GEESHSHA MAXAAFAN ‘paray goochchiyo gaariya’ geetettida qaalay koyro xaafettido doonan dumma dumma qommo para gaariya qonccissana danddayees. (Oos. 8:28, 29, 38) Shin Toophphiya mureessay olan woy annaaciyan goꞌettiyo guutta para gaariya gidennan, gita para gaariya toggi uttidaba milatees. Hegaadan gaanaadan oottida amarida gaasota beꞌa.

Toophphiya mureessay adussa ogiya manddariis. I “Hinddake giyo Toophphiyaa kaweessi biittaa haariya i miishsha ubbaakka [naagiyagaa.]” (Oos. 8:27) Beni Toophphiya biittay, ha wodiyan deꞌiya Suudaane biittaanne Gibxxe biittaa tohossa heeraappe dariyasaa oyqqees. He bitanee manddaridosaa ubbaa issi gaariyan biidaba milatenna, gidikkonne I manddariyo wodiyawu koshshiya darobaa oyqqennan aggenna. Koyro xeetu layttan, asay issisaappe harasaa baanawu goꞌettiyobaappe amaridaagee oyddu goommay deꞌiyo shara malabaa bollaara miccido gaariya. Oosuwaa maxaafaabaa qonccissiya issi xuufee yootiyogaadan, “Hegaa mala para gaaretuyyo borssaanne harabaa caaniyo daro sohoy deꞌees; he gaariyan manddariyogee injjetees, qassi asay adussa ogiya baanaadan maaddana danddayees.”

Toophphiya mureessay Piliphphoosi akko yiyo wode nabbabiiddi deꞌees. “Piliphphoosi woxxidi, hananabaa yootiya Isiyaasa maxaafaa mureessai nabbabishin [siyidoogaa]” taarikee yootees. (Oos. 8:30) He gaaree eesuwan biiddi deꞌenna. Gaaree keehi loddan biyo gishshawu, he mureessay nabbabees, qassi Piliphphoosikka gaariyakko gakkanawu metootibeenna.

Toophphiya mureessay “banaara gaariyan kiyidi uttana mala, Piliphphoosa woossiis.” (Oos. 8:31) Annaaciyawu goꞌettiyo para gaariya laaggiyageeti eqqidi laaggoosona. Shin manddaranawu goꞌettiyo para gaariyan mureessaynne Piliphphoosi uttiyosay deꞌees.

Oosuwaa shemppo 8​ynne taarikiya naqaashay yootiyobaappe denddidaagan, Toophphiya mureessay olawu woy annaaciyawu goꞌettiyo guutta para gaariya gidennan, gita para gaariya toggi uttidoogaa bessiya misileti mata wode kiyida nu xuufetun deꞌoosona.