XANNAꞌIYO HUUPHE YOHUWA 4
MAZAMURE 18 Wozuwaa Gishshawu Galatiyoogaa
Wozuwappe Nuuni Ay Tamaariyoo?
“Xoossai nuna ba siiquwaa hagan bessiis.”—1 YOH. 4:9.
TAMAARANABAA
Yihoowaynne Yesuusi bessido ufayssiya eeshshata wozoy waati qonccissiyakko nuuni tamaarana.
1. Nuuni layttan layttan Yesuusa hayquwa Hassayiyo Baalaa bonchchiyogee nuna waati maaddii?
WOZOY alꞌꞌo imota gidiyogaa neeni maayettiyogee qoncce! (2 Qor. 9:15) Yesuusi ba deꞌuwa aatti immido gishshawu neeni Yihoowara dabbotana danddayaasa. Qassi neeni merinawu deꞌanawu hidootana danddayaasa. Wozuwa giigissida Yihooway nuna keehi siiqiyo gishshawu, nuuni A galatanaadan oottiya daro gaasoy deꞌees! (Roo. 5:8) Nuuni ubbatoo nashshanaadaaninne Yihoowaynne Yesuusi nuuyyo oottidobaa nuuni mule dogennaadan layttan layttan Yesuusa hayquwa Hassayiyo Baalaa bonchchanaadan I nuna azaziis.—Luq. 22:19, 20.
2. Nuuni ha huuphe yohuwan ay beꞌanee?
2 Ha laytti, Hassayuwa Baalay Qeeraa, Hosppune 12, 2025n bonchchettees. Nuuni ubbaykka he baalaa bonchchanawu halchchiyogee tuma. Hassayuwa Baalay bonchchettanaappe kasenne bonchchetti simmin deꞌiya saaminttatun nuuni wodiya bazzidi Yihoowaynne Yesuusi nuussi oottidobaa wotti dentti qoppiyogee a nuna loytti maaddana. Yihoowanne A Naꞌaa xeelliyagan nuuni wozuwappe tamaariyobaa ha huuphe yohuwan beꞌana. Wozoy nuna waati maaddana danddayiyakko, qassi nuuni hegaa nashshiyogaa waati bessana danddayiyakko akeekanaadan kaalliya huuphe yohoy nuna maaddana.
WOZUWAPPE YIHOOWABAA AY TAMAARIYOO?
3. Issi asa hayqoy daro miiloone asaa nagaraappenne hayquwappe waati laꞌa kessana danddayii? (Misiliyakka xeella.)
3 Wozoy Yihooway suure pirddiya Xoossaa gidiyogaa bessees. (Zaa. 32:4) Addaamee Xoossawu azazettibeenna gishshawu nagaranchcha gidiisinne hayqqiis. Nuuni A naata gidiyo gishshawu, nagaraanne hayquwa laattida. (Roo. 5:12) Yihooway nuna nagaraappenne hayquwappe laꞌa kessanawu, wozo yarshsho gidanaadan Yesuusa kiittiis. Shin wottiyobi baynna issi asa hayqoy daro miiloone asaa nagaraappenne hayquwappe waati laꞌa kessana danddayii? Kiitettida Phawuloosi hagaadan giis: “Issi asi [Addaame] azazettibeenna gishshawu daroti nagaranchcha gididoogaadan, hegaadankka issi asi [Yesuusi] azazettido gishshawu daroti xillo gidana.” (Roo. 5:19; 1 Xim. 2:6) Hegaa gishshawu, wottiyobi baynna issi asi Xoossawu azazettennan aggido gishshawu, asa ubbay nagaraanne hayquwa laattidoogaa Phawuloosi yootiis. Yaaniyo gishshawu, nagaraappenne hayquwappe laꞌa kiyanawu wottiyobi baynna issi asi Xoossawu azazettana koshshiis.
Addaame gaasuwan nuuni ubbay nagarawunne hayquwawu aylle gidida. Shin Yesuusa baggaara nagaraanne hayquwa aylletettaappe laꞌa kiyana danddayoos (Mentto 3 xeella)
4. Yihooway Addaame naatuppe bawu azazettiyageeti merinawu deꞌanaadan oottibeennay aybissee?
4 Yesuusi nu gishshawu hayqqidoogee tumuppe koshshiyabee? Yihooway Addaame naatuppe bawu azazettiyageeti merinawu deꞌanaadan oottibeennay aybissee? Yaatiyogee metuwa giigissanawu loꞌꞌo oge giidi nagaranchcha asay qoppana danddayees. Shin Yihoowa qofan yaatiyogee suure pirdda gidenna. Ayssi giikko hegee Addaamee gita nagaraa mule oottibeenna, qassi A naatikka nagaranchcha gidokkona giyogaa mala gidana danddayees. Shin hanotay hegaadaana gidenna.
5. Yihooway ubbatoo likkebaa oottanaagaa nuuni ammanettana danddayiyoy aybissee?
5 Qassi Yihooway wozuwa giigissennan, nagaranchcha gidida Addaame naati merinawu deꞌanaadan paqqadiyogan suure gidennabaa oottiyakko shin? Asay hara allaalletunkka I ba kessido maarata xaasayi xeellana giidi hirggana danddayees. Qassi Yihooway qaalaa gelido ubbabaa polennan agganeeshsha giidi asay qoppana danddayees. Nuuni hegee hanees giidi hirggana koshshenna. Yihooway suurebaa oottanawu ba siiqiyo Naꞌaa yarshshiyogan gita waagaa qanxxido gishshawu I ubbatoo likkebaa oottanaagaa ammanettana danddayoos.
6. Yihooway ba Naꞌaa kiittanaadan denttettida hara eeshshay aybee? (1 Yohaannisa 4:9, 10)
6 Yesuusi nu gishshawu hayqqanaadan Yihooway kiittanaadan denttettida hara waannatiya eeshshay I nuna siiqiyo siiquwa. (Yoh. 3:16; 1 Yohaannisa 4:9, 10 nabbaba.) Yihooway nuuni merinawu deꞌanaadan xalla gidennan, A soo asa gidanaadankka koyiyogaa wozuwappe akeekoos. Ane hagaa qoppa: Addaamee nagaraa oottido wode Yihooway bawu goynniya ba soo asaa giddoppe A kessiis. Nuuni ubbaykka yelettiyo wode Xoossaa so asa gidokko. Shin wozoy qanxxettido gishshawu Xoossaa ammaniyanne awu azazettiya ubbay guyyeppe A soo asa gidana danddayees. Gidoppe attin, ha wodiyankka Yihoowa maarotaa demmana danddayoos; qassi aaranne nu ishanttuuranne michchonttuura loytti dabbotana danddayoos. Yihooway nuna keehi siiqees!—Roo. 5:10, 11.
7. Yesuusi waayettidoogee Yihooway nuna keehi siiqiyogaa nuuni akeekanaadan waati maaddii?
7 Yihooway ba Naꞌay keehi waayettiyogaa beꞌidi ay keena seelettidaakko qoppiyogee I nuna loytti siiqiyogaa nuuni akeekanaadan maaddees. Xoossaa ashkkaratuppe ooninne ammanettidi deꞌanawu metootiyo wodiyan ammanettenna giidi Seexaanay yootees. Yihooway Seexaanay giidobay worddo gidiyogaa bessanawu Yesuusi waayettidi hayqqanaadan paqqadiis. (Iyy. 2:1-5; 1 PHe. 2:21) Asay Yesuusa bolli qilliicciyogaanne wotaaddarati A shocidi mittaa bolli misimaariyan xishiyogaa Yihooway beꞌiis. Qassi Yihooway ba siiqiyo Naꞌay waayettidi hayqqiyogaakka beꞌiis. (Mat. 27:28-31, 39) Yihooway ha ubbabay hanennaadan diggana danddayiiddi aggiis. Leemisuwawu, asay “Xoossay A maaddanawu koyikko, ane haꞌꞌi A ashsho” yaagido wode Yihooway eti giidoogaa oottana danddayees shin. (Mat. 27:42, 43) I yaatiyakko Yesuusi wozuwa qanxxana danddayenna; qassi nuuyyokka hidootay deꞌana danddayenna. Hegaa gishshawu, Yihooway ba Naꞌay hayqqana gakkanaashin waayettanaadan eeno giis.
8. Yihooway ba Naꞌay waayettiyogaa beꞌidi unꞌꞌettidoogaa nuuni ammanettana danddayiyoy aybissee? (Misiliyakka xeella.)
8 Yihooway ba Naꞌay waayettiyogaa beꞌidi kelttiya gelennan aggidoogee awu aybinne siyettibeenna giyogee? Chii. Issi hanotaa xeelliyagan nuussi siyettiyabay deꞌanaadan oottidi I nuna medhdhiis. Qassi I nuna ba leemisuwan medhdhido gishshawu ayyokka siyettiyabay deꞌees giyogaa. Geeshsha Maxaafay I ‘lanccidoogaanne hanqqettidoogaa’ woy azzanidoogaa yootees. (Maz. 78:40, 41) Hegaa gishshawu Yihooway ba Naꞌay waayettiyogaa beꞌidi ay keena azzanidee? Abrahaamanne Yisaaqa taarikiya qoppa. Abrahaami ba mexi issi naꞌaa yarshshanaadan Yihooway azazidoogaa neeni hassayaasa. (Doo. 22:9-12; Ibr. 11:17-19) Abrahaami ba naꞌaa gooraꞌana haniiddi ay keena azzanidaakkonne unꞌꞌettidaakko qoppa. Asay Yesuusa tuggayidi woriyogaa Yihooway beꞌiyo wode ay keena azzanidaakkonne unꞌꞌettidaakko qoppa!—Etaagaadan Ammanite—Abrahaama, Shaaho 2 giya biiduwa jw.org saytiyan beꞌa.
Yihooway ba Naꞌay waayettiyogaa beꞌidi seelettiis (Mentto 8 xeella)
9. Yihooway nena siiqiyo siiquwabaa Roome 8:32, 38, 39ppe ay tamaaray?
9 Yihoowagaadan ooninne, haray atto nu mata dabbo woy lagge gidinkka nuna siiqana danddayennaagaa wozoy qonccissees. (Roome 8:32, 38, 39 nabbaba.) Nuuni nuna siiqiyogaappekka aaruwan Yihooway nuna siiqiyogee qoncce. Merinawu deꞌana koyay? Neeni merinawu deꞌanaadan neegaappe aaruwan Yihooway koyees. Ne nagaray atto geetettanaadan koyay? Ne nagaray atto geetettanaadan neegaappe aaruwan Yihooway koyees. Nuuni an ammaniyogaaninne awu azazettiyogan he alꞌꞌo imotaa nashshiyogaa bessanaadan I koyees. Wozoy Yihooway nuna keehi siiqiyogaa bessiya alꞌꞌo imota. Qassi Yihooway nuna siiqido gishshawu oottido hara darobata ooratta alamiyan tamaarana.—Era. 3:11.
WOZOY YESUUSABAA AY TAMAARISSII?
10. (a) Yesuusi ba hayquwa xeelliyagan keehi unꞌꞌettidoy aybissee? (b) Yesuusa hayqoy aybi qonccanaadan oottidee? (“ Yesuusi Ammanettidoogee Yihoowa Sunttay Geeyanaadan Oottiis” giya saaxiniyakka xeella.)
10 Yesuusa A Aawaa sunttaa geeshshatettay keehi qofissees. (Yoh. 14:31) Yesuusi Xoossaa cayiisinne danobaa oottiis yaagidi asay A woranaagee A Aawaabaa harati iitabaa qoppanaadan oottana giidi keehi unꞌꞌettiis. Yesuusi, “Ta Aawawu, danddayettikko ha wanccaa taappe digga” yaagidi woossidoy hegaassa. (Mat. 26:39) Yesuusi hayqqana gakkanaassi Yihoowawu ammanettiyogan Seexaanay A Aawaa xeelliyagan yootido ubbabay worddo gidiyogaa bessiis.
11. Yesuusi asaa loytti siiqiyogaa waati bessidee? (Yohaannisa 13:1)
11 Wozoy Yesuusi asawu qoppiyogaa, ubbaappe aaruwan bana kaalliyageetussi qoppiyogaa qonccissees. (Lee. 8:31; Yohaannisa 13:1 nabbaba.) Leemisuwawu, Yesuusi saꞌan oottana koshshiya amaridabati keehi deexxanaagaa, ubba I waayetti hayqqanaagaa eriis. Shin Yesuusi deexxiya he ubbabaa oottidoy Yihooway A kiittido gishsha xallawu gidennan, asaa keehi siiqiyo gishshataassa. Yesuusi ba kumetta wozanan haratuyyo sabbakiis, eta tamaarissiisinne eta maaddiis. Yesuusi hayqqanaappe kasetiya qammankka wodiya bazzidi ba kiittidoogeetu tohuwa meecciis, eta tamaarissiis, minttettiisinne etawu kaaletuwa yootiis. (Yoh. 13:12-15) Yesuusi mittaa bolli kaqettido wodiyankka, hayqqana haniya panggawu hidootaa yootiisinne ba aayeessi koshshiyabaa kunttiya ura sunttiis. (Luq. 23:42, 43; Yoh. 19:26, 27) Yaaniyo gishshawu, Yesuusi asaa gishshawu hayqqiyogaa xalaala gidennan, saꞌan deꞌido laytta ubban asaa keehi siiqiyogaa bessiis.
12. Yesuusi haꞌꞌi nuuyyo ay oottiiddi deꞌii?
12 Yesuusi “haranttuwa hayqqana koshshennan issitoo xallaa” hayqqidaba gidikkonne I haꞌꞌikka nuuyyo darobaa oottiiddi deꞌees. (Roo. 6:10) I nuussi ay oottiiddi deꞌii? Wozuwa baggaara nuuni ha wodiyan daro loꞌꞌobaa demmanaadan oottiiddi deꞌees. I oottiyo darobata qoppa. I nuussi Kawo, Gita Kahinenne galchchaa huuphe gididi oottiiddi deꞌees. (1 Qor. 15:25; Efi. 5:23; Ibr. 2:17) Gita waayee wuranaappe kase tiyettidaageetanne zawi baynna asaa shiishshiyo aawatettay awu imettiis. b (Mat. 25:32; Mar. 13:27) Ha wurssetta gallassatun ammanettida aylliya baggaara nuuni Yihoowawu ammanettidi haggaazanaadan koshshiyabatakka I nuussi immees. (Mat. 24:45) Qassi I ba Shaꞌu Layttaa Haaruwa wodekka nu gishshawu oottiyogaa aggenna. Yihooway ba Naꞌaa nuussi immidoy I nu gishshawu hayqqanaadan xalaala gidennan, hegaappe aadhdhiya darobata nuuyyo oottanaadaana!
TAMAARIYOGAA MULE AGGOPPA
13. Xoossaynne Kiristtoosi nuna siiqiyo siiquwabaa ubbatoo waana tamaarana danddayay?
13 Xoossaa Yihoowaynne Yesuus Kiristtoosi nuussi oottidobaa neeni ubbatoo wotta dentta qoppikko, eti nuna siiqiyo siiquwabaa aggennan tamaarana danddayaasa. Ha laytti Hassayuwa Baalay bonchchettanaappe kasenne bonchchetti simmin deꞌiya saaminttatun Wonggeletuppe issuwa woy hegaappe daruwa loytta nabbabana danddayaasa. Neeni issi kutti daro shemppota nabbabanawu baaxetoppa. Yaatiyogaappe, takki gaada nuuni Yihoowanne Yesuusa siiqana koshshiyo hara gaasota koya. Qassi ne eridobaa demmido injje ubban haratussi yoota.
14. Pilggiyogee wozuwabaanne harabata aggennan tamaaranaadan nuna waati maaddii? (Mazamure 119:97) (Misiliyakka xeella.)
14 Neeni tumaa keettan daro layttaa takkidaba gidikko, Xoossaa suure pirddaa, A siiquwanne wozuwa xeelliyagan tamaariyo oorattabay deꞌiishshaa gaada qoppana danddayaasa. Shin hegeeta xeelliyagan nuuni tamaariyo oorattabay ubbatookka deꞌiyogee qoncce. Yaatin neeni waatana danddayay? Nu xuufetun deꞌiya Geeshsha Maxaafay yootiyo maalaalissiya qofata nabbabanne xannaꞌa. Neeni Geeshsha Maxaafaa xannaꞌaydda issibaa loytta akeekana xayikko hegaabaa loytta pilgga. Yaatada Yihoowa, A Naꞌaanne eti nena siiqiyo siiquwa xeelliyagan neeni xannaꞌidobaanne eridobaa kumetta gallassan wotta dentta qoppa.—Mazamure 119:97 nabbaba.
Nuuni tumaa keettan daro layttaa takkidaba gidikkokka, wozuwa loytti nashshanaadan oottiya oorattabata haꞌꞌikka tamaarana danddayoos (Mentto 14 xeella)
15. Nuuni Geeshsha Maxaafaappe oorattabaa demmanawu aggennan baaxetana koshshiyoy aybissee?
15 Neeni Geeshsha Maxaafaa nabbabiyo woy xannaꞌiyo wode ubban oorattabaa woy ufayssiyabaa demmana xayikko hidootaa qanxxoppa. Neeni worqqaa demmanawu baaxetiya ura mala. Worqqaa koyiya issi uri guuttaa demmanawukka daro saatiya woy gallassaa wurssana danddayees. Shin qii guutta worqqaykka alꞌꞌo gidiyo gishshawu I hidootaa qanxxennan danddayan koyees. Nuuni Geeshsha Maxaafaappe tamaariyo oorattabay ubbay worqqaappe keehi alꞌꞌo! (Maz. 119:127; Lee. 8:10) Yaatiyo gishshawu Geeshsha Maxaafaa nabbabiyogaanne oorattabaa demmanawu koyiyogaa aggoppa.—Maz. 1:2.
16. Yihoowanne Yesuusa waani milatana danddayiyoo?
16 Neeni xannaꞌiyo wode, eridobata waata oosuwan peeshshana danddayiyakko qoppa. Leemisuwawu, neeni asa ubbaa issi ayfiyan xeelliyogan suure pirddiya Yihoowa milata. Keehi waayissiya wodetunkka Yihooway koyiyobaa oottanawunne harata maaddanawu eeno giyogan ba Aawaanne harata siiqiya Yesuusa leemisuwa kaalla. Qassi alꞌꞌo gidida Yihoowa imotaa haratikka eriyo injjiya demmanaadan sabbakiyogan Yesuusa leemisuwa kaalla.
17. Kaalliya huuphe yohuwan nuuni ay beꞌanee?
17 Nuuni wozuwabaa aggennan tamaariyo wode Yihoowanne A Naꞌaa kaseegaappe aaruwan siiqana. Qassi etikka nuna loytti siiqana. (Yoh. 14:21; Yaaq. 4:8) Simi yaakko, Geeshsha Maxaafaanne nu dirijjitee giigissiyo xuufeta goꞌettiyogan wozuwabaa aggennan tamaariyageeta gidoos. Yesuusi nu gishshawu hayqqidoogan nuuni demmido anjjotubaanne Yihoowa siiquwa nashshiyogaa bessanawu nuuni oottana danddayiyobata kaalliya huuphe yohuwan beꞌana.
MAZAMURE 107 Xoossaagaadan Siiqiyoogaa
a QONCCISSIDO QAALAA: “Wotti dentti qoppiyogaa” giyogee issi allaalliyabaa yuushshi qoppiyogaanne hegaabaa loytti akeekiyogaa qonccissees.
b Phawuloosi Efisoona 1:10n ‘saluwan deꞌiyabati’ shiiqanaagaa yootidobay Yesuusi Maatiyosa 24:31ninne Marqqoosa 13:27n ‘doorettidaageeti’ shiiqanaagaa yootidobaappe dummatees. Yihooway Yesuusaara haaranaageeta geeshsha ayyaanan tiyiyogan dooriyo wodiyabaa Phawuloosi yootiis. Tiyettidaageetuppe saꞌan attidaageeti gita waayiya wode saluwan shiiqana wodiyabaa Yesuusi yootiis.
