XANNAꞌIYO HUUPHE YOHUWA 19
MAZAMURE 22 Kawotettay Eqqiis—Haa Yo!
Yihooway Mata Wode Pirddiyo Pirddaabaa Nuuni Eriyobay Aybee?
“Godai . . . ooninne xayana mala koyenna.”—2 PHE. 3:9.
TAMAARANABAA
Yihooway matan asaa bolli pirddiyo wode xillobaanne suurebaa pirddanaagaa ammanettana danddayoos.
1. Nuuni keehi ufayssiya wodiyan deꞌoos giyoy aybisee?
NUUNI keehi ufayssiya wodiyan deꞌoos! Geeshsha Maxaafay kasetidi odidobay polettiiddi deꞌiyogaa nuuni ubba galla beꞌoos. Leemisuwawu, ‘huuphessa kawoynne tohossa kawoy’ alamiya haaranawu koyiyo gishshawu, issoy issuwara olettiyogaa nuuni beꞌoos. (Dane. 11:40) Xoossaa Kawotettaa mishiraachoy saꞌaa ubban sabbakettiiddi deꞌiyogaa nuuni eroos. Qassi daro miiloone asay Yihoowawu haggaazanawu dooriis. (Isi. 60:22; Mat. 24:14) Hegaa bollikka, kumi palahida ayyaanaabaa qumaa “koshshiyo wodiyan” demmoos.—Mat. 24:45-47.
2. Nuuni ammanettana danddayiyobay aybee, qassi nuuni akeekana koshshiyabay aybee?
2 Mata wode hanana gitabata nuuni loytti akeekanaadan Yihooway nuna ubbatoo maaddees. (Lee. 4:18; Dane. 2:28) Gita waayee doommiyo wode, nuuni ammanettidi deꞌanaadan erana koshshiya ubbabaa eranaagaanne he keehi wayssiya wodiyan issippetettan deꞌanaagaa ammanettana danddayoos. Shin sinttanaabaa xeelliyagan nuuni erenna issi issibati deꞌiyogaa akeekana koshshees. Ha huuphe yohuwan, kase nuuni yootido gitabatuppe amaridaageeta laammana koshshidoy aybissakko koyro beꞌana. Yaatidi sinttanaabaa xeelliyagan nuuni eriyo amaridabatanne saluwan deꞌiya nu Aaway hegaadan oottiyo ogiya beꞌana.
NUUNI ERENNABAA
3. Yihoowa ammanenna asay gita waayee doommiyo wode waananaagaa nuuni kase yootidoo, qassi nuuni hegaadan qoppidoy aybissee?
3 Gita waayee doommiyo wode, asay Yihoowa ammaniyonne Armmageedoona olaappe attiyo injjiya demmenna giidi kase yootida. Nuuni hegaa giidoy Bashshaa Haattaa wode asay huuphiyan huuphiyan, qassi hanotati ubbay sinttappe hananabaa bessoosona giidi qoppido gishshataassa. Leemisuwawu, Yihooway penggiya gorddi simmin ooninne markkabiya giddo gelana danddayibeennaagaadan, gita waayee doommiyo wode ooninne Yihoowa ammanananne attana danddayenna giidi qoppida.—Mat. 24:37-39.
4. Nohe wode hanida ubbabay ha wodiyan polettiyabaa bessees giidi qoppana koshshennay aybissee? Qonccissa.
4 Bashshaa Haattaa wode hanida ubbabay sinttappe hananabaa bessees giyogee likkee? Likke gidenna. Aybissi? Geeshsha Maxaafay hegaabaa yootenna gishshataassa. a Yesuusi I simmiyo wodiya ‘Nohe wodiyara’ geeddarissidoogee tuma. Shin I Nohe wode hanida ubbabay, hegeekka Yihooway markkabiya penggiya gorddidoogee sinttappe hananabaa bessees gibeenna. Gidoppe attin, hegaa giyogee Nohe taarikiyappenne Bashsha Haattaa wode hanidabaappe tamaarana danddayokko giyogaa gidenna.
5. (a) Bashshaa Haattaappe kase Nohee oottidobay aybee? (Ibraawe 11:7; 1 PHeexiroosa 3:20) (b) Sabbakiyo oosuwara gayttidaagan Nohe wodiyanne nu wodiya issi mala oottiyabay aybee?
5 Nohee Yihooway yootidobaa siyidi markkabiya keexxiyogan ammanuwa bessiis. (Ibraawe 11:7; 1 PHeexiroosa 3:20 nabbaba.) Hegaadankka, Xoossaa Kawotettaa mishiraachchuwa siyiya asay hegaa ammaniyogaa bantta oosuwan bessana koshshees. (Oos. 3:17-20) Pheexiroosi Noha ‘xillotettaabaa yootidaagaa’ giidi xeesiis. (2 PHe. 2:5) Shin kasetiya huuphe yohuwan nuuni beꞌidoogaadan, Bashshaa Haattay yaanaappe kase Nohee saꞌan deꞌiya asa ubbawu sabbakidaakkonne nuuni erokko. Ha wodiyan kumetta saꞌan deꞌiya asawu nuuni sabbakanawu baaxetoos; qassi hegaa minni oottiiddi deꞌoos. Shin nuuni ay keena baaxetikkokka, wurssettay yaanaappe kase ubba asawu sabbakana danddayokko. Aybissi?
6-7. Wurssettay yaanaappe kase nuuni mishiraachchuwa ubba asawu sabbakana danddayokko giyoy aybissee?
6 Sabbakiyo oosuwa xeelliyagan Yesuusi yootidobaa qoppa. ‘Ubba asawu markka gidana mala mishiraachchoy saꞌaa ubban’ odettanaagaa I kasetidi yootiis. (Mat. 24:14) Awudeegaappenne aaruwan he hiraagay ha wodiyan polettiiddi deꞌees. Xoossaa Kawotettaa mishiraachchuwabaa yootiyabay 1000ppe dariya qaalan deꞌees, qassi jw.org saytiya baggaara ha wodiyan daro asay Xoossaa Kawotettaabaa yootiya mishiraachchuwa tamaarana danddayees.
7 Shin, Yesuusi bana kaalliyageeti I yaana gakkanaashin “katamata mule yuuyidi” wurssennaagaakka yootiis. (Mat. 10:23; 25:31-33) Yaaniyo gishshawu, Yesuusi asaa bolli pirddanawu yaanaappe kase nuuni ubba asawu sabbakana danddayokko. Ha wodiyan daro asay nuuni laꞌatettan sabbakana danddayenna heeratun deꞌees. Qassi, daqiiqan daqiiqan daro naati yelettoosona. Hegaa gishshawu, nuuni “zare ubbaayyo, qommo ubbaayyo, dumma dumma biittaa qaala ubbaayyo” mishiraachchuwa yootanawu nuussi danddayettida ubbabaa oottiyaba gidikkonne, wurssettay yaanaappe kase ubba asawu sabbakana danddayokko.—Ajj. 14:6.
8. Yihooway asaa bolli sinttappe pirddana pirddaabaa nuuni woygi oychchana danddayiyoo? (Misiliyakka xeella.)
8 Hegaappe denddidaagan, nuuni hagaadan oychchana danddayoos: Gita waayee doommanaappe kase mishiraachchuwa siyana danddayibeenna asaa bolli Yihoowaynne I sunttido A Naꞌay waati pirddanee? (Yoh. 5:19, 22, 27; Oos. 17:31) Ha huuphe yohoy ekettido xiqisee Yihooway “ooninne xayana mala” koyennaagaa yootees. I “asai ubbai” attanaadan koyees. (2 PHe. 3:9; 1 Xim. 2:4) Nuuni Yihoowabaa hegaa erikkokka, mishiraachchuwa mule siyana danddayibeenna asaa bolli I waati pirddanaakko nuussi yootibeenna. Qassi I nuuyyo yootana koshshennaagee qoncce.
Gita waayee doommanaappe kase mishiraachchuwa siyana danddayibeenna asaa bolli Yihooway waati pirddanee? (Mentto 8 xeella) c
9. Geeshsha Maxaafaa baggaara Yihooway nuussi yootidobay aybee?
9 Yihooway I oottana amaridabata ba Qaalaa baggaara nuussi yootiis. Leemisuwawu, mishiraachchuwa siyiyonne bantta eeshshaa laammiyo injjiya demmibeenna ‘xillo gidenna asaa’ Yihooway hayquwappe denttanaagaa Geeshsha Maxaafay yootees. (Oos. 24:15, NW; Luq. 23:42, 43) Hagee keehi koshshiya hara oyshata oychchanaadan oottees.
10. Nuuni harabaa ay oychchana danddayiyoo?
10 Gita waayiya wode hayqqida asa ubbay dendduwa hidootay baynnan merinawu xayanee? Yihoowa eqettiya, qassi Armmageedoona olan Yihoowaynne A olanchchati xayssido asati hayquwappe denddennaagaa Geeshsha Maxaafay geeshshidi yootees. (2 Tas. 1:6-10) Leemisuwawu, gita waayiya wode, sahuwa, woy cimatettaa gaasuwan, woy daafabay gakkin, woykko asi worin hayqqida harati waananee? (Era. 9:11; Zak. 14:13) Etappe amaridaageeti ooratta alamiyan hayquwappe denddiya ‘xillo gidenna asatuura’ denddanee? Nuuni erokko.
NUUNI ERIYOBAA
11. Armmageedoona olaa wode issi uri pirddettanawu gaaso gidiyabay aybee?
11 Sinttanaabaa nuuni darobaa eroos. Leemisuwawu, Armmageedoona olaa wode asay Kiristtoosa ishanttussi oottidoban eta bolli pirddettanaagaa nuuni eroos. (Mat. 25:40) Tiyettidaageetuyyonne Kiristtoosawu exatiyogaa bessidaageeti dorssata geetettidi pirddettana. Kiristtoosa ishanttuppe amaridaageeti gita waayee doommi simmin saꞌan takkanaagaanne Armmageedoona olay doommanaappe guutta kasetidi saluwa beennaagaa nuuni eroos. Kiristtoosa ishanttuppe amaridaageeti saꞌan deꞌido wode ubban, suure wozanay deꞌiyo asay etanne eta oosuwa maaddiyo injjiya demmana danddayees. (Mat. 25:31, 32; Ajj. 12:17) Hagee keehi koshshiyoy aybissee?
12-13. Amaridaageeti ‘Gita Baablooni’ xayuwa beꞌidi waanana danddayiyonaa? (Misiliyakka xeella.)
12 Gita waayee doommi simminkka, ‘Gita Baabilooni’ xayuwa beꞌiya amaridaageeti Yihoowa Markkati hegee hananaagaa daro layttawu yootiiddi takkidoogaa hassayana danddayoosona. Gita waayiya wode, ‘Gita Baabilooni’ xayuwa beꞌiya amaridaageeti Yihoowa ammananee?—Ajj. 17:5; Hiz. 33:33.
13 Hegaadan gidikko, Muuse wode Gibxxen hanidabaara hegee issi mala gidana. Israaꞌeelati Gibxxeppe kiyiyo wode “hara daro asai” etaara kiyidoogaa hassaya. Muusee yootido Tammu Boshay polettidoogaa eti beꞌido wode etappe amaridaageeti Yihoowa ammaniyogaa doommennan aggokkona. (Kes. 12:38) Gita Baabloona xaya simmin hegaa malabay hanikko, Armmageedoona olay doommanaappe guuttaa kasetidi asay nunaara walahettiyogee likke gidenna giidi nuuni qoppanee? Qoppennaagee qoncce! ‘Qaretaynne maarotay kumido, danddayanchchaa, aggenna siiqoy daridonne daro ammanettiya’ Xoossaa gidida saluwan deꞌiya nu Aawaa milatanawu koyoos. b—Kes. 34:6.
‘Gita Baabilooni’ xayuwa beꞌiya amaridaageeti Yihoowa Markkati hegee hananaagaa daro layttawu yootiiddi takkidoogaa hassayana danddayoosona (Mentto 12-13 xeella) d
14-15. Issi uri merinaa deꞌuwa demmiyogee I hayqqiyo wodiyara woy I deꞌiyo heeraara gayttidabee? Qonccissa. (Mazamure 33:4, 5)
14 Ishantti woy michchontti Yihoowawu haggaazenna bantta dabbuwa xeelliyagan issi issitoo hagaadan gaana danddayoosona: “I gita waayee doommanaappe kase hayqqikko awu loꞌꞌo; ayssi giikko, I hayquwappe denddana.” Loꞌꞌobaa qoppidi hegaadan giidoogee qoncce. Shin issi uri merinaa deꞌuwa demmiyogee I hayqqiyo wodiyara gayttidaban gidenna. Yihooway wottiyobi baynna Daanna; I ubbatoo suurebaanne tumubaa kuuyees. (Mazamure 33:4, 5 nabbaba.) ‘Saꞌaa ubbaa pirddiyagee’ suurebaa pirddiyogaa ammanettana danddayoos.—Doo. 18:25.
15 Issi uri merinawu deꞌiyo hidootaa demmiyoy I deꞌiyo heeraara gayttidaban gidenna giidi qoppiyogeekka bessiyaba. Daro miiloone asay Kawotettaa mishiraachchuwa mule siyana danddayenna biittatun deꞌiyo gishshawu Yihooway eta deeshshata giidi pirddennaagaa ammanettana danddayoos. (Mat. 25:46) Saꞌaa ubbaa xillotettan pirddiyagee nuuppe aaruwan etassi qoppees. Gita waayiya wode Yihooway waatanaakko nuuni erokko. Yihooway kawotettatu sinttan ba geeshshatettaa bessiyo wode, etappe amaridaageeti abaa tamaarana, A ammanananne awu exatana danddayoosona.—Hiz. 38:16.
Gita waayiya wode, ‘Gita Baabilooni’ xayuwa beꞌiya amaridaageeti Yihoowa ammananee?
16. Yihoowabaa nuuni eriyobay aybee? (Misiliyakka xeella.)
16 Yihooway asaa xoqqu ootti xeelliyogaa nuuni Geeshsha Maxaafaa xannaꞌidi akeekida. Nuuni ubbay merinaa deꞌuwa demmanaadan I ba Naꞌaa deꞌuwa nuussi immiis. (Yoh. 3:16) Yihooway nuna ubbaa siiqees. (Isi. 49:15) I nuna ubbaa nu sunttan sunttan erees. Nuuni hayqqikkokka, I nuna loytti eriyo gishshawu nuna hayquwappe denttana danddayees; ayssi giikko I nubaa ubbabaanne nu hassayiyo ubbabaa dogenna! (Mat. 10:29-31) Siiqiya saluwan deꞌiya nu Aaway aadhdhida eranchcha, xillonne maariyagaa gidiyo gishshawu ubba asaa wottiyobi baynna ogiyan pirddanaagaa nuuni ammanettiyo loꞌꞌo gaasoy deꞌees.—Yaaq. 2:13.
Yihooway aadhdhida eranchcha, xillonne maariyagaa gidiyo gishshawu ubba asaa wottiyobi baynna ogiyan pirddanaagaa ammanettana danddayoos (Mentto 16 xeella)
17. Nuuni kaalliya huuphe yohuwan ay pilgganee?
17 Ha laamettida qofay sabbakuwa oosoy awudeegaappenne aaruwan eesoyiyaba gidiyogaa nuna hassayissees. Nuuni hegaadan giyoy aybissee? Qassi nuuni aggennan minni sabbakanaadan oottiyabay aybee? Kaalliya huuphe yohuwan ha oyshatu zaaruwa loytti pilggana.
MAZAMURE 76 Nena Ufayssennee?
a Laamettido gaasuwa loytta eranawu, Laappune 15, 2015 Wochchiyo Keelan sinttaa 7-11n deꞌiya, “Hagee Ne Shenedan Haniis” giya huuphe yohuwa xeella.
b Gita Baabiloona xaya simmin, Maagooga Googi qohuwa gattiyo wode Yihoowa ashkkarati ubbay paacettana. Qassi Gita Baabiloona xaya simmin Xoossaa asaara walahettida ubbay paacettana.
c MISILIYA QOKNCCISSUWA: Heezzu misilee mishiraachchoy amaridaageeta gakkana danddayibeenna gaasuwa qonccissees: (1) Waannatiya haymaanootee qohuwa gattana danddayiyo heeran deꞌiya issi maccaasiyo, (2) polotikaa hanotay diggiyonne qohuwa gattana danddayiyo heeran deꞌiya issi azinaanne machchiyo, qassi (3) asi gakkana danddayenna keehi haaho sohuwan deꞌiya issi bitaniya.
d MISILIYA QONCCISSUWA: Yihoowawu haggaaziyogaa aggida issi yelagiya ‘Gita Baabilooni’ xayuwa xeelliyagan kase tamaaridobaa hassayawusu. A Yihoowakko simmanawu kuuyada Yihoowa Markka gidida bana yelidaageetukko simmaasu. Hegaa malabay hanikko, maariyanne qarettiya, qassi nagaranchchay simmiyogan ufayttiya saluwan deꞌiya nu Aawaa milatanawu koyoos.
