1. Yihoowawu ammanettidi haggaaziya amaridaageeti aybaa sirana danddayiyonaa?

 YIHOOWAY ba asan ufayttiyogaa eriyogee keehi minttettiyaba! Geeshsha Maxaafay hagaadan gees: “GODAI ba asan ufaittees.” (Maz. 149:4) Shin amaridaageeti Yihooway banttanan ufayttiyogaa issi issitoo sirana danddayoosona. Geeshsha Maxaafan etabay odettido Yihoowawu ammanettidi haggaazida daroti, Yihooway banttanan ufayttidoogaa ammananawu issi issitoo metootidosona.—1 Sam. 1:6-10; Iyy. 29:2, 4; Maz. 51:11.

2. Yihooway oonan ufayttii?

² Geeshsha Maxaafay Yihooway nagaranchcha asatun ufayttana danddayiyogaa loytti qonccissees. Waanidi? Nuuni Yesuus Kiristtoosan ammanidi haattan muukettana koshshees. (Yoh. 3:16) Nuuni yaatiyo wode nu nagaran zilꞌꞌettidi laamettidoogaanne Xoossay koyiyobaa oottanawu ayyo qaalaa gelidoogaa haratussi bessoos. (Oos. 2:38; 3:19) Yihooway nuuni aara dabbotanawu hegaadan oottiyo wode keehi ufayttees. Nuuni awu haggaazanawu gelido qaalaa naaganaayyo nuussi danddayettida ubbabaa oottiyo wode, Yihooway nunan ufaytteesinne nuna ba dabbodan xeellees.—Maz. 25:14.

3. Nuuni beꞌana heezzu oyshati awugeetee?

³ Amaridaageeti Xoossay banttanan ufayttennabadan qoppiyoy aybissa gidana danddayii? Yihooway nunan ufayttiyogaa waati bessii? Qassi issi Kiristtaanee Xoossay an ufayttiyogaa waani mintti ammanettana danddayii?

AMARIDAAGEETI XOOSSAY BANTTANAN UFAYTTENNABADAN QOPPIYOY AYBISSEE?

4-5. Nuuni nuna pattenna asadan xeelliyaba gidikko ay ammanettana danddayiyoo?

⁴ Nuuppe daroti naatettaappe doommidi nuna pattenna asadan xeelloos. (Maz. 88:15) Adriyana giyo ishay hagaadan giis: “Taani tana ubbatoo pattenna asadan xeellays. Taani naatettan deꞌiyo wode nu soo asay Gannatiyan deꞌana deꞌuwabaa woossikkokka,  taani yan deꞌana bessiya asa gidikke gaada qoppidoogaa hassayays.” Yihoowa Markka gidenna aawaynne aayyiya dichchido Tooni hagaadan giis: “Tana yelidaageeti eti tana siiqiyogaa woy tanan ceeqettiyogaa mule yooti erokkona. Hegaappe denddidaagan taani oottiyo aybinne eta ufayssana danddayenna gaada qoppaas.”

⁵ Issi issitoo nuuni nuna pattenna asadan xeelliyo wode Yihooway nuna baakko ehiidoogaa hassayana danddayoos. (Yoh. 6:44) Nuuni nuussi deꞌyogaa akeekibeenna loꞌꞌo eeshshata I akeekeesinne nu wozanaa loytti erees. (1 Sam. 16:7; 2 Odi. 6:30) Hegaa gishshawu, nuuni alꞌꞌo gidiyogaa I yootiyo wode nuuni an ammanettana danddayoos.—1 Yoh. 3:19, 20.

6. Kiitettida Phawuloosi I kase oottido nagaraa xeelliyagan awu aybi siyettidee?

⁶ Nuuppe amaridaageeti tumaa eranaappe kase hanno gakkanawu nuna zilꞌꞌana danddayiyabaa oottida. (1 PHe. 4:3) Yihoowayyo ammanettidi haggaaziya harati bantta shugo miyyiya xoonanawu hanno gakkanawu baaxetoosona. Neeni shin? Yihooway neeyyo atto gaana danddayennabadan issi issitoo qoppay? Yaatikko, Yihoowawu ammanettidi haggaaziya haratakka neegaa mala hanotay gakkidoogaa eriyogee nena minttettana danddayees. Leemisuwawu, kiitettida Phawuloosi ba mooruwa qoppidi bana ufayssi baynna asadan xeelliis. (Roo. 7:24) Phawuloosi ba nagaran zilꞌꞌetti laamettidi haattan muukettida asa. Gidikkokka, I bana ‘Yesuusi kiittido ubbaappe laafanne ubbaappe aadhdhiya’ nagaranchcha asadan qonccissiis.—1 Qor. 15:9; 1 Xim. 1:15.

7. Nuuni kase oottido nagaraa xeelliyagan ay hassayana koshshii?

⁷ Nuuni nu nagaraappe zilꞌꞌettidi laamettikko saluwan deꞌiya nu Aaway nuuyyo atto gaanawu qaalaa geliis. (Maz. 86:5) Yaatiyo gishshawu, nuuni oottido nagaran tumuppe zilꞌꞌettikko Yihooway giidobay tuma gidiyogaanne I nuuyyo atto giyogaa ammanettana danddayoos.—Qol. 2:13.

8-9. Yihoowa ufayssiyagaa keena mule oottana danddayokko giidi qoppiyogaa waati aggana danddayiyoo?

⁸ Nuuni ubbay Yihoowawu haggaazanawu nuussi danddayettida ubbabaa oottanawu koyoos. Shin amaridaageeti nuuni Yihoowa ufayssiyagaa keena mule oottana danddayokko giidi qoppoosona. Amanddo giyo michchiya hagaadan gaasu: “Tawu danddayettida ubbabaa Yihoowayyo oottiyogaa giyogee ubbatoo kaseegaappe aarobaa oottiyogaa gaada darotoo qoppaas. Yaaniyo gishshawu taani danddayiyogaappe aarobaa oottanawu darotoo baaxetays. Shin taani qoppidoogaa keena oottennan aggiyo wode, taani tanan hidootaa qanxxiyogaadan Yihoowaykka tanan hidootaa qanxxees gaada qoppaas.”

⁹ Nuuni Yihoowa ufayssiyagaa keena mule oottana danddayokko giidi qoppiyogaa waati aggana danddayiyoo? Yihooway hanotaadan haniyogaa hassaya. Nuuni danddayiyogaappe aarobaa oottanaadan I mule koyenna. Nuussi danddayettida keenan nuuni awu oottiyo ubbabaa I nashshees. Qassi bantta kumetta wozanan Yihoowawu haggaazida Geeshsha Maxaafan etabay odettido asatubaa loytta qoppa. Leemisuwawu, Phawuloosabaa qoppa. I unddenna layttawu minnidi oottiis; daro shaꞌu kilo meetiriya manddariisinne daro galchchaa essiis. Shin A deꞌoy laamettin I kaseegaadan sabbakana danddayibeenna; hegaa giyogee Yihooway an ufayttiyogaa aggiis giyogee? Chii. I ubbatoo baassi danddayettida ubbabaa oottiis; qassi Yihooway A anjjiis. (Oos. 28:30, 31) Hegaadankka, nuuni Yihoowawu oottana danddayiyobay laamettana danddayees. Shin Yihooway nuuni awu haggaazanaadan oottida gaasuwa nashshees. Yihooway nunan ufayttiyogaa qonccissiyo amarida ogeta ane pilggoos.

 YIHOOWAY NUNAN UFAYTTIYOGAA WAATI BESSII?

10. Yihooway nunan ufayttiyogaa yootishin waani “siyana” danddayiyoo? (Yohaannisa 16:27)

¹⁰ I nuuyyo Geeshsha Maxaafaa immiis. Yihooway ba asaa siiqiyogaanne etan ufayttiyogaa bessiyo ogeta koyees. Yesuusi I siiqiyonne A ufayssiya A Naꞌaa gidiyogaa Yihooway qonccissido naaꞌꞌu wodeta Geeshsha Maxaafay yootees. (Mat. 3:17; 17:5) Yihooway nenan ufayttiyogaa neeyyo yootanaadan koyay? Yihooway nuussi saluwappe yootana xayikkonne, Geeshsha Maxaafaa baggaara yootees. Yesuusi Wonggeletun yootidobaa nuuni nabbabiyo wode Yihooway nunan ufayttiyogaa yootishin “siyana” danddayoos. (Yohaannisa 16:27 nabbaba.) Yesuusi ba Aawaa eeshshaa wottiyobi baynna ogiyan bessiis. Hegaa gishshawu, nagaranchcha gidikkokka ammanettidi bana kaalliyageetun Yesuusi ufayttiyogaa yootidoogaa nuuni nabbabiyo wode, Yihooway nuussi hegaadan giyogaadan qoppana danddayoos.—Yoh. 15:9, 15.

11. Waayee nuna gakkiyogee Yihooway nuna siiqiyogaa aggiis giyogaa gidennay aybissee? (Yaaqooba 1:12)

¹¹ I nuussi koshshiyabaa immees. Yihooway nuna maaddanawu giigi uttiis; leemisuwawu deꞌuwassi koshshiyabaa I nuussi kunttees. Shin Iyyoobaagaadan nu bolli iitabay gakkanaadan, Yihooway issi issitoo paqqadees. (Iyy. 1:8-11) Waayee nuna gakkiyogee Yihooway nunan ufayttiyogaa aggiis giyogaa gidenna. Hegee nuuni Yihoowa ay keena siiqiyakko, qassi an ay keena ammanettiyakko bessanaadan oottees. (Yaaqooba 1:12 nabbaba.) Qassi waayee nuna gakkiyo wode Yihooway nuna keehi siiqiyogaanne genccanaadan nuna keehi maaddiyogaa akeekana danddayoos.

12. Dimitira hanotaappe nuuni ay tamaarana danddayiyoo?

¹² Isiya biittan deꞌiya Dimitira giyo ishaa gakkidabaa beꞌa. I ba oosuwappe yedetettiisinne daro aginawu ooso demmana danddayibeenna. Yaaniyo gishshawu, I kaseegaappe aaruwan haggaaziyogan Yihoowan ammanettiyogaa bessanawu qofaa qachchiis. Unddenna aginati aadhdhikkonne, I haꞌꞌikka ooso demmana danddayibeenna. Qassi I keehi sahettido gishshawu hiixaappe denddana danddayibeenna. I loꞌꞌo azinanne aawa gidiyogaa siriyogaa doommiis; qassi Yihooway tanan ufayttiyogaa aggideeshsha giidi qoppiis. Gidikkonne, issi galla omarssi A naꞌiya Isiyaasa 30:15 qofaa woraqatan attamaasu: ‘Woppu giyogeenne ammanettiyogee  intteyyo wolqqa gidana.’ A hegaa A hiixaakko ekka yaada hagaadan gaasu, “Ta aawawu neeni azzaniyo wode, ha xiqisiya hassayana danddayaasa.” Dimitiri ba soo asawu gidiya qumay maayoynne keettay deꞌanaadan Yihooway oottidoogaa akeekiis. I hagaadan giis: “Taani oottana koshshiyabay woppu gaada deꞌiyogaanne ubbatoo ta Xoossan ammanettiyogaa.” Hegaa mala metoy nena gakkiiddi deꞌikko, Yihooway neessi koshshiyabaa kunttiyogaanne neeni genccanaadan maaddiyogaa ammanettana danddayaasa.

13. Yihooway nuna siiqiyogaa O baggaara qonccissii, qassi waatidi?

¹³ Ishanttanne michchontta nuussi immiis. Yihooway nunan ufayttiyogaa nu ishanttunne michchonttu baggaara qonccissees. Leemisuwawu, koshshiyo wodiyan nuna minttettanaadan harata I denttettana danddayees. Isiyan deꞌiya issi michchiya keehi unꞌꞌissiyabay O gakkido wode hegaa ba deꞌuwan beꞌaasu. A ba oosuwappe yedetettaasunne keehi sahettaasu. I azinay gita nagara oottido gishshawu cima gididi oottana danddayibeenna. A hagaadan gaasu: “Hegee hanidoy aybissakko akeekana danddayabeykke. Geella taani balabaa oottidonne Yihooway tanan ufayttiyogaa aggido gishshataassa gaada qoppaas.” He michchiya Yihooway iini ufayttiyogaa iyyo qonccissanaadan mintta woossaasu. Yaatin I waati qonccissidee? A hagaadan gaasu: “Cimati tana haasayissidosonanne Yihooway tana siiqiyogaa taani akeekanaadan maaddidosona.” Shin amarida wodiyappe simmin A Yihooway O siiqiyogaa qonccissanaadan zaarettadakka woossaasu. A hagaadan gaasu: “Galchchan deꞌiya daro ishanttinne michchontti he gallassi tawu dabddaabbiya kiittidosona. Eti xaafido minttettiya qofaa taani nabbabiyo wode Yihooway ta woosaa siyidoogaa akeekaas.” Ee, Yihooway darotoo harati yootiyo minttettiya qofaa  baggaara I nuna siiqiyogaa qonccissees.—Maz. 10:17.

14. Yihooway nunan ufayttiyogaa qonccissiyo hara ogee aybee?

¹⁴ Nuussi zoree koshshiyo wode Yihooway nu mala Kiristtaanetu baggaara nuna zoriyogankka nunan ufayttiyogaa qonccissees. Leemisuwawu, koyro xeetu layttan kiitettida Phawuloosi 14 dabddaabbiya ba mala Kiristtaanetussi xaafanaadan Yihooway ba ayyaanan denttettiis. Phawuloosi he dabddaabbetu baggaara ba ishanttanne michchontta mino zoriya siiquwan zoriis. Yihooway Phawuloosi hegaa mala zoriya xaafanaadan denttettidoy aybissee? Yihooway loꞌꞌo Aawa; qassi “ba ufayttiyo” naata seerees. (Lee. 3:11, 12) Yaatiyo gishshawu, issi uri Geeshsha Maxaafaa goꞌettidi nuna zorikko Yihooway nunan ufayttiyogaa aggiis giyogaa gidenna. Hegee Yihooway nuna haꞌꞌikka siiqiyogaa bessiyaba. (Ibr. 12:6) Yihooway nunan ufayttiyogaa bessiya hara naqaashay aybee?

YIHOOWAY NUNAN UFAYTTIYOGAA NU ERANA DANDDAYIYO HARA OGETA

15. Yihooway ba geeshsha ayyaanaa oossi immii, qassi hegee nuuni ay ammanettanaadan oottii?

¹⁵ Yihooway bana ufayssiyageetussi ba Geeshsha ayyaanaa immees. (Mat. 12:18) Nuna hagaadan oychchana danddayoos: ‘Taani Xoossaa ayyaanaa ayfiya macarata ta deꞌuwan bessiyanaa?’ Neeni Yihoowa erabeenna wodiyagaappe aaruwan haꞌꞌi danddayanchchee? Neeni Xoossaa ayyaanaa ayfiya macarata loytta bessiyo wode Yihooway nenan ufayttiyogaa loytta ammanettana danddayaasa!—“ Geeshsha Ayyaana Aifee . . . ” giya saaxiniya xeella.

16. Yihooway O baggaara mishiraachchuwa yootii, qassi hegee neeni waananaadan oottii? (1 Tasalonqqe 2:4)

¹⁶ Yihooway bana ufayssiyageetuyyo mishiraachchuwa hadaran immees. (1 Tasalonqqe 2:4 nabbaba.) Joselano giyo michchiya mishiraachchuwa haratuyyo yootiyogan waana goꞌettidaakko beꞌa. Issi galla Joselana xiskkuwappe denddiyo wode keehi unꞌꞌettaasu. A hagaadan gaasu: “Taani wolqqaa wuraasinne tana pattenna asadan xeellaas. Shin taani aqinye, qassi hegee tawu haggaazo gallassa. Yaaniyo gishshawu woossada haggaazuwa kiyaas.” He galla maallado Joselana Geeshsha Maxaafaa xannaꞌanawu koyiya Meero giyo keha maccaaseera gayttaasu. Meera, Joselana I penggiya qoxxiyo wode Xoossay maaddanaadan A woossaydda deꞌiyogaa amarida aginatuppe simmin iyyo yootaasu. Joselana he  hanotaappe ay tamaaradee? A hagaadan gaasu, “Yihooway, ‘Taani nenan ufayttays’ giidi tawu yootiiddi deꞌiyabadan qoppaas.” Nuuni yootiyo mishiraachchuwa ubba asay siyennaagee qoncce. Gidikkonne, nuuni haratussi mishiraachchuwa yootanawu nuussi danddayettida ubbabaa oottiyo wode Yihooway nunan ufayttiyogaa ammanettana danddayoos.

17. Wozuwa xeelliyagan Veekippe ay tamaaradii? (Mazamure 5:12)

¹⁷ Yihooway bana ufayssiyageetussi wozuwa waagaa qanxxees. (1 Xim. 2:5, 6) Nuuni wozuwan ammanidi haattan muukettidaageeta gidikkokka, Yihooway nunan ufayttennabadan qoppikko shin? Nuuni ubbatoo nu qofan gidennan, Yihoowan ammanettana koshshiyogaa hassaya. I wozuwan ammaniyageeta xillo asadan xeellees; qassi eta anjjanawu qaalaa geliis. (Mazamure 5:12 nabbaba; Roo. 3:26) Wozuwabaa wotta dentta qoppidoogee Veeko giyo michchiyo maaddiis. Issi gallassi wozuwabaa loytta qoppa simmada, hagaa akeekaasu: “Yihooway tana daro wodiyawu danddayiis. . . . Shin taani kase hanidobay, ‘Ne siiqoy tana maaddiyagaa keena gita gidenna. Ne Naꞌaa yarshshoy ta nagaraa kammana danddayenna’ giyogaa mala.” Wozuwa imotaa A wotta dentta qoppada Yihooway O siiqiyogaa akeekaasu. Nuunikka wozuwabaa wotti dentti qoppiyo wode Yihooway nuna siiqiyogaanne nunan ufayttiyogaa akeekoos.

18. Saluwan deꞌiya nu Aawaa nuuni ubbatoo siiqiyaba gidikko, ay ammanettana danddayiyoo?

¹⁸ Nuuni ha huuphe yohuwan tamaaridobaa oosuwan peeshshanawu baaxetikkokka, issi issitoo hidootaa qanxxananne Yihooway nunan ufayttiishsha giidi qoppana danddayoos. Hegaadan gidikko, ‘I bana ubbatoo siiqiyageetun’ ufayttiyogaa hassaya. (Yaaq. 1:12) Yaaniyo gishshawu, Yihoowakko loytta shiiqa, qassi I nenan ufayttiyoga akeeka. Qassi Yihooway ‘nuuppe ooyyonne haaho gidennaagaa’ ubbatoo hassaya.—Oos. 17:27.