1. Ha wodiyan daroti aybin xeelaa wottiyonaa?

 HA WODIYAN daroti haratuyyo qoppiyogaappe aaruwan banttawu qoppiyogaa neeni akeekadii? Leemisuwawu, amaridaageeti banttanaaninne bantta oottidoban ceeqettiyogaa bessanawu sooshal miidiyan goꞌettoosona. Shin hara amaridaageeti Xoossaa Yihoowa bonchchanawu koyosona. Ha huuphe yohuwan, Yihoowa bonchchiyogaa giyogee woygiyogaakko, qassi nuuni yaatana koshshiyoy aybissakko beꞌana. Nuuni Xoossaa awu bessiyagadan waati bonchchana danddayiyakko, qassi mata wodiyan I ba sunttaa waati bonchchissanaakkokka beꞌana.

YIHOOWA BONCHCHIYOGAA GIYOGEE WOYGIYOGEE?

2. Yihooway Siinaa Deriyan ba bonchchuwa waati qonccissidee? (Misiliyakka xeella.)

² Bonchchoy aybee? Geeshsha Maxaafan “bonchchuwa” giya qaalay issi izaawu sabettanaadan oottiyabaa qonccissana danddayees. Israaꞌeelati Gibxxe aylletettaappe kiyidi daro takkennan, Yihooway malaalissiya ogiyan ba bonchchuwa bessiis. Ane hagaa qoppa: Daro miiloone Israaꞌeelati Xoossay yootiyobaa siyanawu Siinaa Deriya achchan shiiqidosona. Sikkida shaaray deriya maayiis. Sohuwara deree cuwan kamettiis, biittay keehi qaaxxiis, wolqqanttay wolqqammiis, daday guummiis, qassi wolqqaama malkkataa cenggurssay siyettiis. (Kes. 19:16-18; 24:17; Maz. 68:8) Yihooway  ba bonchchuwa qonccissido wode hegan shiiqida Israaꞌeelati ay keena maalaalettidaakko qoppa.

3. Yihoowa waati bonchchana danddayiyoo?

³ Nuuni shin, Yihoowa bonchchana danddayiyoo? Ee, danddayoos. Nuuni maalaalissiya A wolqqaabaanne ufayssiya A eeshshatubaa haratuyyo yootiyogee Yihoowa bonchchana danddayiyo issi oge. Nu oottido ubbaban Yihooway sabettanaadan oottiyogankka A bonchchana danddayoos. (Isi. 26:12) Kawuwa Daawiti Yihoowa bonchchiyogan nuuyyo keehi loꞌꞌo leemiso. Israaꞌeelatu yaaꞌaa sinttan Daawiti hagaadan yaagidi Xoossaa woossiis: “Abeet GODAU, saluwaaninne sa7an de7iya ubbabai nebaa! Gitatettai, wolqqai, bonchchoi, xoonoinne anggai nebaa!” Daawiti woossiyogaa wurssi simmin, ‘yaaꞌida ubbay Yihoowa galatiis.’—1 Odi. 29:11, 20.

4. Yesuusi Yihoowa waati bonchchidee?

⁴ Yesuusi saꞌan deꞌiyo wode, malaalissiya ba ooso ubbawu Pulttoy Yihoowa gidiyogaa yootiyogan ba Aawaa bonchchiis. (Mar. 5:18-20) Yesuusi ba Aawaabaa haasayidobaaninne harata oyqqido ogiyankka Yihoowa bonchchissiis. Issi wode, Yesuusi shiiqo keettan tamaarissishin, hegaa siyiya asatu giddon iita ayyaanay oyqqin 18 layttawu harggida issi maccaasiya deꞌawusu. He iita ayyaanay O quunissido gishshawu A mule sitti gaana danddayukku. Hegee keehi azzanttiyaba! Yesuusi he maccaaseessi qarettidi ikko shiiqidi keha qaalan iyyo, “Maccaasee ne harggiyappe paxadasa” yaagiis. Qassi I ba kushiya maccaasee bolli wottin A sohuwara sitti gaada “Xoossaa sabbiyogaa doommaasu.” A ba harggiyappe paxido gishshawu Yihoowa keehi galataasu! (Luq. 13:10-13) He maccaasiya Yihoowa bonchchidoogaadan, nuunikka Yihoowa bonchchiyo loꞌꞌo gaasoy deꞌees.

NUUNI YIHOOWA BOCHCHANA KOSHSHIYOY AYBISSEE?

5. Nuuni Yihoowa bonchchana koshshiyoy aybissee?

⁵ Yihooway malaalissiya Xoossaa gidiyo gishshawu A bonchchoos. Yihooway ubbaa danddayiyagaa; A wolqqawu zawi baawa. (Maz. 96:4-7) A gita hayyoy I oottidobatun qoncci beettees. I nu deꞌuwawu Pultto, qassi nu deꞌuwawu koshshiyabaa kunttiyay A. (Ajj. 4:11) I ammanettiyagaa. (2 Sam. 22:26) Ubbabay awu hanees; I ba gelido qaalaa naagees. (Yaa. 23:14) Xoossay erissidobaa yootiya Ermmaasi, “aadhdhida eranchcha asaa giddooninne eta kawotettaa ubbaa giddon ne mali baawa” yaagidoy hegaassa. (Erm. 10:6, 7) Nuunikka saluwan deꞌiya nu Aawaa bonchchiyo loꞌꞌo gaasoy deꞌees. Shin nuuni Yihoowa bochchiyogaa xalla gidennan, A siiqoos. Nuuni A wozanappe siiqanaadan oottiya loꞌꞌo eeshshati awu deꞌoosona.

6. Nuuni Yihoowa siiqiyoy aybissee?

⁶ Nuuni Yihoowa wozanappe siiqiyo gishshawu A bonchchoos. Nuuni Yihoowa siiqanaadan oottiya unddenna A eeshshata beꞌa. I maariyagaanne qarettiyagaa. (Maz. 103:13; Isi. 49:15) I nuuyyo qoppees; nuuni azzaniyo wode ikka azzanees. (Zak. 2:8) Nuuni akko shiiqanaadaaninne aara dabbotanaadan nuna maaddees. (Maz. 25:14; Oos. 17:27) I bana ziqqi oottiyagaa gidiyo gishshawu, “salotanne sa7aa xeellanau duge hokkees. I hiyyeesaa buhiyaappe xoqqu oottees.” (Maz. 113:6, 7) Ha ubba gaasotuppe denddidaagan, nu gita Xoossaa nuuni bonchchanawu koyiyogee bessiyaba.—Maz. 86:12.

7. Nuuyyo deꞌiya loꞌꞌo injjee aybee?

⁷ Nuuni harati Yihoowabaa eranaadan koyiyo gishshawu A bonchchoos. Daroti Yihoowabaa tumaa erokkona. Aybissi? Seexaanay Yihoowabaa iita oduwa aassiyogan eta  kahaa dammissido gishshataassa. (2 Qor. 4:4) Yihooway hanqqettiyagaa, nuussi qoppennaagaa, qassi ha alamiyan metuwa gattiyagaa giidi asay ammananaadan Seexaanay oottiis. Shin nuuni nu Xoossaabaa tumaa eroos! Nuuni Xoossaabaa haratussi yootiyonne etikka A sabbanaadan maaddiyo injjee nuussi deꞌees. (Isi. 43:10) Mazamure 96y Yihoowa bonchchiyogaabaa yootees. Nuuni bessiyagaadan A waati bonchchana danddayiyakko ha mazamuriyappe beꞌana.

NUUNI YIHOOWA AWU BESSIYAGAADAN WAATI BONCHCHANA DANDDAYIYOO?

8. Nuuni Yihoowa sabbana danddayiyo issi ogee awugee? (Mazamure 96:1-3)

⁸ Mazamure 96:1-3 nabbaba. Nuuni Yihoowabaa haasayiyogan A bonchchana danddayoos. Ha paydoti Yihoowa asay ‘Godaassi yexxanaadan, A sunttaa sabbanaadan, I ashshiyo mishiraachchuwa yootanaadaaninne Kawotettaa giddon A bonchchuwabaa awaajjanaadan’ yootoosona. Ha ubba ogetun saluwan deꞌiya nu Aawaa bonchchana danddayoos. Beni deꞌida Yihoowa ashkkarati ubbay ufayssiya A eeshshatanne I etawu oottido loꞌꞌobata ubbaa haratuyyo yootanawu mammottibookkona. (Dane. 3:16-18; Oos. 4:29) Nuuni eta leemisuwa waati kaallana danddayiyoo?

9-10. Anjjeleena oottidobaappe ay tamaaray? (Misiliyakka xeella.)

⁹ Amarkkan deꞌiya Anjjeleeno a giyo michchee hanotaa beꞌa. A oottiyo dirijjitiyan Yihoowa sunttawu xalatettan exataasu. A yan oosuwa doommido wode iigaadan yan oosuwa doommida haratuura issi shiiquwa shiiqanaadan shoobettaasu; he shiiquwan ubbaykka banttabaa haratuyyo yootoosona. A Yihoowa Markka gidiyogan demmido ufayssiya deꞌuwa qonccissiya pootota bessanawu halchchaasu. Shin A haasayiyo kayay gakkanaappe kase, iira oottiya issoy bana dichchidaageeti Yihoowa Markka gidiyogaa yootiis. I nu ammanuwa boriyogaa doommiis. Anjjeleena hagaadan gaasu: “Taani keehi yayyaas. Shin ta wozanan hagaadan gaas: ‘Issi asi Yihoowabaa worddobaa haasayiyo wode taani coꞌꞌu gaana bessiyyee, Yihoowawu exatana bessii?’”

¹⁰ He bitanee ba haasayaa wurssi simmin, Anjjeleena sohuwara ba wozanan woossaasu. Yaatada kehatettan awu hagaadan gaasu: “Ta  diccido hanotaykka neegaara issi mala. Taani naatettaappe doommada hanno gakkanawukka Yihoowa Markka.” Hanotay unꞌꞌissiyaba gidikkonne Anjjeleena woppu gaasu. A ba laggetuura Yihoowassi ufayssan haggaaziyogaa qonccissiya pootota banaara oottiyageetussi bessaasunne ba ammanuwabaa bonchchuwan yootaasu. (1 PHe. 3:15) Hegee ay demissidee? Anjjeleena haasaya wurssa simmin, he bitanee ba qofaa laammiis. Ubba I naatettan Yihoowa Markkatuura shiiqido wode demmido ufayssiya amaridabata yootiis. Anjjeleena hagaadan gaasu: “Yihoowawu exatiyogee bessiyaba. Abaa tumaa yootiyogee gita maata.” Harati Yihoowa bonchchenna wodekka nuuni A sabbiyonne bonchchiyo gita maatay nuuyyo deꞌees.

11. Asi deꞌido wode ubban Yihoowawu tumuppe goynniyageeti Mazamure 96:8n deꞌiya maaraa waati kaallidonaa?

¹¹ Mazamure 96:8 tohossa qofaappe nabbaba. b Nuuyyo deꞌiyaban Yihoowa bonchchana danddayoos. Yihoowawu tumuppe goynniyageeti ubbatoo A hegaadan bonchchidosona. (Lee. 3:9) Leemisuwawu, Israaꞌeelati Xoossaa garuwa keexxanawunne hegaa bottokonanawu miishshaanne banttawu deꞌiya harabaa immidosona. (2 Kaw. 12:4, 5; 1 Odi. 29:3-9) Yesuusa kaalliya amaridaageeti anne I kiittidoogeeta “banttawu deꞌiyaban” maaddidosona. (Luq. 8:1-3) Koyro xeetu layttan deꞌida Kiristtaanetikka bantta ishanttanne michchontta koshshiyaban maaddidosona. (Oos. 11:27-29) Ha wodiyan nuunikka nu dosan miishshaa immiyogan Yihoowa bonchchana danddayoos.

12. Nuuni kehatettan immiyo miishshay Yihoowa waati bonchchissana danddayii? (Misiliyakka xeella.)

¹² Nuuni miishshaa kehatettan immiyogee Yihooway bonchchettanaadan waati oottiyakko qonccissiya deꞌuwan hanidabaa beꞌa. Zimbbaabuwe biittan 2020n adussa wodiyawu takkida koshay denddiis. Priskko giyo michchiyo gujjin, issi miilooniyappe dariya asaa koshay keehi qohiis. He keehi waayissiya wodiyan Priskka Oruwanne Arbba ubbatoo, haray atto goshsha wodiyankka haggaaziyogaa aggabeykku. A gaden oottiyogaa aggada haggaazuwawu biyogaa beꞌidi I shooroti, “Neeni namisan hayqqana” yaagidi O boridosona. Priskka Yihooway O maaddanaagaa ammanettiyo gishshawu ubbatoo,  “Yihooway ba ashkkarata mule aggenna” yaagada etawu zaaraasu. Daro takkennan, A baassi koshshiyabata Yihoowa dirijjitiyappe demmaasu. Nuuni ubbay kehatettan immido miishshay hegawu maaddiis. Priskki shooroti hegan malaalettidi iyyo hagaadan giidosona: “Xoossay nena mule aggibeenna gishshawu, nuuni abaa tamaaranawu koyoos.” I shoorotuppe laappunati galchchaa shiiqota shiiqiyogaa doommidosona.

13. Nu eeshshan Yihoowa waati bonchchana danddayiyoo? (Mazamure 96:9)

¹³ Mazamure 96:9 nabbaba. Nu eeshshan Yihoowa bonchchana danddayoos. Yihoowa keettan haggaaziya kahineti meecettidi geeyana koshshiis. (Kes. 40:30-32) Nuunikka nu bollaa geeshshatettaa naagiyogaa xalla gidennan, Yihooway ixxiyobaa oottennan aggiyogankka geeshsha gidana koshshees. (Maz. 24:3, 4; 1 PHe. 1:15, 16) Geeshsha gidenna eeshshaanne oosuwa hegeekka, “ceega meretaa” qaaranawunne Yihoowagaadan qoppanawunne oottanawu, hegeekka ‘ooratta meretaa maayanawu’ nuussi danddayettida ubbabaa oottana koshshees. (Qol. 3:9, 10) Shoraa xayidanne makkalanchcha gidida asatikka Yihooway maaddin bantta eeshshaa laammidi ooratta asatettaa maayana danddayoosona.

14. Jaaka hanotaappe neeni ay tamaaray? (Misiliyakka xeella.)

¹⁴ Wolqqaama danuwa oottiya Jaakabaa ane beꞌoos; I Daydanttaa geetettidikka xeesettees. Jaaki oottido danobatuppe denddidaagan hayqqanaadan pirddettiis. Shin Jaaki hayqqana wodiya naagiiddi deꞌishin, qasho keettan harata oychchanawu yiida issi ishay I Geeshsha Maxaafaa xannaꞌanaadan shoobbin, Jaaki Geeshsha Maxaafaa xannaꞌiyogaa doommiis. Jaaki kase daro iitabaa oottikkokka, laamettido gishshawu amarida wodiyappe simmin haattan muukettidi Yihoowa Markka gidiis. Jaaki keehi laamettido gishshawu qasho keettaa naagiya amaridaageeti I hayqqiyo gallassi appe shaahettiiddi yeekkidosona. He qasho keettan oottiya issi wotaaddaray hagaadan giis: “Jaaki kase ha sohuwan qashettida asatu ubbaappe iita. Shin haꞌꞌi ubbaappe kehiyagee A.” Jaaki hayqqin kaalliya saaminttan qasho keettan saaminttan saaminttan shiiqiyo shiiquwa kaalettanawu yaa biida ishantti koyro wodiyawu shiiqida qashuwasa gidida issi uraara gayttidosona. Shiiquwa  shiiqanaadan A denttettidabay aybee? I Jaaki ba eeshshan laamettidoogan garamettidi Yihoowawu goynnanawu oottana koshshiyabaa eranawu koyiis. Nu eeshshay saluwan deꞌiya nu Aaway bonchchettanaadan oottana danddayiyogee qoncce!—1 PHe. 2:12.

MATA WODE YIHOOWAY BA SUNTTAA WAATI BONCHCHISSANEE?

15. Mata wode Yihooway ba sunttaa muleera waati bonchchissanee? (Mazamure 96:10-13)

¹⁵ Mazamure 96:10-13 nabbaba. Yihooway xillo Daananne Kawo gidiyogaa Mazamure 96 wurssetta paydoti qonccissoosona. Yihooway mata wode ba sunttaa waati bonchchissanee? Suurebaa pirddiyogaana. Gita Baabloona A geeshsha sunttay borettanaadan oottido gishshawu, mata wode O xayssana. (Ajj. 17:5, 16; 19:1, 2) Gita Baabilooni xayuwa beꞌiyageetuppe amaridaageeti nunaara tumu goynuwa goynnana danddayoosona. Wurssettan Armmageedoona olan, Yihooway Seexaana alamiya, hegeekka A ixxiyanne abaa worddobaa yootiya ubbaa xayssidi A siiqiya, awu azazettiyanne A bonchchanawu koyiya ubbaa ashshana. (Mar. 8:38; 2 Tas. 1:6-10) Kiristtoosa Shaꞌu Layttaa Haaruwa wurssetta paaciyappe simmin, Yihooway ba sunttaa muleera geeshshana. (Ajj. 20:7-10) He wode, “haattai abbaa kammiyoogaadan, GODAA bonchchuwaa eratettai sa7aa kumana.”—Imb. 2:14.

16. Neeni ay oottanawu murttadii? (Misiliyakka xeella.)

¹⁶ Mereta ubbay Yihoowa A sunttawu bessiyagaadan bonchchiyo wodee keehi ufayssiyagaa gidana! Shin he wodee gakkanaashin nuuni demmido injje ubban nu Xoossay bonchchettanaadan oottana danddayoos. Ha gita aawatettaa nuna hassayissanawu Oosuwa Kaalettiya Citay Mazamure 96:8y, 2025 layttaa xiqise gidanaadan dooriis: “Yihoowa A sunttawu bessiyagaadan bonchchite.”