Isiyaasa 60:1y hagaadan gees: “Dendda! Denddada poo7issa; aissi giikko, ne poo7oi yiis. GODAA bonchchoikka ne bollan poo7iis.” He maccaasiya he wode Yihudaa waanna katama gidida Xiyono woy Yerusalaame katamiyo gidiyogaa yuushuwan deꞌiya qofay bessees. (Isi. 60:14; 62:1, 2) Yerusalaame katamiya kumetta Israaꞌeela deriya qonccissawusu. Ha xiqisiya xeelliyagan nuuni zaarana naaꞌꞌu oyshati deꞌoosona: Koyruwan, Yerusalaame katamiya awude, qassi waana “denddada” leemiso hanotan pooꞌissadee? Naaꞌꞌanttuwan, Isiyasi yootidobay kaseegaappe aaruwan nu wodiyan polettanee?

Yerusalaame katamiya awude, qassi waana “denddada” leemiso hanotan pooꞌissadee? Ayhudati 70 layttawu Baabiloonen omooduwan takkido wode Yerusalaame katamiyanne yan deꞌiya Xoossaa garoy moorettiis. Shin Meedoonatinne Parsseti Baabiloone oyqqi simmin, Baabiloone haaruwan deꞌiya Israaꞌeelati ubbay bantta biittaa simmanawunne tumu goynuwa zaarettidi essanawu laꞌatettaa demmidosona. (Izi. 1:1-4) Tammanne naaꞌꞌu zerettatuppe attida ammanettidaageeti 537 K.K. doomettan hegaadan oottidosona. (Isi. 60:4) Eti Yihoowawu yarshshota yarshshidosona, baalata bonchchidosonanne Xoossaa garuwa zaarettidi keexxidosona. (Izi. 3:1-4, 7-11; 6:16-22) Yihoowa bonchchoy Yerusalaamen zaarettidi pooꞌiyogaa doommiis; hegaa giyogee Xoossay ba asaa bolli pooꞌissiyogaa doommiis giyogaa. Etikka Yihoowa erenna asawu leemiso hanotan pooꞌo gididosona.

Shin he wode Xoossay erissidobaa yootiya Isiyasi odidobaappe amaridaagaa xalaalay polettiis. Israaꞌeelatuppe daroti Xoossawu azazettiyogaa aggidosona. (Nah. 13:27; Mil. 1:6-8; 2:13, 14; Mat. 15:7-9) Guyyeppe eti Masiya, Yesuus Kiristtoosa ixxidosona. (Mat. 27:1, 2) Yerusalaame katamaynne yan deꞌiya Xoossaa garoy 70 M.Ln, zaarettidi xayiis.

Yihooway hegee hananaagaa kasetidi yootiis. (Dane. 9:24-27) Isiyaasa shemppo 60n odettida hiraagati ha saꞌan deꞌiya Yerusalaamen muleera polettanaadan I halchchibeennaagee qoncce.

Isiyasi yootidobay kaseegaappe aaruwan nu wodiyan polettanee? Ee, shin hegee leemiso hanotan hara maccaasee bolli hegeekka; “saluwan deꞌiya Yerusalaame” bolli hanana. Kiitettida Phawuloosi ibaa hagaadan giis: “A nuussi aayyiyo.” (Gal. 4:26) Saluwan deꞌiya Yerusalaama ammanettida ayyaanaa meretati deꞌiyo Xoossaa dirijjitiyawu saluwa baggaa qonccissawusu. Yesuusinne Phawuloosaagaadan saluwa laattiyo hidootay deꞌiyo ayyaanan tiyettida 144,000ti I naata. Tiyettida Kiristtaaneti ‘geeshsha asa,’ hegeekka ‘Xoossaa Israaꞌeela’ gididosona.—1 PHe. 2:9; Gal. 6:16.

Saluwan deꞌiya Yerusalaama ‘denddidoynne pooꞌissidoy’ ayba ogiyanee? Ayyaanan tiyettida saꞌan deꞌiya ba naatu baggaara hegaadan oottaasu. Eta hanotaa Isiyaasa shemppo 60n odettida hiraagaara geeddarssa.

Kiitettidaageeti hayqqi simmin, kaddidaageetu timirttee aakkido wode ayyaanan tiyettida Kiristtaaneti leemiso hanotan xuman deꞌiyo gishshawu eti denddana koshshiis. (Mat. 13:37-43) He wode eti alamiya worddo haymaanoote ubbaa xaaxa waaxa qonccissiya Gita Baabilooni omoodduwan deꞌoosona. Tiyettidaageeti “wodiya wurssettaa” gakkanaashin omoodduwan takkidosona; hegee 1914n doommiis. (Mat. 13:39, 40) Hegaappe simmin darin takkennan eti 1919n laꞌa kiyidi, sohuwara Kawotettaa mishiraachchuwa  minni sabbakiyogan leemiso hanotan pooꞌissidosona. a Isiyaasa 60:3n ‘kawota’ geetettida Xoossaa Israaꞌeelatuppe attidaageeta gujjin, daro qommo asay hanno gakkanawu he pooꞌuwakko yiiddi deꞌees.—Ajj. 5:9, 10.

Tiyettida Kiristtaaneti sinttappe Yihoowa pooꞌuwa haꞌꞌiigaappe aaruwan pooꞌissana. Waatidi? Eti saꞌaa deꞌuwa wurssiyo wode, ‘Ooratta Yerusalaamo’ woy Kiristtoosaara kawotanne kahineta gidiya awu bullashettiya 144,000ta gidoosona.—Ajj. 14:1; 21:1, 2, 24; 22:3-5.

Ooratta Yerusalaama Isiyaasa 60:1n odettidabay polettanaadan gitabaa oottana. (Isiyaasa 60:1, 3, 5, 11, 19, 20; Ajjuutaa 21:2, 9-11, 22-26​ra gatta xeella.) Saꞌan deꞌiya Yerusalaama beni Israaꞌeela kawotettawu waanna soho gidiyogaadan, ooratta Yerusalaamanne Kiristtoosi ooratta alamiya kawotetta gidana. Ooratta Yerusalaama ‘saluwappe Xoossaa matappe waana duge wodhdhadee?’ Saꞌan deꞌiya asaa maaddiyabaa oottiyogaana. Xoossawu yayyiya dumma dumma zariyappe yiida asay “katamee poo7uwan hemettana.” Eti nagaraappenne hayquwappekka laꞌa kiyana. (Ajj. 21:3, 4, 24) Xoossay erissidobaa yootiya Isiyasinne harati kasetidi odidobay, ‘ubbabay ooraxxiyo wode’ muleera polettana. (Oos. 3:21) Kiristtoosi Kawo gidido wode ubbabay ooraxxiyogaa doommiis; qassi hegee A Shaꞌu Layttaa Haaruwa wurssettan polettana.