Kiitettida Phawuloosi Tasalonqqen deꞌiya Kiristtaanetussi hagaadan giis: “Nuuni ha dabddaabbiyan kiittido kiitaayyo azazettenna urai ooninne de7ikko, he uraa akeekite [woy appe naagettite.]” (2 Tas. 3:14) Nuuni ha kaaletoy cimatussi imettiis giidi kase yootida. Issi urawu darotoo zoree imettikkokka Geeshsha Maxaafay yootiyo maaraa ubbatoo I kaallennan ixxikko, cimati galchchaa akeekissanawu haasayaa haasayana danddayoosona. Hegaappe simmin, aassiyageeti aara zuppetokkona.

Shin, nu kase akeekidobaa laammana koshshiis. Issi issi hanotatuppe denddidaagan Phawuloosi zoridobay galchchan deꞌiya ubbay kuuyana bessiyabaa qonccissiyogaa nuuni haꞌꞌi akeekida. Hegaa gishshawu, cimati galchchaa akeekissanawu haasayaa haasayana koshshenna. Ayssi laamettidee? Phawuloosi immido zoriyawu yuushuwan deꞌiya qofaa ane pilggoos.

He galchchan amaridaageeti “azalla” woy maari baynna deꞌuwa deꞌiyogaa Phawuloosi yootiis. Ayyaanay denttettin imettida zoriya eti siyibookkona. Eta I koyro xomoosido wode hagaadan giidi azaziis: “Oottanau koyenna urai ooninne mooppo.” Oottanawu danddayikkonne, issoti issoti banttawu koshshiyabaa kunttanawu oottana koyokkona. Qassi eti haratu yohuwan geloosona. Hegaa mala azallata Kiristtaaneti waatana koshshii?—2 Tas. 3:6, 10-12.

Phawuloosi, “He uraa akeekite” yaagiis. Ha Giriiketto qaalay hegaa mala ura shaakki eridi nuuni A qohuwappe naagettana koshshiyogaa qonccissees. Phawuloosi cimatussi xalla gidennan, galchchan deꞌiya ubbatussi ha zoriya yootiis. (2 Tas. 1:1; 3:6) Hegaa gishshawu, Kiristtaaneti ubbay issi ishay woy michchiya Xoossaa Qaalay yootiyo zoriya azazettennan ixxiyogaa akeekidi he maari baynna urappe eti ‘shaahettanawu’ doorana danddayoosona.

Nuuni he ura galchchaappe kiyida uradan xeellana bessii? Chii, Phawuloosi hagaadan giis: ‘Ishadan A seerite.’ Yaaniyo gishshawu, ubba Kiristtaanetikka hegaa mala uraara shiiqota shiiqananne haggaazana danddayikkonne, aara allaxxanawu wodiya aattana koshshenna. Aybissi? Phawuloosi, “I yeellatana mala” yaagiis. Yaatiyogan, nuuni nu ishaara zuppettiyogaa aggiyo wode, I ba oosuwan yeellatidi laamettana danddayees.—2 Tas. 3:14, 15.

Ha wodiyan deꞌiya Kiristtaaneti ha zoriya oosuwan waati peeshshana danddayiyonaa? Koyruwan, Phawuloosi yootidoogaadan he uri maari baynna deꞌuwa deꞌiyakkonne nuuni shaakki erana bessees. I yootidobay nuugaappe dummatiya kahay deꞌiyogeetubaa woy nu koyiyobaappe dummatiyabaa dooriya asatubaa gidenna. Qassi nuna naaqqiya asatubaakka gidenna. Phawuloosi Xoossaa Qaalaappe zoree imettin hegaa azazettennan ixxida asatubaa yootiis.

Ha wodiyan issi ishay woy michchiya Xoossaa Qaalaappe imettiya zoriya azazettennan ixxidoogaa a nuuni akeekikko, he uraara allaxxennan woy wodiya aattennan agganawu kuuyoos. Hegee issi uri kuuyiyobaa gidiyo gishshawu, nu soo asa gidennaageetuura hegaabaa haasayana koshshenna. Qassi nuuni he uraara shiiqota shiiqananne haggaazana danddayoos. I ba qofaanne oosuwa laammikko, aara zaarettidi laggetana danddayoos.