ORUWA Ichchashe 18, 2023n, Ishaa Gej Filigilinne Jefri Winderi Yihoowa Markkatu Oosuwa Kaalettiya Citaa yara gididi sunttettidoogaa yootiya dumma erissoy jw.org saytiyan kiyiis. He naaꞌꞌu ishanttikka daro layttawu Yihoowawu ammanettidi haggaazidosona.

Ishaa Filigili Amarkkan, Penssilvaaniyan arggo baggan dicciis; qassi bana yelidaageetuppe tumaa tamaariis. I yelagatettan deꞌiyo wode eta soo asay aassiyageeti keehi koshshiyosan haggaazanawu qeeri katamaa biis. Hegaappe simmin darin takkennan, I Hidaare 20, 1988n haattan muukettiis.

Ishaa Filigila yelidaageeti I ubba wode haggaazuwa haggaazanaadan ubbatoo A minttettidosona. Eti woradaa xomoosiyageetanne Beeteele so asa yarata bantta son darotoo mokkoosona; he ishanttinne michchontti ay keena ufayttiyakko Ishaa Filigili akeekiis. I haattan muukettidi darin takkennan, Masqqala 1, 1989n ubba wode aqinye gidiis. Naaꞌꞌu layttaappe simmin, I Beeteelen haggaazanawu kessido halchchuwa poliis; I hegaa awu layttay 12 gidido wode halchchiis. Xiqimita 1991n Birukiliine Beeteelen haggaaziyogaa doommiis.

Ishaa Filigili Beeteelen Xaafettidabaa Issippe Gattidi Maxaafa Kessiyo Kifiliyan hosppun layttawu ootti simmidi Haggaazo Kifiliyan oottanaadan maddabettiis. He wode I Raashiya doonaa goꞌettiya galchchan amarida layttawu haggaaziis. Yaatidi 2006n Naadiyo ekkiis; eti issippe Beeteelen haggaazoosona. Eti Porchchugaale doonaa goꞌettiya galchchan haggaazidosona; qassi tammaappe dariya layttawu Isppeene doonaa goꞌettiya galchchan haggaazidosona. Ishaa Filigili daro layttawu Haggaazo Kifiliyan ootti simmidi Timirtte Konttiya Biiruwaninne Haggaazo Konttiya Biiruwan oottanaadan maddabettiis. I Laappune 2022n Oosuwa Kaalettiya Citaa Haggaazo Konttiya maaddiyagaa gididi sunttettiis.

 Ishaa Winderi Amarkkan, Kaliforniyan Muriyeta giyosan dicciis. I bana yelidaageetuppe tumaa tamaaridi Laappune 29, 1986n haattan muukettiis. Kaalliya aginan kaafe aqinye gidiis. I hegaa dosido gishshawu agganawu koyibeenna. Amarida aginawu kaafe aqinye gididi haggaazi simmidi Xiqimita 1, 1986n ubba wode aqinye gidiis.

Ishaa Winderi yelagatettan deꞌiiddi he wode Beeteelen haggaaziya ba bayra ishantta naaꞌꞌata biidi oychchiis. Hegee I gitaa gidiyo wode Beeteele gelanawu oychchanaadan denttettiis. Qassi I Uddufune 1990n, Wolkile Beeteelen haggaazanaadan shoobettiis.

Ishaa Winderi Beeteelen Geeshshiyo Kifiliya, Goshshaara Gayttidaba Oottiya Kifiliyanne Beeteele Biiruwa gujjin, dumma dumma ooso kifiletun oottiis. I Anjjeelo 1997n ekkiis, yaatin eti he wodeppe doommidi issippe Beeteelen haggaazoosona. Eti 2014n Worwike maddabettidosona; Ishaa Winderi yan waanna biiruwa keexuwa oosuwa maaddiis. Eti 2016n Patersenen deꞌiya Wachtawer Timirtte Kifiliyan maddabettidosona; Ishaa Winderi yan Cenggurssaanne Biiduwa Kifiliyan oottiis. Oyddu layttaappe guyyiyan eti Worwike simmidosona; qassi Ishaa Winderi Persenel Konttiya Biiruwan oottanaadan maddabettiis. I Laappune 2022n Oosuwa Kaalettiya Citaa Persenel Konttiya maaddiyagaa gididi sunttettiis.

“Imota” gidida ha attumaageeti Kawotettaabaa kaseyanawu ubbatoo minni oottiyo wode Yihooway eta darissidi anjjanaadan woossoos.—Efi. 4:8.