1-2. Issi uri haattan muukettanaappe kase waatana koshshii?

 AADHDHIDA ichchashu layttaa giddon, issi miilooneppe dariya asay haattan muukettidi Yihoowa Markka gidiis. Etappe daroti koyro xeetu layttan deꞌida Ximootiyosaagaadan, “guutta naatettaasappe” doommidi tumaa tamaaridosona. (2 Xim. 3:14, 15) Harati Yihoowabaa yelagatettan tamaaridosona; qassi amaridaageeti cimidi tamaaridosona. Layttay 97 gidido issi maccaasiya Yihoowa Markkatuura Geeshsha Maxaafaa xannaꞌada haattan muukettaasu!

² Neeni Geeshsha Maxaafaa xinaate gidikko woy Yihoowa Markka gidida aawaynne aayyiyaa nena dichchikko, haattan muukettanawu qoppaydda deꞌay? Hegee keehi loꞌꞌo halchcho! Shin neeni haattan muukettanaappe kasetada nena Yihoowawu sheedhdhana koshshees. Ha huuphe yohoy nena Xoossawu sheedhdhiyogaa giyogee woygiyogaakko qonccissees. Qassi nena Xoossawu sheedhdhanawunne haattan muukettanawu giigettiyo wode yaatanawu mammottana koshshennay aybissakko akeekanaadan ha huuphe yohoy nena maaddana.

BANA SHEEDHDHIYOGAA GIYOGEE WOYGIYOGEE?

3. Geeshsha Maxaafan etabay odettido banttana Yihoowawu sheedhdhida asatubaa yoota.

³ Bana Yihoowawu sheedhdhida issi uri dumma halchchuwawu doorettidoogaa Geeshsha Maxaafay yootees. Israaꞌeelati Yihoowawu sheerettida dere. Shin amarida Israaꞌeelati Yihoowawu dumma ogiyan haggaazanawu banttana sheedhdhidosona. Leemisuwawu, Aarooni qacido shaashiyawu sintta  baggaara I ‘Godaassi geeshsha gididi dummatidoogaa’ bessiya worqqaappe merettida phooliya alleeqoy deꞌees. Worqqaappe merettida alleeqoy I Yihoowawu dumma ogiyan haggaazanawu, hegeekka Israaꞌeelan gita kahine gidanawu doorettidoogaa bessees. (Kes. 29:6) Naaziraawetikka Yihoowawu dumma ogiyan haggaazanawu banttana sheedhdhidosona. “Naaziraawe” giya qaalay naazir giyo Ibraawetto qaalaappe ekettiis; hegaa giyogee “Dummatidaagaa,” woy “Bana Sheedhdhidaagaa” giyogaa. Naaziraaweti Muuse Higgiyan etawu imettida dumma azazotakka azazettana koshshiis.—Qoo. 6:2-8.

4. (a) Nena Yihoowawu sheedhdhiyo wode ne halchchoy aybee? (b) Nena ‘yegga bayiyogaa’ giyogee woygiyogee? (Misiliyakka xeella.)

⁴ Neeni nena Yihoowawu sheedhdhiyo wode, Yesuus Kiristtoosa kaalliyagaa gidanawunne ne deꞌuwan aybippenne aaruwan Xoossaa sheniya oottanawu dooradasa. Bana Yihoowawu sheedhdhida Kiristtaanee ay oottana koshshii? Yesuusi hagaadan giis: “Ooninne tana kaallana koyikko, bana yeggi bayo.” (Mat. 16:24) “Bana yeggi bayo” geetetti birshshettida Giriiketto qaalay “bawu deꞌoppo” geetettidikka birshshettana danddayees. Neeni nena Yihoowawu sheedhdhida ashkkara gidiyo gishshawu Yihoowa ufayssenna aybanne oottana koshshenna. (2 Qor. 5:14, 15) Hegaa giyogee ‘asatettaa ooso’ gidida pokkiya tuna nagaraappe haakkana koshshees giyogaa. (Gal. 5:19-21; 1 Qor. 6:18) Neeni he higgeta azazettiyogee metiyabee? Neeni Yihoowa siiqiyabanne A higgeta azazettiyogee neeyyo loꞌꞌo gidiyogaa ammanettiyaba gidikko yaatiyogee metiyaba gidenna. (Maz. 119:97; Isi. 48:17, 18) Niikolasa giyo ishay hagaadan giis, “Neeni Yihooway kessido maarata qasho keettan ne koyidobaa oottennaadan diggiya dirssadan, woy gaammoy nena qohennaadan naagiya dirssadan xeellana danddayaasa.”

5. (a) Nena Yihoowawu waata sheedhdhay? (b) Nena Yihoowawu sheedhdhiyogee haattan muukettiyogaappe waani dummatii? (Misiliyakka xeella.)

 ⁵ Nena Yihoowawu waata sheedhdhay? A xalaalawu goynnanawunne ne deꞌuwan I koyiyobaa kaseyanawu woosan qaalaa gelaasa. Hegaa bollikka, Yihoowa “ne kumetta wozanaaninne ne kumetta shemppuwan, qassi ne kumetta qofaaninne ne kumetta wolqqan” ubbatoo siiqanawu qaalaa gelaasa. (Mar. 12:30) Nena Yihoowawu sheedhdhiyogee hara asi baynnasan neeni awu qaalaa geliyogaa. Shin neeni haattan muukettiyogee asaa sinttan haniyaba; hegee neeni nena Yihoowawu sheedhdhidoogaa harati beꞌanaadan oottees. Nena sheedhdhiyo wode gitabaa qaalaa gelaasa; ne halchchoy neeni gelido qaalaa naagiyogaa gidana koshshees; qassi neeni yaatanaadan Yihooway koyees.—Era. 5:4, 5.

NEENI NENA YIHOOWAWU SHEEDHDHIYOY AYBISSEE?

6. Issi uri bana Yihoowawu sheedhdhanaadan oottiyabay aybee?

⁶ Neeni nena Yihoowawu sheedhdhanaadan oottiya waanna gaasoy A siiqiyogaa. Neeni A siiqanaadan oottidabay deꞌees. Neeni Yihoowabaanne A halchchuwabaa ‘tumu eratettaa’ demmada A loytta siiqadasa. (Qol. 1:9) Neeni Geeshsha Maxaafaa xannaꞌada, (1) Yihooway deꞌiyogaa, (2) Geeshsha Maxaafay A Qaala gidiyogaa, qassi (3) I ba sheniya polanawu ba dirijjitiyan goꞌettiyogaa ammanadasa.

7. Nuuni nuna Xoossawu sheedhdhanaappe kase ay oottana koshshii?

⁷ Banttana Yihoowawu sheedhdhiyageeti Xoossaa Qaalan deꞌiya koyro timirtteta erananne Xoossay kessido maarata kaallana koshshees. Eti bantta ammanuwabaa haratussi  yootanawu banttawu danddayettida ubbabaa oottoosona. (Mat. 28:19, 20) Eti Yihoowa kaseegaappe aaruwan siiqoosonanne A xalaalawu goynnanawu wozanappe koyoosona. Ne hanotaykka etaagaa malee? Neeni Yihoowa ne kumetta wozanan siiqiyaba gidikko, Geeshsha Maxaafaa nena xannaꞌissiyagaa woy nena yelidaageeta ufayssanawu woykko ne laggeti ubbay yaatiyo gishsha xallawu nena sheedhdhada haattan muukettakka.

8. Galatiyogee neeni nena Yihoowawu sheedhdhanaadan waati maaddii? (Mazamure 116:12-14)

⁸ Yihooway neessi oottido ubbabaa loytta qoppikko neeni A galatana, qassi nena awu sheedhdhana. (Mazamure 116:12-14 nabbaba.) Yihooway ‘loꞌꞌo imo ubbaanne kumetta woyto ubbaa’ Immiyagaa gidiyogaa Geeshsha Maxaafay yootees. (Yaaq. 1:17) He imota ubbaappe aadhdhiyagee A Naꞌaa, Yesuusa yarshshuwa. Ane hagaa qoppa! Wozoy neeni Yihoowara dabbotaa minttanaadan oottiis. Qassi I merinaa deꞌuwa hidootay neeyyo deꞌanaadan oottiis. (1 Yoh. 4:9, 10, 19) Nena Yihoowawu sheedhdhiyogee I qonccissido aybippekka aadhdhiya siiquwa gishshawunne I nena anjjido ubbabaa gishshawu galatiyogaa bessiyo keehi loꞌꞌo oge. (Zaa. 16:17; 2 Qor. 5:15) Merinawu Ufayttada Deꞌa! giya maxaafan timirtte 46 qofaa 4n, neeni galatanaadan oottiyabati odettidosona; qassi hegan Xoossaayyo Imotaa Immite giya heezzu daqiiqa biidoykka deꞌees.

NENA YIHOOWAWU SHEEDHDHADA HAATTAN MUUKETTANAWU GIIGETTADII?

9. Issi uri haratuugaa beꞌidi bana Yihoowawu sheedhdhana koshshennay aybissee?

⁹ Neeni nena Yihoowawu sheedhdhada haattan muukettanawu giigettabeennabadan qoppennan aggakka. Geella neeni Yihooway kessido maarata ubbaa kaallanawu ne deꞌuwan laammana koshshiyobay haꞌꞌikka deꞌennan aggenna, woy ne ammanuwa minttanawu daro wodee koshshennan waayi aggana. (Qol. 2:6, 7) Geeshsha Maxaafaa xannaꞌiya ubbati issi mala hanotan ayyaanaaban diccokkona, qassi ubba yelagati issi mala layttan banttana Yihoowawu sheedhdhidi haattan muukettanawu giigettokkona. Neeni giigissana koshshiyabaa akeekanawu baaxeta; yaatada nena hara asaara geeddarssennan neessi danddayettida ubbabaa ootta.—Gal. 6:4, 5.

10. Nena Yihoowawu sheedhdhada haattan muukettanawu neeni hanno gakkanawu giigettabeennabadan qoppikko waatana danddayay? (“ Tumaa Keettan Diccidaageetussi” giya saaxiniyakka xeella.)

¹⁰ Neeni nena Yihoowawu sheedhdhanawu hanno gakkanawu giigettabeennaagaa akeekikkokka yaatanawu halchchiyogaa aggoppa. Ne deꞌuwan koshshiyaban laamettana mala Yihooway maaddanaadan woossa. (Pili. 2:13; 3:16) I ne woosaa siyidi maaddanaagaa ammanettana danddayaasa.—1 Yoh. 5:14.

AMARIDAAGEETI MAMMOTTIYOY AYBISSEE?

11. Yihooway nuuni ayyo ammanetti deꞌanaadan waati maaddii?

¹¹ Banttana Yihoowawu sheedhdhidi haattan muukettanawu giigettiya amaridaageeti yaatanawu mammottoosona. Eti hagaadan qoppana danddayoosona, ‘Taani haattan muuketta simmada gita nagaraa oottada bohettikko shin?’ Neeni hegaadan yayyikko, Yihooway ‘I koyiyogaadan neeni deꞌanaadaaninne ubba wode A ufayssiyabaa oottanaadan’ neessi koshshiya ubbabaa kunttanaagaa ammanetta. (Qol. 1:10) Qassi I neeni suurebaa oottanaadan wolqqaa immana. Hara daroti suurebaa oottanaadan I maaddiis. (1 Qor. 10:13) Hegaa gishshawu Kiristtaane galchchaappe bohettiyageeti keehi guutta. Yihooway ba asay ammanetti deꞌanaadan maaddees.

12. Gita nagaraa oottennaadan naagettanawu waatana danddayiyoo?

 ¹² Nagaranchcha asay ubbay balabaa oottanawu paacettees. (Yaaq. 1:14) Shin neeni paacettiyo wode ay oottanaakko doorana koshshees. Neeni waana deꞌanaakko kuuyiyay nena. Nuussi siyettiyabaanne nuuni oottiyobaa teqqana danddayokko giidi issi issi asay yootees. Shin hegee worddo. Neeni iitabaa amottiyogaa aggana danddayaasa. Hegaa gishshawu, neeni paacettiyo wodekka iitabaa oottennan agganawu doorana danddayaasa. Iitabaappe naagettanawu ubbatoo Yihoowa woossa. Aggennan Xoossaa Qaalaa xannaꞌa. Shiiqota shiiqa. Qassi ne ammanuwabaa haratussi yoota. Neeni hageeta ubbatoo oottikko, Yihoowawu ammanettada deꞌanawu wolqqaa demmaasa. Qassi neeni yaatanaadan Yihooway maaddanaagaa mule dogoppa.—Gal. 5:16.

13. Yooseefi nuuyyo aybin loꞌꞌo leemiso gidii?

¹³ Nena paacee gakkiyo wode waatanaakko kasetada kuuyikko, Yihoowawu ammanettada deꞌanawu metootakka. Nuugaadan nagaranchcha asa gidikkonne, daroti hegaadan oottidoogaa Geeshsha Maxaafay yootees. Leemisuwawu, Phoxiifaara machchiya Yooseefa darotoo cimmanawu malaasu. Shin I waatanaakko kasetidi erees. ‘I ixxis’ giidoogaa Geeshsha Maxaafay yootees; qassi I hagaadan giis: “Taani waatada hagaa mala daro iitabaa hanada Xoossaa bolli nagaraa oottoo?” (Doo. 39:8-10) A Yooseefa paaccanaappe kasekka I waatanaakko eriyogee qoncce. Hegee paacee A gakkido wode suurebaa oottanawu metootennaadan A maaddiis.

14. Nuuni paaciya waati eqettana danddayiyoo?

¹⁴ Nena paacee gakkiyo wode Yooseefaagaadan Xoossawu waana ammanettada deꞌana danddayay? Nena paacee gakkiyo wode waatanaakko haꞌꞌi kuuyana danddayaasa. Yihooway ixxiyobata sohuwara eqetta; qassi hegeetubaa qoppoppa. (Maz. 97:10; 119:165) Yaatikko paacee nena gakkiyo wode nagaraa oottakka. Neeni waatanaakko eraasa. Qassi neeni oottanabaa kuuyaasa.

15. Issi uri Yihoowa ‘wozanappe koyiyogaa’ waati bessana danddayii? (Ibraawe 11:6)

¹⁵ Neeni tumaa demmidoogaa eraasa, qassi kumetta wozanan Yihoowawu haggaazanawu koyaasa; shin nena Yihoowawu sheedhdhada haattan muukettanawu giigettabeennabadan qoppana danddayaasa. Neeni hagaadan giidi  Yihoowa woossida Kawuwa Daawitaagaadan oottana danddayaasa: “Abeet Xoossau, tana qorada, ta wozanaa era; tana paaccada, ta qofaa era. Ane tanan iitabai de7ikko xeella; xeellada, merinaa ogiyan tana kaaletta.” (Maz. 139:23, 24) Yihooway ‘wozanappe bana koyiyageeta’ anjjees. Neeni nena Yihoowawu sheedhdhada haattan muukettanawu halchchuwa kessada baaxetiyogee yaatiyogaa bessees.—Ibraawe 11:6 nabbaba.

KASEEGAAPPE AARUWAN YIHOOWAKKO SHIIQA

16-17. Yihooway tumaa keettan diccidaageeta baakko waati ehiidee? (Yohaannisa 6:44)

¹⁶ Yesuusi bana kaalliyageeta Yihooway ehiidoogaa yootiis. (Yohaannisa 6:44 nabbaba.) Hegee keehi maalaalissiyaba gidiyogaanne nena waati maaddiyakko qoppa. Yihooway nunan loꞌꞌobaa beꞌidi baakko ehiis. I nuna “baayyo dumma asa oottidi” xeellees. (Zaa. 7:6) I nenakka hegaadan xeellees.

¹⁷ Shin neeni tumaa keettan diccida yelaga gidana danddayaasa. Neeni Yihoowawu haggaaziyoy I nena baakko ehiido gishshawu gidennan, nena yelidaageeti awu haggaaziyo gishsha xallaassa gaada qoppana danddayaasa. Gidikkonne, Geeshsha Maxaafay hagaadan gees: “Xoossaakko shiiqite; ikka inttekko shiiqana.” (Yaaq. 4:8; 1 Odi. 28:9) Neeni kasetada Yihoowakko shiiqikko, ikka neekko shiiqana. Yihooway nena issi so asaa yaradan xalaaladan xeellenna. I tumaa keettan diccidaageeta gujjin, ubba asaa huuphiyan huuphiyan baakko ehiis. Yaaqooba 4:8n odettidaagaadan, issi uri kasetidi Yihoowakko shiiqikko, ikka shiiqees.—2 Tasalonqqe 2:13​ra gatta xeella.

18. Nuuni kaalliya huuphe yohuwan ay beꞌanee? (Mazamure 40:8)

¹⁸ Neeni nena Yihoowawu sheedhdhada haattan muukettiyo wode Yesuusa leemisuwa kaallaasa. I ba Aaway koyiyo ubbabaa oottanawu eeno giis. (Mazamure 40:8 nabbaba; Ibr. 10:7) Neeni haattan muuketta simmadakka Yihoowawu ammanettada haggaaziyogaa aggennaadan nena aybi maaddanaakko kaalliya huuphe yohuwan beꞌana.