XANNAꞌIYO HUUPHE YOHUWA 34
MAZAMURE 107 Xoossaagaadan Siiqiyoogaa
Cimati Nagaranchchata Siiqiyogaanne Maariyogaa Waati Bessana Danddayiyonaa?
“Neeni zilꞌꞌettada laamettanaadan Xoossay ba kehatettan maaddanawu [koyees.]”—ROO. 2:4.
TAMAARANABAA
Galchchan deꞌiya, gita nagaraa oottidaageeta cimati maaddana danddayiyo ogeta beꞌana.
1. Gita nagaraa oottida issi uri waanana danddayii?
ISSI bitanee gita nagaraa oottido wode Qoronttoosa galchchay waatanaakko Phawuloosi yootidobaa kasetiya huuphe yohuwan beꞌida. Ba nagaran zilꞌꞌettidi laamettibeenna he bitaniya galchchaappe kessana koshshiis. Gidoppe attin, ha huuphe yohoy ekettido xiqisee yootiyogaadan, he uri ba nagaran zilꞌꞌettidi laamettanaadan Xoossay maaddana danddayees. (Roo. 2:4) Nagarancha uri zilꞌꞌetti laamettanaadan cimati waati maaddana danddayiyonaa?
2-3. Nu mala Kiristtaanee gita nagaraa oottidoogaa nuuni erikko waatana bessii, qassi aybissi?
2 Cimati issi uri gita nagaraa oottidoogaa erennaba gidikko, A maaddana danddayokkona. Issi uri gita nagaraa oottidoogaa nuuni erikko waatana bessii? I maaduwa demmanawu cimatukko baanaadan nuuni minttettana koshshees.—Isi. 1:18; Oos. 20:28; 1 PHe. 5:2.
3 Shin nagaraa oottida uri cimatuyyo yootana xayikko shin? Yaatikko he ura maaddanaadan nuuni cimatussi yootana koshshees. Nu ishay woy nu michchiya xayanaadan nuuni koyenna gishshawu yootiyogee eta siiqiyogaa bessiyaba. He uri nagaraa oottiyogaa aggana xayikko, Yihoowara I dabbotido dabbotay moorettees. Galchchaa sunttay moorettanaadankka I oottana danddayees. Yaatiyo gishshawu cimatuyyo yootiyogee metana danddayikkonne, nuuni Yihoowanne nu ishaa woy nu michchiyo siiqiyo gishshawu hegaadan oottoos.—Maz. 27:14.
GITA NAGARAA OOTTIDA URA CIMATI WAATI MAADDIYONAA?
4. Cimati gita nagaraa oottida uraara gayttiyo wode waatanawu baaxetiyonaa?
4 Galchchan issi uri gita nagaraa oottiyo wode cimati bantta giddoppe kontte a gididi oottiya heezzu cimata dooroosona. He cimati ashkkenne banttana ziqqi oottiyageeta gidana bessees. Eti he uraa maaddanawu baaxetiyaba gidikkokka, I laamettanaadan wolqqanttana danddayennaagaa akeekoosona. (Zaa. 30:19) Kawuwa Daawiti ba nagaran zilꞌꞌettidi laamettidoogaadan, ubba asay hegaadan oottennaagaa cimati eroosona. (2 Sam. 12:13) Nagaraa oottida issoti issoti Yihoowa zoriya siyennan aggana danddayoosona. (Doo. 4:6-8) Shin cimatu halchchoy he uri ba nagaran zilꞌꞌettidi laamettanaadan maaddiyogaa. Cimati nagaraa oottida uraara gayttiyo wode ay hassayana koshshii?
5. Cimati nagaraa oottida uraara gayttiyo wode hassayana koshshiya zoree awugee? (2 Ximootiyoosa 2:24-26) (Misiliyakka xeella.)
5 Cimati nagaraa oottida ura bayida, alꞌꞌo dorssadan xeelloosona. (Luq. 15:4, 6) Hegaa gishshawu cimati nagaraa oottida uraara gayttiyo wode iitabaa haasayokkona woy meqetti baynna ogiyan A oyqqokkona; woykko cimati oyshata oychchidi ubbabaa erana koshshiyabadan qoppokkona. Qassi eti 2 Ximootiyoosa 2:24-26n odettidabata oosuwan peeshshoosona. (Nabbaba.) Cimati nagaraa oottida uri laamettanaadan maaddanawu koyiyo gishshawu ubbatoo ashkke, qarettiyagetanne keha.
Beni henttanchchatudan, cimati bayida dorssaa demmanawu banttawu danddayettida ubbabaa oottoosona (Mentto 5 xeella)
6. Cimati gita nagaraa oottida uraara gayttanaappe kase wodiya bazzidi Yihoowa kaaletuwa eranawu waatana danddayiyonaa? (Roome 2:4)
6 Cimati wodiya bazzidi Yihoowa kaaletuwa erana koshshees. Eti Phawuloosi giidobaa hassayoosona: “Neeni zilꞌꞌettada laamettanaadan Xoossay ba kehatettan maaddanawu [koyees].” Yaatiyo gishshawu eti nagaranchchata Yihoowagaadan kehatettan oyqqanawu baaxetoosona. (Roome 2:4 nabbaba.) Cimati Yesuusi immiyo kaaletuwa kaallidi heemmiyageeta gidiyogaa hassayana koshshees. (Isi. 11:3, 4; Mat. 18:18-20) Cimati nagaraa oottida uraara gayttanaappe kasetidi he uri ba nagaran zilꞌꞌettidi laamettanaadan maaddanawu Yihoowa woossoosona. Eti Geeshsha Maxaafaanne nu xuufeta pilggoosona; qassi he uraanne A hanotaa akeekanaadan maaddana mala Yihoowa woossoosona. He uri hegaadan qoppanaadaaninne oottanaadan gaaso gidana danddayiyabata xeelliyagan cimati erana koshshiyabata yiggoosona.—Lee. 20:5.
7-8. Cimati gita nagaraa oottida uraara gayttiyo wode, Yihoowagaadan danddayanchcha gidiyogaa waati bessana danddayiyonaa?
7 Cimati danddayanchcha gidiyogan Yihoowa leemisuwa kaalloosona. Beni nagaraa oottidaageeta maaddanawu Yihooway ay oottidaakko eti hassayoosona. Leemisuwawu, Yihooway Qaayela danddayiis; I ba qofaa laammennaba gidikko A gakkanabaa, qassi I azazettikko demmana anjjuwa ayyo yootiis. (Doo. 4:6, 7) Yihooway Daawita zoranaadan ba erissidobaa yootiya Naataana kiittiis; Naataani goꞌettido leemisoy Daawiti ba nagaran zilꞌꞌetti laamettanaadan maaddiis. (2 Sam. 12:1-7) Qassi Yihooway Israaꞌeelati ayyo azazettennan ixxido wode ba erissidobaa yootiyageeta “wonttin wonttin” ‘kiittiiddi takkiis.’ (Erm. 7:24, 25) I maaddanaappe kase ba asay zilꞌꞌettidi laamettanaadan naagibeenna. Shin eti nagaraa oottiiddi deꞌiyo gishshawu bantta nagaran zilꞌꞌettidi laamettanaadan yootiis.
8 Cimati gita nagaraa oottidaageeta maaddanawu baaxetiyo wode Yihoowa leemisuwa kaalloosona. Eti 2 Ximootiyoosa 4:2y yootiyogaadan, hegaa mala uraa “daro danddayan” oyqqoosona. Yaatiyo gishshawu, nagaranchcha uri suurebaa oottanawu koyana mala maaddanawu issi cimay ubbatoo woppu giyagaanne danddayanchcha gidana bessees. He cimay hanqqettiyaba woy yiillotiyaba gidikko, he uri I yootiyo zoriya siyennan aggana woy zilꞌꞌettidi laamettennan aggana danddayees.
9-10. Issi uri I oottidobay bala gidiyogaa akeekanaadan cimati waati maaddana danddayiyonaa?
9 Cimati issi uri nagaran gelanaappe kase oottidobata eranawu baaxetoosona. Leemisuwawu, Yihoowara dabbotido dabbotay shugganaadan oottidabay aybee? I ubbatoo Geeshsha Maxaafaa xannaꞌiyogaa, woy haggaaziyogaa aggidee? I ubbatoo Yihoowa woossiyogaa aggidee? I iita amota eqettanawu baaxetiyogaa aggidee? I oonaara wodiya aattii, woy allaxxanawu dooriyobay aybee? I dooriyobati I ay qoppanaadaaninne koyanaadan oottidonaa? Mata wode I kuuyidobaaninne oottidoban A Aaway Yihooway ay keena azzanidaakko akeekii?
10 He uri Yihoowara dabbotido dabbotay shugganaadan oottidabatanne nagaraa oottanaadan gaaso gididabata qoppanaadan maaddanawu cimati oyshata oychchana danddayoosona. Cimati kehatettan hegaadan oottoosona; qassi eti erana koshshenna buzo allaalliya oychchokkona. (Lee. 20:5) Hegaa bollikka, Naataani Daawitawu leemisuwan yootidoogaadan cimati he uri oottidobay bala gidiyogaa I qoppanaadaaninne akeekanaadan maaddanawu eti leemisuwa goꞌettana danddayoosona. Eti nagaraa oottida uraara koyro gayttiyo wode, I ba oottidoban keehi azzanana danddayees. I ba nagaran zilꞌꞌettidi laamettana danddayees.
11. Yesuusi nagaranchchatuura gayttidaagan waatidee?
11 Cimati Yesuusa leemisuwa kaallanawu baaxetoosona. Yesuusi ha loꞌꞌo oyshaa oychchiyogan Phawuloosa maaddiis: “Saaꞌoolaa, Saaꞌoolaa, tana ayssi naaqqay?” Yesuusi ha oyshaa oychchiyogan Phawuloosi oottiyobay likke gidennaagaa I akeekanaadan maaddiis. (Oos. 9:3-6) Qassi Elzzaabeelo giyo maccaaseera gayttidaagankka Yesuusi hagaadan giis: “A ba nagaraappe simmana mala taani [xeellashshana.]”—Ajj. 2:20, 21.
12-13. Cimati nagaraa oottida uri zilꞌꞌetti laamettanawu wodee koshshiyogaa waati bessiyonaa? (Misiliyakka xeella.)
12 Cimati Yesuusa leemisuwa kaalliyo gishshawu, he uri ba qofaanne ba oosuwa laammanawu koyenna giidi sohuwara kuuyokkona. Issoti issoti cimatuura koyro gayttiyo wode bantta nagaran zilꞌꞌettidi laamettana danddayoosona; shin haratussi daro wodee koshshana danddayees. Hegaa gishshawu cimati nagaraa oottida uraara darotoo gayttanawu hanotaa giigissana danddayoosona. Nagaraa oottida issi Kiristtaanee cimatuura koyro gaytti simmidi eti awu yootidobata loytti qoppana danddayees. I bana ziqqi oottidi Yihooway A nagaraa atto gaanaadan oychchana danddayees. (Maz. 32:5; 38:18) Hegaa gishshawu, nagaraa oottida uray koyro gayttiyo wode bessido eeshshaappe dummatiya eeshshaa naaꞌꞌantto gayttiyo wode bessana danddayees.
13 Cimati nagaraa oottida uri ba nagaran zilꞌꞌettidi laamettana mala maaddanawu he urawu qarettananne kehana koshshees. Cimati Yihooway eta baaxiya anjjanaadan woossoosona; qassi bantta ishay ba balaa akeekidi ba nagaran zilꞌꞌettidi laamettanaagaa hidootoosona.—2 Xim. 2:25, 26.
Gita nagaraa oottida uri zilꞌꞌettidi laamettanawu wodiya demmana mala cimati issitooppe daruwa aara gayttana danddayoosona (Mentto 12 xeella)
14. Issi uri ba nagaran zilꞌꞌettidi laamettanaadan tumuppe maaddiyay oonee, qassi nuuni hegaadan giyoy aybissee?
14 Issi uri ba nagaran zilꞌꞌettidi laamettiyo wode nuuni keehi ufayttoos! (Luq. 15:7, 10) He uri ba nagaran zilꞌꞌetti laamettanaadan cimati banttawu danddayettida ubbabaa oottikkonne, I laamettanaadan tumuppe maaddiday oonee? Nagaranchchata xeelliyagan Phawuloosi xaafidobaa hassaya: ‘Eti bantta nagaraappe simmanaadan Xoossay oottiis.’ (2 Xim. 2:25) Hegaa gishshawu, issi Kiristtaanee ba qofaanne xeelaa laammanaadan oottiday Yihoowappe attin asa gidenna. Issi uri ba nagaran zilꞌꞌettidi laametti simmin haniya loꞌꞌobaa Phawuloosi qonccissiis. He uri tumaa loytti eriis, ba mooruwa akeekidi laamettiis, qassi Seexaanaa piriyappe kessi ekkiis.—2 Xim. 2:26.
15. Ba nagaran zilꞌꞌettidi laamettida uraa aggennan maaddanawu cimati oottana danddayiyobay aybee?
15 Issi uri ba nagaran zilꞌꞌetti laamettiyo wode, cimati I ba ammanuwa minttanaadan, Seexaanaa paaciya aggennan eqettanaadaaninne likkebaa oottanaadan maaddanawu ubbatoo A minttettoosona. (Ibr. 12:12, 13) Nagaranchcha uri oottidobaa cimati haratussi yootokkona. Shin galchchay erana koshshiyobay aybee?
“ASA UBBAA SINTTAN SEERA”
16. Koyro Ximootiyoosa 5:20n, Phawuloosi ‘asaa’ giidoogeeti oonee?
16 Koyro Ximootiyoosa 5:20 nabbaba. Phawuloosi banaara oottiya Ximootiyosi “asa ubbaa sinttan” nagaranchchata seeranaadan yootiis. Hegaa giyogee I kumetta galchchaa sinttan nagaranchchata seerana bessees giyogee? Gidennan aggana danddayees. I he nagaraa eriya amaridaageetubaa yootiiddi deꞌees. Eti beꞌidaageeta gidana danddayoosona woy he uri ba oottidobaa etawu yootennan aggenna. Cimati nagaraa oottida urawu seeray imettidoogaa etassi xalaala yootana danddayoosona.
17. Issi uri gita nagaraa oottidoogaa galchchan deꞌiya daroti erikko woy geella hegee sinttappe erettanaba gidikko odettana erissoy aybee, qassi aybissi?
17 Issi issitoo, issi uri gita nagaraa oottidoogaa galchchan deꞌiya daroti eroosona; woy eti hegaabaa sinttappe erennan waayi aggana. Hegaadan gidikko, ‘asaa’ giyagee galchchan deꞌiya ubba asaa bessiyaba. Hegaa gishshawu issi cimay he ishawu woy he michcheeyyo seeray imettidoogaa galchchawu erissees. Aybissi? Harati hegaabaa eridi gita nagaraa oottennaadan gidiyogaa Phawuloosi geeshshidi yootiis.
18. Layttay 18 kumibeenna issi naꞌi gita nagaraa oottikko cimati waatiyonaa? (Misiliyakka xeella.)
18 Layttay 18 kumibeenna issi naꞌi gita nagaraa oottikko cimati waatanee? Galchchaa cimatuppe naaꞌꞌati he naꞌaaranne Kiristtaane gidida A yelidaageetuura b haasayanawu hanotaa giigissoosona. Yelidaageeti bantta naꞌi koshshiyaban laamettanaadaaninne ba nagaraappe simmanaadan maaddanawu ay oottidaakko cimati oychchoosona. He naꞌi yelidaageeti yootiyo zoriya siyidi ba qofaanne eeshshaa laammikko, he naaꞌꞌu cimati cimatu konttee he naꞌaaranne A yelidaageetuura gayttana koshshenna giidi kuuyana danddayoosona. Bantta naata siiquwan seeriyogee Yihooway yelidaageetussi immido aawatetta gidiyogaa cimati eroosona. (Zaa. 6:6, 7; Lee. 6:20; 22:6; Efi. 6:2-4) Cimati he naꞌi koshshiya maaduwa demmiiddi deꞌiyakko shaakki eranawu yelidaageeta issi issitoo oychchoosona. Shin haattan muukettida naꞌi iitabaa oottiyogaa aggennaba gidikko cimati waatanee? Hegaadan gidikko heezzu cimati aaranne Kiristtaane gidida A yelidaageetuura gayttidi haasayoosona.
Layttay 18 kumibeenna issi naꞌi gita nagaraa oottikko naaꞌꞌu cimati aaranne Kiristtaane gidida A yelidaageetuura gayttidi haasayoosona (Mentto 18 xeella)
“GODAI MAAROTAINNE QARETAI KUMIDOOGAA”
19. Cimati gita nagaraa oottida issi uraara gayttiyo wode Yihoowa leemisuwa kaallanawu waati baaxetana danddayiyonaa?
19 Yihooway ba azazota kaallennaageetuppe cimati galchchaa naaganaadan koyees. (1 Qor. 5:7) Shin danddayettida keenan, issi uri ba nagaran zilꞌꞌettidi laamettanaadan maaddanawu cimati minni oottoosona. Qassi eti he uraa maaddiyo wode I laamettanaagaa ubbatoo hidootoosona. Aybissi? Eti ‘maarotaynne qaretay kumido’ Yihoowa milatanawu koyiyo gishshataassa. (Yaaq. 5:11) Layttan sugida kiitettida Yohaannisi Yihoowa leemisuwa waati kaallidaakko beꞌa. I hagaadan giis: “Ta naatoo, nagara intte oottennaadan, taani hagaa intteyyo xaafais; shin ooninne nagara oottikko, Aawaa matan nuuyyo gaannatiya Yesuus Kiristtoosi, Xilloi, de7ees.”—1 Yoh. 2:1.
20. Ha Wochchiyo Keelaa wurssetta huuphe yohuwan ay beꞌanee?
20 Issi Kiristtaanee ba nagaran zilꞌꞌettidi laamettanawu koyenna wodeti deꞌiyogee azzanttiyaba. Yaatikko galchchaappe A kessana koshshees. Hegaa malabay hanikko cimati waatiyonaa? Ha Wochchiyo Keelaa wurssetta huuphe yohuwan ha allaalliya beꞌana.
MAZAMURE 103 Henttanchata—Imota Gidida Asata
a Hageeti kase pirdda konttiya geetettoosona. Shin pirddiyogee eta ooso macaratuppe issuwa xalaala gidiyo gishshawu nuuni hagaappe simmin hegaadan gookko. Nuuni eta cimatu konttiya giidi xeesana.
b Yelidaageeta xeelliyagan odettidabay dichchanaadan maatay imettidoogeetuyyo woy bantta naꞌa gidenna naꞌa dichchiya haratuyyokka hanees.
