Kiitettida Phawuloosi banaara cima gididi oottiya Ximootiyosawu, “Neeni ainne asa som77o xeellennan, issuwaa issuwaappe dummayennan ha azazuwaa naagana mala, Xoossaanne Godaa Yesuus Kiristtoosa doorettida kiitanchchatu sinttan nena taani zorais” yaagidi xaafiis.—1 Xim. 5:21.

Koyruwan, doorettida kiitanchchata geetettidaageeti oonakko shaakki eranawu maloos. Eti 144,000 asatu yara gidennaagee qoncce. Phawuloosi Ximootiyosawu ha dabddaabbiya xaafiyo wode, tiyettidaageetuppe ooninne hayquwappe denddidi saluwa bibeenna. Kiitettidaageetinne hara tiyettidaageeti ayyaana mereta gidibeenna gishshawu ‘doorettida kiitanchchati’ eta gidokkona.—1 Qor. 15:50-54; 1 Tas. 4:13-17; 1 Yoh 3:2.

Hara baggaara qassi, ‘doorettida kiitanchchati’ bashshaa haattaa wode makkalida kiitanchchatakka gidokkona. He kiitanchchati Seexaanaa kaallidi daydanttata gididosona; qassi eti Yesuusawu morkke gididosona. (Doo. 6:2; Luq 8:30, 31; 2 PHe. 2:4) Sinttappe eta Yesuusi 1,000 layttawu ciimman olana. Hegaappe simmidi eti Seexaanaara issippe muleera xayana.—Yih 6; Ajj. 20:1-3, 10.

Phawuloosi yootido ‘doorettida kiitanchchati’ saluwan deꞌiya ‘Xoossaaranne Yesuus Kiristtoosaara’ ammanettidi oottiya kiitanchchata.

Saluwan daro shaꞌan qoodettiya ammanettida kiitanchchati deꞌoosona. (Ibr. 12:22, 23) Yihooway eta ubbawu issi wodiyan issi mala oosuwa immees giidi nuuni qoppana koshshenna. (Ajj. 14:17, 18) Leemisuwawu, Yihooway issi wode, mexi issi kiitanchchay 185,000 Asoore wotaaddarata woranaadan azaziis. (2 Kaw. 19:35) Daro kiitanchchati “xubbiya ubbabaanne iitabaa oottiya asata [Yesuusa] Kawotettaappe xayssana” mala kiitettennan aggokkona. (Mat. 13:39-41) Hara kiitanchchati qassi tiyettidaageeta shiishshanaadan sunttettana danddayoosona. (Mat. 24:31) Qassi harati nu “ogiyan ubban” nuna naagoosona.—Maz. 91:11; Mat. 18:10; Maatiyosa 4:11​ranne Luqaasa 22:43​ra gatta xeella.

Koyro Ximootiyoosa 5:21n odettida ‘doorettida kiitanchchati’ Xoossaa asaara gayttidaagan dumma oosuwa oottanawu sunttettidaageeta gidana danddayoosona. He shemppuwan Phawuloosi, cimati bantta aawatettaa waati polanaakko, qassi galchchan deꞌiyageeti cimata bonchchana bessiyogaa zoriis. Cimati “ainne asa som77o xeellennan, issuwaa issuwaappe dummayennan” bantta oosuwa oottanaadan, qassi issibaa loytti qoppennan kuuyennaadan Phawuloosi zoriis. Ayyaanay denttettin Phawuloosi zoridobaa eti oosuwan peeshshana koshshiyo waanna gaasoy “Xoossaanne Godaa Yesuus Kiristtoosa doorettida kiitanchchatu sinttan” oottiyo gishshataassa. Yaatiyo gishshawu, issi issi kiitanchchatussi galchchaa maaddiyo oosoy imettees. Eti oottiyobatuppe amaridaageeti, Xoossaa ashkkarata naagiyogaa, mishiraachchuwa yootiyageeta maaddiyogaanne eti beꞌidobaa Yihoowawu irpportte oottiyogaa.—Mat. 18:10; Ajj. 14:6.