1. Ubba asay waananaadan Yihooway koyii?

 YIHOOWAY asay ba koyidobaa dooranaadan oottidi medhdhiis. Neeni issibaa kuuyiyo wode ubbatoo he imotaa goꞌettaasa. Issi uri kuuyiyo aybippenne aadhdhiyabay bana Yihoowawu sheedhdhidi A soo asaa yara gidiyogaa. Yihooway ubba asay hegaadan oottanaadan koyees. Aybissi? I asaa siiqiyonne etawu keehi loꞌꞌobaa amottiyo gishshataassa. Eti aara dabbotanaadaaninne merinawu deꞌanaadan I koyees.—Zaa. 30:19, 20; Gal. 6:7, 8.

2. Zilꞌꞌetti laamettiichchibeennaageeti waananaadan Yihooway koyii? (1 Yohaannisa 2:1)

² Gidikkonne, bawu haggaazanaadan Yihooway oonanne wolqqanttenna. I ubba asay ba koyiyobaa kuuyanaadan paqqadiis. Haattan muukettida issi Kiristtaanee gita nagaraa oottiyogan Xoossaa higgiya kanttikko shin? I ba nagaran zilꞌꞌettidi laamettana xayikko galchchaappe A kessana koshshees. (1 Qor. 5:13) Shin Yihooway he uri galchchaappe kiyikkokka, ba nagaran zilꞌꞌetti laamettidi aara zaaretti dabbotanaadan koyees. Yihooway wozuwa giigissido waanna gaasoy bantta nagaran zilꞌꞌettidi laamettiyageetussi atto gaanaassa. (1 Yohaannisa 2:1 nabbaba.) Yihooway gita nagaraa  oottidaageeti zilꞌꞌettidi laamettanaadan shoobbiya, siiqiya Xoossa.—Zak. 1:3; Roo. 2:4; Yaaq. 4:8.

3. Nuuni ha huuphe yohuwan beꞌanabay aybee?

³ Yihooway gita nagaraanne gita nagaraa oottidaageeta xeelliyagan nuuni aagaadan qoppanaadan koyees. Ha huuphe yohoy nuuni hegaadan oottana danddayiyo ogeta yootees. Neeni ha huuphe yohuwa nabbabiyo wode, (1) koyro xeetu layttan Qoronttoosa galchchay gita nagaraa oottida uraa waati oyqqidaakko, (2) gita nagaraa oottida uri zilꞌꞌettidi laamettido wode kiitettida Phawuloosi immido kaaletoy aybakko, qassi (3) gita nagaraa oottida Kiristtaaneta xeelliyagan ha taarikee Yihoowa qofaa waati qonccissiyakko akeeka.

ISSI ISHAY GITA NAGARAA OOTTIDO WODE HANIDABAY AYBEE?

4. Qoronttoosa galchchan hanidabay aybee? (1 Qoronttoosa 5:1, 2)

⁴ Koyro Qoronttoosa 5:1, 2 nabbaba. Phawuloosi heezzantto misoonaawe buussan, Qoronttoosan mati eqqida galchchan iitabaa siyiis. He galchchan deꞌiya issi ishay ba aawaa machcheera zinꞌꞌees. Xoossawu goynnenna asaykka hegee bala gidiyogaa erees! Galchchay he ishay oottidobaa xaasayi xeelliyogaa xalla gidennan, hegan ceeqettiis. Galchchan deꞌiya amaridaageeti nagaranchchata maariya Yihoowa leemisuwa kaallidabadan qoppennan aggokkona. Shin Yihooway ba asay oottiyo gita nagaraa xaasayi xeellenna. He bitanee oottido pokkiya tuna nagaraa gaasuwan galchchaa sunttay moorettidoogee qoncce. I galchchaa yara gididi takkikko, hara Kiristtaaneti A leemisuwa kaallana danddayoosona. Yaatin galchchay waatanaadan Phawuloosi yootidee?

5. Galchchay waatanaadan Phawuloosi yootidee, qassi I woyganawu koyidee? (1 Qoronttoosa 5:13) (Misiliyakka xeella.)

⁵ Koyro Qoronttoosa 5:13 nabbaba. Ba nagaran zilꞌꞌettidi laamettibeenna he bitaniya galchchaappe kessana koshshiyogaa Phawuloosi ayyaanay kaalettin xaafiis. Ammanettida Kiristtaaneti waatana koshshidee? Eti aara ‘zuppetiyogaa agganaadan’ Phawuloosi yootiis. Hegee woygiyogee? Phawuloosi “he bitaniyara haray atto qumaakka [meennaadan]” azaziis. (1 Qor. 5:11) Issi uraara qumaa miyogee aara laggetanaadan oottana danddayees. Hegaa gishshawu Phawuloosi he uraara galchchay wodiya aattana koshshennaagaa yootana koyidoogee qoncce. Hegee galchchay A iita oosuwappe naagettanaadan maaddees. (1 Qor. 5:5-7) Qassi hegee  I Yihoowa ay keena qohidaakko akeekanaadan, ba oottidoban azzananaadaaninne ba nagaran zilꞌꞌettidi laamettanaadan maaddana danddayees.

6. Phawuloosi dabddaabbiya kiittin galchchay waatidee, qassi nagaraa oottida bitanee waanidee?

⁶ Phawuloosi Qoronttoosan deꞌiya Kiristtaanetussi dabddaabbiya kiitti simmidi he galchchay waataneeshsha giidi qoppiyogaa doommiis. Guyyeppe, Tiitu Phawuloosa keehi ufayssiyabaa yootiis. Galchchay Phawuloosi azazidobaa oosuwan peeshshidi nagaraa oottida uraa kessiis. (2 Qor. 7:6, 7) Qassi Phawuloosi ba dabddaabbiya kiittin amarida aginatuppe simmin, he nagaranchchay zilꞌꞌettidi laamettiis! I ba oosuwanne eeshshaa laammidi Yihooway kessido xillotettaa maaraadan deꞌiyogaa doommiis. (2 Qor. 7:8-11) Phawuloosi galchchay oottanaadan yootido harabay aybee?

 BA NAGARAN ZILꞌꞌETTIDI LAAMETTIDA URAA GALCHCHAY WAATANA KOSHSHIDEE?

7. Galchchaappe kessi simmin he bitanee oottidobay aybee? (2 Qoronttoosa 2:5-8)

⁷ Naaꞌꞌantto Qoronttoosa 2:5-8 nabbaba. Phawuloosi, “Intteppe dariya bagga asai he bitaniyaa mala asa hegaadan qaxxayikko, he qixaatee ayyo gidana” yaagiis. Hegaa giyogee nagaraa oottida ura galchchaappe kessi simmin, I zilꞌꞌettidi laamettana koshshiyogaa akeekiis giyogaa. Qassi I zilꞌꞌettidi laamettido gishshawu ubbatoo A seerana koshshenna.—Ibr. 12:11.

8. Phawuloosi galchchay oottanaadan yootido harabay aybee?

⁸ He bitanee zilꞌꞌettidi laamettido gishshawu, I galchchawu simmanaadan paqqadana mala cimatussi Phawuloosi yootiis. Hegaa bollikka, eti ‘awu atto gaanaadaaninne A minttettanaadan,’ qassi eti ‘A mintti siiqana’ mala yootiis. Ishantti haasayiyobaaninne oottiyoban awu tumuppe atto giidoogaanne A siiqiyogaa bessanaadan Phawuloosi koyiis. Hegaappe denddidaagan, he ishay I galchchawu simmidoogan eti ufayttidoogaa ammanettana danddayees.

9. Ba nagaran zilꞌꞌettidi laamettida urawu issoti issoti atto gaanawu mammottidoy aybissa gidana danddayii?

⁹ Galchchan deꞌiya amaridaageeti nagaran zilꞌꞌettidi laamettida uraa kehatettan mokkanawu mammottidonaa? Geeshsha Maxaafay hegaabaa yootana xayikkonne, eti mammottennan aggokkona. I galchchan metoy merettanaadan oottido gishshawu issoti issoti hanqqettiyogaa waayi aggana. Qassi I oottidoban qohettida harati unꞌꞌettiyogaa waayi aggana. Galchchan deꞌiyageeti Yihoowa azazuwa kaallanawu keehi baaxetidosona. Hegaa gishshawu, issoti issoti hegaa mala iitabaa oottida uri galchchawu simmanaadan paqqadiyogee bessennaba giidi qoppana danddayoosona. (Luqaasa 15:28-30​ra gatta xeella.) Shin galchchan deꞌiyageeti ba nagaran zilꞌꞌettidi laamettida bantta ishaa siiqiyogaa bessiyogee keehi koshshiyoy aybissee?

10-11. Ba nagaran zilꞌꞌettidi laamettida urawu cimati atto geennan ixxikko aybi hanana danddayii?

¹⁰ Tumuppe zilꞌꞌettidi laamettida uri galchchawu simmennaadan cimati diggikko woy I galchchawu simmin harati awu siiquwa bessana xayikko, ayyo aybi siyettana danddayiyakko qoppa. He bitanee ‘keehi daro azzanana’ danddayiyogaa Phawuloosi yootiis. I zaarettidi Yihoowawu mule haggaazennabadan qoppana danddayees. I Xoossaakko shiiqanawu baaxetiyogaakka aggana danddayees.

¹¹ Ishanttinne michchontti ba nagaran zilꞌꞌettidi laamettida urawu atto geennan ixxikko, hanana danddayiya harabay aybee? Eti Yihoowara dabbotido dabbotay moorettana danddayees. Aybissi? Bantta nagaran zilꞌꞌettidi laamettiyageetussi atto giya Yihoowa leemisuwa kaalliyogaa aggidi, meqettaa iitanne maaroti baynna Seexaanaa leemisuwa eti kaalliyo gishshataassa. Dabloosi he uri Yihoowawu haggaaziyogaa agganaadan oottanawu etan goꞌettana mala eeno goosona.—2 Qor. 2:10, 11; Efi. 4:27.

12. Galchchay Yihoowa leemisuwa waati kaallana danddayii?

¹² Yaatin Qoronttoosa galchchay Seexaanaa leemisuwa gidennan, Yihoowagaa waati kaallana danddayii? Bantta nagaran zilꞌꞌettidi laamettidaageetussi Yihoowagaadan atto giyogaana. Geeshsha Maxaafaa xaafida amaridaageeti Yihoowabaa woygidaakko akeeka. I “kehanne atto giyaagaa” gidiyogaa Daawiti yootiis. (Maz. 86:5) Mikiyasi hagaadan giis: “Naaquwaa atto yaagiyaagee,  . . . makkalaa qoodennaagee ne mala Xoossai oonee?” (Mik. 7:18) Qassi Isiyasi hagaadan giis: “Iitai ba oosuwaa, nagaranchchaikka ba qofaa aggo; GODAAKKO i simmo. Simmin i a maarana. I nu Xoossaakko simmo. Simmin i ayyo coo atto gaana.”—Isi. 55:7.

13. Ba nagaran zilꞌꞌettidi laamettida uri galchchawu simmanaadan paqqadiyogee bessiyaba gidiyoy aybissee? (“ Qoronttoosa Galchchaappe Kiyida Bitanee Awude Simmidee?” giya saaxiniya xeella.)

¹³ Qoronttoosa galchchay Yihoowa leemisuwa kaallanawu he bitaniyawu atto gaananne A siiqiyogaa bessana koshshiis. Eti ba nagaran zilꞌꞌetti laamettida urawu atto giikko, ‘ubbaban azazettiyogaa’ Phawuloosi yootiis. (2 Qor. 2:9) He bitanee galchchaappe kiyin amarida agina xalaalay aadhdhikkokka, zilꞌꞌettidi laamettiis. Hegaa gishshawu, cimati I galchchawu simmanaadan paqqadanawu takkana koshshenna.

SUURE PIRDDIYOGAANINNE MAARIYOGAN YIHOOWA MILATIYOGAA

14-15. Qoronttoosan hanidabaappe nuuni ay tamaarana danddayiyoo? (2 PHeexiroosa 3:9) (Misiliyakka xeella.)

¹⁴ Beni Qoronttoosan hanidabaa yootiya taarikee “nuna tamaarissanawu” Geeshsha Maxaafan xaafettiis. (Roo. 15:4) Yihooway ba asay oottiyo gita nagaraa xaasayi xeellennaagaa ha taarikiyappe tamaaroos. Yihooway maariyagaa gidiyo gishshawu nagaraa  oottidi laamettibeenna issi uri galchchaa yara gididi deꞌanaadan paqqadees giidi issoti issoti qoppana danddayoosona; shin Yihooway maarotaa bessiyo ogee hegaadaana gidenna. Yihooway maariyagaa gidikkokka, ubba qommo eeshshan ufayttenna. Likkenne likke gidennabaa xeelliyagan I kessido maarata laammenna. (Yih. 4) Ba nagaran zilꞌꞌettidi laamettibeenna issi uri galchchaa yara gididi deꞌanaadan Yihooway paqqadikko, hegee galchchay qohettanaadan oottana danddayiyo gishshawu maarotaa bessiyaba gidenna.—Lee. 13:20; 1 Qor. 15:33.

¹⁵ Gidikkokka, Yihooway ooninne xayanaadan koyennaagaa eroos. Danddayettiyo wode ubban asay attanaadan I koyees. I bantta qofaaninne oosuwan laamettida asata maareesinne eti aara zaaretti dabbotanaadan koyees. (Hiz. 33:11; 2 PHeexiroosa 3:9 nabbaba.) Hegaa gishshawu Qoronttoosa galchchan deꞌiya bitanee zilꞌꞌetti laamettidi ba eeshshaa giigissido wode yan deꞌiyageeti awu atto gaanaadaaninne A mokki ekkanaadan Yihooway azaziis.

16. Qoronttoosa galchchan hanidabaappe Yihoowabaa ay tamaaradii?

¹⁶ Qoronttoosa galchchan hanidabay Yihooway siiqiyagaa, xillonne suure pirddiyagaa gidiyogaa bessees. (Maz. 33:5) Hegaa eriyogee A kaseegaappe aaruwan sabbanawu koyanaadan oottees. I maariyagaa gidiyo gishshawu nuuni keehi galatoos; ayssi giikko nuuni ubbay nagaranchcha, qassi A maarotay nuussi koshshees. Yihooway nu nagaraa atto gaanawu wozuwa giigissido gishshawukka keehi galatoos. Yihooway ba asaa loytti siiqiyogaanne etawu loꞌꞌobaa amottiyogaa eriyogee keehi minttettiyaba!

17. Kaalliya huuphe yohotun ay beꞌanee?

¹⁷ Ha wodiyan issi uri gita nagaraa oottikko, galchchaa cimati Yihoowagaadan siiqiyogaa waati bessana danddayiyonaa? Qassi he uri zilꞌꞌettidi laamettanaadan waati maaddana danddayiyonaa? Cimati issi uri galchchaappe kiyanaadan woy galchchawu simmanaadan kuuyiyo wode ishanttinne michchontti waatana koshshii? Ha oyshata kaalliya huuphe yohotun beꞌana.