1. Nuuni Yihoowa ufayssanawu waatana danddayiyoo?

 NEENI siiqiyo urawu loꞌꞌiyanne maaddiya dumma imotaa immidabadan qoppa. He uri he imotaa saaxiniyan wottidi dogikko, neeni azzanana! Shin he uri imotaa loytti goꞌettiyagaanne nashshiyagaa gidikko, neeni ufayttanaagee qoncce. Ha leemisoy Yihooway immido wozuwa imotaara waani gayttii? Yihooway nu gishshawu ba Naꞌaa immiis. Hegaa gishshawu, he alꞌꞌo imotanne I nuussi wozuwa immanaadan denttettida A siiquwa nuuni nashshiyo wode, Yihooway keehi ufayttanaagee qoncce!—Yoh. 3:16; Roo. 5:7, 8.

2. Nuuni ha huuphe yohuwan ay beꞌanee?

² Daro layttay aadhdhiyo wode, nuuni wozuwa xoqqu ootti xeelliyogaa aggana danddayoos. Nuuni wozuwa nashshiyogaa aggikko, hegee Xoossay nuussi immido ufayssiya imotaa nuuni beꞌennasan woy hassayennasan wottiyogaa mala. Hegaadan hanennaadan Xoossaynne Kiristtoosi nuussi oottidobaa nuuni ubbatoo qoppana koshshees. Ha huuphe yohoy nuna hegawu maaddana. Ha wodiyaninne sinttappe wozoy nuna waati maaddiyakko beꞌana. Hassayuwa Baalaa bonchchanaappe kasenne bonchchi simmin deꞌiya saaminttatun Yihoowa siiquwa nashshiyogaa bessanawu waatana danddayiyakkokka beꞌana.

WOZOY NUNA HA WODIYAN WAATI GOꞌꞌII?

3. Ha wodiyan wozoy nuna goꞌꞌiyo issi ogee aybee?

³ Kiristtoosa wozuwa yarshshuwan nuuni goꞌettiiddi deꞌoos. Leemisuwawu, wozuwappe denddidaagan Yihooway nu nagaraa atto gees. I nuussi atto gaanaadan A giddiyabi baa. Shin I nuussi atto gaanawu koyees. Mazamurawee A nashshiiddi hagaadan giis: “Abeet Godau, neeni kehanne atto giyaagaa.”—Maz. 86:5; 103:3, 10-13.

4. Yihooway wozuwa oossi giigissidee? (Luqaasa 5:32; 1 Ximootiyoosa 1:15)

 ⁴ Yihoowa maarotay nuussi bessenna giidi amaridaageeti qoppana danddayoosona. Yihoowa maarotay nu ubbawukka bessennaagee tuma. Kiitettida Phawuloosi I ‘kiitettidaagaa geetettanawukka bessennaagaa’ akeekiis. Shin I gujjidi hagaadan giis: “Laggetiyabi baynna Xoossaa kehatettaappe denddidaagan taani kiitettidaagaa.” (1 Qor. 15:9, 10) Nuuni nu nagaran zilꞌꞌettidi laamettiyo wode Yihooway nuuyyo atto gees. Aybissi? Hegee nuuyyo bessiyo gishshawu gidennan, I nuna siiqiyo gishshawu hegaadan oottees. Yihoowa maarotay neessi bessennabadan qoppada neeni unꞌꞌettikko, I wozuwa giigissidoy wottiyobi baynna asaassa gidennan, bantta nagaran zilꞌꞌettidi laamettiya asaassa gidiyogaa hassaya.—Luqaasa 5:32; 1 Ximootiyoosa 1:15 nabbaba.

5. Yihoowa maarotay nuussi bessiyabee? Qonccissa.

⁵ Nuuni Yihoowawu daro layttaa haggaazidoogawu I nuussi atto gaana bessees giidi nuuppe ooninne qoppana koshshenna. Nuuni ayyo oottido ubbabaa Yihooway dogennaagee tuma. (Ibr. 6:10) Wozoy I nuuyyo coo immdobappe attin, nuuni awu haggaazido gishshawu qanxxiyoba gidenna. Hegaa gishshawu, nuuni Yihoowawu darobaa oottidoogaappe denddidaagan A maarotay nuussi bessees giidi qoppiyogee bala. Hegee wozoy nuussi koshshenna giidi qoppiyogaa mala.—Galaatiya 2:21​ra gatta xeella.

6. Phawuloosi Yihoowawu minnidi haggaazidoy aybissee?

⁶ Phawuloosi Yihoowawu ay keena oottikkokka, Yihoowa maarotaa demissiyay hegaa gidennaagaa eriis. Yaatin I Yihoowawu minni oottidoy aybissee? Yihooway awu bessido kehatettawunne maarotawu A nashshiyogaa bessanaassa. (Efi. 3:7) Phawuloosaagaadan nuuni ubbatoo minnidi haggaaziyoy Yihoowa maarotaa demmanawu gidennan, A maarotaa nashshiyogaa bessanaassa.

7. Nuuni ha wodiyan wozuwappe demmiyo hara goꞌꞌay aybee? (Roome 5:1; Yaaqooba 2:23)

⁷ Ha wodiyan nuuni wozuwappe demmiyo hara goꞌꞌay Yihoowara loytti dabbotana danddayiyogaa. a Hagaappe kasetiya huuphe yohuwan qonccidaagaadan, nuuni Yihoowa dabbo gididi yelettibookko. Shin wozuwappe denddidaagan, nuuni ‘Xoossaara saruwan’ deꞌananne aara loytti dabbotana danddayoos.—Roome 5:1; Yaaqooba 2:23 nabbaba.

8. Woosaa maataa gishshawu nuuni Yihoowa galatana bessiyoy aybissee?

⁸ Woosay nuuni Yihoowara dabbotidoogan demmido anjjotuppe issuwa. Yihooway nuuni issippe shiiqiyo wode woossiyo woosa xalla gidennan, nurkka deꞌiiddi woossiyo woosaakka siyees. Nuuni woossiyo wode woppu goos. Shin woosaa goꞌꞌay hegaa xalla gidenna. Woosay nuuni Xoossaara dabbotaa minttanaadankka maaddees. (Maz. 65:2; Yaaq. 4:8; 1 Yoh. 5:14.) Yesuusi saꞌan deꞌiyo wode, Yihooway A siyiyogaa, qassi woosay eta dabbotay minnanaadan oottiyogaa eriyo gishshawu ubbatoo woossiis. (Luq. 5:16) Yesuusa wozo yarshshuwan Yihoowara dabbotananne woosan A haasayissana danddayiyo gishshawu Yihoowa keehi galatoos!

WOZOY NUNA SINTTAPPE WAATI GOꞌꞌANA DANDDAYII?

9. Yihoowawu ammanettidi goynniyageetussi wozoy sinttappe ay demissanee?

⁹ Yihoowawu ammanettidi goynniyageetussi wozoy sinttappe ay demissanee? Etawu  merinaa deꞌuwa demissana. Daro shaꞌu layttaasappe doommidi asay hayqqiyo gishshawu, merinawu deꞌiyogee hanennaba giidi daroti qoppoosona. Shin Yihooway koyro halchchidoy asay merinawu deꞌanaadaana. Addaamee nagaraa oottennaakko, merinawu deꞌiyogee danddayettennaba giidi ooninne qoppenna. Qassi ha wodiyan merinawu deꞌana giidi qoppiyogee metiyaba; shin nuuni hegaa demmanaadan Yihooway alꞌꞌobaa, hegeekka ba Naꞌaa immido gishshawu merinaa deꞌuwa demmanaagaa ammanettana danddayoos.—Roo. 8:32.

10. Tiyettidaageetinne hara dorssati yeemuwan naagiyobay aybee?

¹⁰ Merinaa deꞌoy sinttappe demmiyo anjjo gidikkokka, ha wodiyan hegaa loytti qoppanaadan Yihooway koyees. Tiyettidaageeti Kiristtoosaara saꞌaa haariiddi saluwan deꞌiyo ufayssiya deꞌuwa yeemuwan naagoosona. (Ajj. 20:6) Hara dorssati waayee, tuggay woy azzanoy baynna gannate saꞌan deꞌanawu yeemuwan naagoosona. (Ajj. 21:3, 4) Neeni saꞌan merinawu deꞌanawu hidootiya hara dorssatu yaree? Hegee saluwan deꞌiyogaappe guuxxiya woyto gidenna! Nuuni saꞌan deꞌanaadan Yihooway nuna medhdhido gishshawu, saꞌan merinawu deꞌiyogee nu ubbatoo ufayttanaadan oottana.

11-12. Nuuni Gannatiyan demmanawu yeemuwan naagiyo anjjotuppe amaridaageeti awugeetee? (Misiliyakka xeella.)

¹¹ Gannate saꞌan neessi deꞌoy ay mala gidanaakko qoppa. Neeni sahettana woy hayqqana gaada mule hirggakka. (Isi. 25:8; 33:24) Yihooway neeni koyiyo loꞌꞌoba ubbaa neessi immana. Mehiya doꞌaabaa loytta eranawu koyay? Muuziqa miishshata kaaꞌiyogaa tamaaranawu koyay? Misiliya waati medhdhiyakko tamaaranawu koyay? Gannatiyan keexuwa halchchuwa kessiyageeti, keexxiyageetinne goshshanchchati koshshiyogee qoncce. Qassi yan qumaa kattiyogaa, issi issibaa giigissiyo miishshata medhdhiyogaanne saꞌaa loyttiyogaa malabatun maaddiyageetinne moorettidabaa giigissiyageeti koshshiyogee qoncce. (Isi. 35:1; 65:21) Neeni merinawu deꞌiyo wode ha ubbabatanne hara darobata oottiyo wodiya demmaasa.

 ¹² Hayquwappe denddiyageeta mokkiyogee keehi ufayssiyagaa gidana! (Oos. 24:15) Yihooway medhdhido darobata tamaariyogan abaa loyttada eriyogee nena ay keena ufayssanaakkokka qoppa. (Maz. 104:24; Isi. 11:9) Aybinne zilꞌꞌiyabi baynnan Yihoowawu goynniyogee ha ubbabaappe aaruwan keehi ufayssiyaba gidana! Nagaran ‘guutta wodiyawu ufayttana’ gaada sinttappe demmana ha anjjota agganawu koyay? (Ibr. 11:25) Mule koyakka! Ha anjjoti nuuni ha wodiyan aggibayiyo aybippekka aadhdhoosona. Gannate saꞌay ubbatoo hidoota xalla gididi attennaagaa hassaya. Wurssettan, nuuni yan deꞌana. Ha ubbabay hanana danddayiyoy Yihooway nuna keehi siiqidi ba Naꞌay nuuyyo hayqqanaadan oottido gishshataassa!

YIHOOWA SIIQUWA NASHSHIYOGAA WAATA BESSANA DANDDAYAY?

13. Yihooway nuna siiqiyo siiquwa nashshiyogaa waati bessana danddayiyoo? (2 Qoronttoosa 6:1)

¹³ Yihooway nuussi wozuwa immido gishshawu nuuni A nashshiyogaa waati bessana danddayiyoo? Nu deꞌuwan A oosuwa kaseyiyogaana. (Mat. 6:33) Yesuusi “paxa deꞌiyageeti banttawu hayqqidaagawunne Xoossay denttidoogawu deꞌanaappe attin, banttawu deꞌiyogaa aggana mala” hayqqiis. (2 Qor. 5:15) Yihooway nuussi keheesinne atto gees. Nuuni awu haggaazanawu nuussi danddayettida ubbabaa oottiyogan, I nuuyyo oottido darobaa akeekiyogaanne A wozanappe nashshiyogaa bessoos.—2 Qoronttoosa 6:1 nabbaba.

14. Yihoowa kaaletuwan ammanettiyogaa waati bessana danddayiyoo?

¹⁴ Yihoowa kaaletuwan ammanettiyogankka A siiquwa nashshana danddayoos. Waatidi? Nuuni ay keena tamaaranaakko woy ay mala oosuwa oottanaakko kuuyiyo wode, nuuni oottanaadan Yihooway koyiyobaa akeekana koshshees. (1 Qor. 10:31; 2 Qor. 5:7) Nuuni nu ammanuwa oosuwan bessiyo wode malaaliyabay hanana; hegeekka nu ammanoynne nuuni Yihoowara dabbotido dabbotay kaseegaappe aaruwan minnana. Qassi merinawu deꞌiyo hidootan loytti ammanettoos.—Roo. 5:3-5; Yaaq. 2:21, 22.

15. Hassayuwa Baalaa bonchchanaappe kasenne bonchchi simmin deꞌiya saaminttatun Yihoowa nashshiyogaa waati bessana danddayiyoo?

¹⁵ Yihoowa siiquwa nashshiyogaa bessana danddayiyo hara ogeekka deꞌees. Hegee nuuni wozuwa gishshawu Yihoowa keehi galatiyogaa bessanawu Hassayuwa Baalaa bonchchanaappe kasenne bonchchi simmin deꞌiya saaminttatun nuussi danddayettida ubbabaa oottiyogaa. Nuuni Hassayuwa Baalaa bonchchanawu halchchiyogaa xalla gidennan, haratakka shoobbana danddayoos. (1 Xim. 2:4) Hassayuwa Baalan oosettiyabaa neeni shoobbiyogeetussi qonccissa. Yesuusi Hayqqidoy Aybissee? qassi Yesuusa Hayquwaa Hassaya giya biidota jw.org saytiyappe eta bessiyogee nena maaddana danddayees. Cimati ayyaanaaban  shuggidaageeta shoobbiyogaa dogana bessenna. Bayida Yihoowa dorssatuppe amaridaageeti A wudiyakko simmikko saluwaninne saꞌan deꞌiyageeti ay keena ufayttanaakko qoppa! (Luq. 15:4-7) Hassayuwa Baalan nuuni issoy issuwa sarotiyogaa xalla gidennan, oorattata woy adussa wodiyawu nunaara shiiqiyogaa aggidaageetakka sarotanawu baaxetoos. Eti yiidoogan nuuni ufayttiyogaa bessanawu koyoos!—Roo. 12:13.

16. Nuuni Hassayuwa Baalaa bonchchanaappe kasenne bonchchi simmin deꞌiya saaminttatun loytti haggaazanawu qoppana koshshiyoy aybissee?

¹⁶ Hassayuwa Baalaa bonchchanaappe kasenne bonchchi simmin deꞌiya saaminttatun ayyaanaabaa oosuwa loytta oottana danddayay? Hegee Yihoowaynne Yesuusi neessi oottido ubbabaa gishshawu, neeni nashshiyogaa bessiyo loꞌꞌo oge. Nuuni kaseegaappe aaruwan Yihoowawu haggaaziyo wode, I nuna maaddiyogaa loytti akeekoosinne kaseegaappe aaruwan an ammanettoos. (1 Qor. 3:9) Qassi, Geeshsha Maxaafaa Galla Galla Pilggiyogaa giya bukleetiyan woy saaminttawu gidduwan shiiqiyo shiiquwan xannaꞌiyo xuufiyan deꞌiya charttiyan odettida Godaa Kahuwawu nabbabiyo xiqiseta nabbaba. Neeni he xiqiseta xannaꞌanakka danddayaasa.

17. Yihoowa ufayssiyabay aybee? (“ Yihoowa Siiquwa Nashshana Danddayiyo Ogeta” giya saaxiniyakka xeella.)

¹⁷ Ha huuphe yohuwan odettida ubbabaa neeni oosuwan peeshshennaadan ne hanotay diggana danddayees. Shin Yihooway neeni oottiyobaa haratuugaara geeddarssennaagaanne neeni A siiqiyo siiquwa eriyogaa hassaya. A alꞌꞌo imota gidida wozuwa neeni wozanappe nashshiyogaa I beꞌiyo wode keehi ufayttees.—1 Sam. 16:7; Mar. 12:41-44.

18. Xoossaa Yihoowanne Yesuus Kiristtoosa nuuni nashshiyoy aybissee?

¹⁸ Wozuwappe denddidaagan nu nagaray atto geetettiis, Yihoowara dabbotidanne merinawu deꞌiyo hidootaa demmida. Ha anjjota nuussi immanaadan denttettida Yihoowa siiquwa ubbatoo nashshiyageeta gidoos. (1 Yoh. 4:19) Nuna keehi siiqidi ba deꞌuwa nu gishshawu immida Yesuusakka nashshiyageeta gidoos!—Yoh. 15:13.