DARO asay ha wodiyan haratuppe aaruwan bonchchettananne dumma maataa demmana bessiyabadan qoppiyogaa akeekadii? Eti darobaa demmikkokka, hegaappe aarobay banttawu bessiyabadan qoppoosona. Hegaadan qoppiya asati bantta xallaa siiqiyageetanne banttassi deꞌiyabawu galatennaageeta. Geeshsha Maxaafay asaa eeshshay wurssettaa gallassatun hegaadan gidanaagaa yootees.—2 Xim. 3:2.

Ba xallaa siiqiyogee beniisappe deꞌiyaba. Leemisuwawu, Addaamenne Hewana loꞌꞌobaanne iitabaa banttawu kuuyanawu koyidosona; qassi eti kuuyidobaappe denddidaagan nuuni ubbay waayettoos. Daro xeetu layttaappe simmin, Yihudaa Kawoy Ooziyani Xoossaa garuwan ixaanaa cuwayana bessiyabadan qoppiis; shin hegee gita bala. (2 Odi. 26:18, 19) Hegaadankka, Parisaawetinne Saaduqaaweti Abrahaama zeretta gidiyo gishsha xallawu Xoossay eta haratuppe aaruwan bonchchana bessiyabadan qoppidosona.—Mat. 3:9.

Ha alamiyan daro asay ba xallaa siiqeesinne haratuppe aadhdhiyabadan qoppees; qassi nuunikka etaagaadan hananawu paacettana danddayoos. (Gal. 5:26) Nuuyyo dumma maatay woy bonchchoy bessiyabadan qoppiyogaa doommana danddayoos. He asatuugaadan qoppenna mala nuna aybi maaddana danddayii? Hegaa xeelliyagan Yihoowa qofay aybakko nuuni akeekana koshshees. Geeshsha Maxaafay yootiyo naaꞌꞌu maarati nuna maaddana.

Nuuyyo bessiyabaa kuuyiyay Yihoowa. Amarida leemisota beꞌa.

•   Machchiya ba azinaa bonchchanaadan, qassi azinay ba machchiyo siiqanaadan Yihooway koyees. (Efi. 5:33) Azinaynne machchiya issoy issuwawu dumma siiquwa bessana koshshees. (1 Qor. 7:3) Naati banttana yelidaageetussi azazettana bessees; qassi yelidaageeti bantta naatussi koshshiyabaa kunttananne eta siiqana bessees.—2 Qor. 12:14; Efi. 6:2.

• Galchchan deꞌiya cimati minnidi oottiyo gishshawu nuuni eta bonchchana bessiyogaa Yihooway yootiis. (1 Tas. 5:12) Shin bantta ishanttanne michchontta haariyo maati cimatuyyo baawa.—1 PHe. 5:2, 3.

• Qaraxaa ekkanaadaaninne bantta haariyo asatun bonchchettanaadan Xoossay asa kawotettatussi maataa immiis.—Roo. 13:1, 6, 7.

Nuuyyo bessiyagaappe aarobaa Yihooway siiquwan immees. Nuuni nagaranchcha gidiyo gishshawu nuussi bessiyay hayqo. (Roo. 6:23) Shin Yihooway ba aggenna siiquwappe denddidaagan daro anjjota nuussi immees. (Maz. 103:10, 11) Laggetiyabi baynna A kehatettaappe denddidaagan nuuni daro anjjota demmida.—Roo. 12:6-8; Efi. 2:8.

Ha alamiya asaagaadan qoppennaadan naagetta. Akeekennan deꞌiiddi nuuni haratuppe aadhdhiyabadan qoppiyogaa doommana danddayoos. Nuuni metootennan hegaadan qoppana danddayiyogaa Yesuusi qonccissanawu issi issi dinaaree qanxxettido oosanchchatu leemisuwa yootiis. Amaridaageeti guuran doommidi gallassa kumettaa away suullishin oottidosona; harati qassi mexi issi saate oottidosona. Koyro asati bantta oottidobawu daro miishshay qanxxettana bessiyabadan qoppidosona. (Mat. 20:1-16) Yesuusi he leemisuwa yootiyogan, bana kaalliyageeti Xoossay kehidi etawu immidoban eti ufayttana bessiyogaa qonccissiis.

Galatiyagaa gida, qassi neessi koshshiyabaa haratuppe naagoppa. (1 Tas. 5:18) Phawuloosa leemisuwa kaalla; Qoronttoosan deꞌiya ishantti ayyo koshshiyabaa kunttanaadan oychchiyo maatay awu deꞌikkokka I oychchibeenna. (1 Qor. 9:11-14) Nuuni asay nuuyyo immido ubbabawu galatiyageetanne nuussi koshshiyabaa haratuppe naagennaageeta gidana bessees.

 Nena ziqqi oottiyagaa gida. Issi uri babaa bessiyagaappe aaruwan qoppikko, darotoo haratuppe aadhdhiyabadan qoppiyogaa doommees. Bana ziqqi oottiyogee hegaa mala iita qofawu xale.

Xoossay erissidobaa yootiya Daaneeli bana ziqqi oottiyogan nuussi loꞌꞌo leemiso. I bonchchettida keettan dicciis, malanchcha, eranchchanne daro hiillati deꞌiyo asa. Hegaa gishshawu dumma bonchchoynne maatay baayyo bessiyabadan I qoppana danddayees. (Dane. 1:3, 4, 19, 20) Shin Daaneeli bana ziqqi oottiyagaa gidiyo gishshawu, Yihooway A keehi siiqiis.—Dane. 2:30; 10:11, 12.

Ha wodiyan deꞌiya darotuugaadan, nu xallaa siiqidi haratuppe aadhdhiyabadan qoppenna mala nuuni naagettoos. Qassi Yihooway laggetiyabi baynna ba kehatettan immiyo anjjotun ubbatoo ufayttiyageeta gidoos.