1-2. Issi uri haattan muuketti simmidi demmiyo anjjoti awugeetee?

 NUUNI haattan muukettidi Yihoowa so asaa gidiyo wode ufayttoos. Hegaadan Yihoowara mintti dabbotiyogee gita maata. Nuuni hagaadan giida mazamuraawiya Daawita qofan maayettoos: “Neeni [Yihooway] dooridonne ne shilootan uttanau mataa shiishshiyo asi anjjettidaagaa” woy ufayttiyagaa.—Maz. 65:4.

² Yihooway baakko shiishshiyoy ay mala asatee? Nuuni hagaappe kasetiya huuphe yohuwan beꞌidoogaadan, Yihooway banaara dabbotana koyiyageetuura dabbotees. (Yaaq. 4:8) Nena Yihoowawu sheedhdhada haattan muukettiyo wode kaseegaappe aaruwan Yihoowara dabbotaasa. Neeni yaata simmin I neeyyo ‘anjjuwa palahissidi gussanaagaa’ ammanettana danddayaasa.—Mil. 3:10; Erm. 17:7, 8.

3. Banttana Yihoowawu sheedhdhidi haattan muukettida Kiristtaanetuppe koyettiyabay aybee? (Eranchchaa 5:4, 5)

³ Haattan muukettiyogee doometta xalaala gidiyogee qoncce. Neeni haattan muuketta simmada, balabaa oottanaadan paacettiyo wode woy nena metoy gakkiyo wodekka Yihoowayyo merinawu haggaazanawu gelido qaalaa naaganawu neeyyo danddayettida ubbabaa oottanawu koyaasa. (Eranchchaa 5:4, 5 nabbaba.) Neeni Yesuusa kaalliyagaa gidiyo gishshawu, neessi danddayettida keenan Yesuusa leemisuwanne azazota loytta kaallaasa. (Mat. 28:19, 20; 1 PHe. 2:21) Yaatanaadan ha huuphe yohoy nena maaddana.

 METOYNNE PAACEE DEꞌISHINKKA YESUUSA AGGENNAN ‘KAALLA’

4. Yesuusa kaalliyageeti ‘waaye mittaa’ tookkoosona giyogee woygiyogee? (Luqaasa 9:23)

⁴ Neeni haattan muuketta simminkka ne bolli metoy gakkiyogee attenna. Yesuusi bana kaalliyageeti ‘waaye mittaa’ tookkanaagaa qoncciyan yootiis. Qassi “ubba gallassi” eti hegaadan oottoosona. (Luqaasa 9:23 nabbaba.) Yaatin, Yesuusi bana kaalliyageeti ubbatoo waayettanaagaa yootidee? Chii. I eti anjjuwa demmiyogaa xalla gidennan, metoy eta gakkanaagaa qonccissanawu koyiis. Eta bolli gakkiya metotuppe amaridaageeti keehi waayissiyageeta gidennan aggokkona.—2 Xim. 3:12.

5. Bantta goꞌꞌaa aggi bayiyageeti ayba anjjota demmanaagaa Yesuusi yootidee?

⁵ Geella so asaappe nena yedetay gakkennan aggenna; woy Xoossaa Kawotettaa ne deꞌuwan kaseyanawu daro miishshanne aquwa agga bayadasa. (Mat. 6:33) Yaanikko, Yihooway neeni awu oottido ubbabaa dogennaagaa ammanettana danddayaasa. (Ibr. 6:10) Yesuusi hagaadan giidi yootidobay tuma gidiyogaa ne deꞌuwan beꞌennan aggakka: “Taani intteyyo tumaa odays, tana kaalliyo gishshawunne mishiraachchuwa gishshawu keettaa woy ishata woy michchota woy aayyiyo woy aawaa woy naata woy gadiya aggida ooninne, asay naaqqishinkka, ha wodiyan keettata, ishata, michchota, aayota, naatanne gadiya 100 kushe dariyagaa demmana, qassi sinttappe yaana wodiyan merinaa deꞌuwa demmana.” (Mar. 10:29, 30) Neeni demmido anjjoy ne agga bayido ubbabaappe keehi aadhdhees.—Maz. 37:4.

6. Neeni haattan muuketta simmadakka, ‘asatettaa amuwa’ ubbatoo eqettana koshshiyoy aybissee?

⁶ Neeni haattan muuketta simmadakka, ‘asatettaa amuwa’ eqettana koshshees. (1 Yoh. 2:16) Ayssi giikko, neeni haꞌꞌikka nagaranchcha asa. Neeni kiitettida Phawuloosaagaadan issi issitoo qoppennan aggakka. I hagaadan giis: “Taani ta wozana giddon Xoossaa higgiyan ufaittais; shin ta bollaa giddon de7iya ta wozanaa qofaa higgiyaara warettiya dumma higgiyaa be7ais; he higgee ta bollaa giddon de7iya nagaraa ootissiya higgiyan tana qashissees.” (Roo. 7:22, 23) Neeni iita amuwa eqettana koshshiyo gishshawu hidootaa qanxxana danddayaasa. Shin neeni nena Yihoowawu sheedhdhiyo wode gelido qaalaa loytta qoppiyogee paacciyabaa eqettanawu neeni murttido murttiya minttees. Nena paacee gakkiyo wode, ne gelido qaalay maaddana. Waatidi?

7. Nena Yihoowawu sheedhdhiyogee awu ammanettada deꞌanaadan nena waati maaddii?

⁷ Neeni nena Yihoowawu sheedhdhiyo wode nena agga bayaasa. Hegaa giyogee Yihoowa ufayssenna koshshaanne halchchuwa ixxaasa giyogaa. (Mat. 16:24) Yaatiyo gishshawu nena paacee woy metoy gakkiyo wode neeni waatanaakko hirggana koshshenna. Neeni oottanabaa kasetada kuuyadasa, hegeekka Yihoowawu ammanettada deꞌanawu kuuyido kuushsha. Neeni Yihoowa ufayssanawu ubbatoo murttadasa. Neeni Iyyooba leemisuwa kaallana danddayaasa. Keehi waayissiyabay A gakkikkokka, I hagaadan giis: ‘Taani suure gidiyogaa aggikke.’—Iyy. 27:5.

8. Nena Yihoowawu sheedhdhiyo wode woossido woosaa wotta dentta qoppiyogee paaciya eqettanaadan nena waati maaddii?

⁸ Nena Yihoowawu sheedhdhiyo wode woossido woosaa wotta dentta qoppiyogan nena gakkiya paace ubbaa eqettanawu wolqqaa demmaasa. Leemisuwawu, neeni hara asaa aqo laggiya lambbeechchay? Lambbeechchennaagee qoncce! Neeni hegaa malabaa oottennan agganawu Yihoowawu qaalaa geladasa. Neeni iita amoy ne  wozanan diccennaadan diggikko, wodeppe hegaa agganawu baaxetana koshshenna. Yaatikko ‘nagaranchchatu ogiyappe guyye simmaasa.’—Lee. 4:14, 15.

9. Nena Yihoowawu sheedhdhiyo wode woossido woosaa wotta dentta qoppiyogee ne deꞌuwan A goynuwa kaseyanaadankka waati maaddii?

⁹ Issi uri nena shiiqota ubbatoo shiiqennaadan diggiya oosuwa oottanaadan shoobbikko shin? Ne waatanaakko eraasa. Shiiqota shiiqennaadan diggiya oosuwa oottennan agganawu he uri nena shoobbanaappe kasetada kuuyadasa. Yaaniyo gishshawu hegaa mala shoobiya ekkanawu paacettakka; qassi ne deꞌuwan Yihoowa kaseyanawu baaxetaasa. Yesuusa taarikiya loytti qoppiyogee nuna maaddana danddayees. I ba Aawaa ufayssanawu murttiis. Yesuusaagaadan, neenikka nena awu sheedhdhido Xoossaa ufayssennaba ubbaa sohuwara mintta eqettanawu murtta.—Mat. 4:10; Yoh. 8:29.

10. Neeni haattan muuketta simmadakka Yesuusa aggennan ‘kaallanaadan’ Yihooway nena waati maaddii?

¹⁰ Metoy nena gakkiyo wode woy balabaa oottanaadan paacettiyo wode neeni oottiyobay Yesuusa aggennan ‘kaallanawu’ koyiyogaa bessana danddayees. Neeni yaatiyo wode Yihooway nena maaddanaagaa ammanettana danddayaasa. Geeshsha Maxaafay hagaadan gees: “Intte wolqqai danddayiyoogaappe aadhdhiya paaciyan intte paacettanau koyenna Xoossai ammanettidaagaa. SHin inttena paacee gakkiyo wode, he paaciyaa i inttena danddayissana. Qassi he paaciyaappe intte kessi ekkiyo ogiyaakka immana.”—1 Qor. 10:13.

YESUUSA AGGENNAN KAALLANAWU WAATANA DANDDAYAY?

11. Yesuusa aggennan kaallana danddayiyo keehi loꞌꞌo ogetuppe issoy awugee? (Misiliyakka xeella.)

¹¹ Yesuusi kumetta wozanan Yihoowawu haggaaziis; qassi I Yihoowa woossiyogan ubbatoo  akko shiiqiis. (Luq. 6:12) Neeni haattan muuketta simmadakka Yesuusa aggennan kaallana danddayiyo keehi loꞌꞌo ogetuppe issoy Yihoowakko loytta shiiqanaadan maaddiyabata ubbatoo oottiyogaa. Geeshsha Maxaafay hagaadan gees: “Nuuni hanno gakkanaassi de7ido maaraadan, ane sinttau boos.” (Pili. 3:16) Yihoowawu loytti haggaazanawu kuuyida ishanttunne michchonttu deꞌuwan hanidabaa neeni issi issitoo siyaasa. Geella eti Kawotettaa Mishiraachchuwa Yootiyageetu Timirtte Keettan tamaaridosona woy aassiyageeti keehi koshshiyosan haggaazoosona. Neenikka hegaa mala halchchuwa kessikko, hegaa polanawu neessi danddayettida ubbabaa ootta. Yihoowa asay Yihoowassi loytti haggaazanawu koyees. (Oos. 16:9) Neeni haꞌꞌi yaatana danddayennaba gidikko shin? Yihoowawu loytti haggaaziyageetuppe laafiya asadan nena xeelloppa. Neeni wurssettay gakkanaashin gencciyogee keehi koshshiyaba. (Mat. 10:22) Neeni neessi danddayettida keena oottiyo wode Yihooway keehi ufayttiyogaa dogoppa. Hegee neeni haattan muuketta simmadakka Yesuusa aggennan kaallana danddayiyo keehi loꞌꞌo oge.—Maz. 26:1.

12-13. Neeni Yihoowawu haggaaziyogan kaseegaadan ufayttennaba gidikko, waatana danddayay? (1 Qoronttoosa 9:16, 17) (“ Woxxiyogaa Aggoppa” giya saaxiniyakka xeella.)

¹² Neeni wozanappe woossennabadan qoppikko woy kaseegaadan ne haggaazuwan ufayttennaba gidikko waatana koshshii? Neeni Geeshsha Maxaafaa nabbabiyogaa kaseegaadan dosennaba gidikko waatana koshshii? Neeni haattan muuketta simmin neeyyo hegaadan siyettikko, Yihoowa ayyaanay nenan oottennabadan qoppoppa. Nuuni nagaranchcha gidiyo gishshawu nuussi siyettiyabay issi issitoo laamettana danddayees. Neeni Yihoowawu haggaaziyogan kaseegaadan  ufayttennaba gidikko, kiitettida Phawuloosa hanotaa qoppa. Phawuloosi Yesuusa leemisuwa kaallanawu baaxetikkokka, koshshiyabaa oottanawu I issi issitoo loytti koyibeennaagaa akeekiis. (1 Qoronttoosa 9:16, 17 nabbaba.) I hagaadan giis: “Taani dosennan ixxikkokka, wonggeliyaa gishshayyo hadaraa Xoossai taassi immiis.” Hegaa giyogee Phawuloosi issi issitoo loytti koyana xayikkokka, ba haggaazuwa polanawu murttiis giyogaa.

¹³ Hegaadankka, neeni neeyyo siyettiyabaa xalla qoppada kuuyoppa. Suurebaa oottanawu neeni loytta koyana xayikkokka, yaatanawu murtta. Neeni ubbatoo suurebaa oottikko, ne qofay loddan loddan laamettana danddayees. Ubbatoo buzo xannaꞌiyogee, woossiyogeenne sabbakiyogee neeni haattan muuketta simmadakka Yesuusa aggennan kaallanaadan maaddees. Neeni Yihoowawu aggennan haggaaziyogaa ne ishanttinne michchontti beꞌidi minettana.—1 Tas. 5:11.

NENA ‘UBBATOO QORA’

14. Neeni ubbatoo ay qorana koshshii, qassi aybissi? (2 Qoronttoosa 13:5)

¹⁴ Neeni haattan muuketta simmadakka nena ubbatoo qoriyogee keehi koshshiyaba. (2 Qoronttoosa 13:5 nabbaba.) Neeni ubba galla woossiyakko, Geeshsha Maxaafaa nabbabiyakkonne xannaꞌiyakko, shiiqota shiiqiyakko, qassi haggaaziyakkonne eranawu issi issitoo nena qoriyogee loꞌꞌo. Hegeetun ufayttanawunne loytta goꞌettanawu baaxeta. Leemisuwawu, nena hagaa mala oyshata oychchana danddayaasa: ‘Taani Geeshsha Maxaafaa koyro timirtteta qonccissana danddayiyanaa? Taani ta haggaazuwan loytta ufayttanawu oottana danddayiyobay deꞌii? Taani woossiyo wode tana qofissidabaa loytta qonccissiyanaa, qassi ta woosay taani Yihoowan wozanappe ammanettiyogaa bessii? Shiiqota ubbatoo shiiqiyanaa? Taani shiiqotun loytta kaallanawunne qofaa yootanawu waatana danddayiyanaa?’

15-16. Paaciya eqettiyogaa xeelliyagan issi ishaappe ay tamaaray?

¹⁵ Ne shugo miyyiya shaakka eriyogeekka keehi koshshiyaba. Robertta giyo ishay yootidobay hegaa qonccissees: “Taayyo layttay 20 heera gidido wode amarida saatiyawu oottiyo oosoy tawu deꞌees. Issi galla oosuwappe simmin, tanaara oottiyara taani I soo baanaadan shoobbaasu. A nuuni nurkka takkanaagaanne ‘ufayssiya wodiya aattanaagaa’ yootaasu. Koyro heeran, hanenna gaaso shiishshaas; shin wurssettan iyyo ixxis gaas, yaatada hegaa gaasuwa qonccissaas.” Robertti paaciya eqettidoogee galatissiyaba. Shin guyyeppe I hanidabaa  qoppidi hegaappe dummatiyabaa oottana koshshiyogaa akeekiis. I hagaadan giis: “Yooseefi Phoxiifaara machchiyo eqettidoogaadan, taani he shoobiya sohuwara mintta eqettabeykke. (Doo. 39:7-9) Qassi taani ixxis gaanawu keehi metootidoogan dagammaas. Hegee taani Yihoowara dabbotido dabbotaa minttana koshshiyogaa akeekanaadan maaddiis.”

¹⁶ Roberttaagaadan neenikka nena qoriyogan goꞌettana danddayaasa. Neeni paaciya eqettiyo wodekka nena hagaadan oychcha, ‘Taani sohuwara ixxis giidanaa?’ Neeni giigissana koshshiyabaa akeekikko, hidootaa qanxxoppa. Ne shugo miyyiya haꞌꞌi erido gishshawu ufaytta. Hegaabaa Yihoowa woossa, qassi I kessido kandduwa maaraadan deꞌanawu murttido murttiya minttiyabaa ootta.—Maz. 139:23, 24.

17. Robertta hanotay Yihoowa sunttaara waani gayttii?

¹⁷ Robertta hanotaappe harabaakka tamaaroos. I gujjidi hagaadan giis: “Tanaara oottiya maccaasee shoobiya ekkennan ixxa simmin, A hagaadan gaasu, ‘Paaciya aadhdhadasa!’ A woyganawu koyidaakko oychchaas. Kase Yihoowa Markka gidida I laggee yelaga Yihoowa Markkati ubbay injjiya demmikko geeman balabaa oottoosona giidi iyyo yootidoogaa tawu odaasu. Yaatiyo gishshawu, A taanikka hegaa mala asakkonne paaccanaagaa ba laggiyawu yootaasu. Taani Yihoowa sunttay bonchchettanaadan oottidoogaa guyyeppe erada keehi ufayttaas.”

18. Neeni haattan muuketta simmadakka waatanawu murttadii? (“ Ufayssiya Naaꞌꞌu Huuphe Yohota” giya saaxiniyakka xeella.)

¹⁸ Neeni nena Yihoowawu sheedhdhada haattan muukettiyo wode, aybi hanikkokka A sunttay geeyanaadan oottanawu koyiyogaa bessaasa. Qassi Yihooway nena gakkiya metuwanne neeni eqettiyo paaciya eriyogaa ammanettana danddayaasa. Neeni ammanettada deꞌanawu baaxetiyo baaxiya I anjjana. Neeni yaatanaadan I neessi ba geeshsha ayyaanaa baggaara wolqqaa immanaagaa ammanettana danddayaasa. (Luq. 11:11-13) Yihooway maaddin, neeni haattan muuketta simmadakka Yesuusa aggennan kaallana danddayaasa.