XANNAꞌIYO HUUPHE YOHUWA 2
MAZAMURE 132 Haꞌꞌi Issuwaa Gidida
Azinatoo, Intte Machchota Bonchchite
“Azinatoo, . . . eta bonchchite.”—1 PHE. 3:7.
TAMAARANABAA
Issi azinay haasayiyobaaninne oottiyoban ba machchiyo siiqiyogaanne bonchchiyogaa waati bessana danddayiyakko beꞌana.
1. Yihooway aqo deꞌuwa doomissido issi gaasoy aybee?
YIHOOWAY “ufayttiya Xoossa,” qassi nuunikka ufayttanaadan koyees. (1 Xim. 1:11, NW) Nuuni nu deꞌuwan ufayttanaadan maaddiya daro imotaa I nuussi immiis. (Yaaq. 1:17) He imotatuppe issoy aqo deꞌuwa. Issi attumaageenne maccaara aqo oyqqiyo wode, issoy issuwa siiqanawunne bonchchanawu qaalaa geloosona. Eta siiqoy minni minni biyogee eti keehi ufayttanaadan oottana danddayees.—Lee. 5:18.
2. Ha wodiyan daro aqo deꞌoy ay malee?
2 Ha wodiyan, aqo oyqqida daroti bantta bullachchaa gallassi gelido qaalaa naagennaagee azzanttiyaba. Hegaappe denddidaagan eti ufayttokkona. Alamiya Payyatetta Dirijjitee mati kessido irpporttiyan qonccissidoogaadan, daro azinati bantta machchota wadhdhoosona, eta bolli meqetti baynnabaa haasayosona woy hara ogiyan eta qohoosona. Hegaadan oottiya issi azinay asaa sinttan ba machchiyo bonchchikkonne son O naaqqiyagaa gidana danddayees. Qassi daro azinati pornograafiya a beꞌiyogee machchoti ooninne eta siiqennabadan qoppanaadaaninne ufayttennaadan oottees.
3. Issi issi azinati bantta machchota naaqiyoy aybissee?
3 Amarida azinati bantta machchota naaqqiyoy aybissee? Geella eta makkalanchcha aaway dichchido gishshawu hegaa mala eeshshaa bessiyogee bala gidenna giidi qoppana danddayoosona. Harati qassi bantta wogan daro attumaageeti bantta machchota naaqqiyo gishshawu hegaadan oottoosona. He attumaageeti wolqqaama gididabadan banttawu siyettana mala bantta machchotuyyo meqettaa iitana bessiyabadan qoppoosona. Hara attumaageeti qassi bantta yiilluwa mittana koshshiyogaa tamaaribookkona. Amarida attumaageeti ubbatoo pornograafiya beꞌiyogee eti maccaasabaanne mattumaa gaytettaabaa iitabaa qoppanaadan oottana danddayees. Hegaa bollikka, koronaa harggiya wodiyan unddenna azinati bantta machchota qohiyogaa doommidoogaa daro eranchchati akeekidosona. Gidikkonne, issi azinay ba machchiyo naaqqana bessiyo ay gaasoykka baawa.
4. Kiristtaane gidida azinati naagettana koshshiyabay aybee, qassi aybissi?
4 Kiristtaane gidida azinati macca asaa xeelliyagan balabaa qoppennaadan naagettana koshshees. b Aybissi? Darotoo issi uri qoppiyobaa oottiyo gishshataassa. Kiitettida Phawuloosi Roomen deꞌiya tiyettida Kiristtaaneti ‘ha saꞌaa asaa qulliyogaa agganaadan’ zoriis. (Roo. 12:1, 2) Phawuloosi Roomen deꞌiya galchchawu dabddaabbiya xaafiyo wode, yan deꞌiyageeti Kiristtaane gidoosappe daro layttay aadhdhiis. Gidikkokka, Phawuloosi xaafidobay he galchchan deꞌiya amaridaageeti ha saꞌaa asaa meeziyanne qofaa qulliiddi deꞌiyogaa qonccissees. Bantta qofaanne eeshshaa eti laamanaadan I zoridoy hegaassa. He zoree ha wodiyan Kiristtaane gidida azinatussikka haniyogee qoncce. Etappe amaridaageeti ha saꞌaa asaa qofaa qullidi bantta machchota qohidoogee azzanttiyaba. c Issi azinay ba machchiyo waati oyqqanaadan Yihooway koyii? Ha huuphe yohuwa waanna xiqisiyappe hegaa zaaruwa demmoos.
5. Koyro PHeexiroosa 3:7y qonccissiyogaadan, issi azinay ba machchiyo waati oyqqana koshshii?
5 Koyro PHeexiroosa 3:7 nabbaba. Azinati bantta machchota bonchchanaadan Yihooway azaziis. Ba machchiyo bonchchiya issi azinay iyyo keheesinne O siiqees. Issi azinay ba machchiyo bonchchiyogaa waati bessana danddayiyakko ha huuphe yohuwan beꞌana. Shin koyruwan, issi azinay oottana bessennabata beꞌana.
NE MACHCHIYO QOHIYABAA MULE OOTTENNAADAN NAAGETTA
6. Bantta machchota wadhdhiya azinata xeelliyagan Yihoowawu aybi siyettii? (Qolasiyaasa 3:19)
6 Issi azinay ba machchiyo wadhdhana bessenna. Yihooway hanttaarabaa oottiyageeta ixxees. (Maz. 11:5) Bantta machchota wadhdhiya azinata Yihooway keehi ixxees. (Mil. 2:16; Qolasiyaasa 3:19 nabbaba.) Ha huuphe yohuwan waanna xiqise gidida 1 PHeexiroosa 3:7y yootiyogaadan, issi azinay ba machchiyo maara oyqqennaba gidikko I Xoossaara dabbotido dabbotay moorettees. Haray atto Yihooway A woosaa siyennan aggana danddayees.
7. Efisoona 4:31, 32y yootiyogaadan, azinati aybippe naagettana koshshii? (“Qonccissido Qaalaa” giyagaakka xeella.)
7 Issi azinay ba machchee bolli waassana woy meqetti baynnabaa haasayana koshshenna. Issi issi azinati bantta machchota keehi hanqqettoosonanne eta keehi qohiyabaa haasayosona. Shin Yihooway ‘yiilluwa, hanqquwa, cabbuwanne cashshaa’ ixxees. d (Efisoona 4:31, 32 nabbaba.) I ubbabaa siyees. Issi azinay ba machchiyo asi baynnasan haasayissiyo ogeekka Yihoowa qofissees. Ba machchee bolli iitabaa haasayiya azinay ba machcheera xalla gidennan, I Xoossaara dabbotido dabbotaakka moorees.—Yaaq. 1:26.
8. Pornograafiya xeelliyagan Yihoowa qofay aybee, qassi aybissi?
8 Issi azinay pornograafiya beꞌana bessenna. Pornograafiya xeelliyagan Yihoowa qofay aybee? I hegaa ixxees. Hegaa gishshawu, pornograafiya beꞌiya azinay Yihoowara dabbotido ba dabbotaa moorees, qassi ba machchiyo kawushshees. e Issi azinay oottiyoban xalaala gidennan, qoppiyobankka ba machcheessi ammanettidi deꞌanaadan Yihooway koyees. Hara maccaasiyo aggennan xeellidi iira zinꞌꞌanawu qaaqqatiya attumaagee “he wode ba wozanan iira wodiraa laammiyogaa” Yesuusi yootiis. f—Mat. 5:28, 29.
9. Issi azinay ba machchee kahay qumꞌꞌanaadan oottiya hanotan mattumaa gayttanawu wolqqanttiyogaa Yihooway ixxiyoy aybissee?
9 Mattumaa gayttiyo wode issi azinay ba machchiya koyennabaa oottanaadan wolqqanttana bessenna. Issi issi azinati bantta machchoti yeellatanaadan woy eta kahay qumꞌꞌanaadan oottiya hanotan mattumaa gayttanaadan iisettoosona. Ba xallaa siiqiyogaanne haratussi qoppennaagaa bessiya hegaa mala eeshshaa Yihooway ixxees. Issi azinay ba machchiyo siiqanaadan, kehatettan oyqqanaadaaninne I kahaa bonchchanaadan Yihooway koyees. (Efi. 5:28, 29) Kiristtaane gidida issi azinay ba machchee kahay qumꞌꞌanaadan oottiya hanotan mattumaa gayttanawu wolqqanttiyagaa, woy O qohiyagaa woykko pornograafiya beꞌiyagaa gidikko shin? I ba qofaanne ba oosuwa laamanawu waatana danddayii?
ISSI AZINAY IITA EESHSHAA AGGANAWU WAATANA DANDDAYII?
10. Azinati Yesuusappe ay tamaariyonaa?
10 Issi azinay ba machchiyo qohiyogaanne I kahay qumꞌꞌanaadan oottiya hanotan mattumaa gayttanaadan wolqqanttiyogaa agganaadan aybi maaddana danddayii? I Yesuusa leemisuwa kaallanawu baaxetana danddayees. Yesuusi machchibeennaba gidikkokka, I bana kaalliyageeta oyqqido ogee issi azinay ba machchiyo waati oyqqanaakko loꞌꞌo leemiso gidees. (Efi. 5:25) Leemisuwawu, Yesuusi ba kiittidoogeeta oyqqidonne haasayissido ogiyappe azinati tamaarana danddayiyobaa beꞌana.
11. Yesuusi ba kiittidoogeeta waati oyqqidee?
11 Yesuusi ba kiittidoogeetussi ubbatoo kehiis, qassi eta bonchchuwan oyqqiis. I etawu meqettaa iiti erenna. Yesuusi etawu Godaa gidikkokka, I ba wolqqaa bessiyogan eti awu yayyanaadan oottibeenna. Shin I bana ziqqi oottidi etawu haggaaziis. (Yoh. 13:12-17) I bana kaalliyageetussi hagaadan giis: “Taani ashkkenne ziqqi giyagaa gidiyo gishshawu, . . . taappe tamaarite; yaatikko, intte gazddana.” (Mat. 11:28-30) Yesuusi ashkke gidiyogaa akeekite. Ashkke uri shugo gidenna. I bana naagana danddayiya mino asa. Yiilloyiyabay merettiyo wode I woppu geesinne ba yiilluwa mittana danddayees.
12. Yesuusi harata waati haasayissidee?
12 Yesuusi haasayiyoban harata minttettiisinne gazddissiis. I bana kaalliyageetu bolli iitabaa haasayibeenna. (Luq. 8:47, 48) Eqettiyageeti A hanqqetissana koyido wodenne A cayido wodekka, “zaaridi cayibeenna.” (1 PHe. 2:21-23) Yesuusi iitabaa haasayiyogaappe issi issitoo coꞌꞌu giis. (Mat. 27:12-14) I oottidobay azinatuyyo keehi loꞌꞌo leemiso!
13. Maatiyosa 19:4-6n odettidaagaadan, issi azinay ba machchiyo waati “baqqi oyqqana” danddayii? (Misiliyakka xeella.)
13 Yesuusi azinati bantta machchotussi ubbatoo ammanettanaadan azaziis. Issi azinay ba “machchiyo baqqi oyqqana” koshshiyogaa ba Aaway yootidoogaadan ikka yootiis. (Maatiyosa 19:4-6 nabbaba.) Hegaa gishshawu, azinaynne machchiya siiqettiyo siiqoy eti issoy issuwa baqqi oyqqidoogaa mala mino gidana bessees. Etappe issoy aqo deꞌuwa qohiyabaa oottikko eti naaꞌꞌaykka qohettoosona. Ba machchiyo keehi siiqiya azinay ubba qommo pornograafiyappe haakkees. I “pattennabaa xeellenna mala” ba ayfiya sohuwara wora zaarees. (Maz. 119:37) Qassi I hara maccaasa xeellidi amottennaadan ba ayfiyara maacettees.—Iyy. 31:1.
Ammanettiya issi azinay pornograafiya beꞌennan ixxees (Mentto 13 xeella) h
14. Ba machchiyo qohiya azinay Yihoowara dabbotido moorettida ba dabbotaa giigissanawunne ba machcheera issippetettan deꞌanawu ay oottana bessii?
14 Ba machchiyo wadhdhiya woy I bolli iitabaa haasayiya issi azinay Yihoowara dabbotido moorettida ba dabbotaa giigissanawunne ba machcheera issippetettan deꞌanawu darobaa oottana koshshees. I oottana bessiyabati awugeetee? Koyruwan, I mooranchcha gidiyogaa akeekana bessees. Yihoowappe geemmidabi baawa. (Maz. 44:21; Era. 12:14; Ibr. 4:13) Naaꞌꞌanttuwan, I ba machchiyo qohiyogaa aggananne ba eeshshaa laammana koshshees. (Lee. 28:13) Heezzanttuwan, I ba machchiyonne Yihoowa naaqqidoogan zilꞌꞌettidi eta maarotaa oychchana koshshees. (Oos. 3:19) I laamettanawu koyana mala qassi qoppiyoban, haasayiyobaaninne oottiyoban naagettana mala maaddanaadan Yihoowa mintti woossana koshshees. (Maz. 51:10-12; 2 Qor. 10:5; Pili. 2:13) Oyddanttuwan, hanttaarabaanne cashsha ubbaa ixxiyogan ba woosaara maayettiyabaa oottana koshshees. (Maz. 97:10) Ichchashanttuwan, galchchan deꞌiya siiqiya henttanchchata maaduwa sohuwara oychchana koshshees. (Yaaq. 5:14-16) Usuppunttuwan, zaarettidi hegaa mala iitabaa oottennaadan naagettanawu maaddiya halchchuwa kessana koshshees. Pornograafiya beꞌiya issi azinaykka ha usuppunbata oottana koshshees. I ba eeshshaa laamanawu baaxetiyo baaxiya Yihooway anjjana. (Maz. 37:5) Shin issi azinay ba machchiyo qohiyabaa oottennan aggiyogaa xallay gidenna. I ba machchiyo siiqananne bonchchana koshshees. Hegaadan waati oottana danddayii?
INTTE MACHCHOTA SIIQIYOGAANNE BONCHCHIYOGAA WAATI BESSANA DANDDAYEETII?
15. Issi azinay ba machchiyo siiqiyogaa waati bessana danddayii?
15 Siiqiyogaa bessite. Bantta aqo deꞌuwan ufayttiya amarida ishantti ubba galla bantta machchota keehi siiqiyogaa bessiyabaa oottoosona. (1 Yoh. 3:18) Kushiya oyqqiyogaa woy qoommiyogaa mala darin metennabaa oottiyogan issi azinay ba machchiyo siiqiyogaa bessana danddayees. “Ta nena laamotays” woy “Peeshshay ay malee?” giidi kiitaa kiittana danddayees. Issi issitoo I ciishshaa woy imotaa immiyogan O siiqiyogaa qonccissana danddayees. Issi azinay hegaadan oottiyo wode, ba machchiyo siiqiyogaanne bonchchiyogaa bessees; qassi eta aqo deꞌoy minnees.
16. Issi azinay ba machchiyo sabbana koshshiyoy aybissee?
16 Nashshiyogaa yootite. Ba machchiyo siiqiyanne bonchchiya issi azinay I O xoqqu ootti xeelliyo gaasuwa yootees; qassi A babaa loꞌꞌobaa qoppanaadan oottees. I yaatana danddayiyo issi ogee A maaddanawu A machchiya oottiyo ubbabawu O galatiyogaa. (1 Tas. 5:18) Issi azinay ba machchiyo wozanappe sabbiyo wode A ufayttawusu, woppu gawusu, qassi harati O siiqiyogaanne bonchchiyogaa akeekawusu.—Lee. 31:28.
17. Issi azinay ba machchiyo bonchchiyogaa waati bessana danddayii?
17 Kehitenne bonchchite. Siiqiya azinay ba machchiyo xoqqu ootti xeelleesinne nashshees. I Yihoowappe imettida alꞌꞌo imotadan O xeellees. (Lee. 18:22; 31:10) Hegaa gishshawu, mattumaa gayttiyo wodiyankka iyyo keheesinne O bonchchees. Eti mattumaa gayttiyo wode O ufayssennabaa, yeellayiyabaa woy I kahaa qumꞌꞌiya aybanne oottanaadan iisettenna. g Yihoowa sinttan awukka geeshsha kahay deꞌanaadan I baaxetees.—Oos. 24:16.
18. Azinati ay oottanawu murttana koshshii? (“ Machchiyo Bonchchiya Azina Gidanawu Maaddiya Oyddubata” giya saaxiniyakka xeella.)
18 Azinatoo, intte haasayiyonne oottiyo ubbaban intte machchota siiqanawunne bonchchanawu baaxetiyogaa Yihooway beꞌidi ufayttiyogaa ammanettana danddayeeta. Intte machchota qohiya aybanne oottennan aggiyogan, etawu kehiyogan, qoppiyogaaninne eta keehi dosiyogan eta bonchchanawu murttidaageeta gidite. Yaatiyogan, eta siiqiyogaanne nashshiyogaa besseeta. Intte machchota bonchchitenne siiqite; qassi intte Yihoowara dabbotido aybippenne aadhdhiya intte dabbotaa naagite.—Maz. 25:14.
MAZAMURE 131 “Xoossai Issippe Gattidoogaa”
a “Pornograafe” giya qaalay beꞌiya, nabbabiya woy siyiya ura denttettanawu giigida inddaa woy mattumaa gaytettaa qonccissi bessiya biidota, misileta, xuufetanne ezggiyobata bessiyaba.
b Azinati Ichchashe 2024 Wochchiyo Keelan “Maccaasaa Yihooway Xeelliyogaadan Xeellay?” giya huuphe yohuwa nabbabiyogan goꞌettana danddayoosona.
c Son qohoy gakkiyogeeti jw.org saytiyaninne JW Laybreeriyan kaalli kaalli kiyiya “Gujo Huuphe Yohota” giyagan “Son Qohoy Gakkiyogeetussi Haniya Maaduwa” (Amaarattuwa) giya huuphe yohuwa nabbabiyogan goꞌettana danddayoosona.
d QONCCISSIDO QAALAA: “Cashshay” harata kawushshidi xeegiyogaa, iitabaa haasayiyogaanne ubbatoo boriyogaa bessiyaba. Hegaa gishshawu, issi azinay ba machchiyo qohanawu woy guuttanawu haasayiyo iitaba ubbay cashsha.
e “Pornograafee Intte Aqo Deꞌuwa Qohana Danddayees” giya jw.org saytiyaninne JW Laybreeriyan kiyida huuphe yohuwa xeella.
f Azinay pornograafiya beꞌiyo machchiya Naase 2023 Wochchiyo Keelan “Ne Aqo Laggee Pornograafiyaa Beꞌikko Neeni Waatana Danddayay?” giya huuphe yohuwa nabbabiyogan goꞌettana danddayawusu.
g Issi azinaynne machchiya mattumaa gayttiyo ogiya xeelliyagan geeshshabaanne geeshsha gidennabaa Geeshsha Maxaafay dummayidi yootenna. Kiristtaane gidida aqo laggeti Yihoowa bonchchissanawu, issoy issuwa ufayssanawu, qassi ubbatoo geeshsha kahay deꞌiyogeeta gidanawu murttidoogaa bessiyabata kuuyana koshshees. Aqo laggeti ha xuurabaa haratuura haasayokkona.
h MISILIYA QONCCISSUWA: Issi ishaara oottiya Yihoowa Markka gidennaageeti pornograafiya qonccissiya xuufiya A bessanawu maloosona.
