1-2. (a) Gita nagaraa oottidi zilꞌꞌetti laamettibeennaageeta xeelliyagan Yihoowa qofay aybee? (b) Nagaranchchati waananaadan Yihooway koyii?

 YIHOOWAY ubba qommo eeshshan ufayttenna. I nagaraa ixxees. (Maz. 5:4-6) Geeshsha Maxaafan deꞌiya azazota nuuni azazettanaadan Yihooway koyees. Gidikkonne, nuuni nagaranchcha gidiyogaanne wottiyobi baynna ogiyan awu azazettana danddayennaagaa Yihooway erees. (Maz. 130:3, 4) Qassi I ‘ba aaro kehatettaabaa yootiya kiitaa shaaramuxatettawu geellayidi tamaarissiya’ nagaranchchata xaasayi xeellenna. (Yih. 4) Armmageedoona olan, “Xoossau goinnenna asati” xayanaagaa Geeshsha Maxaafay yootees.—2 PHe. 3:7; Ajj. 16:16.

² Shin, Yihooway ooninne xayanaadan koyenna. Geeshsha Maxaafay geeshshidi yootiyogaadan, I “ooninne ba nagaraappe simmanaadan [koyiyogaa]” ha Wochchiyo Keelan beꞌida. (2 PHe. 3:9) Cimati nagaraa oottida uri zilꞌꞌettidi laamettanaadaaninne zaarettidi Yihoowakko shiiqanaadan maaddiyo wode Yihoowagaadan danddayanchcha gidanawu baaxetoosona. Shin nagaraa oottida uri issi issitoo ba nagaran zilꞌꞌettidi laamettenna. (Isi. 6:9) Cimati nagaraa oottida uraa maaddanawu  darotoo baaxetikkokka, issoti issoti iitabaa oottiyogaa aggokkona. Yaatin cimati waatana koshshii?

“IITABAA OOTTIDA BITANIYA . . . KESSITE”

3. (a) Ba nagaran zilꞌꞌettidi laamettenna uraa waatana koshshiyogaa Geeshsha Maxaafay yootii? (b) Issi uri ba nagaran zilꞌꞌettidi laamettanawu koyennaba gidikko, I galchchaappe kiyanawu kuuyiis nuuni giyoy aybissee?

³ Nagaraa oottida uri zilꞌꞌettidi laamettana xayikko cimati 1 Qoronttoosa 5:13n “iitabaa oottida bitaniya intte giddoppe kessite” giya zoriya oosuwan peeshshan koshshees. Nagaraa oottida uri zilꞌꞌettidi laamettana xayikko, galchchaappe kiyanaagaa erees. Yaatiyo gishshawu, he uri galchchaappe kiyanawu kuuyiis giyogaa mala. I a ba zeridobaa zaarettidi cakkees. (Gal. 6:7) Nuuni hegaadan gaana danddayiyoy aybissee? Cimati A maaddanawu darotoo baaxetikkokka, I laamettennan ixxido gishshataassa. (2 Kaw. 17:12-15) Yihoowa azazuwa azazettanawu koyennaagaa I ba oosuwan bessiis.—Zaa. 30:19, 20.

4. Ba nagaran zilꞌꞌettidi laamettibeenna ura galchchaappe kessiyo wode, erissoy odettana koshshiyoy aybissee?

⁴ Ba nagaran zilꞌꞌettidi laamettibeenna ura galchchaappe kessiyo wode, he uri hegaappe simmin Yihoowa Markka gidennaagee galchchawu odettees. b Erissoy odettiyo halchchoy he uraa yeellayanaassa gidenna. Hegaa halchchoy ishanttinne michchontti he uraara ‘zuppetiyogaa agganaadan, haray atto qumaakka meennaadan’ yootiya Geeshsha Maxaafaa azazuwa azazettanaadaana. (1 Qor. 5:9-11) Yihooway ha azazuwa nuussi immido loꞌꞌo gaasoy deꞌees. Kiitettida Phawuloosi hagaadan giis: ‘Guutta irshshoy munaqan ubbasaa gakkees.’ (1 Qor. 5:6) Ba nagaran zilꞌꞌetti laamettibeenna ura galchchaappe kessana xayikko, harati Yihoowa azazuwa azazettana koshshennabadan qoppana danddayoosona.—Lee. 13:20; 1 Qor. 15:33.

5. Galchchaappe kiyida ura nuuni waati xeellana koshshii, qassi aybissi?

⁵ Galchchaappe kiyida nu mala Kiristtaaniya nuuni waati xeellana koshshii? Nuuni aara zuppetana xayikkokka, hidooti baynnabadan gidennan, bayida dorssadan A xeellana koshshees. Issi dorssay bayikko, zaarettidi wudiyakko simmana danddayees. He bayida dorssay bana Yihoowawu sheedhdhidoogaa hassaya. I Yihoowawu ammanettidi deꞌanawu gelido qaalaa naagibeennaagee azzanttiyaba. (Hiz. 18:31) Shin wodee deꞌiyo gishshawunne Yihooway maarana koyiyo gishshawu, he uri laamettanaagaa nuuni hidootoos. Yaatiyo gishshawu, galchchaappe kiyida ura cimati waati maaddana danddayiyonaa?

CIMATI GALCHCHAAPPE KIYIDAAGEETA WAATI MAADDIYONAA?

6. Galchchaappe kiyida ura maaddanawu cimati waatiyonaa?

⁶ Issi uraa galchchaappe kessiyo wode I Yihoowakko simmanaadan cimati A maaddanawu baaxetiyogaa aggiyonaa? Chii aggokkona! Cimati he ura galchchaappe kessidoogaa yootiyo wode I galchchawu simmanawu waatana koshshiyakkokka odoosona. Shin cimati oottiyobay hegaa xalla gidenna. Daro hanotatun, cimati galchchaappe kiyida uri ba qofaa laammidaakkonne akeekanawu amarida aginaappe simmin zaarettidi aara gayttanaagaa yootoosona. Amarida aginaappe simmin he uri cimatuura zaaretti gayttanawu maayettikko, I ba nagaran zilꞌꞌettidi laamettanaadan eti A minttettoosona. He uri cimatuura zaarettidi gayttiyo wodekka ba nagaran  zilꞌꞌetti laamettana xayikko, eti sinttappe zaarettidi aara gayttanawu baaxetananne I zilꞌꞌettidi laamettanaadan minttettana.

7. Issi uri galchchaappe kiyiyo wode cimati Yihoowagaadan qarettiyogaa waati bessana danddayiyonaa? (Ermmaasa 3:12)

⁷ Cimati galchchaappe kiyidaageetussi qarettiya Yihoowa leemisuwa kaalloosona. Leemisuwawu, beni wode, Yihooway ba asay Israaꞌeelati bantta nagaran zilꞌꞌettidi laamettana gakkanaashin naagennan I eta maaddiis. Eti bantta nagaran zilꞌꞌettidi laamettana xayikkokka, Yihooway ba erissidobaa yootiyageeta etakko kiittiis. Hooseꞌi ba machchiya gita nagaraa oottiyogaa aggana xayikkokka, iyyo atto gaanaadaaninne O zaarettidi ekkanaadan Yihooway awu yootidoogaa ha Wochchiyo Keelan naaꞌꞌantto huuphe yohoy qonccissiis. Yaatiyogan Yihooway qarettiyagaa gidiyogaa ba asaa tamaarissiis. (Hoo. 3:1; Mil. 3:7) Cimati Yihoowa leemisuwa kaalliyogan nagaraa oottida uri simmanaadan wozanappe koyoosona; qassi I metootennan simmanaadan maaddoosona.—Ermmaasa 3:12 nabbaba.

8. Yesuusi bayida naꞌaabaa yootido taarikee galchchaappe kiyidaageeta xeelliyagan Yihoowa qofaa loytti akeekanaadan nuna waati maaddii? (Luqaasa 15:7)

⁸ Bayida naꞌaabaa yootiya leemisuwan A aaway waanidaakko hassaya. Aaway ba naꞌaa beꞌosaara, “woxxi biidi A qoommidi yeriis.” (Luq. 15:20) Aaway ba naꞌay maarotaa oychchana gakkanaashin naagibeennaagaa akeeka. Aaway ba naꞌaa siiqiyo gishshawu, woxxidi akko biis. Bayidaageetuura gayttidaagan cimati hegaadan oottanawu baaxetoosona. Yihoowawu haggaaziyogaa aggidaageeti simmanaadan eti koyoosona. (Luq. 15:22-24, 32) Nagaraa oottida uri simmiyo wode, saluwan deꞌiyageetikka, saꞌan deꞌiyageetikka keehi ufayttoosona!—Luqaasa 15:7 nabbaba.

9. Nagaraa oottidaageeti waananaadan Yihooway koyii?

⁹ Hanno gakkanawu nuuni tamaaridoogaadan, bantta nagaran zilꞌꞌettidi laamettanawu koyennaageeti galchchaa yame gididi deꞌanaadan Yihooway koyenna. Gidikkonne, I eta maaddanawu koyees. Eti simmanaadan I koyees. Qassi asay ba nagaran zilꞌꞌetti laamettiyo wode, Yihoowawu siyettiyabaa akeeka. Hoose7a 14:4y hagaadan gees: “Ta hanqqoi etappe simmiis; hegaa gishshau, taani eta makkala hanuwaappe eta pattana; pattada eta wozanappe siiqana.” Cimati Yihoowawu siyettiyabaa akeekiyogee issi uri ba nagaran zilꞌꞌettidi laamettiyogaa doommidoogaa bessiyabaa akeekanawu baaxetanaadan maaddees. Qassi hegee Yihoowawu haggaaziyogaa aggidaageeti sohuwara akko simmanaadan denttettiyaba.

10-11. Galchchaappe kiyidi takkidaageeta maaddanawu cimati waati baaxetiyonaa?

¹⁰ Galchchaappe kiyidi takkidaageeta, geella daro laytta gididoogeeta maaddanawu cimati waati baaxetiyonaa? Hegaa mala asati eti galchchaappe kiyanaadan gaaso gididabaa oottiyogaa aggidaageeta gidana danddayoosona. Issi issi hanotatun, eti galchchaappe kiyidoy aybissakko hassayennan aggana danddayoosona. Hanotay ayba gidikkonne, cimati hegaa mala asata demmidi minttettanawu baaxetoosona. Cimati etaara gayttiyo wode issippe woossoosonanne eti galchchawu simmanaadan minttettoosona. Issi uri daro layttawu galchchaappe haakkidi takkikko, I zaarettidi Yihoowabaanne Geeshsha Maxaafaa tumaa tamaarana koshshees. Yaatiyo gishshawu, I galchchawu simmanawu koyiyogaa yootikko, galchchawu I simmiichchibeennaba gidikkokka, issi uri A Geeshsha Maxaafaa xannaꞌissanaadan cimati hanotaa giigissana danddayoosona. Ubba hanotatunkka,  cimati Geeshsha Maxaafaa xannaꞌissiya ura dooroosona.

¹¹ Cimati Yihoowagaadan asaa siiqanawu baaxetoosona. Yaatiyo gishshawu, eti Yihoowawu haggaaziyogaa aggidaageeta ubbaa demmidi Yihoowakko simmanaadan minttettanawu koyoosona. Issi uri ba nagaran zilꞌꞌettidi laamettidoogaa bessikko, qassi ba iitaa oosuwa aggikko, sohuwara galchchawu simmana danddayees.—2 Qor. 2:6-8.

12. (a) Cimati keehi naagettana koshshiyo hanotati awugeetee? (b) Gita nagaraa oottida issotu issotussi Yihoowa maarotay bessenna giidi nuuni qoppana koshshennay aybissee? (Tohossa qofaakka xeella.)

¹² Issi issi hanotatun, cimati issi uri galchchawu simmanaadan paqqadanaappe kase  keehi naagettana koshshees. Leemisuwawu, issi uri mattumaara gayttidaagan naꞌa qohikko, woy kaddidaagaa gidikko, woy ba aqo deꞌuwa laalanawu qoppidi geella wodiraa laamikko, I tumuppe ba nagaran zilꞌꞌetti laamettidaakkonne cimati shaakki erana koshshees. (Mil. 2:14; 2 Xim. 3:6) Eti galchchan deꞌiya ishanttanne michchontta qohuwappe naagana koshshees. Qassi tumuppe ba nagaran zilꞌꞌettidanne ba iita oosuwa aggida oonanne Yihooway mokki ekkanaagaa nuuni akeekana koshshees. Yaatiyo gishshawu, cimati harata balettiya uri tumuppe ba nagaran zilꞌꞌetti laamettidoogaa eranawu koyikkokka hegaa mala urawu Yihoowa maarotay mule bessenna giidi qoppana koshshenna. c—1 PHe. 2:10.

GALCHCHAY OOTTANA DANDDAYIYOBATA

13. Cimati seeraa immido uraa hanotay galchchaappe kiyida uraa hanotaappe aybin dummatii?

¹³ Kasetiya huuphe yohuwan nu beꞌidoogaadan, issi urawu seeray imettidoogee galchchawu issi issitoo odettees. Hegaa mala hanotatun, he uri ba nagaran zilꞌꞌettidi laamettidoogaanne ba iita oosuwa aggidoogaa nuuni eriyo gishshawu, aara ubbatoo hashetana danddayoos. (1 Xim. 5:20) I haꞌꞌikka galchchaa yame gidiyo gishshawu, I aggennan suurebaa oottanaadan ishanttuppenne michchonttuppe awu minttettoy koshshees. (Ibr. 10:24, 25) Shin galchchaappe kiyida uraa hanotay hegaara issi mala gidenna. Nuuni he uraara ‘zuppetiyogaa aggoos, haray atto qumaakka mookko.’—1 Qor. 5:11.

14. Galchchaappe kiyidaageetuura gayttidaagan Kiristtaaneti Geeshsha Maxaafan loohida bantta kahaa waati goꞌettana danddayiyonaa? (Misiliyakka xeella.)

¹⁴ Koyro Qoronttoosa 5:11n deꞌiya kaaletoy galchchaappe kiyida uraa nuuni shiiquwa shoobbana woy I shiiquwa yiikko sarotana danddayennaagaa yootii? Chii, gidenna. Nuuni aara zuppetennaagee qoncce. Shin Kiristtaaneti galchchaappe kiyida uri eta dabbo woy kase eta lagge gidikko, I shiiquwa shiiqanaadan shoobbanawu woy agganawu Geeshsha Maxaafan loohida bantta kahaa goꞌettidi kuuyana danddayoosona. I shiiquwa yiikko shin? Hegaa mala uraa beni sarotokko. Shin  hegaara gayttidaagankka Geeshsha Maxaafan loohida kahan ubba Kiristtaaneti banttawu kuuyoosona. Amaridaageeti he uri shiiquwa yiyo wode, sarotanawu woy mokki ekkanawu doorana danddayoosona. Shin he uraara nuuni darobaa haasayana woy wodiya aattana koshshenna.

15. Naa77antto Yohaannisa 9-11​n odettidaageeti ay mala nagaraa oottidonaa? (“ Yohaannisinne Phawuloosi Yootido Nagaray Issi Malee?” giya saaxiniyakka xeella.)

¹⁵ Gita nagaraa oottida amaridaageeta nuuni sarotana koshshennaagaa Geeshsha Maxaafay yootees. Nuuni hegaa mala ura sarotikko A ‘iita oosuwan aara hashetoos.’ (2 Yohaannisa 9-11 nabbaba.) Shin ha xiqisiya yuushuwan deꞌiya qofay he uri kaddidaagaa woy Geeshsha Maxaafay bala giidi yootiyobaa harati oottanaadan ammanttanawu baaxetiyagaa gidiyogaa qonccissees. (Ajj. 2:20) Hegaa gishshawu, issi uri kaddidaageetu timirttiya woy hara iita oosota aassiyagaa gidikko, cimati A oychchanawu bookkona. Gidikkonne, he uri ba nagaran zilꞌꞌettidi laamettana danddayees. Shin hegaa mala uri ba nagaran zilꞌꞌettidi laamettana gakkanaashin nuuni A sarotokko woy galchchaa shiiquwa yaanaadan shoobbokko.

QARETTIYOGAANINNE MAARIYOGAN YIHOOWA LEEMISUWA KAALLA

16-17. (a) Nagaranchchati waananaadan Yihooway koyii? (Hizqqeela 18:32) (b) Cimati gita nagaraa oottidaageeta maaddanawu baaxetiyo wode Yihoowara waati oottana danddayiyonaa?

¹⁶ Ha Wochchiyo Keelan nuuni ay tamaaridoo? Yihooway ooninne xayanaadan koyenna! (Hizqqeela 18:32 nabbaba.) I nagaranchchati aara sigettanaadan koyees. (2 Qor. 5:20) Yihooway baayyo haggaaziyogaa aggida ba ashkkarati bantta nagaran zilꞌꞌettidi laamettanaadaaninne baakko simmanaadan ubbatoo minttettiyoy hegaassa. Cimati gita nagaraa oottidaageeti bantta nagaran zilꞌꞌettidi laamettanaadan maaddiyogan Yihoowara oottoosona.—Roo. 2:4; 1 Qor. 3:9.

¹⁷ Nagaraa oottidaageeti bantta nagaran zilꞌꞌettidi laamettiyo wode, saluwan deꞌiyageeti ay keena ufayttiyakko qoppa! Saluwan deꞌiya nu Aaway bayida dorssay galchchawu simmiyo wode ubban keehi ufayttees. Nuuni Yihoowa qaretaa, A maarotaanne laggetiyabi baynna A kehatettaa wotti dentti qoppiyogee nuuni kaseegaappe aaruwan A siiqanaadan oottees.—Luq. 1:78.