Nikolasanne Selino hara paacee gakkiis. Paransaaye macara biiroy eti ooratta galchchan haggaazanaadan maddabiis. Eti hagaadan giidosona: “Koyro heeran keehi ufayttida, shin guyyeppe nu laggeta laamotiyogaa doommida. Nu ooratta galchchan deꞌiya ishanttuura loytti laggetibookko.” a Metiyabay deꞌikkokka neeni biido ooratta galchchan ufayttiyagaanne loꞌꞌo ayfiya demmiyagaa waana gidana danddayay? Harati waati maaddana danddayiyonaa? Neenikka ooratta galchchan deꞌiyageetikka demmiyo anjjoy aybee?

NEENI MEEZETANAADAN MAADDIYA OYDDU MAARATA

1. Yihoowan ammanetta. (Maz. 37:5) Jaappaanen deꞌiya Kaazuma I azinay oosuwawu harasaa laamettido wode 20 layttawu takkido galchchaa aggada baasu. A ‘ba ogiya hadaraa Yihoowayyo waata immadee?’ A hagaadan gaasu: “Taani hirgganaadan, boorasanaadaaninne unꞌꞌettanaadan oottida ubbabaa zaara zaarada Yihoowawu yootaas. Taani yaatido wode ubban I tawu koshshiya minotettaa immiis.”

Neeni kaseegaappe aaruwan Yihoowan ammanettanawu waatana danddayay? Issi puutee diccanawu haattaynne araddida biittay koshshiyogaadan nu ammanuwawukka minttiyabay koshshees. Qommoora abay qonccido Nikolasi Xoossaa sheniya oottanawu bantta goꞌꞌaa aggi bayida Abrahaamabaa, Yesuusabaanne Phawuloosabaa wotti dentti qoppidoogee Yihooway A maaddanaagaa I loytti ammanettanaadan oottiis. Geeshsha Maxaafaa ubbatoo xannaꞌiyogee ne deꞌuwan laamettiyabaa  neeni genccanaadan maaddana; qassi neeni yaatikko ne ooratta galchchan deꞌiya harata minttettiya qofaa demmana.

2. Geeddarssoppa. (Era. 7:10) Juleesi Beeniineppe Amarkkaa biido wode keehi dummatiya wogaa meezetana koshshiis. I hagaadan giis, “Tanaara gayttiya ubbawu tabaa ubbabaa yootana koshshiyabadan qoppaas.” Hegee I meezetido wogaappe dummatiyo gishshawu I galchchan deꞌiya haratuppe haakkiyogaa doommiis. Shin I ishanttanne michchontta loytti eri simmidi ba qofaa laammiis. I hagaadan giis: “Saꞌan nuuni awan deꞌikkokka asay ubbay issi mala gidiyogaa taani haꞌꞌi akeekaas. Shin eti banttawu siyettiyabaa dumma dumma ogiyan qonccissana danddayoosona. Asaa eeshshay dumma dumma gidiyogaa nuuni akeekana koshshees.” Yaaniyo gishshawu neeni haꞌꞌi deꞌiyo galchchaa kaseegaara geedarssoppa. Aqinye gidida Ana-Liiso giyo michchiya hagaadan gaasu: “Ta ooratta galchchay kaseegaara issi mala gidana ga qoppido gishshawu gidennan, taani oorattabaa eranawu koyido gishshawu yaas.”

Cimatikka haꞌꞌi deꞌiyo galchchaa kaseegaara geeddarssennaadan naagettana koshshees. Issibaa dumma dumma ogiyan oottiyogee bala gidenna. Intte intte qofaa yootanaappe kase, heeraa hanotaa loytti eriyogee loꞌꞌo. (Era. 3:1, 7b) Galchchay intteegaadan qoppanaadan oottiyogaappe, intte leemiso gidiyogan tamaarissiyogee loꞌꞌo.—2 Qor. 1:24.

3. Ne ooratta galchchan minna ootta. (Pili. 1:27) Issi galchchaappe laamettidi hara galchchaa biyogee daro wodiyanne wolqqaa wurssiyaba gidikkokka, sohuwara ooratta galchchan shiiqota shiiqiyogeenne danddayettikko, Shiiquwa Addaraashaa biidi shiiqiyogee keehi koshshiyaba. Ne ooratta galchchan deꞌiya ishanttinne michchontti nenaara laggetanawunne nena maaddanawu darotoo nenaara gayttana koshshees. Tohossa Afirkkan deꞌiya gita katamaa ba naaꞌꞌu macca naatuura biida Lusindda hagaadan gaasu: “Ta ooratta galchchan deꞌiyageetuura laggetanaadan, haggaazanaadaaninne shiiqotun qofaa yootanaadan ta laggeti tana zoridosona. Qassi haggaazo shiiquwawu nu keettaa goꞌettanaadan eeno giida.”

Ishanttinne michchontti galchchan oottiyo oosotun neeni ‘issippe baaxetiyogee’ neenikka haratikka minnanaadan maaddees. Qommoora ibay odettido Ana-Liisa, I ooratta galchchan deꞌiya ubbaara haggaazanaadan cimati O minttettidosona. Yaatidoogee ay demissidee? A hagaadan gaasu, “Galchchan deꞌiyageetuura loytta erettanawu hegee keehi loꞌꞌo oge gidiyogaa taani sohuwara akeekaas.” Qassi Shiiquwa Addaraashaa geeshshiyogaanne loyttiyogaa mala oosotun neeni ne dosan maaddiyogee neeni hegaa ne galchchaadan xeelliyogaa ishanttinne michchontti akeekanaadan oottees. Neeni ne ooratta galchchan minna oottikko ishanttuuranne michchonttuura sohuwara loytta laggetaasa, qassi eta ne soo asadan xeellaasa.

4. Haratuura laggeta. (2 Qor. 6:11-13) Neeni etawu qoppiyogaa harati erikko, ne etaara laggetanawu metootakka. Yaaniyo gishshawu asaara haasayanawunne loytta erettanawu gidiya wodiya demmana mala Shiiquwa Addaraashaa  kasetada baanawunne shiiquwappe simmin yan takkanawu halchcha. Eta sunttaa eranawu baaxeta. Neeni asaa sunttaa hassayiyagaa, siiqiyagaanne haasayissanawu metennaagaa gidikko, asay nenaara erettanawu koyananne neessi loꞌꞌo lagge gidana danddayees.

Harati nena galchchaa yame ootti xeelliya xeellennaakko unꞌꞌettiyogaappe, ne ay mala asakko ishanttinne michchontti eranaadan ootta. Yaatiyo gishshawu, neeni ne ishanttuuranne michchonttuura Shiiquwa Addaraashan gayttiyogaa xalla gidennan, etappe amaridaageetuura harasankka wodiya aattanawu baaxeta. Lusindda giidoogaadan ootta: “Nuuni nu soo harata kasetidi shoobbido gishshawu, etaara loytti laggetida.”

“ISSOI ISSUWAA MOKKITE”

Erenna asay deꞌiyo Shiiquwa Addaraashaa gelanawu issoti issoti yayyana danddayoosona. Yaatikko ne galchchaa yiida harata waata maaddana danddayay? Kiitettida Phawuloosi, “Kiristtoosi inttena mokkidoogaadan, . . . issoi issuwaa mokkite” giidi minttettiis. (Roo. 15:7) Cimati Kiristtoosa leemisuwa kaalliyogan oorattata mokkoosona. (“ Biido Galchchan Neeyyo Injjetanaadan Maaddiyabata” giya saaxiniya xeella.) Shin naata gujjin galchchan deꞌiyageeti ubbay oorattati meezetanaadan maaddana danddayoosona.

Asaa ne soo shoobbiyogan xalaala gidennan, koshshiyaban maaddiyogankka imattaa mokkana danddayaasa. Leemisuwawu, issi michchiya mata wode I heeri yiida hara michchiyo katama giddon yuushshada otobisiyanne baaburiya waata goꞌettanaakko bessaasu. A oottidoban ooratta michchiya ufayttaasunne hegee A hanotaa meezetanaadan maaddiis.

AYYAANAABAN DICCANA DANDDAYIYO OGIYA

Kafo maray ba keettaappe kiyidi paalliyogaa doommanawu yayyana danddayikkonne, I issitoo doommikko xoqqasan paalliyogaa leddan leddan meezetana danddayees. Hegaadankka, neeni ooratta galchchaa biyo wode guuttaa yayyana danddayaasa; shin neeni yayyiyogaa aggikko Yihoowa  haggaazuwan leemiso hanotan ne qefiya miccada xoqqasan paallana danddayaasa. Nikolasinne Selina hagaadan giidosona: “Hara galchchaa laamettidi biyogee keehi loꞌꞌo loohisso. Ooratta asaanne heeraa meezetanawu nuuni ooratta eeshshaa bessana koshshiis.” Doomettan abay odettido Zhin-Sharli A soo asay waani goꞌettidaakko yootiis: “Nu naati nu ooratta galchchan ayyaanaaban kaymidosonanne Yihoowara loytti dabbotidosona. Amarida aginatuppe simmin, nu naꞌiya saaminttawu gidduwan shiiqiyo shiiquwan kifileta shiishshiyogaa doommaasu; qassi nu naꞌay haattan muukettibeenna aassiyagaa gidiis.”

Leemisuwawu, aassiyageeti keehi koshshiyosan haggaazanawu beennaadan ne hanotay nena diggiyaba gidikko, waatana danddayay? Ha huuphe yohuwan odettida qofatuppe amaridaageeta oosuwan peeshshiyogan ne kase deꞌiyo galchchay neeyyo ooratta galchchaa mala gidanaadan oottana danddayaasa. Neeni Yihoowan ammanettada haratuura haggaazanawu halchchuwa kessiyogaaninne oorattatuura laggetiyogan woy ne kase eriyogeetuura laggetettaa minttiyogan ne galchchan minnada ootta. Geella neeni oorattata woy metootidaageeta kasetada koshshiyaban maaddana danddayaasa. Siiqoy tumu Kiristtaaneta shaakki erissiya eeshsha gidiyo gishshawu harata maaddiyogee neeni Yihoowakko loytta shiiqanaadan oottees. (Yoh. 13:35) “Xoossaa ufaissiyaagee hegaa mala yarshshuwaa” gidiyogaa neeni ammanettana danddayaasa.—Ibr. 13:16.

Metiyabati deꞌishinkka, daro Kiristtaaneti bantta ooratta galchchan ufayttiyageetanne loꞌꞌo ayfiya demmiyageeta gididosona; qassi neenikka yaanana danddayaasa! Ana-Liisa hagaadan gaasu, “Galchchaa laammiyogee wozanaa aassa dooyanaadan maaddiis.” Hara galchchaa biyogee “issi uri awudeegaappenne aaruwan Yihoowa maaduwa demmanaadan oottiyogaa” Kaazuma haꞌꞌi akeekaasu. Juleesi shin? I hagaadan giis: “Taani haratuura laggetidoogee boorasennaadan tana maaddiis. Taani ta ooratta galchchaa keehi meezetido gishshawu hara galchchaa baanaagee tawu keehi deexxiyaba milatees.”