1-2. Israaꞌeelan kawotida amaridaageetubaa Geeshsha Maxaafay woygii?

 ISRAAꞌEELAN kawo gididi haarida 40​ppe dariya asatubaa Geeshsha Maxaafay yootees. a Qassi etappe amaridaageeti oottidobaa Geeshsha Maxaafay genttennan yootees. Leemisuwawu, loꞌꞌo kawotikka iitabaa oottidosona. Loꞌꞌo kawo gidida Daawitabaa ane beꞌoos. Yihooway hagaadan yaagiis: ‘Ta ashkkaray Daawiti ta sinttan suurebaa xalaalaa oottiiddi, ba kumetta wozanan tana kaalliis.’ (1 Kaw. 14:8) Shin, I asa machcheera zinꞌꞌiisinne I azinaa olan worissanawu maqettiis.—2 Sam. 11:4, 14, 15.

² Shin ammanettibeenna kawotuppe daroti issi issi loꞌꞌobata oottidosona. Robiꞌaamabaa ane beꞌoos. I Yihoowa sinttan “iitabaa oottiis.” (2 Odi. 12:14) Shin, Robiꞌaami ba kawotettaappe tammu Israaꞌeela zerettati shaahettanaadan Xoossay yootido azazuwa azazettiis. Qassi I katamatussi qatota gimbbidoogan asay goꞌettiis.—1 Kaw. 12:21-24; 2 Odi. 11:5-12.

3. Keehi koshshiya issi oyshay aybee, qassi nuuni ha huuphe yohuwan ay beꞌanee?

³ Keehi koshshiya issi oyshaa ane beꞌoos. Israaꞌeela kawoti loꞌꞌobaanne iitabaa oottiyo wode Yihooway issi kawoy ammanettidaagaa woy ammanettennaagaa gaanaadan oottidabay aybee? He oyshaa zaaroy nuuni Yihoowa ufayssanawu oottana koshshiyabaa akeekanaadan maaddees. Yihooway Israaꞌeela kawotubaa  qoriyo wode loytti xeelliyo heezzubata beꞌana: eta wozanaa hanotaa, eti bantta nagaran zilꞌꞌettidi laamettidoogaanne eti tumu goynuwa mintti kaalliyogaa.

ETI KUMETTA WOZANAN YIHOOWA SIIQIDOSONA

4. Ammanettida kawotanne ammanettibeenna kawota dummayiyabay aybee?

⁴ Yihoowa ufayssida kawoti kumetta wozanan b awu goynnidosona. Loꞌꞌo Kawoy Yoosaafixi ‘ba kumetta wozanan Yihoowa koyiis.’ (2 Odi. 22:9) Geeshsha Maxaafay Yoosiyasabaa hagaadan gees: “Ba kumetta wozanan . . . GODAAKKO simmidaban Yoosiyaasa mala, kawoi, appe kase . . . mulekka denddibeenna.” (2 Kaw. 23:25) Cimatettaa wodiyan iitabaa oottida Solomoni shin? ‘I kumetta wozanaappe ba Xoossaa siiqibeenna.’ (1 Kaw. 11:4) Qassi ammanettibeenna kawuwa Abiiyabaa Geeshsha Maxaafay hagaadan gees: ‘A wozanay ba Xoossaayyo polo gidibeenna.’—1 Kaw. 15:3.

5. Kumetta wozanan Yihoowawu haggaaziyogaa giyogee woygiyogaakko qonccissa.

⁵ Yaatin kumetta wozanan Yihoowawu haggaaziyogaa giyogee woygiyogee? Kumetta wozanan Yihoowawu haggaaziya uri Xoossawu goynnana koshshiyogaa I eriyo gishsha xalaalawu hegaadan oottenna. Shin I Yihoowa wozanappe siiqiyonne bonchchiyo gishshawu awu haggaazees. Qassi I ba deꞌo laytta ubban Yihoowa wozanappe siiqiyogaanne bonchchiyogaa aggenna.

6. Nuuni Yihoowa nu kumetta wozanan siiqanawu waatana danddayiyoo? (Leemiso 4:23; Maatiyosa 5:29, 30)

⁶ Yihoowa kumetta wozanan siiqida ammanettida kawotu leemisuwa nuuni waati kaallana danddayiyoo? Nuuni Yihoowawu ammanettennaadan oottana danddayiya aybippenne naagettana koshshees. Leemisuwawu nuuni allaxxiyo wode beꞌiyoban woy oottiyoban naagettana koshshees. Qassi nuuni duretiyogee nu deꞌuwan keehi koshshiyaba giidi qoppennaadan akeekanchchanne loꞌꞌo laggeta dooriyageeta gidana koshshees. Nuuni Yihoowa siiqiyo siiqoy irxxanaadan oottiyabaa akeekikko, hegee nuuni Yihoowa siiqiyogaa agganaadan oottenna mala nu qoppiyobaanne oottiyobaa sohuwara laammanawu baaxetana koshshees.—Leemiso 4:23; Maatiyosa 5:29, 30 nabbaba.

7. Nuuni Yihoowa siiqiyo siiqoy irxxanaadan oottiya aybippenne naagettana koshshiyoy aybissee?

⁷ Nuuni nu wozanay shaahettanaadan oottana koshshenna. Nuuni naagettana xayikko, Yihoowawu minnidi haggaaziyo gishshawu iita qofay nuna qohenna giidi qoppana danddayoos. Leemisuwawu, neeni ne keettaa geeshshada penggiya dooya wottin buhee soo geliyogaa qoppa. Hegaa nuuni Yihoowara dabbotido dabbotaara geeddarssana danddayoos. Nuuni Yihoowakko kaseegaappe aaruwan shiiqanawu loꞌꞌobaa oottiyogaape aarobay koshshees. Nuuni buhee nu soo gelanaadan koyennaagaadan, Yihoowa siiqiyo siiqoy irxxanaadan oottiya aybinne nu wozanan gelennaadan naagettana koshshees.—Efi. 2:2.

ETI BANTTA NAGARAN ZILꞌꞌETTIDI LAAMETTIDOSONA

8-9. Kawuwa Daawitinne Kawuwa Hizqqiyasi etawu seeray imettido wode waatidonaa? (Misiliya xeella.)

⁸ Qommoora qonccidaagaadan Kawuwa Daawiti gita nagaraa oottiis. Shin Daawiti oottidoban Yihoowawu aybi siyettidaakko Xoossay erissidobaa yootiya Naataani ayyo odido wode I bana ziqqi oottidi ba nagaran zilꞌꞌettidi laamettiis. (2 Sam. 12:13) Daawiti zilꞌꞌettidoy  Naataana cimmanawu woy qixaatiyappe attanawu gidenna. I tumuppe zilꞌꞌettidi laamettiis. Daawiti Mazamure 51n yootidobay I ba oottidoban tumuppe zilꞌꞌettidi laamettidoogaa bessees.—Maz. 51:3, 4, 17, huuphessa qofaa.

⁹ Kawuwa Hizqqiyasikka Yihoowa bolli nagaraa oottiis. Geeshsha Maxaafay abaa hagaadan gees: “Hizqqiyaasi otorettido gishshau, . . . a bolli, Yihudaa bollinne Yerusalaame bolli GODAA hanqqoi wodhdhiis.” (2 Odi. 32:25) Hizqqiyasi otorettidoy aybissee? Yihooway A dureyido gishshawu, Asooreta I xoonanaadan maaddido gishshawu, woy woriya harggiyappe A pattido gishshawu gidana danddayees. I ba duretettaa ubbaa Baabilooneta bessidoy otorettido gishshataassa gidennan aggenna. Yihooway A bolli hanqqettidoogaa Xoossay erissidobaa yootiya Isiyasi awu odiis. (2 Kaw. 20:12-18) Yaatin Hizqqiyasi Daawitaagaadan, bana ziqqi oottidi zilꞌꞌetti laamettiis. (2 Odi. 32:26) Hegaappe denddidaagan, Yihooway Hizqqiyasa waati xeellidee? ‘Suurebaa oottida’ ammanettida kawodan A xeelliis.—2 Kaw. 18:3.

10. Seeray imettido wode Kawuwa Amesiyasi waatidee?

¹⁰ Daawitappenne Hizqqiyasappe dumma hanotan, Yihudaa Kawoy Amesiyasi “suurebaa oottiis; shin kumetta wozanaappe gidenna.” (2 Odi. 25:2) I oottido balabay aybee? Amesiyasi Eedoomata xoonanaadan Yihooway A maaddi simmin I eta xoossatuyyo goynniis. c Guyyeppe, Xoossay erissidobaa yootiyagee seerido wode, kawoy I yootiyobaa siyennan ixxidi I baanaadan oottiis.—2 Odi. 25:14-16.

11. Naaꞌꞌantto Qoronttoosa 7:9, 11 yootiyogaadan, Yihooway nuussi atto gaanaadan nuuni waatana koshshii? (Misiliyakka xeella.)

¹¹ Nuuni ha taariketuppe ay tamaariyoo? Nuuni nu nagaran zilꞌꞌettidi laamettananne hegaa zaarettidi oottennaadan naagettanawu nuussi danddayettida keenaa baaxetana koshshees. Guutta milatiya allaalletun galchchaa cimati nuussi zoriya immikko shin? Yihooway nuna siiqennabadan woy cimati nuna ixxiyabadan nuuni qoppana koshshenna. Israaꞌeelan kawotida loꞌꞌo kawotussikka zoreenne seeray koshshiis. (Ibr. 12:6) Nuuyyo seeray imettiyo wode (1) nuna ziqqi oottidi seeraa ekkana, (2) koshshiyaban laamettana, qassi (3) kumetta wozanan Yihoowawu haggaazana bessees. Nuuni nu nagaran zilꞌꞌettidi laamettikko, Yihooway nuussi atto gaana.—2 Qoronttoosa 7:9, 11 nabbaba.

ETI TUMU GOYNUWA MINTTI KAALLIDOSONA

12. Ammanettida kawota ammanettibeennaageetuppe keehi dummayiyabay aybee?

¹² Yihooway ammanettidaageeta giido kawoti tumu goynuwa mintti kaallidosona. Qassi eti Yihoowa asaykka yaatanaadan minttettidosona. Nuuni qommoora beꞌidoogaadan, eti balabaa oottidoogee qoncce. Shin eti Yihoowa xalaalawu goynnidosonanne he biittaappe eeqaa goynuwa xayssanawu baaxetidosona. d

13. Yihooway Kawuwa Akaaba ammanettibeennaagaa giidoy aybissee?

¹³ Yihooway amarida kawota ammanettibeennaageeta giidoy aybissee? Eti oottidobay ubbay bala gidennaagee tuma. Leemisuwawu, iita Kawoy Akaabi Naabute A gaasuwan hayqqidoogaa siyidi amarida hanotan bana ziqqi oottiisinne azzaniis. (1 Kaw. 21:27-29) Qassi I katamata gimbbiisinne Israaꞌeelatu gishshaa olettidi xooniis. (1 Kaw. 20:21, 29; 22:39) Shin Akaabi A machchiya A denttettin worddo goynuwa  keehi aassiis. I yaatidoogawu ba nagaran zilꞌꞌettidi laamettibeenna.—1 Kaw. 21:25, 26.

14. (a) Yihooway Kawuwa Robiꞌaama ammanettibeenna asadan xeellidoy aybissee? (b) Ammanettibeenna kawotuppe daroti oottido balabay aybee?

¹⁴ Ammanettibeenna hara Kawuwa Robiꞌaamabaa ane beꞌoos. Qommoora beꞌidoogaadan I ba haaro wodiyan daro loꞌꞌobaa oottiis. Shin A kawotettay minnido wode I Yihoowa Higgiyawu azazettiyogaa aggidi worddo xoossatuyyo goynniyogaa doommiis. (2 Odi. 12:1) Hegaappe simmin, I issi issitoo Yihoowayyo goynniis; qassi hara wodetun worddo xoossatuyyo goynniis. (1 Kaw. 14:21-24) Tumu goynuwappe haakkida kawoti Robiꞌaamanne Akaaba xalaala gidokkona. Qassi ammanettibeenna kawotuppe daroti worddo xoossatuyyo goynnidosonanne haratikka yaatanaadan minttettidosona. Tumu goynuwa mintti kaalliyogee Yihoowa sinttan issi kawoy loꞌꞌo woy iita geetettanaadan oottiya waanna gaaso gidiyogee qoncce.

15. Tumu goynuwa mintti kaalliyogaa Yihooway xoqqu ootti xeelliyoy aybissee?

¹⁵ Yihooway goynuwa xoqqu ootti xeelliyoy aybissee? Issi gaasoy Xoossaa asay tumu goynuwa kaallanaadan maaddiyo aawatettay kawotuyyo deꞌiyogaa. Qassi asay worddo xoossatuyyo goynniyogee eti hara iita nagaraa oottanaadaaninne issoy issuwa naaqqanaadan oottiis. (Hoo. 4:1, 2) Hegaa bollikka, Israaꞌeela kawotinne Israaꞌeelati ubbay banttana Yihoowawu sheedhdhidosona. Yaaniyo gishshawu eti Yihoowawu goynniyogaa aggidi worddo xoossatussi goynnidoogee shaaramuxiyogaa mala gidiyogaa Geeshsha Maxaafay yootees. (Erm. 3:8, 9) Shaaramuxiya issi uri ba aqo laggiya woy ba aqo laggee bolli nagaraa oottees. Hegaadankka, bana Yihoowawu sheedhdhida  issi uri Yihoowawu ammanettennan aggiyo wode A keehi azzanttees. e—Zaa. 4:23, 24

16. Yihoowa sinttan xillo asanne nagaranchcha asa shaakki erissiyabay aybee?

¹⁶ Nuuni tamaariyobay aybee? Nuuni worddo goynuwara gayttida ubbabaappe naagettanawu murttidaageeta gidana koshshees. Qassi nuuni tumu goynuwa mintti kaallananne Yihoowawu minni haggaazana koshshees. Xoossay erissidobaa yootiya Milkkiyasi Yihoowa sinttan loꞌꞌo asanne iita asa shaakki erissiyabaa loytti qonccissiis. I hagaadan giis: “He wode intte zaarettidikka xilluwaappenne nagaranchchaappe gidduwan de7iya zawaanne Xoossaassi azazettiyaageetuppenne azazettennaageetuppe gidduwan de7iya zawaa be7ana.” (Mil. 3:18) Nuuni Yihooway nuna xillo asadan xeellanaadan koyoos. Yaaniyo gishshawu aybinne, haray atto nu mooroykka nuuni Yihoowawu haggaaziyogaa agganaadan oottenna mala naagettana koshshees. Yihoowawu haggaaziyogaa aggiyogee gita nagara.

17. Nuuni aqo lagge dooriyo wode akeekanchcha gidana koshshiyoy aybissee?

¹⁷ Neeni aqo oyqqanawu qoppiyaba gidikko Milkkiyasi yootidobay neeni loꞌꞌo aqo lagge dooranaadan maaddana danddayees. Ane hagaa qoppa: Loꞌꞌo eeshshati deꞌiyo issi uri Yihoowawu haggaazennaba gidikko, A woy O xillo asadan Yihooway xeellii? (2 Qor. 6:14) Ne he uraara aqo oyqqikko I woy A neeni Yihoowawu ammanettada deꞌanaadan maaddanee? Hagaa hassaya: Kawuwa Solomoni ekkido eeqawu goynniya maccaasatuyyo amarida loꞌꞌo eeshshati deꞌennan aggokkona. Shin eti Yihoowawu goynnennaageeta gidiyo gishshawu loddan loddan Solomona wozanaa worddo xoossatukko zaaridosona.—1 Kaw. 11:1, 4.

18. Yelidaageeti bantta naata ay tamaarissana koshshii?

 ¹⁸ Yelidaageetoo, intte naati Yihoowawu haggaazanawu loytti koyanaadan maaddanawu Geeshsha Maxaafan odettida kawotu taariketa goꞌettana danddayeta. Yihoowawu goynnidanne asay yaatanaadan minttettida kawoti an sabettidoogaa eti akeekanaadan maaddite. Geeshsha Maxaafaa xannaꞌiyogaa, shiiqota shiiqiyogaanne sabbakiyogaa mala intte Yihoowara dabbotidi deꞌanaadan maaddiyabati intte deꞌuwan keehi koshshiyabata gidiyogaa intte haasayiyobaaninne oottiyoban intte naata tamaarissite. (Mat. 6:33) Hegee xayikko, intte naati Yihoowa Markka gidiyogee “so asaa haymaanootiya” kaalliyogaa xalla giidi qoppana danddayoosona. Hegaappe denddidaagan, eti Yihoowawu goynniyogee darin koshshennabadan qoppana, woy awu haggaaziyogaa aggana danddayoosona.

19. Yihoowayyo haggaaziyogaa aggida uri waanana danddayii? (“ Yihoowakko Simmana Danddayaasa!” giya saaxiniyakka xeella.)

¹⁹ Issi uri Yihoowawu haggaaziyogaa aggikko, hegee I zaarettidi Yihoowara mule dabbotana danddayenna giyogee? Chii, I zilꞌꞌetti laamettidi Yihoowakko simmana danddayees. Yaatanawu I bana ziqqi oottidi galchchaa cimatuppe maaduwa ekkana koshshees. (Yaaq. 5:14) Zaarettidi Yihoowara dabbotanawu baaxetiyogee bessiyaba!

20. Nuuni ammanettida kawotu leemisuwa kaallikko, Yihooway nuna waati xeellanee?

²⁰ Yaatikko nuuni Israaꞌeela kawotuppe tamaaridobay aybee? Nuuni ubbatoo Yihoowa kumetta wozanan siiqikko, ammanettida kawotu mala gidana danddayoos. Nu balaappe tamaariyageetanne nu nagaran zilꞌꞌettidi koshshiyaban laamettiyageeta gidoos. Qassi tumu Xoossaa xalaalawu mintti goynniyogee keehi koshshiyogaa hassayoos. Neeni Yihoowawu ammanettada deꞌikko I nena A sinttan suurebaa oottida uradan xeellana.