1-2. Neeni afuxxanaadan oottana danddayiya hanotati awugeetee?

 NUUNI ubbaykka yeekki eroos. Nuuni ufayttido gishshawu, issi issitoo yeekkoos. Leemisuwawu, neeni naꞌa yelido wodiya mala dumma hanotatun yeekkennan aggakka. Woy neeni keehi ufayttanaadan oottidabaa hassayido wode, woykko daro layttappe simmin ne laggiya beꞌido wode yeekkennan aggakka.

² Shin darotoo nuuni keehi azzanido woy waayettido gishshawu yeekkoos. Leemisuwawu, nu ammanettiyo uri nuna naaqqikko, yeekkana danddayoos. Caddi oyqqiya harggiyan nuuni sahettiyo woy siiqiyo uri hayqqiyo wode nuuni yeekkana danddayoos. Baabilooneti Yerusalaame xayssido wode Ermmaasayyo siyettidoogaadan nuussikka siyettana danddayees. Ermmaasi hagaadan giis: “Ta aifee shaafaadan afuttaa goggees. . . . Mule wode aggennan afuttaa tigees.”—Zil. 3:48-50.

3. Yihooway ba ashkkarati waayettiyogaa beꞌiyo wode waanii? (Isiyaasa 63:9)

³ Nuna unꞌꞌissiyabay gakkin nuuni ay keena afuxxidaakko Yihooway loytti erees. Yihooway ba ashkkaratu bolli gakkiya waayiya ubbaa eriyogaanne maaduwawu nu waassiyo wode siyiyogaa Geeshsha Maxaafay yootees. (Maz. 34:15) Shin Yihooway nuna beꞌiyogaappenne nuna siyiyogaappe aarobaa oottees. I nu Aawaa; qassi I nuna keehi siiqees. Yaatiyo gishshawu nuuni yeekkiyogaa I beꞌiyo wode, keehi azzanees, qassi sohuwara maaddees.—Isiyaasa 63:9 nabbaba.

4. Amarida Geeshsha Maxaafaa taariketuppe nuuni Yihoowabaa ay tamaariyoo?

 ⁴ Yihooway ba ashkkarati yeekkiyo wode awu aybi siyettidaakko, qassi eta waati maaddidaakko ba Qaalaa baggaara nuussi yootiis. Haanno, Daawitanne, Kawuwa Hizqqiyasa gakkidabaa pilggiyogan nuuni hegaa akeekana danddayoos. Eti yeekkanaadan oottidabay aybee? Eti maaduwa demmanawu yeekkin Yihooway waatidee? Qassi nuuni keehi azzanidi, nuna harati kaddin, woy hidootaa qanxxidi yeekkiyo wode, eta taarikee nuna waati minttettana danddayii?

KAYYOTTIDI YEEKKIYO WODE

5. Haanno gakkida hanotay A waananaadan oottidee?

⁵ Haanna yeekkanaadaaninne kayyottanaadan oottiya daro metoy O gakkiis. Haanni keettaawaassi hara machchiya deꞌawusu, I sunttay Piniino; qassi A Haanno keehi ixxawusu. Hegaa bollikka, Piniinissi daro naati deꞌoosona; shin Haanna naꞌa yelabeykku. (1 Sam. 1:1, 2) Haanna naꞌa yelana danddayenna gishshawu Piniina O ubbatoo qilliiccawusu. Hegaa malabay nena gakkiyakko neeyyo aybi siyettanee? Haanna ‘yeekkana gakkanaassinne qumaa meettaa ixxana gakkanaassi yiillotaasu;’ qassi ba wozanan ‘keehi mishettaasu.’—1 Sam. 1:6, 7, 10.

6. Haanna woppu gaanawu ay oottadee?

⁶ Haanna woppu gaanaadan maaddidabay aybee? O maaddida issibay Yihoowawu goynnanawu A garuwa biidoogaa. A ‘camo yeehuwa yeekkada Yihoowa woossiyo’ wode Xoossaa garuwa geliyo penggiya dabaabaa matan deꞌennan aggukku. A Yihoowa hagaadan woossaasu: “Tana ne ashkkariyo xeella! Ta mishuwaa be7ada, tana hassaya.” (1 Sam. 1:10b, 11) Haanna ba wozanan deꞌiya ubbabaa Yihoowawu yootaasu. Yihooway Haanna yeekkiyogaa beꞌidi ikka keehi azzaniis. Qassi O keehi siiqiyo gishshawu minttanawu koyiis!

7. Haanna ba metuwabaa Yihoowawu yoota simmada waanadee?

⁷ Haanna ba wozanan deꞌiya ubbabaa Yihoowawu yoota simmadanne Gita Kahinee Eeli O minttetti simmin waanadee? Geeshsha Maxaafay hagaadan gees: “A ba ogiyaa baada, qumaa maasu; hegaappe simmin mulekka azzanabeikku.” (1 Sam. 1:17, 18) Unꞌꞌissiya I hanotay laamettana xayikkokka, Haanna woppu gaasu. A bana unꞌꞌissida gita toohuwa Yihoowan wottaasu. Yihoowaykka iyyo siyettiyabaa akeekiis, I woosaa siyiisinne guyyeppe A naata yelanaadan oottiis.—1 Sam. 1:19, 20; 2:21.

8-9. Ibraawe 10:24, 25y yootiyogaadan, nuuni shiiqota shiiqanawu nuussi danddayettida ubbabaa oottana koshshiyoy aybissee? (Misiliyakka xeella.)

⁸ Nu tamaariyobaa. Neeni azzanada yeekkanaadan oottiya metoy nena gakkiiddi deꞌii? Geella so asaappe issoy woy ne laggee  hayqqin kayyottennan aggakka. Hegaa mala hanotatun neeni nerkka takkanawu koyiyogee wottin deꞌiyaba. Shin Haanni hanotaa hassaya. A Xoossaa garuwa bin Yihooway yan O minttettiis. Hegaadankka nuuni daafuridaba woy azzanidaba gidikkokka shiiqota biyo wode Yihooway nuna maaddeesinne minttettees. (Ibraawe 10:24, 25 nabbaba.) Shiiqotun minttettiya Geeshsha Maxaafaa xiqiseta nuuni siyiyo wode iitabaa aggidi, ufayssiyabaa qoppanaadan Yihooway nuna maaddana danddayees. Nu hanotay sohuwara giigana xayikkokka, darin azzaniyogaa agganaadan maaddana danddayees.

⁹ Shiiqotun nu ishanttinne michchontti nuna minttettoosona; qassi nuna keehi siiqiyogaa bessoosona. Hegaa bollikka, nuuni shiiquwan etaara gayttiyo wode minettoos. (1 Tas. 5:11, 14) Machchiya hayqqido issi dumma aqinya hanotaa ane beꞌa. I hagaadan giis: “Ta machchiya tana keehi laamottiyo gishshawu taani yeekkiyogaa aggana danddayabeykke. Shin taani shiiquwa biyo wode tawu koshshiya minttettuwa demmays. Ishanttinne michchontti yootiyo ufayssiyabay taani tumuppe minettanaadan maaddiis. Taani shiiquwa gakkanaappe kase keehi unꞌꞌettidaba woy azzanidaba gidikkokka, yan ubbatoo minettays.” Nuuni shiiqota biyo wode Yihooway nu ishanttunne michchonttu baggaara nuna maaddees.

10. Nuuni keehi azzaniyo wode Haanni leemisuwa waati kaallana danddayiyoo?

¹⁰ Haanna bawu siyettida ubbabaa woosan Yihoowawu yootidoogankka minettaasu. Neenikka Yihooway ne woosaa siyanaagaa ammanettada ‘nena hirggissiya ubbabaa Yihoowa bolli olana’ danddayaasa. (1 PHe. 5:7) Bonqqiyageeti I azinaa worido issi michchiya hagaadan gaasu: “Taani keehi kayyottido gishshawu, zaarettada mule ufayttana danddayennabadan qoppaas. Shin tana keehi siiqiya ta Aawaa Yihoowa woossido wode ubban taani woppu gaas. Tawu siyettiyabaa woyga qonccissanaakko issi issitoo erikke; shin Yihooway ta hanotaa akeekees. Taani keehi azzaniyonne unꞌꞌettiyo wode I tana woppissanaadan woossays. Yaatada sohuwara woppu gays, qassi he galla oottana koshshiyabaa oottays.” Neeni yeekkaydda Yihoowa woossiyo wodenne ne azzananaadan oottidabaa awu yootiyo wode Yihoowaykka azzanees; qassi neessi siyettiya ubbabaa akeekees. Neeni azzananaadan oottidabay xayibeennaba gidikkokka, Yihooway nena minttettananne neeni woppu gaanaadan maaddana danddayees. (Maz. 94:19; Pili. 4:6, 7) Neeni ubbatoo awu ammanettada deꞌanawu oottido ubbabaa I akeekees, qassi I nena woytana.—Ibr. 11:6.

NEENI AMMANETTIYO URI NENA KADDIYO WODE

11. Daawiti harati A qohido wode waanidee?

¹¹ Daawiti yeekkanaadan oottiya daro metota genccana koshshiis. Issoti issoti A ixxidosona, ubba qassi I ammanettidoogeeti A kaddidosona. (1 Sam. 19:10, 11; 2 Sam. 15:10-14, 30) Issi wode I hagaadan giis: “Taani ooliyan daafuraas; qamma ubban taani yeekkaidda, ta hiixaa irxxissaas; ta borkkotaakka ta afuttan musissaas.” Daawitassi hegaadan siyettidoy aybissee? I “[ba] morkketu ubbaa gaasuwan” gidiyogaa yootiis. (Maz. 6:6, 7) Daawita harati keehi qohido wode, I unꞌꞌettidi yeekkiyogaa aggana danddayibeenna.

12. Mazamure 56:8y yootiyogaadan, Daawiti ay ammanettidee?

¹² Metoy Daawita gakkikkokka, Yihooway A siiqiyogaa I ammanettiis. I hagaadan giis:  ‘Yihooway taani yeekkiyo yeehuwa siyiis.’ (Maz. 6:8) Qassi I hara wode Mazamure 56:8n deꞌiya keehi ufayssiyabaa xaafiis. (Nabbaba.) Ha xiqisee Yihooway nuna keehi siiqiyogaanne I nuussi qoppiyogaa geeshshidi yootees. Daawiti Yihooway A afutta ubbaa mazggabidabadan yootiis. Daawiti bana gakkida waayiya Yihooway akeekiyogaanne hassayiyogaa ammanettiis. Daawita gakkiiddi deꞌiya metotu xalaala gidennan, he metooti A ay keena qohidaakkokka saluwan deꞌiya siiqiya A Aaway eriyogaa I ammanettiis.

13. Harati nuna naaqqikko woy kaddikko nuuni ay hassayana koshshii? (Misiliyakka xeella.)

¹³ Nu tamaariyobaa. Neeni ammanettiyo uri nena qohido woy kaddido gishshawu keehi azzanaydda deꞌay? Geella neeni ekkanawu woy gelanawu qoppido uri woykko ne azinay woykko ne machchiya nena aggido woy ne siiqiyo uri Yihoowawu haggaaziyogaa aggido gishshawu neeni azzanaydda deꞌennan aggakka. Keettaayyiya pokkiya tuna nagaraa oottada aggada biido issi ishay hagaadan giis: “Hagee ta bolli haniis gaada ammanana danddayabeykke, taani keehi azzanaas, yiillotaas, qassi pattennabadan qoppaas.” Issi uri nena kaddikko, woy nena keehi qohikko, Yihooway nena mule aggennaagaa eriyogan minetta. He ishay hagaadan giis: “Asi issi issitoo ammanettennan aggana danddayikkonne, Yihooway awudenne ammanettiyagaa gidiyogaa taani akeekaas. Aybi hanikkokka, I nuna ubbatoo maaddana. Yihooway baassi ammanettiyageeta aggenna.” (Maz. 37:28) Qassi ooppenne aaruwan Yihooway nena siiqiyogaa ubbatoo hassaya. Neeni ammanettiyo uri nena kaddiyogee keehi azzanttiyaba. Shin nebaa xeelliyagan Yihoowawu siyettiyabay laamettibeenna. Neeni A sinttan alꞌꞌo. (Roo. 8:38, 39) Issi asi nena naaqqikkokka, Yihooway nena siiqiyogaa neeni hassayana koshshees.

14. Mazamure 34:18y yootiyo ammanttiya qofay aybee?

¹⁴ Hara uri nena kaddikko Daawiti Mazamure 34:18n yootido qofay nena minttettana danddayees. (Nabbaba.) “Bantta ayyaanan liiqidaageeta” giyagee loꞌꞌobaa aybanne demmana giidi hidootennaageeta qonccissiyaba gidana danddayees. Bantta ayyaanan liiqidaageeta Yihooway waati maaddii? Yihooway nuussi “mataana;” I yeekkiya naꞌa idimmidi minttettiya aawa woy aayo mala. Issi uri nuna kaddido woy aggido gishshawu, nuuni keehi azzanikko, Yihooway hegaa akeekidi nuna sohuwara maaddana. Nu wozanay meqqikko, qassi nuna pattenna asadan qoppikko I nuna minttettanawu giigi uttiis. Qassi yeemuwan naagiyo darobaa I nuussi  immiyogan ha wodiyan nuna gakkiya metuwa genccanaadan maaddees.—Isi. 65:17.

HIDOOTAA QANXXIDI YEEKKIYO WODE

15. Hizqqiyasi yeekkanaadan oottidabay aybee?

¹⁵ Yihuuda Kawoy Hizqqiyasi awu layttay 39 gidido wode, wolqqaama sahuwa sahettiis. Hizqqiyasi he sahuwan hayqqanaagaa Xoossay erissidobaa yootiya Isiyasi yootiis. (2 Kaw. 20:1) Hizqqiyasi hegaa siyido wode keehi azzanidi mishettidi yeekkiis. I Yihoowa mintti woossiis.—2 Kaw. 20:2, 3.

16. Hizqqiyasi yeekkiiddi woossin Yihooway awu ay oottidee?

¹⁶ Yihooway Hizqqiyasa woosaa siyidonne A afuttaa beꞌido wode awu qarettidi hagaadan giis: “Taani ne woosaa siyaas; ne afuttaakka be7aas. Taani nena pattana.” Yihooway A maaridi awu layttaa gujjanaagaanne Yerusalaame katamaa Asooretu kushiyappe ashshanaagaa Isiyasa baggaara yootiis.—2 Kaw. 20:4-6.

17. Nuuni keehi sahettiyo wode Yihooway nuna waati maaddana danddayii? (Mazamure 41:3) (Misiliyakka xeella.)

¹⁷ Nu tamaariyobaa. Nena oyqqida harggiyappe neeni paxennaba milatikko waatuutii? Neessi siyettiyabaa Yihoowawu yoota. Neeni yeekkaydda woossikkokka I ne woosaa siyana. ‘Gita maarotaa Aawaynne ubbaban minttettiya Xoossay’ nu waaye ubban nuna minttettanaagaa Geeshsha Maxaafay yootees. (2 Qor. 1:3, 4) Yihooway nu meto ubbaa ha wodiyan qaarana giidi qoppokko, shin I nuna ubbaa maaddana. (Mazamure 41:3 nabbaba.) I ba geeshsha ayyaanaa baggaara nuuni genccanaadan nuussi wolqqaa, hayyuwanne woppaa immees. (Lee. 18:14; 2 Qor. 4:7) Sinttappe saho ubbay xayanaagaa yootiya hidootaa baggaarakka I nuna minttettees.—Isi. 33:24.

18. Keehi metiyabay nena gakkin nena minttettida xiqisee awugee? (“ Nuuni Yeekkiyo Wode Nuna Minttettiya Xiqiseta” giya saaxiniya xeella.)

¹⁸ Yihooway giidobay Hizqqiyasa minttettiis. Hegaadan Xoossaa Qaalay nunakka minttettana danddayees. Nuuni unꞌꞌettiyo wode Geeshsha Maxaafaa baggaara Yihooway yootiyobay nuna minttetteesinne nuuni woppu gaanaadan maaddees. (Roo. 15:4) Arggo Afirkkan deꞌiya issi michchiya kanssere O oyqqidoogaa erada darotoo yeekkaasu. A hagaadan gaasu: “Tana keehi minttettida xiqisee Isiyaasa 26:3. Darotoo nuuni nu metuwa qaarana danddayennaba gidikkokka, ha xiqisee Yihooway nuuni woppu gaanaadaaninne ay metuwakka genccanaadan maaddana danddayiyogaa yootees.” Hidooti baynnaba milatiya hanotay nena gakkin, nena minttettida xiqisee deꞌii?

19. Nuuni yeemuwan naagiyobay aybee?

¹⁹ Nuuni wurssetta gallassatun deꞌiyo gishshawu, yeekkanaadan oottiyabati gujji gujji  baanaagee qoncce. Shin nuuni Haanni, Daawitanne Kawuwa Hiziqqiyasa taarikiyappe akeekiyogaadan nuuni yeekkiyo wode beꞌidi Yihooway azzanees. Nu afuttay tumuppe Yihoowa sinttan alꞌꞌo. Hegaa gishshawu, unꞌꞌissiyabay nuna gakkiyo wode nuuyyo siyettiya ubbabaa woosan Yihoowawu yootana koyiyogee qoncce. Galchchan deꞌiya nuna siiqiya ishanttuppenne michchonttuppe mule haakkana koshshenna. Geeshsha Maxaafaa nabbabiyogan Yihoowappe minttettuwa demmoos. Nuuni ubbatoo ammanettidi genccikko, Yihooway nuna woytanaagaa eroos. Qassi nuuni azzanidi, harati kaddiininne hidootaa qanxxidi afuxxido afutta ubbaa I sinttappe quccanawu qaalaa geliis. (Ajj. 21:4) He wode nuuni ufayssa afuttaa afuxxana.