1. Yihoowa kaaletoy nuussi koshshiyoy aybissee? Leemisuwa yoota.

 WORAA giddon neessi ogee bayidabadan qoppa. Yan doꞌati, qohiya mittay maataynne paalliya guuttabati deꞌiyo gishshawu hegee keehi iita soho. Qassi ogee injjetenna; hegaa bollikka shuchchay kumiis. Qohiyabay awan deꞌiyakko, qassi hegaappe waani naagettanaakko loytti eriya uri nena kaalettikko neeni woppu gaana! Ha alamee he woraa mala. Nuuni Yihoowara dabbotido dabbotaa moorana danddayiya iitabay ha alamiyan kumiis. Shin Yihooway wottiyobi baynna hanotan nuna kaalettees. I nuna qohiyabaappe naageesinne ooratta alamiyan demmana merinaa deꞌuwawu kaalettees.

2. Yihooway nuna waati kaalettii?

² Yihooway nuna waati kaalettii? Koyruwan I ba Qaalaa Geeshsha Maxaafaa baggaara kaalettees. Qassi asaa baggaarakka nuna kaalettees. Leemisuwawu, nuuni loꞌꞌobaa kuuyanaadan maaddiya ayyaanaabaa qumaa ‘ammanettida wozannaama aylliya’ baggaara I nuussi giigissees. (Mat. 24:45) Hara kayma attuma asatu baggaarakka Yihooway nuna kaalettees. Leemisuwawu, meto wodiya genccanawu maaddiya minttettuwanne kaaletuwa woradaa xomoosiyageetuppenne galchchaa cimatuppe demmoos. Keehi waayissiya ha wurssetta gallassatun ammanttiya kaaletuwa demmiyo gishshawu wozanappe galatoos! Hegee nuuni Yihoowan sabettidi deꞌanaadaaninne deꞌo ogiyappe kiyennaadan maaddees.

3. Ha huuphe yohuwan ay beꞌanee?

³ Shin Yihoowa kaaletuwa kaalliyogee issi issitoo metiyaba gidana danddayees; ubba he kaaletoy nagaranchcha asaa baggaara imettiyo wode azazettiyogee yaa metees. Aybissi? Eti nuussi immiyo kaaletuwa nuuni dosennan aggana danddayoos. Woy eti immiyo kaaletoy nuussi hanennaba milatin, hegee Yihoowappe yibeenna giidi qoppana danddayoos. Yihooway  ba asaa kaalettiyogaanne A kaaletuwa kaalliyogee anjjuwa ehiyogaa nuuni ammanettiyogee he wodetun keehi koshshiyaba. Nuuni mintti ammanettanaadan maaddana mala kaallidi deꞌiyabata ha huuphe yohuwan beꞌana: (1) beni wodiyan Yihooway ba asaa waati kaalettidee? (2) ha wodiyan nuna waati kaalettiiddi deꞌii? qassi (3) A kaaletuwa ubbatoo kaalliyogee nuna waati goꞌꞌii?

YIHOOWAY ISRAAꞌEELATA WAATI KAALETTIDEE?

4-5. Yihooway Israaꞌeelata Muuse baggaara kaalettiyogaa waati bessidee? (Misiliyaa xeella.)

⁴ Yihooway Israaꞌeelata Gibxxeppe kaaletti kessanawu Muusa sunttiis. Qassi I Muuse baggaara Israaꞌeelata kaalettiyogaa qoncciyan bessiis. Leemisuwawu, I gallassan shaaraa tuussan, qassi qamman tamaa tuussan kaalettiis. (Kes. 13:21) Muusee anne Israaꞌeelata Zoꞌo Abbaakko kaalettiya tuussaa kaalliis. Shin Gibxxeti Israaꞌeelata oyqqanawu kaallidosona. Hegaappe denddidaagan, Israaꞌeelati banttana Gibxxeti worana giidi qoppido gishshawu keehi hirggidosona. Eti Muusee eta Zoꞌo Abbaakko kaalettiyogee bala giidi qoppidosona. Shin hegee bala gidenna. Yihooway ba asaa Muuse baggaara yaa kaalettidogan balibeenna. (Kes. 14:2) Guyyeppe, Xoossay eta keehi maalaalissiya ogiyan ashshiis.—Kes. 14:26-28.

⁵ Hegaappe simmin, 40 layttawu Muusee Xoossaa asaa bazzuwan kaalettanawu shaaraa tuussan ubbatoo ammanettiis. a Yihooway Muuse dunkkaaniyappe bollaara tuussay deꞌanaadan oottido wode Israaꞌeelati ubbay hegaa beꞌana danddayoosona. (Kes. 33:7, 9, 10) Shaaraa tuussaa giddoora Yihooway Muusa haasayissiis; yaatin I Yihoowa kaaletuwa asaassi yootiis. (Maz. 99:7) Israaꞌeelati Yihooway banttana Muuse baggaara kaalettiyogaa loytti akeekana danddayoosona.

6. Israaꞌeelati Yihoowa kaaletuwa waati xeellidonaa? (Qoodaabaa 14:2, 10, 11)

⁶ Muusee Yihoowa gishshaa haasayiyogaa bessiya naqaashaa Israaꞌeelati sheneho giidoogee azzanttiyaba. (Qoodaabaa 14:2, 10, 11 nabbaba.) Yihooway Muuse baggaara eta kaalettiyogaa eti darotoo ammanennan ixxidosona. Hegaappe denddidaagan, Hidootaa Biittaa gelennaadan Yihooway eta diggiis.—Qoo. 14:30.

7. Yihoowa kaaletuwa kaalliyogan leemiso gidiyageeta yoota. (Qoodaabaa 14:24) (Misiliyakka xeella.)

⁷ Gidikkonne, amarida Israaꞌeelati Yihoowa kaaletuwa kaallidosona. Leemisuwawu, Yihooway hagaadan giis: ‘Kaaleebi tana polo wozanaappe kaalliis.’ (Qoodaabaa 14:24 nabbaba.) Xoossay Kaaleeba woytiis, ubba qassi Hidootaa Biittan I deꞌanawu koyido sohuwa doori ekkanaadan paqqadiis. (Yaa. 14:12-14) Hidootaa Biittaa gelanaadan paqqadettido Israaꞌeelatikka Yihoowa kaaletuwa kaalliyogan nuussi loꞌꞌo leemiso. Israaꞌeelata kaalettanaadan Muuseppe simmin Yaasu sunttettido wode, eti Yaasa “a de7o laitta ubban bonchchidosona.” (Yaa. 4:14) Hegaa gishshawu, Yihooway I qaalaa gelido biittaa eti gelanaadan oottiyogan eta anjjiis.—Yaa. 21:43, 44.

8. Yihooway kawotu wodiyan ba asaa waati kaalettidaakko qonccissa. (Misiliyakka xeella.)

⁸ Amarida layttaappe simmin, Yihooway ba asaa kaalettanawu daannata sunttiis. Hegaappe guyyiyan, kawoti haariyo wode Yihooway ba asaa kaalettanawu Xoossay erissidobaa yootiyageeta sunttiis. Ammanettida kawoti Xoossay erissidobaa yootiyageetu zoriya siyidosona. Leemisuwawu, Kawuwa Daawiti Xoossay erissidobaa yootiya Naataana seeraa bana ziqqi oottidi ekkiis. (2 Sam. 12:7, 13;  1 Odi. 17:3, 4) Kawuwa Yoosaafixi Xoossay erissidobaa yootiya Yahaaziꞌeeli odido kaaletuwa kaalliis; qassi I Yihudaa asay ‘Xoossay erissidobaa yootiyageetun ammanettanaadan’ minttettiis. (2 Odi. 20:14, 15, 20) Kawuwa Hizqqiyasi unꞌꞌettido wode, Xoossay erissidobaa yootiya Isiyasa maaduwa oychchiis. (Isi. 37:1-6) He kawoti Yihoowa kaaletuwa kaallido wode ubban, I eta anjjiisinne ba asaa naagiis. (2 Odi. 20:29, 30; 32:22) Yihooway ba asaa Xoossay erissidobaa yootiyageetu baggaara kaalettiyogaa ubba asay loytti akeekana koshshees. Shin daro kawotinne Israaꞌeelati Xoossay erissidobaa yootiyageeta siyibookkona.—Erm. 35:12-15.

YIHOOWAY BENI KIRISTTAANETA WAATI KAALETTIDEE?

9. Yihooway beni Kiristtaaneta O baggaara kaalettidee? (Misiliyakka xeella.)

⁹ Koyro xeetu layttan Yihooway Kiristtaane galchchaa essiis. He Kiristtaaneta kaalettanawu I waatidee? Galchchawu huuphe gidanaadan I Yesuusa sunttiis. (Efi. 5:23) Shin Yesuusi bana kaalliyageeti oottanabaa etawu huuphiyan huuphiyan yootibeenna. Yerusalaamen deꞌiya aawatettay deꞌiyo kiitettidaageetunne cimatu baggaara yootiis. (Oos. 15:1, 2) Qassi galchchaa heemmanaadan I cimata sunttiis.—1 Tas. 5:12; Tii. 1:5.

10. (a) Beni Kiristtaaneti banttassi imettida kaaletuwa waatidonaa? (Oosuwaa 15:30, 31) (b) Amaridaageeti Yihooway eta kaalettanawu sunttidoogeeta siyennan ixxidoy aybissee? (“ Amaridaageeti Yihooway Ba Asaa Kaalettanawu Goꞌettiyogeeta Sheneho Giidoy Aybissee?” giya saaxiniya xeella.)

¹⁰ Beni Kiristtaaneti kiitettidaageeti yootido kaaletuwa kaallidonaa? Etappe daroti imettida kaaletuwa ufayssan kaallidosona. Qassi, eti demmido ‘minttettuwan keehi ufayttidosona.’ (Oosuwaa 15:30, 31 nabbaba.) Shin, Yihooway ba asaa ha wodiyan waati kaalettiiddi deꞌii?

HA WODIYAN YIHOOWAY NUNA WAATI KAALETTII?

11. Yihooway ha wodiyan aawatettay deꞌiyogeeta waati goꞌettidaakko bessiya leemisuwa yoota.

¹¹ Yihooway ba asaa kaalettiyogaa haꞌꞌikka aggibeenna. I Geeshsha Maxaafaa baggaaranne galchchawu huuphe gidida ba Naꞌaa baggaara hegaadan oottees. Xoossay ha wodiyankka asan goꞌettiyogaa bessiya naqaashay deꞌii? Ee. Leemisuwawu, 1870​ppe simmin hanidabaa  qoppa. Charles Tez Raasilinne A laggeti Xoossaa Kawotettay 1914n haariyogaa doommanaagaa akeekidosona. (Dane. 4:25, 26) Geeshsha Maxaafaa hiraagaa pilggidi eti hegaadan kuuyidosona. Eti Geeshsha Maxaafaa pilggiyo wode Yihooway eta kaalettidee? Ee, kaalettiis. Ha alamiyan 1914n hanidabati hegeetikka, Koyro Alamiya Olay, wurssiya harggee, biittaa qaattaynne koshay Xoossaa Kawotettay haariyogaa doommidoogaa bessoosona. (Luq. 21:10, 11) Yihooway suure wozanay deꞌiyo he asati ba asaa maaddanaadan goꞌettidoogee qoncce.

12-13. Naaꞌꞌantto Alamiya Olaa wode sabbakiyonne tamaarissiyo oosuwa aassanawu aawatettay deꞌiyo ishantti ay oottidonaa?

¹² Naaꞌꞌantto Alamiya Olaa wode hanidabaakka qoppa. Waanna biiruwan aawatettay deꞌiyo ishantti Ajjuutaa 17:8 xannaꞌidosona. Naaꞌꞌantto Alamiya Olay, Armmageedoona olay doommanaadan oottennaagaa eti xannaꞌidobaappe akeekidosona. Yaatiyo gishshawu, he olaappe simmin Yihoowa Markkati keehi daro asawu markkattana danddayiyo saro wodee yaanaagaa eti eridosona. Yaaniyo gishshawu, he wode hegee hanennaba milatikkonne kumetta saꞌan sabbakanaadaaninne tamaarissanaadan misoonaaweta loohissanawu aawatettay deꞌiyo ishantti Giiliyade timirtte keettaa essidosona. Olay deꞌishinkka misoonaaweti dumma dumma biittaa kiitettidosona. Hegaa bollikka, sabbakiyogaaninne tamaarissiyogan gooba gidanaadan aassiyageeta ubbaa maaddanawu ammanettida ayllee ubba galchchatun dumma timirtte keettaa b doomissiis. Xoossaa asay sinttappe oottana oosuwawu ha ogetun giigettiis.

¹³ Nuuni kasebaa qoppiyo wode, he waayissiya wodiyan Yihooway ba asaa kaalettidogaa loytti akeekana danddayoos. Naaꞌꞌantto Alamiya Olaappe simmin, Yihoowa asay daro biittatun laꞌatettan sabbakees. Qassi he oosoy kumetta saꞌan oosettiiddi deꞌees.

14. Yihoowa dirijjiteenne ayyaanan sunttettida cimati immiyo kaaletuwan nuuni ammanettana koshshiyoy aybissee? (Ajjuutaa 2:1) (Misiliyakka xeella.)

 ¹⁴ Ha wodiyan Oosuwa Kaalettiya Citaa yarati ubbatoo Kiristtoosa kaaletuwan ammanettoosona. Eti ishanttussi immiyo kaaletoy Yihoowanne Yesuusa qofaa qonccissiya kaaleto gidanaadan koyoosona. Qassi eti woradaa xomoosiyageetu baggaaranne cimatu baggaara galchchatuyyo kaaletuwa immoosona. c Ayyaanan tiyettida cimati ‘Kiristtoosa ushachcha kushiyan’ deꞌoosona; qassi eta xeelliyagan odettidabay galchchaa cima gidida ubbaassikka hanees. (Ajjuutaa 2:1 nabbaba.) Cimati ubbay nagaranchcha gidiyo gishshawu balana danddayiyogee qoncce. Kiitettidaageetuugaadan, Muuseenne Yaasu issi issitoo balabaa oottidosona. (Qoo. 20:12; Yaa. 9:14, 15; Roo. 3:23) Kiristtoosi ammanettida aylliyanne ayyaanan sunttettida cimata loytti kaalettiiddi deꞌees; qassi I ‘wodiya wurssettay gakkanaashin’ ubbatoo hegaadan oottana. (Mat. 28:20) Hegaa gishshawu, aawatettay deꞌiyo he ishanttu baggaara I immiyo kaaletuwan ammanettoos.

UBBATOO YIHOOWA KAALETUWA KAALLIYOGEE ANJJUWA DEMISSEES

15-16. Yihoowa kaaletuwa kaallidaageetuppe nuuni ay tamaariyoo?

¹⁵ Nuuni Yihoowa kaaletuwa ubbatoo kaallikko, haꞌꞌikka anjjuwa demmoos. Leemisuwawu, Andinne Raabena deꞌuwa sima oottanaadan ammanettida ayllee immido zoriya oosuwan peeshshidosona. (Ibr. 13:5.) Hegaappe denddidaagan, eti Yihoowa dirijjitee goꞌettiyo keettata keexxiyogan maaddidosona. Raabena hagaadan gaasu: “Issi issitoo nuuni keehi xuntta keettan deꞌida; yan kattiyo sohoykka baawa. Qassi taani pootuwa denttiyogaa dosiyaba gidikkokka, pootuwa denttanawu taani goꞌettiyo miishshata bayzzana koshshiis. Taani hegaa bayzzido wode yeekkaas. Shin taani agga bayidoban azzaniyogaappe, Abrahaama machchee Saariigaadan Yihoowawu haꞌꞌi oottana danddayiyoban ufayttanawu murttaas.” (Ibr. 11:15) Andinne Raabena hegaadan oottidoogan ayba anjjo demmidonaa? Raabena hagaadan gaasu: “Nuuni nuussi deꞌiya ubbabaa Yihoowawu immiiddi deꞌiyogaa eriyogan keehi ufayttoos. Ta keettaawaynne taani Yihooway nuussi immido oosuwa oottiyo wode ooratta alamiyan deꞌoy ay mala gidanaakko akeekida.” Andikka iigaara issi malabaa yootiis: “Nuussi deꞌiya wodiyanne wolqqa ubban Yihoowawu oottido gishshawu ufayttoos.”

¹⁶ Nuuni Yihoowa kaaletuwa ubbatoo kaallikko demmiyo hara anjjoy aybee? Leemisuwawu,  Marsaya naaꞌꞌantto xekkaa timirttiya wurssa simmada, aqinye gidanaadan imettida zoriya oosuwan peeshshanawu keehi koyaasu. (Mat. 6:33; Roo. 12:11) A hagaadan gaasu: “Taani miishsha qanxxennan yuniversttiyan oyddu layttawu tamaaranaadan shoobettaas. Shin taani Yihoowawu loytta oottanawu koyaas. Hegaa gishshawu yuniversttiya geliyogaappe taani aqinye gidada haggaazanawu gidiya miishshaa demmanaadan maaddiyabaa tamaaranawu kuuyaas. Hagee taani kuuyido keehi loꞌꞌo kuushshatuppe issuwa. Taani haꞌꞌi aqinye gidada ufayssan haggaazays; qassi ta oosuwa hanotay taani Beeteelen haggaazanaadaaninne Yihoowawu hara daro ogetun oottanaadan maaddiis.”

17. Ubbatoo Yihoowa kaaletuwa kaalliyogee hara ay anjjota demissii? (Isiyaasa 48:17, 18)

¹⁷ Yihoowa dirijjitee qohiyabaappe nuna naagiya zoriya nuussi immiyo wodeti deꞌoosona. Leemisuwawu, miishshaa siiquwappenne Xoossaa Higgiya kanttanaadan oottiyabaappe naagettanaadan nuuyyo zoree imettees. He allaalletun Yihoowa kaaletuwa kaalliyogee nuussi anjjuwa demissees. Nuussi geeshsha kahay deꞌeesinne daro metuwappe attoos. (1 Xim. 6:9, 10) Hegaappe denddidaagan, nuuni kumetta wozanaappe Yihoowawu goynnana danddayoos; hegee nuuni keehi ufayttanaadaaninne woppu gaanaadan oottees.—Isiyaasa 48:17, 18 nabbaba.

18. Neeni ubbatoo Yihoowa kaaletuwa kaallanawu murttidoy aybissee?

¹⁸ Gita waayiya wodenne Shaꞌu Layttaa Haaruwa wode Yihooway kaaletuwa immanawu asan goꞌettiyogaa aggennaagee qoncce. (Maz. 45:16) Ubbatoo kaaletuwa kaalliyogee nuuni koyiyobaa diggiyo wodekka hegaa kaalliyoo? Haꞌꞌi Yihoowa kaaletuwa kaallikko yaatiyogee metenna. Yaaniyo gishshawu, nuna heemmanaadan sunttettida attumaageeti immiyo kaaletuwa gujjin, Yihoowa kaaletuwa ubbatoo kaalliyageeta gidoos. (Isi. 32:1, 2; Ibr. 13:17) Nuna Kaalettiya Yihoowa, ammanettidi kaallana danddayoos; ayssi giikko, aara dabbotido dabbotaa moorana danddayiya aybippenne I nuna naagees; qassi ooratta alamiyan demmana merinaa deꞌuwawu kaalettees.