegaadan oottiis. Leemisuwawu, Yihooway medhdhidobata I issi issitoo qoppiis. Hegee Yihooway keehi wolqqaama gidiyogaanne asaa loytti siiqiyogaa I hassayanaadan oottiis. (Maz. 65:6-9) Daawiti Yihooway haratussi oottidobaakka wotti dentti qoppiis. (Maz. 31:19; 37:25, 26) Ubba I Yihooway awu oottidobaa loytti qoppiis. Yihooway Daawita naatettaappe doommidi maaddiisinne naagiis. (Maz. 22:9, 10) Daawiti hegeeta loytti qoppidoogee kaseegaappe aaruwan Yihoowan ammanettanaadan maaddidoogee qoncce!

6. Nuuni yayyiyo wode Yihoowan ammanettanaadan nuna aybi maaddanee?

⁶ Neeni yayyiyo wode nena hagaadan  oychcha: ‘Yihooway kase oottidobay aybee?’ I medhdhidobaa loytta qoppa. Leemisuwawu, kafotinne ciishshati Yihoowa meran merettibeennabanne awu goynnana danddayennaba gidikkonne, Yihooway etawu koshshiyabaa kunttiyogaa loytta ‘xeella.’ Yihooway etaagaappe aaruwan nuussi koshshiyabaa kunttana. Hegaa loytti qoppiyogee kaseegaappe aaruwan nuuni Yihoowan ammanettanaadan oottees. (Mat. 6:25-32) Yihooway ba ashkkaratussi oottidobaakka qoppa. Etabay Geeshsha Maxaafan odettido mino ammanoy deꞌiyogeetubaa xannaꞌana danddayaasa; woy ha wodiyan Yihoowawu haggaaziyageetu deꞌuwan hanidabaa nabbabana danddayaasa. a Hegaa bollikka, Yihooway neessi oottidobaa loytta qoppa. Neeni A eranaadan I nena waati maaddidee? (Yoh. 6:44) I ne woosaa waati zaaridee? (1 Yoh. 5:14) I ba alꞌꞌo Naꞌaa yarshshidoogee nena ubba galla waati maaddii?—Efi. 1:7; Ibr. 4:14-16.

7. Venesa yayyiyogaa agganaadan Xoossay erissidobaa yootiya Daaneelabay O waati maaddidee?

⁷ Heytin deꞌiya Veneso b giyo michchiyo keehi yayyanaadan oottiyabay gakkiis. I heeran deꞌiya issi bitanee ubba galla iyyo dawaleesinne kiitaa kiittees; qassi iira mattumaa gayttanawu wolqqanttees. Venesa hegaadan oottanawu koyennaagaa awu loytta yootaasu. Gidoppe attin, he bitanee keehi hanqqettiisinne O yashissiis. A hagaadan gaasu: “Taani keehi yayyaas.” Venesa yayyiyogaa agganawu ay oottadee? A bana qohuwappe naaganawu bawu danddayettida ubbabaa oottaasu. A sunttatuura gayttanaadan issi cimay O maaddiis. Qassi A Yihooway beni ba ashkkarata qohuwappe waati naagidaakkokka loytta qoppaasu. Venesa hagaadan gaasu: “Taani Xoossay erissidobaa yootiya Daaneelabaa koyro qoppaas. I aybanne mooribeennaba gidikkonne, namisettida gaammotu ollan olettiis. Gidikkonne Yihooway A naagiis. Yihooway gaammotu doonaa gorddiis. Taani oottana harabi baynna gishshawu, Yihooway he bitanee tabaa qoppiyogaa agganaadan oottiyogan ta metuwa qaaranaadan Yihoowa woossaas. Hegaappe simmin taani yayyiyogaa aggaas.”—Dane. 6:12-22.

YIHOOWAY HAꞌꞌI OOTTIIDDI DEꞌIYOBAY AYBEE?

8. Daawiti ay ammanettidee? (Mazamure 56:8)

⁸ Daawiti Gaaten iita hanotan deꞌikkokka, yashshiyabata qoppibeenna. I he wode Yihooway ayyo oottiiddi deꞌiyobata qoppiis. Daawiti Yihooway A kaalettiyogaa, naagiyogaanne awu siyettiyabaa akeekiyogaa eriis. (Mazamure 56:8 nabbaba.) Daawitawu loꞌꞌo laggetikka deꞌoosona; leemisuwawu, Yonaataaninne Gita Kahinee Abemeleki A minttettidosonanne maaddidosona. (1 Sam. 20:41, 42; 21:6, 8, 9) Qassi Kawuwa Saaꞌooli A woranawu koyikkokka, Daawiti hayqqennan attiis. A gakkiiddi deꞌiyabaanne A qofissidabaa Yihooway loytti eriyogaa I ammanettiis.

9. Yihooway nubaa ay akeekii?

⁹ Neeni yayyanaadan oottiya metoy nena gakkiyo wode Yihooway he metuwanne he metoy neeni waananaadan oottiyakko akeekiyogaa hassaya. Leemisuwawu, Yihooway Gibxxen deꞌiya Israaꞌeelati naaqettiyo naaquwa xalla gidennan, ‘eta waayiyakka’ akeekiis. (Kes. 3:7) Daawiti Yihooway A ‘metuwanne’ “tuggaa” beꞌiyogaa yootiis. (Maz. 31:7) Qassi  Xoossaa asay iitabaa kuuyidi tuggatiyo wodekka “eta waayee ubban i waayettiis.” (Isi. 63:9) Neeni yayyiyo wode Yihooway nena qofissidabaa akeekeesinne yayyiyogaa agganaadan nena maaddanawu koyees.

10. Yihooway neessi qoppiyogaanne nena gakkiya metuwa neeni xoonanaadan maaddanaagaa ne ammanettiyoy aybissee?

¹⁰ Neeni yayyanaadan oottiya metoy gakkikko, Yihooway nena maaddiiddi deꞌiyogaa akeekennan aggana danddayaasa. Yaatin, ne waatana danddayay? I ne miyyiyan deꞌiyogaa akeekanaadan nena maaddana mala woossa. (2 Kaw. 6:15-17) Yaatada hagaa qoppa: Dere haasayay woy galchchan harati yootiyo qofay nena minttettidee? Issi xuufee, biidoy woy muuziqa biidoy ne minnanaadan oottidee? Issi uri neeyyo yootido qofay woy xiqisee nena minttettidee? Ishanttinne michchontti nuna siiqido siiqoynne Xoossaa Qaalaappe nuuni demmido minttettoy nuna maaddidoogaa dogana danddayoos. Gidikkonne, hageeti Yihooway nuussi immido dumma imota. (Isi. 65:13; Mar. 10:29, 30) Hageeti Yihooway neessi qoppiyogaa bessoosona. (Isi. 49:14-16) Qassi neeni an ammanettiyogee bessiyaba gidiyogaa qonccissoosona.

11. Yayyiyogaa agganaadan Aydo maaddidabay aybee?

¹¹ Senegaalen deꞌiya Ayda meto wodiyan Yihooway O waati maaddidaakko akeekaasu. O yelidaageeti A bayra naꞌa gidiyo gishshawu, baayyonne so asayyo koshshiyabaa kunttanaadan koyoosona. Gidoppe attin, Ayda aqinye gidanawu ba deꞌuwa sima oottaasu; shin guyyeppe O miishshay metiis. So asay O hanqqettiisinne boriis. A hagaadan gaasu: “Taani tana yelidaageeta maaddana danddayabeenna gishshawu, ubba asay tana borana gaada yayyaas. Hanotay keehi iitido gishshawu taani Yihoowa amassalaas.” He wode shiiquwan A issi haasayaa siyaasu. “Haasayaa haasayiya ishay, nuuni unꞌꞌettanaadan woy yayyanaadan oottiyabaa Yihooway eriyogaa nuna hassayissiis. Cimatuppenne haratuppe demmido zoree Yihooway tana siiqiyogaa taani loddan loddan ammanettanaadan oottiis. Taani Yihoowa woossiyo wode I tana maaddanaagaa kaseegaappe aaruwan ammanettays. I ta woosaa zaaridoogaa akeekiyo wode woppu  gays.” Guyyeppe, Ayda aqinyetettaa aggennaadan, qassi bana yelidaageetanne harata maaddanawu gidiya miishshaa demissiya oosuwa oyqqaasu. A hagaadan gaasu: “Taani kumetta wozanaappe Yihoowan ammanettaas. Woossa simmada yayyiyogaa darotoo aggays.”

YIHOOWAY SINTTAPPE OOTTANABAY AYBEE?

12. Mazamure 56:9y yootiyogaadan, Daawiti ammanettidobay aybee?

¹² Mazamure 56:9 nabbaba. Ha xiqisee Daawiti yayyido wode A maaddida harabaa yootees. I iita hanotan deꞌikkokka, Yihooway sinttappe ayyo oottanabaa loytti qoppiis. Daawiti Yihooway A koshshiya wodiyan ashshanaagaa erees. Hegaa bollikka, Daawiti Israaꞌeelan kawotanaagaa Yihooway yootiis. (1 Sam. 16:1, 13) Yihooway qaalaa gelidobay ubbay polettanaagaa Daawiti ammanettiis.

13. Yihooway ay oottanaagaa ammanettana danddayiyoo?

¹³ Yihooway neeyyo ay oottanawu qaalaa gelidee? I nuna meto ubbaappe naagees giidi qoppana koshshenna. c Shin, ha alamiyan nena gakkana metoy ayba gidikkonne yaana ooratta alamiyan he metuwa Yihooway xayssanaagaa hassaya. (Isi. 25:7-9) Hayqqidaageeta denttanawu, nuna harggiyappe pattanawunne nu morkketa ubbaa xayssanawu nuna Medhdhidaagawu wolqqay deꞌees.—1 Yoh. 4:4.

14. Nuuni loytti qoppana danddayiyobay aybee?

¹⁴ Neeni yayyiyo wode Yihooway sinttappe oottanabaa loytta qoppa. Seexaanay xayiyo wode, xilloti attin iitati xayiyo wode, ubba galla leddan leddan wottiyobi baynna asa gidiyo wode neeyyo aybi siyettanaakko qoppa. Nuuni nu hidootaabaa waati loytti qoppana danddayiyakko loytti qonccissiya ootti-besuwa 2014n shiiqido killiliya shiiquwan beꞌida. Issi aaway 2 Ximootiyoosa 3:1-5n deꞌiya qofay Gannatee ay mala gidanaakkonne qonccissiyakko hagaappe keehi dumma gidanaagaa ba so asaara tobbiis. I hagaadan giis: “Ooratta alamiyan keehi ufayssiya wodee yaana, ayssi giikko asati harata siiqiyageeta, ayyaanaabaa siiqiyageeta, ashkketa, banttana ziqqi oottiyageeta, Xoossaa sabbiyageeta, yelidaageetussi azazettiyageeta, galatiyageeta, ammanettiyageeta, bantta soo asaa siiqiyageeta, maayettiyageeta, haratubaa ubbatoo loꞌꞌobaa haasayiyageeta, bantta huuphiya naagiyageeta, woppu giyageeta, loꞌꞌobaa dosiyageeta, tumubaa haasayiyageeta, eeno giyageeta, ufayttiyobaappe aattidi Xoossaa dosiyageeta, Xoossawu wozanappe aqiyageeta gidana; qassi hageetu mala asatuura dabbotaa mintta.” Ooratta alamiyan deꞌoy ay mala gidanaakko, intte so asaara woy ne mala Kiristtaanetuura haasayay?

15. Tanaya yayyikkokka, ammanettada deꞌanaadan O maaddidabay aybee?

¹⁵ Huuphessa Maqidooniyan deꞌiya Tanayo giyo michchiya sinttappe demmana anjjotubaa loytta qoppidoogee yayyiyogaa agganaadan O maaddiis. A Geeshsha Maxaafaa xannaꞌiyogaa yelidaageeti eqettidosona. A hagaadan gaasu: “Taani yayyidobatuppe amaridaageeti ta bolli gakkidosona. Taani shiiquwappe simmiyo wode ubban ta aayyiya tana shocawusu. Taani Yihoowa Markka gidikko, tana yelidaageeti tana worana giidi yashissidosona.” Wurssettan, O yelidaageeti Tanayo sooppe yedettidosona. Yaatin A waanadee? A hagaadan gaasu: “Taani ammanettada deꞌikko merinawu ay keena ufayttada deꞌanaakko ubbatoo qoppaas. Qassi ha alamiyan taappe halana danddayiya aybaanne  Yihooway taayyo ooratta alamiyan immanaagaanne iitabay ubbay dogettanaagaa qoppaas.” Tanaya ammanettada deꞌaasu. Yihooway maaddin A deꞌiyosaa demmaasu. Ha wodiyan Tanaya ammanettida ishaa gelaasu; qassi eti ubba wode haggaazuwa ufayssan haggaazoosona.

HA WODIYAN YIHOOWAN LOYTTA AMMANETTA

16. Luqaasa 21:26-28n deꞌiya hiraagay polettiyogaa beꞌiyo wode, nuuni xala gididi deꞌanaadan maaddiyabay aybee?

¹⁶ Gita waayiya wode ubba asay “yashshan daafurana.” Shin Xoossaa asay minnidinne xala gididi deꞌana. (Luqaasa 21:26-28 nabbaba.) Nuuni yayyennay aybissee? Yihoowan ammanettiyo gishshataassa. Qommoora ibay odettido Tanaya kase O gakkida metoti hara metota genccanaadan maaddiyogaa yootaasu. A hagaadan gaasu: “Nuuni ay metonne genccanaadan Yihooway maaddanaagaanne nuna anjjanaagaa akeekaas. Issi issitoo harati hanotata eti koyiyogaadan oottiyaba milatana danddayees; shin Yihooway paqqadana xayikko eti yaatana danddayokkona. Issi metoy deexxana danddayikkonne xayana.”

17. Layttaa xiqisee 2024gee nuna waati maaddii? (Koyro sinttan deꞌiya misiliya xeella.)

¹⁷ Ha wodiyan nuuni yayyanaadan oottiya darobay deꞌees. Shin yayyennan aggiyogan Daawita milatana danddayoos. Daawiti hagaadan giidi Yihoowa woossido woosay 2024 layttaa xiqise gidanaadan doorettiis: “Taani yayyido wode, nenan ammanettais.” (Maz. 56:3) Geeshsha Maxaafaa eranchchay ha xiqisiya xeelliyagan yootidobaa akeeka: “Daawiti bana yashshiyabaa woy ba metuwa ubbatoo qoppibeenna. I bana Ashshiyagan ammanettiis.” Kaalliya aginatun, ubba qassi yayyanaadan oottiyabay nena gakkiyo wode nu layttaa xiqisiya loytta qoppa. Yihooway kase oottidobaa, haꞌꞌi oottiiddi deꞌiyobaanne sinttappe oottanabaa wodiya bazzada loytta qoppa. Yaatikko, Daawitaagaadan neeni hagaadan gaana danddayaasa: “Xoossan ammanettaisinne yayyikke.”—Maz. 56:4.