XANNAꞌIYO HUUPHE YOHUWA 21
MAZAMURE 107 Xoossaagaadan Siiqiyoogaa
Loꞌꞌo Aqo Lagge Waata Demmana Danddayay?
“Wozannaama machcho ooni demmanau danddayii? Inqquwaa giyo al77o shuchchaappekka a al77ausu.”—LEE. 31:10.
TAMAARANABAA
Issi uri loꞌꞌo aqo lagge demmanaadan maaddana danddayiya Geeshsha Maxaafay yootiyo maaratanne galchchan deꞌiya harati aqo oyqqanawu koyiyageeta maaddana danddayiyo ogiya pilggana.
1-2. (a) Aqo oyqqibeenna Kiristtaaneti aqo oyqqanawu qoppidi issippe wodiya aattiyogaa doommanaappe kase akeekana koshshiyabay aybee? (b) “Aqo oyqqanawu qoppidi issippe wodiya aattiyogaa” giyogee woygiyogee? (“Qonccissido Qaalaa” giyagaa xeella)
NEENI aqo oyqqanawu koyay? Aqo oyqqiyogee ufayssawu keehi koshshana xayikkonne, yelaga gidin woy gastta gidin aqo oyqqibeenna daro Kiristtaaneti aqo lagge demmanawu koyoosona. Neeni issi uraara aqo oyqqanawu qoppada issippe wodiya aattiyogaa doommanaappe kase Yihoowara loytta dabbotana, nebaa loytta erananne aqo deꞌuwan goꞌettiyo miishshaara gayttida aawatettawu giigettana bessiyogee qoncce. a (1 Qor. 7:36) Hegaadan gidikko, ufayssiya aqo deꞌoy neessi deꞌana danddayees.
2 Shin loꞌꞌo aqo lagge demmiyogee issi issitoo metiyaba gidana danddayees. (Lee. 31:10) Qassi neeni loytta eranawu koyiyo ura demmikkokka, aqo oyqqanawu qoppada issippe wodiya aattiyogaa b doommiyogee deexxiyaba gidana danddayees. Aqo oyqqibeenna Kiristtaaneti loꞌꞌo aqo lagge demmanaadaaninne aqo oyqqanawu qoppidi issippe wodiya aattiyogaa doommanaadan eta maaddana danddayiyabaa ha huuphe yohuwan beꞌana. Qassi aqo oyqqanawu koyiyageeta galchchan deꞌiya harati maaddanawu waatana danddayiyakko beꞌana.
LOꞌꞌO AQO LAGGE DEMMANAADAN NENA AYBI MAADDANA DANDDAYII?
3. Aqo oyqqibeenna issi Kiristtaanee aqo lagge koyiyo wode ay qoppana koshshii?
3 Neeni aqo oyqqanawu koyikko, ne aqo laggiyawu deꞌanaadan ne koyiyo eeshshata aqo oyqqanawu qoppidi issippe wodiya aattiyogaa doommanaappe kase shaakka eriyogee keehi loꞌꞌo. c Hegee xayikko, neessi haniya aqo laggiya neeni akeekennan aggana woy neeyyo hanenna uraara aqo oyqqanawu qoppada wodiya aattiyogaa doommana danddayaasa. Neeni dooriyo aqo laggee haattan muukettida Kiristtaane gidana koshshiyogee qoncce. (1 Qor. 7:39) Shin haattan muukettida ubbay neeyyo haniya aqo lagge gidenna. Hegaa gishshawu nena hagaadan oychcha: ‘Ta deꞌuwawu taani ayba halchchota kessidanaa? Ta aqo laggiyawu deꞌana bessees gaada taani qoppiyo eeshshati awugeetee? Taani naagiyobay bessiyabee?’
4. Amaridaageeti woygi woossidonaa?
4 Neeni aqo oyqqanawu koyikko, hegaa xeelliyagan Yihoowa woossidoogee qoncce. (Pili. 4:6) Yihooway ba ashkkarati aqo lagge demmanaagaa qaalaa gelibeennaagee tuma. Shin I neessi koshshiyabaa kuntteesinne neeyyo siyettiyabaa akeekees; qassi neeni aqo lagge demmanawu koyiyo wode nena maaddana danddayees. Yaatiyo gishshawu neeni koyiyobaanne neeyyo siyettiyabaa ubbatoo awu yoota. (Maz. 62:8) Danddayanchcha gidanawunne aadhdhida eratettaa demmanawu woossa. (Yaaq. 1:5) Amarkkan deꞌiya aqo oyqqibeenna Joona d giyo ishay woygi woossiyakko yootiis: “Ta aqo laggeeyyo deꞌanaadan taani koyiyo eeshshata Yihoowawu yootaas. Loꞌꞌo aqo laggeera gayttana danddayiyo injjiya demmanawu woossaas. Taani loꞌꞌo azina gidanaadan oottiya eeshshati taassi deꞌana mala maaddanaadankka Yihoowa woossaas.” Siri Lankkan deꞌiya Taanayo giyo michchiya hagaadan gaasu: “Taani loꞌꞌo aqo laggiya koyiyo wodiyan ubbatoo ammanettanaadan, loꞌꞌobaa qoppanaadaaninne ufayttanaadan maaddana mala Yihoowa woossaas.” Neeni loꞌꞌo aqo laggiya sohuwara demmana xayikkokka, Yihooway nena maaddanawu qaalaa geliis; qassi I nena siiqeesinne neessi qoppees.—Maz. 55:22.
5. Aqo oyqqibeenna Kiristtaaneti Yihoowa siiqiya aqo oyqqibeenna haratuura awude gayttana danddayiyonaa? (1 Qoronttoosa 15:58) (Misiliyakka xeella.)
5 Geeshsha Maxaafay nuuni “Godaa oosuwaa azallennan” oottanaadan minttettees. (1 Qoronttoosa 15:58 nabbaba.) Neeni Yihoowawu minnada haggaaziyabanne dumma dumma ishanttuuranne michchonttuura wodiya aattiyaba gidikko, etaara minttettiya wodiya aattiyogaa xalla gidennan, neegaadan Yihoowa haggaazuwan xeelaa wottiya aqo oyqqibeenna haratuura gayttana danddayaasa. Qassi neeni Yihoowa ufayssanawu neessi danddayettida ubbabaa oottiyo wode neenikka tumuppe ufayttana.
Neeni Yihoowawu minnada haggaaziyabanne dumma dumma ishanttuuranne michchonttuura wodiya aattiyaba gidikko, aqo oyqqanawu koyiya haratuura gayttana danddayaasa (Mentto 5 xeella)
6. Aqo oyqqibeenna Kiristtaaneti aqo lagge koyiyo wode ay hassayana koshshii?
6 Shin aqo laggiya koyiyogee ne deꞌuwan aybippenne aaruwan keehi koshshiyaba gidenna mala naagetta. (Pili. 1:10) Tumuppe ufayttanaadan oottiyabay Yihoowara neeni dabbotiyogaappe attin, aqo oyqqiyogaa woy oyqqennan aggiyogaa gidenna. (Mat. 5:3) Qassi neeni aqo oyqqennan takkiyo wodiyan ne haggaazuwa aassanawu injjiya demmaasa. (1 Qor. 7:32, 33) He wodiya akeekan goꞌetta. Amarkkan deꞌiya layttay 40 matidaashin aqo oyqqida Jeesiko giyo michchiya hagaadan gaasu, “Taani ubbatoo minnada haggaazidoogee aqo oyqqanawu koyayddakka ufayttada deꞌanaadan tana maaddiis.”
WODIYA BAZZADA HE URAABAA ERA
7. Neeni issi uraa siiqiyogaa yootanaappe kase abaa loytta eriyogee loꞌꞌo gidiyoy aybissee? (Leemiso 13:16)
7 Issi uri neeyyo loꞌꞌo aqo lagge gidiyabadan neeni qoppikko shin? Neeni A siiqiyogaa sohuwara yootana koshshii? Geeshsha Maxaafay yootiyogaadan, akeekanchcha uri issibaa oottanaappe kase hegaabaa erees. (Leemiso 13:16 nabbaba.) Yaaniyo gishshawu neeni A siiqiyogaa yootanaappe kase, amarida wodiyawu he uraabaa eranawu baaxetiyogee loꞌꞌo. Nezerlandden deꞌiya Aschwini hagaadan giis: “Nuuyyo siyettiyabay eesuwan eesuwan laamettana danddayees. Yaatiyo gishshawu, wodiya bazzada issi uraa erappe attin, ne wozanan amottido gishsha xallawu aqo oyqqanawu qoppada issippe wodiya aattoppa.” Hegaa bollikka, he uraabaa neeni loytta eriyo wode, I neeyyo hanennaagaa akeekana danddayaasa.
8. Aqo oyqqibeenna issi uri loꞌꞌo aqo lagge gidana uraabaa waati erana danddayii? (Misiliyakka xeella.)
8 Neeni issi uraa siiqiyogaa awu yootennan abaa waata erana danddayay? Galchchaa shiiqotun woy issippe wodiya aattiyosan he uri ayyaanaaban, eeshshaaninne kandduwan ay malakko akeekana danddayaasa. A laggeti oonee, qassi I haasayanawu dosiyobay aybee? (Luq. 6:45) A halchchoy neegaara issi malee? A loytti eriya A galchchaa cimata woy hara kayma Kiristtaaneta abaa oychchana danddayaasa. (Lee. 20:18) Ayyo ay mala sunttaynne eeshshay deꞌiyakko oychchana danddayaasa. (Uru. 2:11) Neeni abaa eranawu baaxetiyo wode A yeellayennaadan naagetta. A qofaa bonchcha; qassi abaa ubbabaa eranawu baaxetoppa.
Neeni issi uraa siiqiyogaa yootanaappe kase, amarida wodiyawu abaa loytta eranawu baaxeta (Mentto 7-8 xeella)
9. Loꞌꞌo aqo lagge gidana danddayiya uraa neeni haasayissanaappe kase ay ammanettana koshshii?
9 Neeni he uraa siiqiyogaa yootanaappe kase ay keena wodiyawu abaa erana koshshii? Neeni hegaa sohuwara yootiyaba gidikko, ne issibaa kuuyanaappe kase loytta yiggennabadan he uri qoppana danddayees. (Lee. 29:20) Shin, he uri neeni A siiqidoogaa akeekidashin neeni hegaa yootennan keehi takkikko, ne issibaa kuuyanaappe kase keehi mammottiyabadan I qoppana danddayees. (Era. 11:4) Neeni issi uraa haasayissanaappe kase, he uraara aqo oyqqiyogaa ammanettana koshshennaagaa hassaya. Shin neeni aqo oyqqanawu giigettidoogaanne neeni qoppido uri neeyyo loꞌꞌo aqo lagge gidana danddayiyogaa ammanettana koshshees.
10. Issi uri nena siiqikkokka, ne A siiqennaba gidikko waatana koshshii?
10 Issi uri nena siiqidoogaa neeni akeekikko waatana koshshii? Neeni he ura siiqennaba gidikko, ne oottiyoban hegaa bessa. Neeni issi ura siiqennan deꞌaydda neeni A koyiyabadan I qoppanaadan oottiyogee iitaba.—1 Qor. 10:24; Efi. 4:25.
11. Aqo oyqqanaappe kase issippe wodiya aattiyo woy aqo oyqqiyo hanotaa neeni giigissiyaba gidikko, ne loytta qoppana koshshiyabay aybee?
11 Issi issi biittatun, yelidaageeti woy kayma gidida hara dabboti aqo oyqqibeennaageetussi aqo laggiya doorana danddayoosona. Hara biittatun qassi, so asay woy laggeti aqo oyqqibeenna urawu aqo laggiya koyoosona; yaatidi attumaagee woy maccaara issoy issuwawu haniyakkonne eranawu issippe gayttanaadan oottoosona. Aqo oyqqanaappe kase issippe wodiya aattiyo woy aqo oyqqiyo hanotaa giigissanaadan neeni oyshettikko, eti naaꞌꞌaykka koyiyoobaanne etassi koshshiyaaba akeeka. Neeni laggiyawu woy dabbuwawu haniya aqo lagge gaada issi ura qoppikko, abaanne A eeshshaabaa loytta era; qassi I Yihoowara loytti dabbotidaakkonne shaakka era. Yihoowara dabbotaa minttiyogee miishshaappe, timirttiyappe woy hayttatiyogaappe aaruwan keehi koshshiyaba. Gidikkokka, aqo oyqqanaakkonne wurssettan kuuyana koshshiyay aqo oyqqibeenna ishaanne aqo oyqqibeenna michchiyo gidiyogaa hassaya.—Gal. 6:5.
AQO OYQQANAWU QOPPADA ISSIPPE WODIYA AATTIYOGAA WAATA DOOMMANA DANDDAYAY?
12. Neeni issi uraara aqo oyqqanawu qoppada issippe wodiya aattanawu koyikko, he urawu hegaa waata yootana danddayay?
12 Neeni issi uraara aqo oyqqanawu qoppada issippe wodiya aattanawu qoppikko, neeyyo siyettiyabaa awu waata yootana danddayay? e Neeni issisan gayttada woy silkkiyan he uraara haasayana danddayaasa. Neeni he ura siiqidoogaanne abaa erana koyiyoogaa qoncciyan yoota. (1 Qor. 14:9) Koshshikko, I loytti qoppidi zaaranaashin amarida wodiyawu naaga. (Lee. 15:28) Qassi he uri koyennaba gidikko A qofaa bonchcha.
13. Issi uri nena siiqiyogaa neeyyo yootikko waatana danddayay? (Qolasiyaasa 4:6)
13 Issi uri nena siiqiyogaa neeyyo yootikko shin? He uri hegaa neeyyo yootanawu xala gidana koshshennan aggenna; yaatiyo gishshawu awu kehatettaanne bonchchuwa bessa. (Qolasiyaasa 4:6 nabbaba.) Neeni aqo oyqqanawu qoppada issippe wodiya aattiyoogaa doommanaakkonne kuuyanawu neessi wodee koshshikko hegaa yoota. Shin, danddayettida keenan sohuwara ne zaaruwa yoota. (Lee. 13:12) Neeni koyana xayikko kehatettaaninne qoncciyan yoota. Osttiriyan deꞌiya Hansa giyo ishay issi michchiya akko yaada A haasayissido wode I waati zaaridaakko akeeka: “Taani kuuyidobaa kehatettaaninne qoncciyan yootaas. Taani O coo qaaqqayanawu koyabeenna gishshawu, sohuwara hegaa yootaas. Hegaa gishshawu, tana qofaa laammees gaada A qoppennaadan haasayiyobaaninne oottiyoban naagettaas.” Shin neenikka A siiqikko hegaa awu yoota; yaatidi aqo oyqqanawu qoppidi intte issippe aattiyo wodiyan hanana danddayees gaada neeni qoppiyobata issippe tobbite. Ne wogaa woy hara gaasuwan ne qofay he uraagaappe dummatana danddayees.
AQO OYQQIBEENNA KIRISTTAANETA HARATI WAATI MAADDANA DANDDAYIYONAA?
14. Aqo oyqqibeenna Kiristtaaneta waati minttettana danddayiyoo?
14 Aqo oyqqibeenna Kiristtaaneta nuuni waati minttettananne maaddana danddayiyoo? Nuuni maaddana danddayiyo issi ogee haasayiyoban naagettiyogaa. (Efi. 4:29) Nuna hagaadan oychchana danddayoos: ‘Taani aqo oyqqanawu koyiyageetu bolli qilliicciyanaa? Aqo oyqqibeenna issi ishaynne michchiya haasayishin beꞌada eti issoy issuwara siiqettoosona gaada qoppiyanaa?’ (1 Xim. 5:13) Hegaa bollikka, aqo oyqqibeenna Kiristtaaneti mooridabadan woy haratuppe guuxxiyabadan qoppana mala nuuni mule oottana bessenna. Qommoora abay odettido Hansi hagaadan giis: Amarida ishantti hagaadan goosona, ‘Neeni aqo oyqqennay aybissee? Neeni naꞌa gidakka.’ Hegaa mala qofay harati eta xoqqu ootti xeellennabadan etawu siyettanaadaaninne ubbatoo eti aqo oyqqiyogaabaa qoppanaadan oottana danddayees. Aqo oyqqibeenna Kiristtaaneta demmido injje ubban galatiyogee keehi loꞌꞌoba!—1 Tas. 5:11.
15. (a) Issi uri aqo lagge demmanaadan nuuni maaddanaappe kasetidi loytti qoppana koshshiyabay aybee? (Roome 15:2) (Misiliyakka xeella.) (b) Biiduwappe neeni tamaarido keehi koshshiyabati awugeetee?
15 Issi ishaynne michchiya loꞌꞌo aqo lagge gidana danddayoosona giidi nuuni qoppikko shin? Geeshsha Maxaafay nuuni haratussi siyettiyabaa akeekanaadan yootees. (Roome 15:2 nabbaba.) Aqo oyqqibeenna daroti loꞌꞌo aqo lagge gidana danddayiya ura harati eta eretissanaadan koyokkona; qassi nuuni eta qofaa bonchchana bessees. (2 Tas. 3:11) Harati nu maaduwa koyana danddayoosona, shin eti oychennan deꞌishin nuuni maaddana koshshenna. f (Lee. 3:27) Issoti issoti hegaa mala ogiyan erettiyogaa koyokkona. Jarmanen deꞌiya Lidiyo giyo aqo oyqqabeenna michchiya hagaadan gaasu: “Daro asaa xeesiyo wode issi ishaanne issi michchiyokka shoobbana danddayaasa. He ishaynne michchiya issippe wodiya aattanaadaaninne bantta koyidobaa kuuyanaadan hanotay injjetanaadan ootta.”
Cora asay issippe shiiqiyogee aqo oyqqibeenna Kiristtaaneti issoy issuwara gayttanaadan oottees (Mentto 15 xeella)
16. Aqo oyqqibeenna Kiristtaaneti ayba hassayana bessii?
16 Nuuni ubbay, aqo oyqqibeennaageeta gidin woy aqo oyqqidaageetikka ufayssiya deꞌuwa deꞌana danddayoos! (Maz. 128:1) Yaatiyo gishshawu, neeni aqo oyqqanawu koyikkokka aqo laggiya demmaychchabeennaba gidikko, ubbatoo Yihoowawu haggaaziyogan xeelaa wotta. Maakon deꞌiya Sin Yi giyo michchiya hagaadan gaasu: “Neeni haꞌꞌi aqo oyqqennan deꞌiyo wodee gannatiyan ne aqo laggiyara aattiyo wodiyara geeddarssiyo wode keehi guutta. He wodiyan ufaytta; qassi hegaa loytta goꞌetta.” Shin neeyyo loꞌꞌo aqo lagge gidana danddayiya ura demmada he uraara issippe wodiya aattiyogaa doommikko waatana danddayay? Aqo oyqqanawu qoppada issippe aattiyo wodiyan neeni loꞌꞌobaa waata kuuyanaakko kaalliya huuphe yohuwan beꞌana.
MAZAMURE 137 Ammanettida Kiristtaane Maccaasata
a Neeni aqo oyqqanawu gakkidaakkonne shaakka eranawu nena maaddanaadan, “Aqo Oyqqanawu Qoppidi Wodiya Aattiyogaa—Shaaho 1: Taani Hegawu Gakkidanaa?” (Amaarattuwa) giya huuphe yohuwa jw.org saytiyan xeella.
b QONCCISSIDO QAALAA: Ha huuphe yohuwaninne kaalliya huuphe yohuwan, “aqo oyqqanawu qoppidi issippe wodiya aattiyogaa” giyagee issi attumaageenne maccaara issoy issuwawu haniya aqo lagge gidanaakkonne akeekanawu issoy issuwabaa loytti eriyo wodiya qonccissees. Aqo oyqqanawu qoppidi wodiya aattiyogee doomettiyoy issi attumaageenne maccaara issoy issuwa siiqiyogaa qoncciyan yootiyo wodiyana, qassi hegee eti aqo oyqqanaakko woy agganaakko kuuyiyo wodiya gakkanawu takkees.
c Kaalliya menttotun, loꞌꞌo aqo laggee isha gidiyogaadan qoncciis. He maarati michchonttussikka haniyogee qoncce.
d Issi issi asatu sunttay laamettiis.
e Issi issi wogatun, darotoo issi ishay aqo oyqqanawu qoppidi wodiya issippe aattiyogaa doommanawu issi michchiyo oychchees. Shin issi michchiya oychchikkokka metoy deꞌenna. (Uru. 3:1-13) Gujjada eranawu, “Yelagati Oychchiyo Oyshaa . . . Taani A Siiqiyogaa Waata Qonccissana Danddayiyanaa?” (Amaarattuwa) giya huuphe yohuwa Hidaare 8, 2004 Beegottite! maxeetiyan xeella.
f Ammanuwawu Baaxetiyoogan Loꞌꞌo Ayfiyaa Demmidaageeta—Aqo Oyqqibeenna Kiristtaaneta giya biiduwa jw.org saytiyan xeella.
