Nuuni Yihoowa ufayssanawu nuuyyo ammanoy deꞌana koshshees. Shin ‘asay ubbay ammanennaagaa’ Geeshsha Maxaafay yootees. (2 Tas. 3:2) Kiitettida Phawuloosi ha sohuwan, A bolli yedetaa gattida ‘nagaranchchanne iita asatubaa’ yootiiddi deꞌees. Shin ammanuwa xeelliyagan I yootidobay he asatubaa xalla qonccissenna. Amarida asati ubbabaa medhdhida Xoossay deꞌiyogaa ammananawu koyokkona. (Roo. 1:20) Harati qassi Xoossay deꞌees giidi ammaniyogaa yootana danddayoosona. Shin Yihoowa ufayssanawu hegaa xalaalay gidenna.

Nuuni Yihooway deꞌiyogaanne tumuppe A ammaniyageeta I ‘woytiyogaa’ ammanettana koshshees. (Ibr. 11:6) Ammanoy geeshsha ayyaanaa ayfiya macara. Qassi nuuni geeshsha ayyaanaa demmanawu Yihoowa woossana koshshees. (Luq. 11:9, 10, 13) Geeshsha ayyaanaa demmanawu maaddiya waannabay Yihoowa ayyaanan xaafettida A Qaalaa nabbabiyogaa. Yaatidi nuuni nabbabidobaa wotti dentti qoppananne eridobaa oosuwan peeshshanawu baaxetana danddayoos. Yaatiyogan, Yihoowa ufayssiya ammanoy nuussi deꞌiyogaa bessiya ogiyan nuuni deꞌana mala A ayyaanay nuna maaddanaadan eeno goos.