YIHOOWAY neessi immido daro imotatun neeni ufayttiyogeenne ha imotata waata goꞌettana danddayiyakko kuuyanaadan I neessi paqqadidoogaa neeni nashshiyogee qoncce. Geeshsha Maxaafay yootiyogaadan woyne eessay Xoossaa imota, ubba Geeshsha Maxaafay hagaadan gees: “Qumaa miyoogaaninne woiniyaa eessaa uyiyoogan ufaissai beettees.” (Era. 10:19; Maz. 104:15) Shin amarida asay ushshaa likkiyappe aattidi uyiyogaa neeni beꞌennan aggakka. Qassi ushshaa xeelliyagan kumetta saꞌan deꞌiya asaa xeelay issi mala gidenna. Ushshaa uyiyogaa xeelliyagan loꞌꞌobaa kuuyanaadan Kiristtaaneta aybi maaddana danddayii?

Nuuni kuuyiyo wode nu heeran deꞌiya asaa qofaadan gidennan, Xoossaa qofaadan kuuyana koshshees. Yaatiyogee nuuni ufayssiya deꞌuwa deꞌanaadan oottees.

Ha alamiyan daro asay ushshaa darotoo uyiyogaanne likkiyappe aattidi uyiyogaa neeni akeekennan aggakka. Issoti issoti ushshay ufayssiyo gishshawu uyoosona. Harati qassi metuwan unꞌꞌettiyogaa agganawu uyoosona. Qassi amarida heeratun asay ushshaa likkiyappe aattidi uyiya uraa kayma woy mino asadan xeellees.

Shin Kiristtaaneti banttana Medhdhidaagaappe loꞌꞌo kaaletuwa demmoosona. Leemisuwawu, likkiyappe aattidi uyiyogee iitabaa kaalettiyogaa I nuussi yootiis. Mattottiya uraabaanne mattottiyogee kaalettiyo metuwabaa loytti qonccissiya Leemiso 23:29-35n deꞌiya qofaa nabbabana danddayoos. a Awurooppan deꞌiya Daaneela giyo cimay Yihoowabaa tamaaranaappenne A zoriya oosuwan peeshshanaappe kase ba deꞌoy ay malakkonne hassayees. I hagaadan giis: “Ta darotoo likkiyappe aattada uyiyogee taani iitabaa kuuyanaadan oottiis. Hegaappe denddidaagan iitabay ta bolli gakkiis, qassi taani hegaabaa qoppiyo wode haꞌꞌikka yiillotays.”

Ushshaa xeelliyagaaninne hegaa likkiyappe aattidi uyiyo wode gakkiya metuwappe naagettiyogaa xeelliyagan loꞌꞌobaa waati kuuyana danddayiyoo? Nuuni kuuyiyobaaninne oottiyoban Xoossaa qofaa kaallana koshshees.

Ushshaa xeelliyagan Geeshsha Maxaafay yootiyobaanne amarida asay ushshaa uyiyo gaasuwa ane beꞌoos.

Ushshaa darissennan uyiyogaa Xoossa Qaalay diggenna. Qassi woyne eessaa uyiyogee ufayssana danddayiyogaa Geeshsha Maxaafay yootees. Hagaadan gees: “Ne qumaa ufaissan ma; ne woiniyaa eessaa ne wozanai pashkkishin uya.” (Era. 9:7) Yesuusi woyne eessaa uyiis; qassi hara ammanettida Yihoowa ashkkaratikka uyidosona.—Mat. 26:27-29; Luq. 7:34; 1 Xim. 5:23.

Xoossaa Qaalay ushshaa darissennan uyiyogaa diggana xayikkonne mattottiyogaa diggees. Geeshsha Maxaafay, “woiniyaa giyo eessaa uyidi mattottoppite” giidi geeshshidi yootees. (Efi. 5:18) Qassi “mattottiyaageeti . . . Xoossaa kawotettaa [laattennaagaakka]” yootees. (1 Qor. 6:10) Ee, likkiyappe aattidi uyiyogaanne mattottiyogaa Yihooway diggees. Nuuni nu heeran deꞌiya asay oottiyobaa kaalliyogaappe Xoossaa ufayssiyabaa kuuyana koshshees.

Amaridaageeti mattottana xayikko, daro ushshaa uyana danddayoos giidi qoppoosona. Shin hegee keehi qohiyaba. ‘Woyne eessassi haarettiyogee’ issi uri gita balaa balanaadaaninne Yihoowara dabbotido dabbotettay moorettanaadan oottana danddayiyogaa Geeshsha Maxaafay loytti  qonccissees. (Tii. 2:3; Lee. 20:1) Daro ‘ushshaa’ uyiyogee issi uri Xoossay ehiyo ooratta alamiya gelennaadan diggana danddayiyogaa Yesuusi mintti yootiis. (Luq. 21:34-36) Yaatin, ushshaa uyiyogan gakkiya metuwappe naagettanawu issi Kiristtaanee waatana danddayii?

Nuuni ushshaa uyiyogaa xeelliyagan kuuyiyo wode nu heeran deꞌiya asay oottiyobaa xalla qoppikko qohettoos. Kiristtaaneti qumaaranne uyiyobaara gayttidaagan Yihoowa ufayssiyabaa akeekan oottoosona. Geeshsha Maxaafay nuna hagaadan zorees: “Simmi intte ai miikkonne, woi ai uyikkonne, woi intte ai oottikkonne, ubbabaa Xoossaa bonchchuwaassi oottite.” (1 Qor. 10:31) Amarida oyshatanne Geeshsha Maxaafay yootiyo maarata ane pilggoos:

Taani ushshaa uyiyoy harati tana borennaadaanee? Kessaabaa 23:2y hagaadan gees: “Daro asaa kaalloppa.” Israaꞌeelati Yihoowa ufayssenna asaa kaallennaadan I ha sohuwan yootiis. Hegee ha wodiyan deꞌiya Kiristtaanetussikka loꞌꞌo zore. Nuuni ushshaara gayttidaagan haratuugaadan qoppiyabanne kuuyiyaba gidikko, Yihooway kessido maaraadan deꞌiyogaa loddan loddan aggoosinne aara dabbotido dabbotay moorettees.—Roo. 12:2.

Taani ushshaa uyiyoy mino gidiyogaa bessanaassee? Issi issi wogatun darotoo uyiyogeenne likkiyappe aattidi uyiyogee meeze gididabanne ubba asay maayettiyoba. (1 PHe. 4:3) Shin, 1 Qoronttoosa 16:13y nuuni oottanaadan minttettiyobaa akeeka: “Tishshi giite. Ammanuwan minnite. Xalite. Minnite.” Ushshay issi uri tumuppe mino gidanaadan maaddana danddayii? Chii maaddenna. Ushshaa uyiyogee issi uri loytti qoppennaadaaninne loꞌꞌobaa kuuyennaadan oottana danddayees. Hegaa gishshawu, ushshaa likkiyappe aattidi uyiyogee issi uri eeyya gidiyogaa besseesippe attin mino gidiyogaa bessenna. Isiyaasa 28:7y issi uri ushshaa uyikko yiicotiyogaa, ganddigaariyogaanne xubettiyogaa yootees.

Tumu minotettaa immiyay Yihoowa gidiyo gishshawu, nuuni tishshi giidi ammanuwan minni eqqana bessees. (Maz. 18:32) Nuuni akeekanchcha gididi qohiyabaappe naagettiyogaaninne Yihoowara dabbotido dabbotaa moorennabaa kuuyiyogan hegaadan oottoos. Yesuusi Yihoowara mintti dabbotiis, qassi I xalanne suurebaa oottanawu  murttidaagaa gidiyo gishshawu daro asay A bonchchiis.

Taani ushshaa uyiyoy ta metuwan unꞌꞌettennan agganaassee? Ayyaanay kaalettin mazamuraawe hagaadan giis: “Tana hirggai woriyo wode, neeni [Yihoowa] tana woppu oottada ufaissaasa.” (Maz. 94:19) Neeni issiban unꞌꞌettikko ushshan gidennan, Yihoowa maaduwan ammanetta. Darin unꞌꞌettennaadan maaddiya issi ogee Yihoowa darotoo woossiyogaa. Qassi daroti galchchan deꞌiya kayma Kiristtaaniyappe loꞌꞌo zoriya koyiyogee goꞌꞌiyogaa akeekidosona. Issi uri metuwa genccanawu ushshaa uyikko, suurebaa oottiyogaa aggana danddayees. (Hoo. 4:11) Qommoora abaa denttido Daaneeli hagaadan giis: “Taani unꞌꞌettaasinne zilꞌꞌettaas. Taani unꞌꞌettennan agganawu kuuyikkonne, hegee daro metuwa kaalettiis; qassi ta laggeti taappe shaahettidosonanne taani tana pattenna asadan xeellaas.” Wurssettan Daaneela maaddidabay aybee? I hagaadan giis: “Taani ushshan gidennan, Yihoowa maaduwan ammanettana koshshiyogaa akeekaas. Wurssettan Yihooway maaddin, taani ta metuwa genccada xoonaas.” Nu hanotay hidooti baynnaba milatiyo wodekka Yihooway nuna maaddanawu ubbatoo giigi uttiis.—Pili. 4:6, 7; 1 PHe. 5:7.

Neeni issi issitoo ushshaa uyikko, ha oyshata goꞌettada ne ay keena uyiyakko yiggana danddayaasa. Nena hegaadan oychcha: ‘So asaappe issoy woy mata laggee ta ushshaa meezee qofissidoogaa yootidee?’ Yaatikko, hegee neeni akeekabeenna ushshaa meezee woy metoy deꞌiyogaa bessiyaba gidana danddayees. ‘Taani kaseegaappe aaruwa uyiyanaa?’ Hanotay hegaa mala gidikko, issi urawu ushshaa amalee xayikkokka, hegee awu amale gidiiddi deꞌiyogaa bessiyaba gidana danddayees. ‘Amarida gallassawu woy daro wodiyawu ushshaa uyennan agganawu metootiyanaa?’ Yaatikko ushshaa uyiyogee aggenna meeze woy amale gidana danddayees. Hegaa giyogee he metuwa xoonanawu aakimiya maadoy koshshana danddayees giyogaa.

Ushshaa uyiyogee daro metuwa kaalettana danddayiyo gishshawu, amarida Kiristtaaneti ushshaa mule uyennan agganawu kuuyidosona. Harati qassi ushshay cammiyo gishshawu, uyennan  agganawu kuuyana danddayoosona. Ne laggiyappe issoy hegaa malabaa kuuyikko, A borennan I kuuyidobaa bonchchiyogan kehatettaa bessana danddayaasa.

Ay keena ushshaa uyanaakko neeni kasetada kuuyiyogee loꞌꞌo gidiyogaa akeekennan waaya aggana. Woy neeni aapputoo uyanaakko, hegeekka saaminttan issitoo woy qumaa miyo wode darissennan uyanawu neeyyo higgiya kessana danddayaasa. Harati qassi ay mala ushshaa uyanaakko kaseti kuuyoosona. Leemisuwawu, woyniya woy biiraa darissennan uyiyaba gidikkonne, cammiya ushshaa walakkidi uyennan agganawu kuuyidosona. Issi uri ay keena ushshaa uyanaakko issitoo kuuyichchikko, kuuyidobaa oosuwan peeshshanawu metootenna. Issi kayma Kiristtaane hegaadan kuuyidi, hegaa oosuwan peeshshikko yeellatana bessenna.

Ushshaa xeelliyagan nuuni kuuyiyo wode haratuyyo aybi siyettiyakko nuuni qoppana koshshees. Roome 14:21 hagaadan gees: “Asho meennan woi ushsha uyennan aggiyoogee woikko ne ishaa xubbiyaabaa aibanne oottennan aggiyoogee lo77o.” Neeni ha zoriya waata oosuwan peeshshana danddayay? Harata siiqa. Neeni ushshaa uyiyogee issi uraa yiilloyiyogaa akeekikko, siiqoy neeni he uri deꞌiyosan ushshaa uyennaadan oottees. Neeni yaatiyo wode harata bonchchiyogaa, siiqiyogaanne neeppe aaruwan etassi qoppiyogaa bessaasa.—1 Qor. 10:24.

Qassi kawotettay ushshaara gayttidaagan higgeta kessana danddayees. Issi Kiristtaanee he higgeta azazettiyogee qoncce. Ushshaa uyanawu issi urawu hagaa keena laytta gidana bessees giidi higgee yootana danddayees. Woy qassi issi uri ushshaa uyikko kaamiya laaggennaadan woy issi issi maashineta goꞌettennaadan higgee diggana danddayees.—Roo. 13:1-5.

Yihooway ufayssiya daro imotata nuussi immiis; hegeetuppe issoy nuuni koyidobaa dooriyo maata. Nuuni miyobaa woy uyiyobaa dooriyo maataykka hegeetuppe issuwa. Nu koyidobaa dooriyo maataa goꞌettidi Yihoowa ufayssiyogan hegaa nashshiyogaa bessiyageeta gidoos.