XANNAꞌIYO HUUPHE YOHUWA 23
MAZAMURE 28 Yihoowa Dabbo Gidiyoogaa
Yihooway Nena Ba Dunkkaaniya Shoobbees
“[Ta dunkkaanee] etaara de7ana. Taani eta Xoossaa gidana.”—HIZ. 37:27.
TAMAARANABAA
Yihoowa dunkkaaniyan imatta gidiyogaa giyogee woygiyogaakko, qassi nuna Shoobbidaagee nuussi koshshiyabaa waati kunttiyakko akeekanaadan maaddana.
1-2. Yihooway ammanettidi awu goynniyageeta shoobbido shoobee aybee?
ISSI uri nena, ‘Yihooway neessi aybee?’ giidi oychchiyakko ne woyga zaaruutee? ‘Yihooway ta Aawaa, ta Xoossaanne ta Dabbuwa’ gaada zaarana danddayaasa. Neeni Yihoowa qonccissanawu harabaakka qoppennan aggakka. Shin I nena Shoobbidabadan qoppay?
2 Kawuwa Daawiti Yihoowa, imattaa shoobbidaagaadan, qassi awu ammanettidi goynniyageeta shoobettida imattatudan qonccissiis. I hagaadan giis: “Abeet GODAU, ne dunkkaaniyaa gelanau bessiyaagee oonee? Ne geeshsha deriyan nenaara de7anau bessiyaagee oonee?” (Maz. 15:1) Nuuni Yihoowa imattata, hegeekka A dabbota gidana danddayiyogaa ha xiqisiyappe akeekoos. Hagee nuussi keehi gita bonchcho!
YIHOOWAY BA DUNKKAANIYAN DEꞌANAADAN NUNA SHOOBBEES
3. Yihooway koyro shoobbido imattay oonee, qassi Yihoowaynne I koyro shoobbido imattay waanidoonaa?
3 Yihooway ubbabaa medhdhiyogaa doommanaappe kase, barkka deꞌiis. Guyyeppe, I ba bayra Naꞌaa medhdhiis. Yihooway ba dunkkaaniyawu koyro ba Naꞌaa shoobbiis; qassi I yaatidoogan keehi ufayttiis. Geeshsha Maxaafay Yihooway ba Naꞌan keehi ‘ufayttidoogaa’ yootees. Qassi A Naꞌaykka ubba gallassi Yihoowa ‘sinttan ufayttees.’—Lee. 8:30.
4. Yihoowa imatta gidida harati oonee?
4 Hegaappe guyyiyan Yihooway kiitanchchata medhdhiis. Yaatidi etakka shoobbiis. Geeshsha Maxaafay kiitanchchata “Xoossaa naata” yaagees; qassi hegee eti Yihoowara deꞌiyogan ufayttiyogaa qonccissees. (Iyy. 38:7, NW; Dane. 7:10) Daro layttawu Xoossaa dabboti aara saluwan deꞌiyageetu xalaala. Guyyeeppe, I asaa medhdhiis; qassi eti A dabbo gidana danddayidosona. A dabbotuppe amaridaageeti Heenooka, Noha, Abrahaamanne Iyyooba. Eti Yihoowawu azazettido gishshawu, A dabbo gididoogaa Geeshsha Maxaafay yootees.—Doo. 5:24; 6:9; Iyy. 29:4; Isi. 41:8.
5. Hizqqeela 37:26, 27n odettida hiraagaappe nuuni ay akeekana danddayiyoo?
5 Aadhdhida daro layttatun, Yihooway ba dabboti ba imattata gidanaadan shoobbiyogaa aggibeenna. (Hizqqeela 37:26, 27 nabbaba.) Leemisuwawu, Hizqqeela hiraagaappe nuuni akeekiyogaadan, Xoossay baassi ammanettidi goynniyageeti ba mata dabbo gidanaadan tumuppe koyees. I etaara ‘sarotettaa maachchaa maacettanaagaa’ yootiis. He hiraagay saluwa biyo hidootaynne saꞌaa laattiyo hidootay deꞌiyogeeti Yihoowa dunkkaaniyan ‘issi wude’ gidiyo wodiya qonccissees. (Yoh. 10:16) Haꞌꞌi hegaadan haniiddi deꞌees!
NUUNI AWAN DEꞌIKKOKKA XOOSSAY NUUYYO QOPPEES
6. Issi uri Yihoowa dunkkaaniyan waanidi imatta gidana danddayii, qassi A dunkkaanee awan deꞌii?
6 Beni wode dunkkaanee issi uri shemppiyosanne qohuwappe attiyosa. He dunkkaaniyan deꞌiya issi imattay shoobbidaagee ayyo qoppiyogaa erana danddayees. Nuuni nuna Yihoowawu sheedhdhiyo wode, A dunkkaaniyan imatta gidoos. (Maz. 61:4) Nuuni kumi palahiya ayyaanaa qumaa demmoosinne Yihoowa imatta gidida haratuura dabbotoos. A dunkkaanee issi heera xalaalan deꞌenna. Geella neeni dumma gita shiiquwa shiiqanawu kare biittaa biikko, Xoossaa dunkkaaniyan deꞌiya ufayttiya haratuura gayttana danddayaasa. Nuuni awan deꞌikkokka, Yihoowawu ammanettidi haggaazikko, A dunkkaaniyan deꞌiya imattata gidana danddayoos.—Ajj. 21:3.
7. Ammanettidi hayqqidaageeti haꞌꞌikka Yihoowa dunkkaaniyan shoobettida imatta gidiyogaa nuuni aybin eriyoo? (Misiliyakka xeella.)
7 Ammanettidi hayqqidaageeti shin? Eti haꞌꞌikka Yihoowa dunkkaaniyan shoobettida imattee? Ee! Nuuni hegaadan giyoy aybissee? Yihoowa xeelan eti paxa deꞌiyo gishshataassa. Yesuusi hagaadan giis: “Muusee daran hanidabaa xaafidoban Yihoowa, ‘Abrahaama Xoossaa, Yisaaqa Xoossaa, qassi Yaaqooba Xoossaa’ giido wode, hayqqida asay denddanaagaa erissiis. Eti ubbay ayyo paxa deꞌiyo gishshawu, I paxa deꞌiyageetu Xoossaappe attin, hayqqidaageetu Xoossaa gidenna.”—Luq. 20:37, 38.
Ammanettidi hayqqidaageetikka Xoossaa dunkkaaniyan shoobettidabadan qoppana danddayoos (Mentto 7 xeella)
NUUNI DEMMIYO GOꞌꞌAANNE NU OOTTANA KOSHSHIYABATA
8. Yihoowa dunkkaaniyan A imattata gidiyogan nuuni waani goꞌettiyoo?
8 Yihoowa dunkkaanee A imattati aara dabbotido dabbotaa moorana danddayiya aybippenne naageesinne etawu ammanttiya hidootay deꞌanaadan oottees. Nuuni Yihoowakko shiiqidi deꞌikko, Seexaanay nuna merinawu qohiyabaa oottana danddayeenna. (Maz. 31:23; 1 Yoh. 3:8) Yihooway ooratta alamiyan ammanettida ba dabbota ayyaanaabaa qohuwappe xalla gidennan, hayquwappekka ubbatoo naagana.—Ajj. 21:4.
9. Yihooway ba imattati ay oottanaadan koyii?
9 Yihoowa dunkkaaniyan imatta gidiyogee tumukka nuuyyo gita bonchcho. Nuuni merinawu aara mata dabbo gididi deꞌana danddayoos. Nuuni A imatta gididi deꞌanawu koyikko, waatana koshshii? Neeni issi ura son imatta gidada shoobettikko, loꞌꞌo imatta gidanawu koyaasa. Leemisuwawu, neeni caammaa kessada gelanaadan I koyana danddayees, qassi neenikka hegaadan oottaasa. Hegaadankka, Yihooway A dunkkaaniyan ubbatoo deꞌiyageetuppe koyiyobaa nu oottanawu koyiyogee qoncce. Nuuni Yihoowa siiqiyo siiqoy A loytti ‘ufayssanawu’ nuussi danddayettida ubbabaa oottanaadan denttettees. (Qol. 1:10) Yihooway nu dabbuwa gidikkokka, I bonchchoy bessiyo nu Xoossaanne nu Aawa. (Maz. 25:14) Nuuni hegaa mule dogana koshshenna, qassi nuuni ubbatoo A wozanappe bochchana bessees. Hegaadan bonchchiyogee A azzanttiyabaa oottennan agganaadan nuna maaddees. Nuuni ‘ashkketettan nu Xoossaara hemettanawu’ ubbatoo koyoos.—Mik. 6:8.
YIHOOWAY ISRAAꞌEELATA UBBAA ISSI AYFIYAN XEELLIIS
10-11. Yihooway Israaꞌeelati Siinaa bazuwan deꞌiyo wode etassi ay oottidee, qassi hegee I asa asappe shaakkennaagaa waati bessii?
10 Yihooway ba dabbota issi ayfiyan xeellees. (Roo. 2:11) Yihooway Siinaa bazzuwan Israaꞌeelatuyyo oottidoogaappe hegaa akeekana danddayoos.
11 Yihooway ba asaa Gibxxe aylletettappe kessi simmidi, dunkkaaniyan oottana mala qeeseta sunttiis. Qassi dunkkaaniyan hara oosota oottanaadan I Leewata sunttiis. Yihooway dunkkaaniyan oottiyageetussi woy hegaa matan deꞌiyageetussi haratuppe aaruwan qoppii? Chii! Yihooway asa asappe shaakkenna.
12. Yihooway bazzuwan Israaꞌeelatussi oottidobay I asa asappe shaakkennaagaa waati bessii? (Kessaabaa 40:38) (Misiliyakka xeella.)
12 Israaꞌeela asa gidida issi uri Xoossaa dunkkaaniyan oottin aggin, qassi A dunkkaaniya matan deꞌin aggin Israaꞌeelati ubbay Yihoowa dabbo gidana danddayoosona. Leemisuwawu, shaaraynne tamaa tuussay maalaaliya hanotan Xoossaa dunkkaaniya kammiyogaa Israaꞌeelati ubbay beꞌanaadan Yihooway oottiis. (Kessaabaa 40:38 nabbaba.) Shaaray denddiyo wode Xoossaa dunkkaaniyappe haahuwan dunkkaanidaageetikka hegaa beꞌana danddayoosona. Eti he wode banttabaa shiishshi qachchoosona, bantta dunkkaaniya wottoosonanne haratuura he sohuwappe boosona. (Qoo. 9:15-23) Eti ubbay baana koshshiyogaa erissiya biraappe giigida naaꞌꞌu xurumbbatuppe kiyiya wolqqaama cenggurssaa siyana danddayoosona. (Qoo. 10:2) Issi uri Xoossaa dunkkaaniya matan deꞌiyo gishsha xallawu, haahuwan deꞌiyageetuppe aaruwan Yihoowara loytti dabbotees giyogaa gidenna. Israaꞌeelati ubbay Yihoowa imatta, qassi I eta kaalettiyogaanne naagiyogaa eti ammanettana danddayoosona. Hegaadan, nuuni ha wodiyan saꞌan awa heeran deꞌikkokka, Yihooway nuna siiqees, nuussi koshshiyabaa kuntteesinne nuna naagees.
Asay dunkkaanidosan giddo heeran deꞌiya Xoossaa dunkkaanee Yihooway asa asappe shaakkennaagaa bessees (Mentto 12 xeella)
YIHOOWAY HA WODIYANKKA ASA ASAPPE SHAAKKENNA
13. Yihooway ha wodiyan asa asappe shaakkenna gaana danddayiyoy aybisee?
13 Ha wodiyan Xoossaa asaappe amaridaageeti Yihoowa Markkatu waanna biiruwa woy macara biiruwa matan deꞌoosona. Harati qassi yan haggaazoosona. Hegaappe denddidaagan, eti yan deꞌiya daro oosota oottananne aawatettay deꞌiyogeetuura laggetana danddayoosona. Amaridaageeti yuuyidi xomoosiyageeta woy dumma ubba wode haggaazuwa haggaaziyageeta. Neeni etappe issuwa gidana xayikkokka, nena Shoobbiday Yihoowa gidiyogaanne I nena siiqiyogaa ammanettana danddayaasa. I nena loytti ereesinne neessi koshshiyabaa immees. (1 PHe. 5:7) Yihooway ba ashkkaratussi ubbawu ayyaanaabaa qumaa immees, eta kaaletteesinne naagees.
14. Yihooway asa asappe shaakkennaagaa bessiya hara ogee aybee?
14 Kumetta saꞌan deꞌiya asay Geeshsha Maxaafaa demmanaadan oottiyogankka, Yihooway asa asappe shaakkennaagaa bessiis. Geeshsha Maxaafay koyro heezzu doonatun xaafettiis; Ibraawettuwan, Aramayke doonaaninne Giriikettuwan xaafettiis. Geeshsha Maxaafay koyro xaafettido doonaa nabbabana danddayiyageeti danddayennaageetuppe aaruwan Yihoowara mata dabboo? Chii, gidokkona.—Mat. 11:25.
15. Yihooway asa asappe shaakkennaagaa bessiya naqaashay aybee? (Misiliyakka xeella.)
15 Yihooway nuuni A dabbo gidanaadan shoobbidoy nu loytti tamaarido woy Geeshsha Maxaafay koyro xaafettido doonaa eriyo gishshataassa gidenna. Yihooway loytti tamaaridaageetuyyo xalla gidennan, kumetta saꞌan deꞌiya asa ubbawu ba aadhdhida eratettaa immees. A Qaalay Geeshsha Maxaafay daro shaꞌu doonatun birshshettiis; yaatiyo gishshawu, kumetta saꞌan deꞌiya asay A timirttiyappe goꞌettanaanne Yihoowa dabbo waani gidana danddayiyakko tamaarana danddayees.—2 Xim. 3:16, 17.
Geeshsha Maxaafay daro shaꞌu doonan birshshettidoogee Yihooway asa asappe shaakkennaagaa waati bessii? (Mentto 15 xeella)
UBBATOO YIHOOWA UFAYSSA
16. Oosuwaa 10:34, 35y yootiyogaadan, nuuni ubbatoo Yihoowa waati ufayssana danddayiyoo?
16 Yihooway ba dunkkaaniyan nuna mokki ekkiyogee nuussi keehi gita bonchcho. I ooppenne aaruwan keha, siiqiyagaanne Shoobbiyagaa. Hegaa bollikka, I asa asappe shaakkenna. I nu heeray, wogay, eray, zaree, qommoy, layttay woy mattumay ayba gidikkokka, nuna ubbaa mokki ekkees. Shin Yihooway mokki ekkiyoy baayyo azazettiyageetu xalaala.—Oosuwaa 10:34, 35 nabbaba.
17. Yihoowa dunkkaaniyan imatta gidiyogaa xeelliyagan gujo qofaa awuppe demmana danddayiyoo?
17 Mazamure 15:1n Daawiti hagaadan giidi oychchiis: “Abeet GODAU, ne dunkkaaniyaa gelanau bessiyaagee oonee? Ne geeshsha deriyan nenaara de7anau bessiyaagee oonee?” Daawiti ayyaanay denttettin he oyshata zaariis. Nuuni Yihoowa ufayssanawunne A dabbo gididi deꞌanawu oottana bessiyabatuppe amaridaageeta kaalliya huuphe yohoy qonccissees.
MAZAMURE 32 Yihoowa Bagga Gida!
